Hechos 20

Pabloe' cu bin Macedonia yéetel Grecia

1Le ca j dzo'oc le wo'och'táanbalo', Pabloe' tu t'anaj le j ocsaj óolo'obo' u ti'al u tzolic u xiquino'ob; cu dzo'ocole' tu méekajo'obe' ca j bin Macedonia. 2Tu xíimbaltaj tuláacal le caajo'obo' táan u cux óoltic le sucu'uno'ob yéetel u t'aano'ob, cu dzo'ocole' j kuch Grecia. 3J p'áat óox p'éel winal te'elo'. Bin u ca'aj ocol ca'ach cheem u ti'al u binbal Siriao' ca tu yojéeltaje' le judíobo' yaan ba'ax cu tucultico'ob u beetic ti'. Le o'olale' j suunaj xíimbalil, ca j máan tu ca'a téen Macedonia. 4Láakinta'ab tumen Sopater Bereail, Aristarco yéetel Segundo, Tesalonicailo'ob, Gallo Derbeil, Timoteo, bey xan Tíquico' yéetel Trófimo', máaxo'ob ti' u lu'umil Asia u taalo'ob. 5Le sucu'uno'oba' j bino'ob táanile' ca tu pa'atajo'ob Troas. 6To'one' cu dzo'ocol le kiinbesaj ma' tu jaanta'al paj sacan waaje', j luko'on Filipos ti' cheeme' ca t chucpachto'ob Troas cu dzo'ocol u máan cinco kiino'ob, j p'áato'on siete kiino'ob te'elo'.

Pabloe' cu xíimbaltic troas

7Tu yáax kiin le semanao' j much'lajo'on u ti'al c xet'ic le waajo', Pabloe' táan u ca'ansic le ocsaj óolo'obo'. Tumen yaan u jóokol tu jeel kiine', j t'aanaj tac chúumuc áakab. 8Much'ucbalo'ob ti' jun p'éel cúuchil tu ca'anlil le najo' tu'ux yaan ya'ab sáasilo'ob t'aba'antac; 9jun túul táanquelem xi'ipal Eutico u kaaba'e' culucbal ti' jun p'éel calon iik. Tu yo'olal chowacchaj u tze'ec Pabloe' jach taacchaj u wenel le j xi'ipalo', le ca j t'úub u wenele' j lúub tu yóox yáal le najo' ca j líiksa'abe' quimen. 10J éem túun Pabloe' ca noclaj tu yóokole' ca tu méekaj, ca tu ya'alaj ti' le sucu'uno'obo': ma' u ja'akal a wóole'ex; tumen cuxa'an.

11Pablo túune' j na'ac tu ca'a téen; tu xet'aj le waajo', jaane', ca jo'op' u t'aan tu ca'a téen tac ca sáasji, cu dzo'ocole' ca j bini. 12Le xi'ipalo' cuxa'an bisa'abic, tuláacalo'ob túun qui'imacchaj u yóolo'ob.

Pabloe' j luk Troase' ca j bin Mileto

13To'one' j máano'on táanile' ca j bino'on ti' cheem tac tu caajil Asón u ti'al c ch'a'ic Pablo te'elo', je'el bix tu ya'aljilacto'ono', tumen leti'e' tu yóoltaj j bin yóok lu'um. 14Le ca t ilaj Pablo tu lu'umil Asone' j ooc t éetel ti' le cheemo' ca j bino'on Mitilene. 15Jóoko'on te'elo', j máano'on tu jeel kiine' actáan Quío, tu láak kiine' j kucho'on tu jáal ka'anabil Samos. Je'elo'on tu chan caajil Trojilio, tu jeel kiine' j kucho'on Mileto. 16Bey beeta'abic, tumen Pabloe' u ti'al ma' u yantal ya'abcach kiino'ob Asiae' ma' tu yóoltaj j bin Efesoi'; tumen u káat séeb kuchul Jerusalén u ti'al u yantal tu kiinil Pentecostés te'elo', wa ca p'áataco'.

