Luuka 19

Zakaayi miyaka Yisu hu nzo a nde

1Yisu akoti mu musyenge a Yeriko na ataangili nde. 2Huuna hwaba na bahala limosi la nduhi a Zakaayi. Nde aba mukuutu bakambi ba limandu na nde aba isina. 3Nde akasaha umono Yisu, ka nde a hakatwala ve mu toni a konge a baatu. Zakaayi aba mukusi. 4Nde ayeni tiinu hu busu, na avati hu yulu muti wa sikomore mana nde amono Yisu wu akavyohele ŋana.

5Bu Yisu hatoodi ŋa mbuha moyina, nde asuuli miisu na aleeli nde: «Zakaayi, sutaha mawasa! Loloyi me apfwana uba hu nzo a we.» 6Zakaayi asutihi mu mawasa na ayaki nde na kinya yoosi. 7Baatu bamono buuna, boosi baakaŋono na baakaleele: «Muutu mowunuwu miyabala mupaaku huli wu asumaha.» 8Ka Zakaayi, mutele, ŋa busu bwa Pfumu, ni uleele nde: «Pfumu! Me tsapa ibadi hi busina bwa me huli biyaha. Tso me apolo mbongo yi ndahi huli muutu ŋa me akakamba limandu, me tsapfutala nde byetso bina ŋa yulu a bi me apoli.» 9Yisu aleeli nde: «Loloyi Nzambi miiyobolo baatu babali mu nzo moyi, mu toni ati muutu mowunuwu ka li wu imbisa hya Abrahami. 10Eye, Mwana a muutu aya mu usaha na uyobolo ba baadimbala.»

Sahu li bikuuku bya wolo

Mataayi 25.14-30

11Yisu abweta sahu likima huli ba baabeedi baamiiyuha mambu momaana. Nde aba bebele na musyenge a Yeruselemi. Nde hatiidi sahu moliina, mu toni ati baatu baakatsima ti Ipfumu hya Nzambi a hyakibwetamba mu umonehele ve. 12Yisu ni uleele: «Bahala limosi la nzo bapfumu, layeni hu tsi a lala hu uyabaha bupfumu. Ka Humbisa nde akiyafutaha. 13Teehele nde mu uyene, ateeli kuumi ŋa hati li basalili ba nde, na aviidi pasi nde ikuuku hya wolo imosi hya talu yindahi. Nde aleeli bo: “Saani mumbungu, nate bu me unzapfutaha.” 14Ka baatu ba bula bwa nde baaba baabelele nde. Bo baatsindihi konge bilumbi ŋa mbisa a nde mu uyaleele: “Bisu a litondi ti nde aba pfumu a bisu ve.” 15Baabyalisi nde bupfumu. Bu nde hayafutaha, nde hatsihi basalili ba nde, ba nde havidi mbongo, mu uyaba ki kaluha bo baabahi. 16Wu a tsomi ayamonehele na aleeli: “Pfumu, ikuuku hi we ava me hyabuta bikuuku kuumi.” 17Pfumu aleeli nde: “We siidi bubwe. We musalili wu mubwe, mu toni ati we mi mwese imbuli mu mwa bisiha bya hole. Me piidi we lituma li misyenge kuumi.” 18Wu a boole ayidi na aleeli: “Pfumu, ikuuku hi we ava me hyabuta bikuuku bitaanu.” 19Pfumu aleeli huli nde wu: “We kaka, me miipa we lituma li misyenge mitaanu.” 20Mukima ayidi na aleeli: “Pfumu, mono ikuuku hya we hya wolo hi me mbeedi atswehe hutso a itini hya tsanda. 21Me tsiidi buuna, bu me mbeedi na boomo bwa we. We li muutu nga likondinakaali, mu toni ati we ubaavolo bi we aveleswehe na we ubaakuukaha bi we avelekuna.” 22Pfumu aleeli nde: “Musalili wu mubi! Me tsa tsundasa we ŋa yulu mukuma a we mwakulu. We ayaba ti me muutu nga likondinakaali, ti me umbaapolo bi me apele tswehe, me umbaakuukaha bi me apele kuna. 23Muhima we avelesuusa mbongo a me hutso a nzo iswehili hya mbongo? Humbisa a pfutihili a me, me kipolo yo na kaluha ŋa yulu.” 24Titswene nde aleeli huli baatu ba nde ba baaba ŋana: “Patulaani nde ikuuku hya nde hya wolo, na vaani hyo huli nga bikuuku kuumi.” 25Bo baaleeli huli nde: “Pfumu, a li buni! Nde ti amiikwabaha bikuuku kuumi.” 26Pfumu akaali: “Me ndeele benu, sa basinzava huli wuna wu abaha. Ka huli wu avelebaha, sa bapatula pa bi nde ali na byo. 27Titswene, behelaani me baboho ba me, ba baavelitondo ti me mba pfumu a bo, na baduba bo, ŋa busu bwa me.”» 28Nde amana utoyo buuna, Yisu avyohi ŋa busu, na nde akumi hu tsyelo musyenge a Yeruselemi.

