Hechos 23
23
1Pabloe' tu pactaj u múuch'ul u nuuctaquil le judíobo' ca tu ya'alaj ti'ob: Sucu'une'ex, jeedzel in tuucul cuxliquen tac bejela'a' tu táan Ku.
2Ananías túune', máax u noojoch le j kiino'obo', tu ya'alaj ti' le máaxo'ob yano'ob naadz ti' Pabloe' ca u lajo'ob tu chi'. 3Ba'ale' Pabloe' tu núucaj ti': ¡Ku cu bin jadziquech, teech ca'a p'éel ich! ¿Culucbalech te'elo' u ti'al a p'is óoltiquen je'el bix u ya'alic le a'almaj t'aano'? ¿Ba'axten ca wa'alic ca la'ajaquen wa ma' bey u ya'alic le a'almaj t'aano'?
4Le máaxo'ob yano'ob te'elo' tu ya'alajo'ob ti': ¿Bey wa a poch'ic u noojoch j kiin Kuo'?
5Pabloe' tu ya'alaj: Sucu'une'ex ma' in wojel ca'ach wa leti' u noojoch le j kiino'obo'; tumen cu ya'alic le Quili'ich dzíibo': Ma' a t'aan kaas tu yo'olal jun túul u jalachil a caajal.
6Pablo túune' tu yilaj dze'edzec ti' le much'a'ano'obo' saduceob, u láak dze'edzeque' fariseob, ca tu ka'am a'alaj: Sucu'une'ex, tene' fariseoen, u paalen fariseob; táan in p'is óolta'ale' tumen táan in pa'atic u ca'a púut cuxtal le quimeno'obo'.
7Le ca tu ya'alaj lela' le fariseob yéetel saduceobo' jo'op' u ba'atel t'aano'ob ca jáatzpaj le máaxo'ob much'ucbalo'obo'. 8Tumen le saduceobo' cu ya'alico'obe' ma' táan u ca'a púut cuxtal le quimeno'obo', yéetel mina'an ángelo'ob mix pixano'ob. Ba'ale' le fariseobo' cu yocsaj óoltico'ob le ba'alo'oba'. 9Ca jo'op' u yawat t'aano'ob. Ca j líik dze'edzec ti' u j ca'anbesajilo'ob le a'almaj t'aano', máaxo'ob yano'ob tu tzéel le fariseobo', ca tu ya'alajo'ob: Mix ba'al kaas c ilic ti' le máaca'; wa dzo'oc u t'a'anal tumen jun túul ángel wa jun túul pixane', ma' unaj c xachicbáa ti' Kui.
10Tumen jach ya'abchaj u ba'atel t'aano'obe', u noojoch le aj ba'atelo'obo' sajacchaj ca u xe'exet'a'ac Pablo. Bey túuno' tu ya'alaj ca taalac aj ba'atelo'ob u ti'al u jóokso'ob Pablo ti' ichilo'ob yéetel ca u ca'a biso'ob te chúumuc najo'.
11Tu jeel áakabe' chíicpaj Yuumtzil ti' Pabloe' ca tu ya'alaj ti': Anac a wóol, Pablo, tumen je'el bix dzo'oc a t'aan tin wo'olal way Jerusalene', bey xan yaan a t'aan tin wo'olal tu caajil Roma.
Bix tuculta'abic u quiimsa'al Pablo
12Tu jeel kiine', dze'edzec judíob tu múuch' tuculto'ob u quiimsico'ob Pablo, ca tu jalacht'aanto'ob u ti'al xotkinaj ca tu ya'alico'ob ma' tun janalo'ob mix tu bin j ukulo'ob wa ma' p'iis u quiimsico'obe'. 13Máanal cuarenta le máaco'ob tu múuch' tu cultajo'ob lela'. 14J bino'ob túun ti' u nojochilo'ob le j kiino'obo' yéetel ti' le anciano'obo' ca tu ya'alajo'ob:
To'one' dzo'oc c ch'a'achi'itic u kaaba' Ku u ti'al xotkiinil t óokol ma' bíin c jaant mix ba'al ca'aliquil ma' c quiims Pabloi'. 15Beoraa' te'exe' yéetel u láako'ob u nuuctaquil le caajo', káate'ex ti' u noojoch le aj ba'atelo'obo'; ca u taas sáamal ta táane'ex, ca wa'alique'ex ti'e' a káate'ex a ma'alob ojéelte'ex ba'ax u beetmaj. To'on túune' c líiksicbáa u ti'al c quiims ma'ili' kuchuc waye'.
16Ba'ale' u paal u quiic Pabloe' j kuch u yojéelt le ba'alo'oba' ca j bin te chúumuc najo' u ti'al u ya'al ti'. 17Pablo túune' tu t'anaj jun túul ti' le náacomo'obo' ca tu ya'alaj ti': Bis le j xi'ipal ti' u noojoch le aj ba'atelo'obo' tumen yaan ba'al kabéet u ya'alic ti'.
