Miqueas 6
6
Kue' cu ya'alic u nu'uc ti' Israel
1Bejela'e' u'uye'ex ba'ax cu ya'alic Yuumtzil:
¡Líiken a wa'al ti' le pu'uco'ob ba'ax cu yúuchul ti' teech,
u ti'al ca u'uya'ac tumen le jo'ol lu'umo'ob ba'ax ca wa'alico'!
2Pu'uque'ex ch'en xiquinte'ex, bey xan te'ex u chuno'ob u pakilo'ob lu'um;
Yuumtzile' bin u ca'aj u tacpoolt u caajal,
bin u ca'aj j ba'atel t'aan yéetel Israel.
3Bey u ya'alic Yuumtzila':
In caajal núuct le ba'ax quin káat chi'itic techa',
¿ba'ax tin beetaj u ti'al ca kuuxilnaquech?
4Tene' tin jóokesajech Egipto le ca tocajech ti' palitzilil;
teen tin túuxtajo'ob ti' teech, Moises Aarón yéetel María,
u ti'al ca u nu'ucto'ob a beel
5In caajal, bejela'e' ka'ajac ti' teech ba'ax tu jokjo'oltaj Balac u ajawil Moab,
bey xan ba'ax núuca'ab ti' tumen Balaam u paal Beor.
Ka'ajac ti' teech bix úuchic a ch'actic Sitim yéetel Gilgal,
ila'a jaaj xan u dzáanche'etaj Yuumtzil.
Ba'ax cu káatic Yuumtzil ti' wíinic
6¿Ba'ax yéetel nib óolalil bíin xi'iquen
in kult Yuumtzil, u Kuil le ca'analo'obo'?
¿Bíin wa xi'iquen tu táan yéetel mejen ja'aben wacaxo'ob,
u ti'al ca in kub ti' u ti'al j tóocbil?
7¿Bíin wa qui'imacchajac u yóol Yuumtzil wa ca in kub mil j tamano'ob ti'
wa diez mil u yáalal aceite?
¿Cux wa ca in kub in yáax paal u ti'al
in bo'otic u dzu'uy in wóol yéetel in keban?
8Wíinic Yuumtzile' dzo'oc u ya'alic ti' teech ba'ax utz
ba'ax utzil xan u káat ca beete:
beet ba'ax tu no'oja'an, yéetel ca yanac a chuca'an óolal
yéetel ca wu'uyaj t'ant Ku yéetel cabal óolal.
9Yuumtzile' táan u t'anic le caajo',
utzil ba'al u yu'uba'al yéetel tzicbe'enil:
Caaj, u'uye'ex bey xan te'ex j tzol xiquine'ex.
10Tu yotoch j loolob máaque' yaan ocoltbil ayikalilo'obi',
le ma' ti'ibil p'iso'obo' in p'ectmajo'ob.
11¿Bix bíin in sa'ates u si'ipil máax cu meyaj
tu yéetel u nu'ucul p'iiso'ob u péecsmaj, ma' ti'ibil u p'iiso'obi'?
12Tuláacalo'ob u aj ayikalilo'ob le caaja' aj yedz wíinico'ob;
tuláacal u cajnáalilo'obe', aj tuuso'ob yéetel aj táabsajo'ob.
13Le t o'olal bin in ca'a in jadzech;
bin in ca'aj in sutech x lab caajil tu yo'olal a kebano'ob.
14Bíin janalquech, ba'ale' ma' bíin na'ajaquechi',
bíin xi'ic u bin a mukyajtic wi'ij;
bíin a mol u yich a meeyaj ba'ale' mix jun p'íit bíin p'áatac techi',
wa ca p'áatac ti' teech jun p'íite' bíin in beet u kascunta'al ich ba'atel.
15Bíin pakalnaquech, ba'ale' ma' bíin joochnaquechi';
bíin a juch' aceitunas ba'ale' ma' bíin a jaant u aceiteili';
bíin a yedz uvaob, ba'ale' ma' bíin a wuk u vinoili'.
16Tumen teche' xi'ic u bin a beetic ba'axo'ob cu ya'alic
yéetel ba'axo'ob cu beetic Omri yéetel u yotochnáalo'ob Acab,
bey xan táan quetic ba'axo'ob cu beetico'ob.
Le t o'olale', teech yéetel a cajnáalilo'obe'
bíin in beet ti' teech yéetel ti' cajnáalilo'ob
ca ila'aque'ex táaj kaasil yéetel ca p'a'asta'aque'ex
u subtzilil in caajale' bíin taalac ta wóokol.
Currently Selected:
Miqueas 6: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
