Malaquías 3
3
1Yuumtzil u yuumil tuláacal páajtalile' cu ya'alic: Bin in ca'aj in túuxt in aj bisaj t'aan u ti'al u nu'ucbes le bej ti' teno'. Yuumtzil le máax ca caxantique'exo', séeba'an bíin ococ ichil kulnaj. ¡Táan u kuchul u aj bisaj t'aanil le nup t'aan ca dzíiboltique'exo'!
2Ba'ale' ¿máax je'el u páajtal u mukyatic u kiinil u taalbale'? ¿Máax túun je'el u páajtal u p'áatal wa'alacbale'? Bíin kuchuc je'el bix u kuchul káak u ti'al u yutzquint c anile'; bey jojolqui ja' cu lukesic c boonolile'. 3Yuumtzile' bíin culac u yutzquint u yanil le aj kiino'ob u ch'i'ibalo'ob Leví, je'el bix u máayta'al oro yéetel plata ich káake'. Cu dzo'ocole' leti'obe' je'el u páajtal u táanbesico'ob u ti'ibil óolo'ob ti' Yuumtzil je'el bix u najmal u beetico'obo'. 4Yuumtzil túune' bíin qui'imacchajac u yóol tu yo'olal u ti'ibil óolal Judá yéetel Jerusalén, je'el bix u qui'imacchajal u yóol úuch ca'ache'.
5Yuumtzil u yuumil tuláacal páajtalile', cu ya'alic: Bíin taalaquen in p'is óolte'ex. Bíin xan in beet in aj tacpoolil ti' le máaxo'ob cu beetico'ob pulya'ajo', le cu nup kebantalo'obo', le ma' jaaj u séeb chi'obo', le máaxo'ob cu yedzico'ob u aj meyajo'obo', le máaxo'ob cu yedzico'ob x quimen íichamo'ob bey xan le j ma' taataobo', le máaxo'ob loolob t'antic le j táanxel lu'umilo'obo' yéetel le máaxo'ob ma' tu tziquiqueno'obo'.
Diezmo'ob yéetel ti'ibil óolo'ob
6Teen Yuumtzil. Ma' kexpajaqueni'. Le t o'olal ma' xu'ulsa'aque'exi' u ch'i'ibale'ex Jacob. 7Te'exe' dzo'oc a náachcunticaba'ex ti' in wa'almaj t'aano'ob, je'el bix tu beetajilo'ob a máanja'an ch'i'ibale'exe', ma' a wóolte'ex a wu'uyaj t'ante'exo'obi'. Teen Yuumtzil u Yuumil tuláacal páajtalile' quin wa'alic: ¡Suunaque'ex ti' teen, teen xane' bíin suunaquen ti' te'ex! Ba'ale' te'exe' ca wa'alique'ex: ¿Ba'ax o'olal bíin suunaco'on ti' teech? 8Tene' quin káat chi'itic: ¿Je'el wa u yocolta'al Ku tumen jun túul wíinique'? ¡Te'exe' dzo'oc a wocoltiquene'ex! Quex beyo' ca káat chi'itique'ex: ¿Ba'ax ti' c ocoltiquech? ¡Ti' diezmos yéetel ti' ti'ibil óolalo'ob dzo'oc a wocoltiquene'ex! 9Bey, tuláacal le caajo'ob, tuláacale'ex táan a wocoltiquene'ex, let o'olal bin in ca'aj in loolob t'ante'ex. Teen Yuumtzil u yuumil tuláacal páajtalile' quin wa'alic ti' te'ex: 10Taase'ex a diezmoex tu cúuchil tu'ux cu dza'abal u taakin kulnaj, u ti'al ca yanac ba'ax janalta'al tin wotoch. Beete'ex u ti'al ca a wile'ex wa ma' tin je'ic u calom kiinilo'ob ca'an u ti'al in láalic ta wóokole'ex asab ya'ab ayikalil. 11Ma' bíin in p'at u kuchul ikelo'ob u kascunto'ob a joche'ex mix u yich a pakal uvaexi'. 12Tuláacal múuch' caajo'ob bíin u ya'alo'ob qui' a wóole'ex tumen te'exe' bíin yanac te'ex jun p'éel lu'um sen qui'ichquelem. Teen Yuumtzil u yuumil tuláacal páajtalil, teen j a'ale.
U ch'a'a óotzilil Ku ti' u caajal
13Yuumtzile' cu ya'alic: Te'exe' dzo'oc a kaakas t'antiquene'ex. Quex beyo' ca káat chi'itique'ex: ¿Ba'ax kaasil dzo'oc c a'alic ti' teech? 14Je'el ba'ax dzo'oc a wa'alique'exa': Chéen cunel u meyajta'al Ku. ¿Ba'ax utzil bíin c kame'ex u ti'al u bo'olil ba'ax cu ya'alic, tu yo'olal c máan búuquintmaj u nookil okom óolal tu táan Yuumtzil u yuumil tuláacal páajtalil? 15To'one' dzo'oc c ilic qui' u yóol le j ca'anal icho'obo', le j loolob máaco'ob xano' cu bin utzil ti'ob, cu túuntaj óoltico'ob Ku, cu dzo'ocole' ma' tu kamico'ob mix jun p'éel jaadz.
16(Le máaxo'ob túun tziquic Kuo' j t'aanajo'ob tu baatzilo'ob, Yuumtzile' tu yu'ubaj ma'alob ba'axo'ob cu ya'alico'ob. Tu táan túun Yuumtzile' j dzíibta'ab ti' jun p'éel ju'un tu'ux cu ka'ajsa'al máaxo'ob tziquic yéetel táan óoltic Yuumtzil.)
17Yuumtzil u yuumil tuláacal páajtalile' cu ya'alic: Táan in nu'ucbesic jun p'éel kiin u ti'al in caajaltico'ob tu ca'a téen. Je'el bix le taata cu ch'a'ic óotzilil ti' le paal meyajtique', bey bíin in ch'a'a óotzilil ti'ob. 18Te'ex túune', bíin a kaj óolte'ex u jela'anil máax utz ti' máax kasa'an bey xan máax kultic Yuumtzil ti' máax ma' tu kultic.
Currently Selected:
Malaquías 3: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