Yisu miikoto mu musyenge a Yeruselemi

29Ŋa Yisu hayato hupedu a mala ma Betefage na Betanya hu tsyelo Isyelo hya Olive#19.29 Isyelo hya Olive: aba mbuha a ngundu miti mi mibaabuta mbutu a «olive»., nde atsindihi bayihi boole. 30Yisu aleeli bo: «Yenaani hu bula bwa hu busu. Ŋa benu luuto huuna, benu lu umono ibubuuru baakutala. Ibubuuru mohiina kini a hyabiti muutu ve. Nyangulaani hyo na behelaani me hyo. 31Tso muutu fuuli benu: “Mu hima benu lili mu unyangula hyo?” Benu lifutili nde: “Pfumu li na nzala hyo.”»

32Ba baatsindihi bayene, baabiisi we bu Yisu hayabisi. 33Bu bo baakanyangula ibubuuru, banga hyo baaleeli bo: «Mu hima benu lili mu unyangula ibubuuru?» 34Bayihi ba boole bafutili: «Pfumu li na nzala a hyo.» 35Na bo baabitili Yisu ibubuuru. Bo baabwahi biyunga bya bo ŋa yulu iboodi, na baakumbisi Yisu mu uvata ŋa yulu hyo. 36Ŋa nde hakabita ibubuuru, baatu baakayala biyunga bya bo mu nzila.

37Yisu ayato hupedu musyenge a Yeruselemi. Nzila yi nde haba, ni yi yakakulamana isyelo hya Olive. Konge bayihi boosi, hutso a kinya, yakayusa Nzambi mu ndaha yi mifudi, mu toni bipadi bi bo baamoni. 38Bo baakaleele: «Nyaha Pfumu Nzambi asyeme pfumu a bisu wuli mu uya mu nduhi a nde! Hyenze ŋa toto, na muyusu huli Nzambi hu hati mayulu.» 39Mwana kabu li Bafarisi, ŋa hati la konge baaleeli Yisu: «Mulongisi, liha bayihi ba we kele.» 40Na Yisu afutili bo: «Me ndeele benu, tso bo badibuhi minywa, mamanya sa masa muyali!»

Yisu alili mu toni a bisu Yeruselemi

41Bu Yisu hakayasusaha hupedu musyenge, nde atalila Yeruselemi, abwi mu ulila mu toni a nde. 42Nde aleeli: «Tso we kaka beedi ayaba buni we usoolo hyenze loloyi! Ka mu tangu moyi, hyo hyasweme ŋa miisu ma we. 43Bilumbu sa biya, bambeene ba we sa bayadiinga we na utelemese bikahu mu manzila ma we. Bo bu uvinyala na uswekemese we matsyelo moosi. 44Bo sa banyihula we woosi, we na bisu bula boosi. Bo a busiisa ŋa hati la we, manya ŋa yulu a manya ve. Mu toni ati, we a hatsikaha tangu yi Nzambi hu uyakumbasa we ve.»

Yisu abingi banga mumbungu ba baaba mu litandala la nzo a Nzambi

Mataayi 21.12-17; Malako 11.15-19; Yowani 12.13-22

45Yisu akoti mu litandala la nzo a Nzambi, na nde abwi mu ubinga banga mumbungu. 46Nde aleeli bo: «Mambu ma Ngidi mali mu uleele bu: “Nzo a me yili nzo lisambulu.” Ka benu laamiikitusa yo iswemili hya biibi#Esa 56.7; Yel 7.11.»

47Yisu akabaalongese bilumbu byosi mu litandala la nzo a Nzambi. Bakuutu ba banganga ba Nzambi, balongisi ba mikele na bakuutu ba bibandu, baakasaha uduba nde. 48Ka bo a baabahi nzila ve, mu toni ati baatu baakasilasa ma nde hakaleele na isuusi hyosi.

Currently Selected:

Luuka 19: TSA

Highlight

Copy