Génesis 43

Cu bisa'al Benjamín Egipto

1Le wi'ijo' j máan tip'a'anchaj ti' tuláacal le múuch' caajo'obo' 2cu dzo'ocol u láaj jaantic Jacob yéetel u paalal le trigo tu taasajo'ob tu lu'umil Egiptoe', Jacobe' tu ya'alaj ti'ob:

Xeene'ex tu ca'a téen a mane'ex jun p'íit trigo u ti'al c jaante.

3Ba'ale' judae' tu núucaj ti':

Le máaco' jach tu ya'alaj to'on: Wa ma' ta taasique'ex u j tuup'il a wíidzine'ex waye', mix a chéen taale'ex a wilene'exi'; 4bey túuna' wa ca cha'ic u bin t éetele', c bin j man teech le trigoo'; 5ba'ale' wa ma' ta cha'ic u bine', ma' táan c bin, le máaco' tu ya'alaj to'on: wa ma' ta taasique'ex teen u j t'uupil a wíidzine'exe', ma' a taal a wilene'ex.

6Ca túun tu ya'alaj Israel: ¿Ba'ax teen cu beeta'al teen sen ya'ab kaas? ¿Ba'ax teen ta wa'alaje'ex ti' le máac yaan u láak a wíidzine'ex?

7Leti'obe' tu núucajo'ob:

Tumen leti'e' tu sen káatchi'itaj t o'olal yéetel tu yo'olal c láaktzilo'ob. Tu káatchi'itaj to'on: ¿Cuxa'an wa a taataex? ¿Yaan wa u láak a wíidzine'ex? To'one' j yanchaj c núuquic u káat chi'ob. ¿Tu'ux bin c ojéelt wa yaan u ya'alic to'on ca c bis c íidzin?

8Judae' tu ya'alaj ti' Israel u taata:

Wa c káate'ex cuxtale' cha' u bin le j xi'ipalo', teen quin in canante, chéen bey je'el c bin tu séeblaquilo'. Beyo' ma' t quíimil, mix teech, mix to'on, mix c paalal. 9Teen quin dzáiquimbáa tu yo'olal; ti' teen ca bin a káat je'el ba'alac ca úuchuc ti'e'. Wa ma' tin sutic waye', teen quin in cuch u si'ipil ta táan tuláacal u kiinilo'ob in cuxtal. 10Wa ma' tu yo'olal dzo'oc u sen xáantal waye', ¡bejela'a' dzo'oc c bine' yéetel dzo'oc c suut ca'a téene'!

11Ca túun tu núucaj u taata ti'ob: Bey mina'an u láak ba'ax cu páajtal c beetico', beete'ex lela': bise'ex siibalo'ob ichil u nu'ucul a cuuche'ex u ti'al le máaco'. Bise'ex ti' u asab ma'alobil ba'ax cu beeta'al ti' le caajo'oba', jun p'íit balsamo, jun p'íit caab, qui'iboc ja'ob, mirra, nuez, yéetel almendra. 12Bise'ex xan ca'a jaatz taakin, yéetel kube'ex ta kabile'ex le taakin j su'ut te'exo', ma' c ojel wa chéen j náay óolali'. 13¡Séeba'an! ch'a'ex a wíidzine'ex, xeene'ex tu ca'a téen a wile'ex le máaco'. 14Ku ca u beet u muuntal u pucsi'ikal u ti'al u cha'akabtic Simeón yéetel Benjamín. Tin wo'olale', wa yaan in p'áatal j ma' paalale', p'áataquen túun j ma' paalal.

15U paalal Jacobe' tu ch'a'ajo'ob siibalo'ob, ca'a jaatz u ya'abil taakin, yéetel Benjamine' ca j bino'ob Egipto. Le ca kucho'ob tu táan Josee', 16ca j ila'ab tumen José ti' yaan Benjamín yéetelo'obe', tu ya'alaj ti' u aj cananba'albáa u yotoch:

Bis le máaco'ob tin wotocha', quíims jun túul wacaxe' ca a nu'ucbesej, tumen leti'obe' yaan u janalo'ob tin wéetel chúumuc kiin.

