Génesis 46

Jacob yéetel u láaktzilo'obe' j bino'ob Egipto

1Israele' tu dzajubáa j bej yéetel tuláacal ba'ax yaan ti' ca'achi. Le ca j kuch Bersebae', tu kubaj quíimsbil ba'alche'ob ti' u Ku u taata. 2Ti' le áakabo' Kue' j t'aanaj yéetel Israel ichil jun p'éel náay, ca tu t'anaj tu kaaba':

Jacob, Jacob. Leti'e' tu núucaj: Je'elena'.

3Ku túune' tu ya'alaj:

Teen Junab Ku, u Kuen a taata. Ma' a sajactal j bin Egipto, tumen te'elo' bíin in beet ca ya'abac a ch'i'ibal, yaan u kuchul j béeytal jun p'éel nojoch múuch' caaj. 4Yaan in bin ta wéetel Egipto, teen quin in jóokes a ch'i'ilancab te'elo'. Cu dzo'ocol xane' le quéen quíimqueche', josee' ti' cu bin j yantal ta tzéele'.

5Cu dzo'ocole' Jacobe' j jóok Beerseba. U paalal Israele' tu dzajo'ob u taata, u paalalo'ob yéetel u yatano'ob ti' le bolano'ob túuxta'ab ti' tumen faraón u ti'al u bisa'alo'obo'. 6Jacob yéetel tuláacal u láaktzilo'obe' j bino'ob Egipto, tu bisajo'ob u wacaxo'ob, u j tamano'ob yéetel tuláacal le ba'alo'ob yanchaj ti'ob tu lu'umil Canaán. 7Tuláacal u j xibil paalal, u x ch'upul paalal, u j xiibil áabilo'ob yéetel u x ch'upul áabilo'obe' j bino'ob yéetel.

8Lelo'oba' u kaaba'ob le israelitaob j bino'ob Egiptoa'; u káat ya'ale', Jacob yéetel u ch'i'ilancab:

Rubén u j yáax paal Jacob. 9U paalal Rubene': Hanoc, Falú, Hezrón yéetel Carmi.

10U paalal Simeone': Jemuel, Jamín, Ohad, Jaquín Zoar, yéetel Saúl u yaal jun túul co'olel x canaanil.

11U paalal Levie': Gersón, Coat yéetel Merari.

12U paalal Judae': Er, Onán, Sela, Fares yéetel Zara, (Er yéetel Onane' j quíimo'ob tu lu'umil Canaán). U paalal Farese': Ezrón yéetel Hamul.

13U paalal Isacare': Tola, Fúa, Job yéetel Simrón.

14U paalal Zabulone': Sered, Elón yéetel Jahleel.

15Lelo'oba' u paalal Jacob yéetel Lea ca'aliquil ti' caja'ano'ob ca'ach Padan-aram, pa'ate' yéetel Dina u x ch'upul paal. Tu pa'ate'il u ch'i'ibale' treinta yéetel tres, j xiibo'ob tac u x ch'uupilo'ob.

16U paalal Gade': Sifión, Hagui, Esbón, Suni, Eri, Arodi yéetel Areli. 17U paalal Asere': Imna, Isúa, Isúi Bería, yéetel jun túul x yíidzino'ob cu kaaba'intic Sera. U paalal Beriáe': Heber yéetel Malquiel. 18Lelo'oba' u paalal Jacob yéetel Zilpa. Le x palitzil tu síaj Labán ti' Lea u x ch'upul paal, u ch'i'ibale' diez yéetel seis máaco'ob tu pa'ate'il.

19U paalal Jacob yéetel Raquel u yatan: José yéetel Benjamín. 20U paalal José yéetel Asenat: Manasés yéetel Efraín. Lelo'oba' j síijo'ob Egipto. Asenate' u x ch'upul paal Potifera u aj kiinil On. 21U paalal Benjamine': Bela, Bequer, Asbel, Gera, Naamán, Ehi, Ros, Mupim Hupim yéetel Ard. 22Lelo'oba' u ch'i'ibal Jacob yéetel Raquel. Catorce máaco'ob tu pa'ate'il.

23U paal Dane': Husim. 24U paalal Neftalie': Jahzeel, Guni, Jezer yéetel Silem. 25Lelo'oba' u paalal Jacob yéetel Bilha, le x palitzil tu síaj Labán ti' Raquel u x ch'upul paal, u ch'i'ibalo'obe' siete máaco'ob tu pa'ate'il.

26Le máaco'ob j kucho'ob Egipto yéetel Jacob, tuláacalo'ob jach u ki'ikele', sesenta yéetel seis chéen j xiibo'ob, ma' j xo'oc u yatantzilo'ob yéetel u paalalilo'obi'. 27U paalal Josee', ca'a túulo'ob, sijnalo'ob Egipto. Bey túuno' le j kucho'ob Egipto' sesenta máaco'ob láaj u ch'i'ilancab Jacob.

28Jacobe' tu túuxtaj táanil Judá u yil José, u ti'al ca taalac u kam tu lu'umil Gosén. Le ca j kucho'ob Gosene', 29Josee' tu ya'alaj ca nu'ucbesa'ac u bolan u ti'al ca xi'ic u kam u taata. Le ca j kuch tu táan u taatae', tu méekaj, j xaanchaj u yokol tu queléembal. 30Israel túune' ca tu ya'alaj ti' José:

¡Cu dzo'ocol in pactiquech tin wichil láili' cuxa'aneche', tene' je'el u páajtal in quíimile'!

31Josee' tu ya'alaj ti' u sucu'uno'ob yéetel ti' u láaktzilo'ob u taata:

Bin in ca'aj in wil Faraón, ca in dzáa le péectzila': In sucu'uno'ob, u láaktzilo'ob in taata, máaxo'ob cajacbalo'ob ca'ach canaane', dzo'oc u taalo'ob u ti'al ca p'áataco'ob tin wéetel; 32tu taasajo'ob u j tamano'ob, u wacaxo'ob yéetel tuláacal ba'ax yaan ti'ob, tumen u meyajo'obe' j canan j taman yéetel tzéen wacax. 33Le túun quéen u t'ane'ex le faraón yéetel le quéen u káat te'ex ba'ax meyajil ca beetique'exe', 34te'exe' a'ale'ex ti'e'; j canan j taman suuc c beetic, je'el bix c máanja'an ch'i'ibalo'obe'. Bey túuno' je'el u páajtal a p'áatale'ex cajtal tu lu'umil Gosene', tumen le j egipciobo' u wet'majo'ob u yúuchul múul cajtal yéetel aj canan j tamano'ob.

Currently Selected:

Génesis 46: MAYABI

Highlight

Copy