Génesis 17

Súut kup, u chíiculal nup t'aan

1Le ca tu chucaj noventa yéetel nueve u ja'abo'ob Abrame', chíicpaj Yuumtzil ti'e', ca tu ya'alaj ti':

Tene', u Junab Kuilen sen nojoch páajtalil; cuxlen x ma' si'ipil tin táan, 2bin in ca'aj in beet jun p'éel nup t'aan ta wéetel: bíin in beet ca sen ya'abac a ch'i'ibalo'ob.

3Abram túune' j noclaj j lu'um ca'aliquil Kue' táan u bin u ya'alic ti':

4Bey le nup t'aan quin in beet ta wéetela': Teche' yaan a taatainta'al tumen ya'abcach nucuch caajo'ob. 5Bejela'e' ma' bíin a kaaba'int Abrami'. Ba'ale' bejela'e' a kaaba'e' Abraham, tumen in ca'aj in beet ca taatainta'aquech tumen ya'abcach múuch' caajo'ob. 6Bíin in beet ca sen ya'abac a ch'i'ibalo'ob: ti' teech bíin jóokoc ajawo'ob yéetel múuch' caajo'ob. 7Le nup t'aan quin beetic ta wéetela', bey xan bíin in beet yéetel tuláacal a ch'i'ibalo'ob, u káat u ya'ale', tene' a Junab Kuen, leti'obe' u Kueno'ob xan. 8Ti' teech yéetel ti' leti'ob bíin in dzáa te'ex u lu'umil Canaán, le tu'ux caja'anech bejela'e', ba'al a ti'ale'ex u ti'al mina'an u xuul kiino'ob, teen xane' a Junab Kuene'ex.

9Tu ya'alaj xan Ku ti' Abraham:

Ba'ale' teche' béeycunt in nup t'aan, teech yéetel tuláacal a ch'i'ibalo'ob. 10Lela' leti'e' nup t'aan quin beetic ta wéetele'exa' u najmal u béeycuntico'ob tuláacal a ch'i'ibalo'ob: tuláacal le j xiibo'ob yaan ichile'ex u najmal u súut kupta'alo'ob.#17.10 Súut kup, jun p'éel úuchben chíiculal cu meyaj ca'ach ti' le judiob iquil u éejemtico'ob u nup t'aan Ku yéetelo'ob, xoc xan versíiculo 11 u ti'al a wojéeltic bix u beeta'al ca'achi. 11U najmal a kupique'ex u yoot'el a j xiibile'ex, lela' bíin p'áatac bey u chíiculal le nup t'aan c beetica' te'ex tin wéetel, teen ta wéetele'ex. 12Bejela'a' cu bin j chúunule', tuláacal j xiib ichile'ex u najmal u súut kupta'al tu ocho kiino'ob síijic, je'el máaxac paalil ca síijic ich najil bey le palitzil mana'an yéetel taakin ti' je'el máaxac j táanxel lu'umile'. 13Bic p'áatac wa máax ma' u súut kupta'al bey le jun túulo' bey u láako'. Beyo' in nup t'aane' bíin p'áatac chica'an ta bakele'ex bey jun p'éel u nup t'aanil tuláacal u kiinil le cuxtalo'. 14Ba'ale' le máax ma' tu súut kupta'ale' u najmal u tze'elel ichile'ex, tu yo'olal ma' tu béeycunsaj in nup t'aani'.

15Kue' tu ya'alaj xan ti' Abraham: Sarai a watane' ma' táan u suut u kaaba'int beyo'. Líikbal bejela'e' u kaaba'e' Sara. 16Bíin in qui' t'ante, yaan in dzáic teech jun túul paal tu yéetel. Bey, in ca'aj in qui' t'ante. Leti'e' yaan u maamainta'al tumen ya'abcach múuch' caajo'ob u ch'i'ilancabe' yaan u beeticuba'ob u ajawo'ob caajo'ob.

17Abrahame' j noclaj lu'um, ca j che'ejnaj ca'aliquil táan u tucultic: ¿Jun túul máac yaan cien ja'abo'ob ti'e' je'el wa u páajtal yantal u paale'? ¿Sarae' bin u ca'aj wa yantal u paal tu noventa ja'abo'ob? 18Ca túun tu ya'alaj ti' Ku:

Quexi' ca páatac u cuxtal Ismaele' yéetel a qui' t'aane'.

19Ca j núuca'ab ti' tumen Ku:

Ba'ax tin wa'alaje': a watan Sarae' yaan u dzáic teech jun túul paal, teche' yaan a dzáic u kaaba'int Isaac yéetel leti'e' yaan in jedzcuntic in nup t'aan, yaan xan in t'ilcuunsic yéetel u ch'i'ilancab u ti'al ja'abo'ob mina'an u xuul. 20Tu yo'olal Ismaele', dzo'oc xan in wu'uyiquech, bin in ca'aj in qui' t'ante; yaan in beetic u ya'abtal u paalal ca ya'abchajac xan u ch'i'ibal. Ismaele' yaan u taatainta'al tumen doce nucuch máaco'ob, yaan in beetic yéetel jun p'éel nojoch múuch' caaj. 21Ba'ale' in nup t'aan yaan in t'ilcuunsic yéetel Isaac, le paal cu bin u dzáa teech Sara ichil jun ja'ab, bey je'el bix le kiino'oba'.

22Le ca j dzo'oc u t'aan Ku yéetel Abrahame' j luk te'elo'. 23Ti' le kiin je'elo' Abrahame' tu súut kuptaj Ismael u paal, tu súut kuptaj xan tuláacal le palitzilo'ob sijnalo'ob tu yotoch, bey le u manmaj yéetel u taakine'. Tuláacal le máaco'ob cajacbalo'ob tu yotoch, bey le meyajtique', súut kuptajo'ob je'el bix u ya'almajil Kue'. 24-25Abrahame' yaan ca'ach noventa yéetel nueve ja'abo'ob ti', Ismael u paale' yaan ca'ach trece ja'abo'ob ti' ca j súut kupta'abi. 26Abraham yéetel Ismael u paale' tu kamajo'ob u meeyjul le súut kuptajil ti' jun p'éelili' kiin, 27pa'ate' yéetel le máaco'ob caja'ano'ob tu yotocho', bey xan le palitzilo'ob sijnalo'ob tu najilo', bey le mana'ano'ob yéetel taakin ti' le táanxel caajilo'obo'.

Currently Selected:

Génesis 17: MAYABI

Highlight

Copy