17Le aj canan ba'albáo' tu beetaj jach je'el bix nu'ucta'abic ti' tumen Josee', ca tu bisajo'ob, 18Ba'ale' leti'obe' ja'ak u yóolo'ob tumen táan u bisa'alo'ob tu yotoch José, ca tu ya'alajo'ob tu baatzilo'ob:

¡Lela' chéen táabsajil! j taasa'abo'on waye' tu yo'olal le taakin j su'ut to'ono', bin u ca'aj u macho'ono'ob u ti'al u beetico'ob c meyaj beyo'on palitzile' pa'ate' yéetel c aalako'ob.

19Tu yo'olale' le ca j kucho'ob tu jool le najo' j naadzo'ob tu yicnal le aj canan ba'albáo' u ti'al ca t'aanaco'ob tu yéetel, 20Ca tu ya'alajo'ob ti':

¡Nojoch máac! jach u jaajile' le u láak kiinaco' chéen j taalo'on j maan trigo, 21Ba'ale' le ca j kucho'on tu'ux ca'ach bin c máans áakabe', le ca j t wach'aj c costale', t ilaj tu jáal chi'obe' ti' yaan c taakin tu jujun túulilo'oni'. Le taakino' t ilaj chuca'an. Bejela'e' t taasaj u ti'al c sute, 22t taasaj xan u láak taakin u ti'al c manic trigoo. Ba'ale' ma' c ojel máax dzáa le yáax taakin tu jool c cuucho'.

23Le aj canan ba'albáo' tu núucaj:

Jóomoc a wóole'ex, ma' a ch'aique'ex sajaquil. A Kuex yéetel u Ku a taataexe' leti' wal dzáa ichil a cuuche'exe'. Tumen tene' tin kamaj le taakin iquil bo'olnajique'exe'.

Le aj canan ba'albáo' tu joksaj Simeone' ca tu bisaj tu'ux yano'ob leti'ob; 24Cu dzo'ocole' ca tu láaj bisajo'ob tu yotoch José, ca tu dzaj ja' u ti'al u p'o'ic u yooco'ob, tu dzaj xan ba'al u jaant u burro'ob. 25Leti'obe' tu máakanto'ob le siibalo'obo' ca tu pa'atajo'ob u suutbal José chúumuc kiin, tumen tu yojéeltajo'ob ti' cu bino'ob janali'.

26Le ca j kuch José tu yotoche', leti'obe' tu dzajo'ob le siibalo'ob tu taasajo'obe', ca j noclajo'ob j lu'um tu táan. 27Josee' tu káatchi'itaj ti'ob bix yanilo'ob, tu káatchi'itaj xan:

¿Bix yanil a taataex, le nuxiib ta tzicbaltaje'ex teen, láili' cuxa'ane'?

28Leti'obe' j chinlajo'ob ca tu ya'alajo'ob:

C taatae', a palitzile', ma'alob yanil, láili'; cuxa'ane'.

29Josee', paacatnaj tu bakpach, ca tu yilaj Benjamín u yíidzin ti' jun túulili' taata yéetel ti' jun túulili' maama, ca tu ya'alaj:

¿Leti' wa u j t'uupi a wíidzine'ex ta tzicbaltaje'ex tena'? ¡J xi'ipal, Ku ca u qui' t'aan teech!

Le ca tu ya'alaj le t'aana', 30Josee' j péecnaj u yóol ca tu yilaj u yíidzin, ca j taacchaj u yokol. Tu séeblaquil j ooc tu yotoch, ca okolnaj te'elo'. 31Le ca páatchaj u jáawal u yokole' tu p'o'aj u yich, jóoke' ca tu ya'alaj: ¡jóoksa'ac le janalo'!

32Josee' j dzaab u janal ti' jun p'éel x mayacche', u paalal Jacobe' ti' u láak. Ti' u láak x mayacche'e' le j egipciob cu janalo'ob yéetel Joseo'; tumen ti' le egipciobo', wet'a'an ti'ob u múuch' janalo'ob yéetel le j hebreob. 33Le u láaktzilo'ob Josee' j culajo'ob le ca a'ala'ab ti'ob tumen, tu tzoolol u ja'abilo'ob, ya'ax táanile' le sucu'untzilo'obo' tac le j t'uup íidzino'; leti'obe' sen jaka'an u yóolo'ob táan u paclan ilicuba'ob. 34Josee' tu dzaj u jaanto'ob le ba'ax cu jaantic leti'e' ti' Benjamine' tu dzaj u ya'abil. José yéetel u láaktzilo'obe' j múuch' ukulnajo'ob ca sen j qui'imacchaj u yóolo'ob.

Currently Selected:

Génesis 43: MAYABI

Highlight

Copy