Hechos 12

Bix quíimsa'abic Jacobo yéetel bix ka'alic Pedro

1Ti' le kiino'obo' ajaw Herodese' jo'op' u ch'a'apachtic dze'edzec ti' le iglesiao'. 2Tu beetaj u quíimsa'al Jacobo u sucu'un Juane' yéetel u táadz máascab. 3Le ca tu yilaj utz tu t'aan le Judíob ba'ax tu beetajo' ca tu machaj Pedro u kal xan. Lela' úuch tu kiinilo'ob iquil u jaanta'al le x ma' le vadurail waajo'. 4Cu dzo'ocol u machic Pedroe', Herodese' tu kalaj tu'ux cananta'an tumen can jaatz aj ba'atelo'ob, can túul aj ba'atelo'ob yaan ti' jun jaatz. Táan u tucultic u taasic tu táan le caajo' le quéen dzo'ococ le Pascuao'. 5Bey túuno' Pedroe' cananta'an ma'alo'ob te tu'ux kala'ano', ba'ale' le iglesiao' táan u payalchi' yéetel tuláacal u pucsi'ikal ti' Yuum Ku tu yo'olal.

Kue' cu jáalkabtic Pedro

6Ti' le áakabo' ma'ili' sáasac le kiin u tucultmaj Herodes u jóokesic Pedro tu táan le caajo', Pedroe' táan u wenel chúumuc ti' can túul aj ba'atelo'ob, kaxa'an yéetel ca'a p'éel cadena, bey xan tu joolnaje' yaan u láak aj ba'atelo'ob táan u canantico'ob le najo'. 7Tec taal jun túul u ángel Yuumtzile' ca j chu'up le naj yéetel u sáasilo'. Le ángelo' tu péedzkabtaj Pedro tu ch'ala'atele', tu yajsaje' ca tu ya'alaj ti': Líiken séeba'an. Le cadenaob túuno'j luko'ob tu séeblaquil tu kab Pedro. 8Le ángel túuno' tu ya'alaj ti': Kax ma'alob a kaxnak yéetel dzáa a xanab ta wooc. Le ca tu beetaj Pedro lela', le ángelo' tuya'alaj ti': Búuquint a sayum, tzaypachteni'.

9Pedroe' jóok tu paach le ángelo', quex ma' u yojel wa jaaj wa ma' jaaj ba'ax cu beetic le ángelo'. Tu tucultaje' chéen táan u yilic jun p'éel náay cu ye'esa'al ti' tumen Ku. 10Ba'ale' j máano'ob tu yicnalo'ob le j canano'ob yano'ob yáaxo', cu dzo'occole' tu yicnal le ca'a jaatz canano'obo'; le ca j kucho'ob tu yicnal le jool naj beeta'an yéetel hierro tu'ux cu jóokol máac calleo' je'epaj tu juunal. Jóoko'obe' ca tu xíimbalto'ob jun p'éel calle, cudzo'ocole' le ángelo' tu p'ataj Pedro tu juunal.

11Pedro túune' tu kaj óoltaj ba'ax cu yúuchule' ca tu ya'alaj: Bejela'e' quin wilic jach tu jaajil Yuumtzile' tu túuxtaj u ángel u ti'al toquiquen tu kab Herodes yéetel ti' tuláacal le ba'ax u káat u beeto'ob teen le judíobo'.

12Ca'aliquil táan u tucultic lela', Pedroe' j bin tu yotoch María, u maama Juan Marcos, tu'ux much'ucbal ya'abcach máaco'ob u ti'al j payalchi'. 13Le ca j koopnaj tu jool najil táancabe', jun túul x ch'úupal Rode u kaaba'e', jóok u yil máaxi'. 14Ba'ale' le ca tu kaj óoltaj u t'aan Pedroe' ma' tu je'aj le jool najo', ba'ale' tu yo'olal u sen qui'imac óolale' áalcabnaj ich naj u ti'al u ya'ale' ti' yaan Pedro tu jool naje'. 15A'ala'ab túun ti': ¡Choco a pool! Ba'ale' leti'e' tu sen a'alaj jach jaaj. Leti'obe' tu ya'alajo'ob: Ma' leti', u ángel.

16Ca'aliquile' Pedroe' láili' táan u kopic le jool najo': le ca tu je'ajo'ob le jool naj le ca tu yilajo'obe' ja'ak u yóolo'ob. 17Ba'ale' leti'e' tu beetaj u kab ti'ob u ti'al ca u maco'ob u chi'ob, ca tu tzicbaltaj ti'ob bix úuchic u jáalkabta'al tumen Yuumtzil; ca tu ya'alaj ti'ob; Tzicbalte'ex lela' ti' Jacobo bey xan ti' le sucu'uno'obo'. Jóok túune' ca j bin táanxel tu'ux.

18Le ca sáasjie' yanchaj jun p'éel nojoch sat óolal ichil le aj ba'atelo'obo' tumen ma' u yojelo'ob ba'ax úuch ti' Pedroi'. 19Herodese' tu túuxtaj caxantbil, ba'ale' tu yo'olal ma' páatji u caxta'ale' tu káataj u chi' le j canano'obo' ca tu túuxtaj quiimsbilo'ob. Cu dzo'ocole' Herodese' jóok Judeae' ca j bin cajtal Cesarea.

Bix quíimic Herodes

20Herodese' kuux yéetel u cajnáalo'ob Tiro yéetel Sidono', ba'ale' leti'obe' tu múuch' tucultajo'ob u taalo'ob tu táan. Páatji u lúubulo'ob utzil tu táan Blasto, jun túul u noojoch u j meyajo'ob ajaw Herodes, tu chi' lela' tu káatajo'ob jéedzel, tumen u lu'umo'obe' cu kamic ba'al jaantbil ti' u lu'um le ajawo'. 21Herodese' tu t'anajo'ob u ti'al ca talaco'ob ti' jun p'éel kiin. Ti' le kiino' tu búuquintaj u nookil u kamic u'ula', culaj tu cúuchil le xot kiino' ca j t'aanaj yéetelo'ob. 22Le máaco'ob túuno' jo'op' u ka'am a'alico'ob: ¡Le máax cu t'aana' ma' wíiniqui' ba'ale' jun túul ku!

23Ti' le súutuco' jun túul u ángel Kue' tu beetaj u lúubul Herodes ti' koja'anil tumen ma' tu nojbe'encunsaj Kui'; bey túuno' j quíim jaanta'an tumen x nookol.

24Ba'ale' u ma'alob péectzilil Kue' táan u bin u t'i'it'pajal táan xan u tze'ecta'al tuláacal tu'ux. 25Bernabé yéetel Saulo le ca j dzo'oc u meyajo'obe' j luko'ob Jerusalén táan u bisico'ob Juan marcos yéetelo'ob.

Currently Selected:

Hechos 12: MAYABI

Highlight

Copy