18Le náacomo' ca tu bisaj ti' u noojoch le aj ba'atelo'obo' ca tu ya'alaj ti': Pablo le máax kala'ano' tu t'anajene' ca tu káat óoltaj teen ca in taas le j xi'ipal waya', tumen yaan ba'ax kabéet u ya'alic teech. 19U náacom le aj ba'atelo'obo' tu machaj tu kab le xi'ipalo', ca tu bisaj jun páayile' ca tu káataj ti': ¿Ba'ax a káat a wa'al teen?
20Le xi'ipal túuno' tu ya'alaj ti': Le judíobo' dzo'oc u múuch' tucultico'obe' ca u káato'ob teech Pablo sáamal tu táan u múuch'ul u nuuctaquil le caajo'; u ba'ax o'olalil cu bin u ya'alo'obe' tumen u káato'ob u ma'alob ojéelto'ob ba'ax u beetmaj. 21Ba'ale' ma' a wocsaj óoltic ba'ax cu bin u ya'alo'ob, tumen maanal cuarenta máaco'ob u tacmuktmuba'ob u ti'al pa'atic, máaxo'ob u ch'a'achi'itmajo'ob u kaaba' Ku u ti'al xot kiin tu yóokolo'ob ma' túun janalo'ob mix túun yukulo'ob wa ma' p'iis u quíimsico'ob Pabloe'; bejla'e' u líiksmuba'ob, chéen táan u pa'atico'ob ba'ax can a núuque.
22U noojoch le aj ba'atelo'ob túuno' tu ya'alaj ti' le j xi'ipal ca xi'ico' yéetel ma' u tzicbaltic ti' mix máac wa dzo'oc u ya'alic le ba'alo'ob ti'a'.
Cu túuxta'al pablo tu táan jalach Felix
23U noojoch le aj ba'atelo'ob túuno' tu t'anaj ca'a túul náacomo'obe', ca tu ya'alaj ti'obe' ca u nu'ucbeso'ob docientos aj ba'atelo'ob cu bino'ob xíimbalil, sesenta cu bino'ob yóokol tzíimino'obi' yéetel docientos yaan u lóomte'ob u ti'al u bino'ob tac Cesarea las nueve áakab. 24tu túuxtaj xan ca nu'ucbesa'ac tzíimino'ob u ti'al Pablo, ca tu ya'alaj ca bisa'ac tac tu táan jalach Felix ma'alob cananta'an u ti'al ma' u yúuchul mix jun p'éel loob ti'. 25Yéetelo'obe' tu túuxtaj le dzíibil ju'una'; 26Claudio Lisias cu tziquic u nojbe'enil nojoch Felix. 27Le judíobo' dzo'oc ca'ach u kalico'ob le máaca', bin u ca'aj u quiimso'ob xan. Ba'ale' le ca tin wojéeltaj Romanoe', j binen yéetel in aj ba'atelo'obe' ca tin tocaj tu kabo'ob. 28Tumen tin wojéeltaj ba'ax o'olal cu taquico'ob u poole', tin bisaj tu táan u múuch'ul u nuuctaquil le judíobo' 29ca tin wojéeltaje' chéen táan u taquico'ob u pool tu yo'olal u ba'alilo'ob u ya'almaj t'aano'ob, le o'olale' mina'an ba'ax o'olal u ti'al u quiimsa'al mix u ti'al u ka'alal. 30Ba'ale' tumen tin wojéeltaj le judíob táan u tucultico'ob u quiimsico'obe', je'el quin túuxtic techa', dzo'oc xan in káatic ti' le máaxo'ob taquic u poolo', ca u ya'alo'ob ta táane' ba'ax o'olal cu taquico'ob u pool. Ca xi'ic teech utzil.
31Le aj ba'atelo'ob túuno', je'el bix a'ala'ab ti'obo', tu macho'ob Pabloe' ca tu bisajo'ob yéetel áakab tac tu caajil Antípatris. 32Tu jeel kiine' le aj ba'atelo'ob xíimbal ooc u bino'obo' j suunajo'ob te j chúumuc najo', le yóokol tzíimin cu bino'obo' tu láakintajo'ob Pablo. 33Le ca j kucho'ob Cesareae' tu dzajo'ob le ju'uno' ti' jalach Felix, ca tu kubajo'ob xan Pablo ti'. 34Cu dzo'ocol u xoquic le ju'uno', le jalach wíinico' tu káataj tu'uxil Pablo; le ca tu yojéeltaj Ciliciaile', 35tu ya'alaj ti': Bin in ca'aj in wu'uyech le quéen talac le máaxo'ob taquic a poolo'. Ca tu ya'alaj ca cananta'ac tu jalach najil Herodes.
Currently Selected:
Hechos 23: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