U tzol xiquin Pablo ti' u ancianailo'ob Efeso

17Ca'aliquil ti' yaan Miletoe' Pabloe' tu túuxtaj t'anbil u ancianilo'ob Efeso; 18le ca j taalo'obe' tu ya'alaj ti'ob: Te'exe' a wojele'ex bix in cuxtal ichile'ex cáajic tu yáax kiin ca j kuchen way Asiae'. 19Sáamsamal anjien ichile'ex táan in meyajtic Yuumtzil yéetel tuláacal cabal óolal, yéetel u ja'il in wich bey xan ich ya'abcach túuntaj óolalo'ob taal ti' teen tu yo'olal le ba'ax u káat u beeto'ob teen le judíobo'. 20Ba'ale' ma' jáaw in tze'ectic te'ex le ba'alo'ob u ti'al a wutzile'exo', táan in ca'ansique'ex tu táan máaco'ob yéetel ta wotoche'ex. 21Ti' le judíobo' bey xan ti' le ma' judíobo' dzo'oc in wa'alic ti'ob unaj u kexico'ob u tuuculo'ob tu táan Ku yéetel u yocsaj óoltico'ob Yuumtzil Jesucristo. 22Bejela'a' túune' táan in bin Jerusalén, tumen táan u bisiquen Quili'ich Pixan, ma' in wojel ba'ax je'el u páajtal u yúuchul teen te'elo'. 23Chéen ba'ax in wojele', ti' tuláacal caaj tu'ux ca xi'iquene' Quili'ich Pixane' cu ya'alic tene' ba'ax cu pa'atiquene' in ka'alal yéetel in sen mukyaj. 24Ba'ale' mix ba'al ti' le ba'alo'ob quin táan óoltica', mixin cuxtal yaan u tojol in ti'al teen, tu yo'olal ca páatac in wáalcabtic in beel yéetel qui'imac óolal tac tu xuul, yéetel in dzo'ocsic in meyaj tu kubentaj teen Yuumtzil Jesús u ti'al in tze'ectic u ma'alob péectzilil Ku.

25Bejla'ae' in wojel mix jun túul ti' te'ex, ichil máaxo'ob in tze'ecmaj u ajawil Kuo', bíin u yilen tu ca'a téen. 26Le o'olal in káat in wa'al te'ex bejela'e' quin wu'uyic mina'an teen si'ipil ta wóokole'ex, 27tumen in tze'ecmaj te'ex tuláacal u tzolbe'en t'aan Ku, mix ba'al tin ta'acaj te'ex. 28Le o'olale' canantaba'ex te'ex, canante'ex xan u múuch'ul le ocsaj óolo'obo', tu yóokol máaxo'ob dza'ane'ex tumen Quili'ich Pixan je'el bix j canane'ex u ti'al a táan óolte'ex u iglesia Yuumtzil, le tu manaj yéetel u ki'ikelo'. 29Tumen in wojel le quéen xi'iquene' yaan u taal yaanal máaco'ob bíin u yóolto'ob u xu'ulso'ob le iglesiao', je'el bix le dzíidzic ba'alche'ob cu xu'ulsico'ob le j tamano'obo'. 30Bey xan ichile'ex yaan u líikil dze'edzec máaco'ob cu bin u ca'anso'ob tuso'ob u ti'al ca tzaypachta'aco'ob tumen le j ocsaj óolo'obo'. 31Canantaba'ex túun, ka'ajac ti' te'exe' tu yáam óoxp' éel ja'abo'ob bul kiin yéetel bul áakabe' ma' jáaw in tzolic a xiquine'ex ta jun túulile'ex yéetel u ja'il in wich.

32Bejla'e', Sucu'une'ex, quin kubentique'ex tu kab Yuum Ku yéetel ti' u t'aanil u yaacunaj, le yaan páajtalil ti' u ti'al u dzáic a muuke'exo' yéetel u ti'al u dzáic te'ex jun p'éel cúuchil ichil tuláacal le máaxo'ob u kubmajuba'ob ti'o'. 33Ma' in dzíiboltmaj u taakin mix u nook mix máaqui'. 34A wojele'ex ma'alobe' meyajnajen yéetel in kabo'oba' uti'al ca yanac ba'ax kabéet ti' teen yéetel ti'le máaxo'ob yano'ob tin wéetelo'. 35Mantadz in ca'ansmaj ti' te'exe' bey unaj u yúuchul meyaj u ti'al u yáantal le máaxo'ob kabéet wa ba'ax ti'obo', yéetel a ka'ajsique'ex u t'aano'ob Yuumtzil Jesús, máax tu ya'alaj: Yaan asab qui'imacóolal u dza'abal wa ba'ax ti' u ca ka'amal wa ba'ax.

36Cu dzo'ocol u ya'alic lela', Pabloe' j xolaje' ca j payalchi'inaj yéetel tuláacalo'ob. 37tuláacalo'ob okolnajo'ob ca tu méekajo'ob yéetel tu dzu'udzajo'ob Pablo. 38Jach okomchaj u yóolo'ob tumen tu ya'alaj ti'ob ma' bíin u yilo'ob tu ca'a téeni'. Cu dzo'ocole' ca tu láakintajo'ob tac tej cheemo'.

Currently Selected:

Hechos 20: MAYABI

Highlight

Copy