Oseas 1
1
U yatan Oseas yéetel u paalalo'ob
1Lela' leti' le péectzil tu túuxtaj Yuumtzil ti' Oseas, u paal Beeri, tu kiinilo'ob Uzías, Jotam, Acaz yéetel Ezequías, u ajawilo'ob Judá, tu kiinilo'ob xan Jeroboam, u paal Joás, u ajawil Israel.
2Yuumtzile' bey tu chu'unsilac le péectzil u káat ca'ach u túuxt yéetel Oseasa': U lu'umil Israele' dzo'oc u jach kastal úuchic u tzelicubáa ti' teen. Teech xane' xeen a ch'a'a jun túul x cáacbach u ti'al a watante, ca yanac a paalal x yéetel; beyo' leti'obe' bíin paalalta'aco'ob tumen jun túul x cáacbach.
3Oseas túune' tu ch'a'aj x Gomer u ti'al u yatante, u x ch'upul paal Diblaim, leti'e' x yo'omchaj ca tu síijsaj jun túul u paal. 4Yuumtzil túune' tu ya'alaj ti' Oseas: Dzáa u kaaba'int le chan paalo' Jezreel, tumen ichil jun p'íit kiine' bíin in ca'aj in jadz u ch'i'ibalo'ob Ajaw Jehú tu yo'olal le quiimsaj tu beetaj Jezreelo', yéetel bíin in dzáa u xuul ti' u ajawil Israel. 5Ti' le kiino' bíin in xu'uls tu táax lu'umil Jezreel u páajtalil u aj ba'atelo'ob Israel.
6Gomere' yo'omchaj tu ca'a téen ca tu síijsaj jun túul u x ch'upul paal. Yuumtzile' tu ya'alaj ti' Oseas: Dzáa u Kaaba'int le chan paalo' Lo-ruhama tumen tene' ma' bíin suunac in ch'a'a óotzilil ti' u ajawil Israeli'. Ma' bíin in sa'asti'o'obi'. 7Ba'ale' ti' u ajawil Judae' bíin in ch'a'a óotzilili': teen Yuumtzil u Junab Kue', bíin in toque. Ba'ale' ma' bíin in toco'ob yéetel ba'atelil, bíin in toco'ob x ma' p'úunche'il, x ma' máascabil, mix yéetel tzíimino'ob, mix yéetel j nat' tzíimino'obi'.
8Cu dzo'ocol u lukesic u chu'uch Lo-ruhamae', x Gomere' yo'omchaj tu ca'a téen, ca tu síijsaj u láak paal. 9Yuumtzil túune' tu ya'alaj ti' Oseas: Dzáa u kaaba'int Lo-ami ti' le chan paalo', tumen te'ex bejela'e' ma' in caajale'exi' mix teen a Junab Kuene'exi'.
Cu ca'a líiksa'al u caajil Israel
10Bíin kuchuc u kiinile' le j israelitaobo'
bíin béeyaco'ob je'el bix u sa'am lu'umil u jáal ka'anabe',
mix máac bíin páatac u p'isic mix u xoquic.
Ma' bíin a'ala'ac ti'obi':
Te'ex bejela'e' ma' in caajale'exi',
Ba'ale', Kue' bíin u ya'al ti'ob:
Te'exe' u paalale'ex le cuxa'an Kuo'.
11Bíin much'lac túun u cajnáalilo'ob Judá yéetel Israel,
u ti'al u dzáico'ob jun túulili' u nojochilo'ob,
likbal tuláacal tu'uxe' bíin suunaco'ob Jerusalén.
¡Bíin nojoch kiinac u ti'al Jezreel!
Currently Selected:
Oseas 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
