Miqueas 2
2
U páajtalil le máaxo'ob cu yedzico'ob óotzilo'ob
1¡Yaj yanil le máaxo'ob quex ichil u wenelo'obe'
bin u bin u jok jo'oltico'ob loobo'ob,
cu dzo'ocole' chéen p'el u sáastale' cu béeycuntico'ob,
tumen tu kabo'ob yaan le páajtalilo'!
2Le quéen u dzíibolto'ob jun p'éel lu'ume' cu ch'a'ico'ob;
le quéen u dzíibolto'ob najo'obe' cu yocoltico'ob.
Cu yedzico'ob wíinico'ob, u yotochnáalo'ob bey xan u lu'umo'ob.
3Le t o'olal Yuumtzile' cu ya'alic:
Tene' xane' in tucultmaj ba'ax bíin in beet ti' te'ex.
Bin in ca'aj in túuxt ta wóokole'ex jun p'éel yaj óolal
ti' ba'ax ma' bíin páatac a jechique'ex mix a poole'exi',
ma' bíin xíimbalnaque'ex yéetel x ca'anal ichili'
tumen bíin u kiininto'ob noj yajilo'ob.
4Ti' le kiino' bíin ka'ayac ti' te'ex u kaayilo'ob áacam okol.
Bíin a'alac ti' te'ex:
Dzo'oc u láaj xu'ulsa'al; c caajale', Yuumtzil u yuumile',
dzo'oc u kéexel u yuumil, mina'an máax wet'ic;
c kaaxo'obe' dzo'oc u t'oxláanta'al ichil le máaxo'ob jáanpayt ti' to'ono'.
5Le t o'olal te'exe' ma' bíin yanac ti' te'ex ba'al a ti'ale'ex ichil u caajal Yuumtzili'.
Loolob aj bóobato'ob
6Cu ya'alico'ob: ¡Ma' a taale'ex yéetel bóobatilo'ob!
¡Le noj yajo' ma' bíin páatac u chucpachtico'oni'!
7¿Loolob t'anta'an wa u caajil Jacobe'?
¿Kue' dzo'oc wa u náacal u yóol? ¿Bey wa suuc u beetic Yuumtzilo'?
¿Ma' wa tu beetic utz u t'aan Yuumtzil ti' máax toj u cuxtal?
8Te'exe' dzo'oc a líikesique'ex a kabe'ex tu yóokol in caajal.
Ca toquique'ex le co'ocoj nooko'ob ti' le máaxo'ob
dzo'oc u suuto'ob ti' le ba'atelo'obo'
tumen ca tucultique'ex dzo'oc a jechique'ex le loobo'.
9U co'olelilo'ob in caajale' tu xáacch'intaje'exo'ob tu yaabilaj otocho'ob
u mejen paalalo'obe' lukesico'ob ti'ob jun puli'
le tziic dzo'oc in dzáic ti'obo'.
10Líikene'ex, xíimbalnene'ex, tumen lela' ma' u cúuchil je'eleli';
tu yo'olal ya'ab kasa'anil yaan ichilo',
dzo'oc u kastal mina'an utz p'aatal ti'.
11Wa yaan máax cu patic tu pool tuuso'ob cu dzo'ocole' cu ya'alic:
Tene' quin ka'aytic vino yéetel ukul cu cáalcunaj,
le aj bóobat beyo' utz tu t'aan le caajo'.
Kue' cu séeb chi'itic u toquic u caajal
12Bin in ca'aj in láaj much'quint u caajil Jacob;
bin in ca'aj in mol le jun p'íit u yalab Israel.
Bíin in much'quinto'ob bey u múuch'ul j tamano'obe',
bey jun múuch' j tamano'ob tu'ux yaan xíiw u jaanto'obe',
bíin jumnaco'ob bey sen ya'abo'obe'.
13Bíin xi'ic je'ebel u beelo'ob tumen Ku,
leti'obe' xane' bíin xi'ico'ob tu paach
u ti'al u jóokbalo'ob tu jool le caajo'.
Yuumtzil u ajawilo'obe', bíin xi'ic táanil ti' tuláacalo'ob.
Currently Selected:
Miqueas 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
