Rut 4
4
Cu dzo'ocol u beel Booz yéetel x Rut
1Láili' ti' le kiino', Booze' j bin cutal tu jool le caajo', tu cúuchil tu'ux cu much'icuba'ob le máaco'obo'. Ti' le súutuco' táan ca'ach u ch'aacat te'elo' u nadza'an láaktzil Elimelec, ti'olal máax t'aanaj ca'ach Booz. Booze' tu ya'alaj ti': U'uye, co'oten waye', culen. Leti' túune' j náadze' ca j culaji'. 2Tu séeblaquil Booze' tu t'anaj diez u nuuquilo'ob le caajo', bey xan tu ya'alaj ti'ob ca culaco'ob yéetel. P'elac dzo'cquic u cutalo'obe', 3Booze' tu ya'alaj ti' u láaktzil: X Noemí, máax j luk Moabe' dzo'oc u suut, táan u conic le lu'um u ti'al ca'ach c láaktzil j Elimelec. 4In káat ca a wojéelte', tumen wa a káat a mane', ca a man bejela'e' tu táan le aj jaajcunajo'oba', leti'obe' u nuuquilo'ob le caaja'. Tu yo'olal teech le láakdzil asab naadz ti' Elimeleque', teech u najmal a manic le lu'umo'. Ba'ale' wa ma' ta manique', a'al ti' teen, tumen cu dzo'ocol teche' teen u najmal in manic. Le láaktzilo' tu núucaj: Quin manic.
5Booz túune' tu ya'alaj: Jach ma'alob, ba'ale' wa ca manic le lu'um ti' x Noemio', u najmal xan u dzo'ocol a beel tu yéetel x Rut, le x quimen íicham moabitao', u ti'al beyo' le lu'umo' ca p'áatac tu kaaba' le quimeno'.
6Le ca tu yu'ubaj le t'aana', le j láaktzilo' tu núucaj: Wa beyo' ma' tu páajtal in manic, tumen ma' tu páajtal in p'atic ti' in paalal u ti'alinto'ob. Ba'ale' wa a káate' man teech, quin dzáic ti' teech tuláacal u páajtalil a manic.
7Ti' le kiino'obo' suucchaja'an tu caajil Israel, Wa máax cu p'atic u páajtalil ti' u láak u láaktzil, wa cu kax t'antic u t'aanil u conic wa ba'axe', le j coonolo' cu lukesic jun p'éel u xanabe', cu dzáic ti' le máax cu maano'. Bey túuno', je'el bix suucchaja'anile', 8u láaktzil Booze' tu lukesaj u xanabe', ca tu dzaj ti' j Booz ca tu ya'alaj ti': Man teech.
9Booz túune' tu ya'alaj ti' u nuuquilo'ob yéetel ti' tuláacal le yano'ob te'elo': Tuláacale'exe' ca jaajcuntique'ex teen manic ti' x Noemí le lu'umo'ob u ti'alo'ob ca'ach Elimelec, Quelión yéetel Mahlón. 10Bey xan ca jaajcuntiquexe', quin ch'a'ic in watant Rut, le x quimen íicham x moabilo', u ti'al ca p'áatac le ba'alo'obo' tu kaaba' Mahlón, u j quimen íicham. Beyo' u kaaba' Mahlone' ma' bíin sa'atac ichil u láaktzilo'ob, mix bíin tu'ubsa'ac ichil le caaja'. Bejela'e' te'exe' ca jaajcuntique'ex.
11Le u nuuquilo'ob le caaj yéetel tuláacal le máaxo'ob yano'ob te'elo' tu núucajo'ob: Bey, to'one' aj jaajcunajo'on. ¡Yuumtzil ca u beet u beytal a watan je'el bix x Raquel yéetel x Lea, ti' le máaxo'ob u taalbal tuláacal le j israelitaob! teech xane' ca jach sen nojochac a tzicbe'enil Efrata, ca kuchuc a beeta'abáa jun túul nojoch máac tu caajil Belen. 12Yuumtzil ca u beet u ya'abtal a paalal yéetel le co'olela', ca ya'abchajac a láaktzililo'ob je'el bix yanji' ti' Fares, u paal Tamar yéetel Judá.
13Bey túun dzo'oquic u beel Booz yéetel x Rut ca tu nupajubáa ti'. Yuumtzile' tu beetaj ca p'áatac x yo'om yéetel ca yanac u paal.
14Le co'olelo'ob túuno' tu ya'alico'ob ti' x Noemí: ¡Qui'iqui' t'anta'ac Yuumtzil, Dzo'oc u dzáic ti' teech jun túul a wáabil u ti'al u canan teech! ¡Quexi' ca nojoch ba'alac a wáabil tu caajil Israele'! 15Leti' bíin u dzáa ti' teech líik óolal yéetel xan u yáantiquech ti' a ch'ija'anil, tumen u paal a wilib, le máax u sen yaabiltmajech, a ti'ale' jach co'oj u tojol asab ti' ya'abcach paalal.
16X Noemí túune' tu ch'a'aj u tzéent le chan paalo'. 17Le ca j ila'ab tumen u yéet caajalo'obe' táan u ya'alico'ob: ¡Dzo'oc u paalintic jun túul paal x Noemí! ca j dzaab u kaaba'int Obed. Obede' u taata Isaí yéetel u ca'a yuum David.
U máanja'an ch'i'ibalo'ob David
18Lelo'oba' u ch'i'ibalo'ob Fares: Fares u taata Hezrón, 19Hezrón u taata ca'ach Ram, Rame' u taata ca'ach Aminadab, 20Aminadabe' u taata ca'ach Naasón, Naasone' u taata ca'ach Salmón, 21Salmone' u taata ca'ach Booz, Booze' u taata ca'ach Obed, 22Obed u taata ca'ach Isaí, Isaie' u taata ca'ach David.
Currently Selected:
Rut 4: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
