2 Timoteo 4
4
1Tu táan Ku yéetel tu táan Yuumtzil Jésucristo, máax bíin taalac je'el bix Ajaw u ti'al u p'is óolt le cuxa'ano'ob yéetel le quimeno'obo' quin jach kubentic teech 2ca a tze'ect le ma'alob péectzilo'; ca tzol xiquinaquech tu kiinil wa quex ma' tu kiinili'. E'es u si'ipilo'ob, keyo'ob yéetel tzol xiquinto'ob yéetel tuláacal chuca'an óolal bey xan yéetel ca'ansaj. 3Tumen bíin kuchuc u kiinil ma' bíin óolta'ac tumen máaco'ob u kamo'ob le ma'alob ca'ansajo'; ba'ax cun úuchule', je'el bix cun u dzíibolto'obe', bíin u much'quinto'ob aj ca'anbesajo'ob u ti'al ca ca'ansa'ac ti'ob chéen le ba'ax u káat u yu'ubo'obo'. 4Bíin u cúulpachcunto'ob le jaajo', yéetel bíin u dzáa u yóolo'ob ti' tuláacal u jejeláasil chéen tzicbatbil ba'alo'ob. 5Ba'ale' teche' p'áaten mantadz yéetel ma'alob tuucul, mukyajt le yaayaj óolalo'obo', kub a wóol a tze'ect le ma'alob péectzilo'. Beet ma'alob a meyaj.
6Tumen tene' ta'aytac in ku'ubul u ti'al quiimsbil; táan u náadzal u kiinil in binbal. 7Dzo'oc in ba'ateltic le ma'alob ba'atelo', dzo'oc in wáalcabtic le bej tac tu xuulo', dzo'oc in canantic le ocsaj óolalo'. 8Bele táan u pa'atiquen u siibalil jun p'éel toj cuxtal, lela' bíin u dzáa teen Yuumtzil ti' le kiino', tumen leti'e' jun túul juez toj u p'is óol. Ma' chéen ti' teen bíin u dza'i' ba'ale' tac ti' le máaxo'ob táan u dzíiboltico'ob yéetel yaacunaj u taalbalo'.
Nu'uctajo'ob u ti'al Timoteo
9Beet tac tu'ux cu páajtal u ti'al a séeb taal a wilen. 10Tumen Demase' dzo'oc u xúump'attiquen tumen tu dzíiboltaj asab u ba'alilo'ob le yóokolcaaba', ca j bin Tesalónica. Crescente dzo'oc u bin tu lu'umil Galicia, Titoe' tu lu'umil Dalmacia. 11Chéen Lucas yaan tin wéetel. Caxant Marcos ca a tas ta wéetel, tumen cu páajtal u yáantiquen ti' le meyajo'. 12Tiquicoe' tin túuxtaj tu caajil Efeso. 13Le quéen taaqueche' tas teen le u yo'ocabil nook tin p'ataj Troas tu yotoch Carpo; bey xan le libro'obo', táanilbe'en le in ju'uno'obo'. 14Alejandro le j men máascabo' dzo'oc u beetic teen ya'abcach kaas. Yuumtzil bíin u bo'ot ti' je'el bix cu najmatic le ba'axo'ob dzo'oc u beetico'. 15Teche' canantabáa ti', tumen dzo'oc u dzáicubáa tu contra le ma'alob péectzil c tze'ectico'.
16Le ca yáax j anjien tu táan le jalach wíinico'ob u ti'al in wa'alic in t'aane', mix máac áanten; tuláacal tu xúump'atteno'ob. Quin pa'atic ma' u si'ipiltalo'ob tumen Ku tu yo'olal lela'. 17Ba'ale' Yuumtzile' tu yáanten ca tu dzáa in muuk, le o'olale' páatji' in tze'ectic le ma'alob péectzilo' yéetel in beetic ca u'uya'ac tumen tuláacal le máaxo'ob ma' judíobo'. Bey túuno' Yuumtzile' tu tocajen ti' u chi' le chacmo'olo'. 18Bíin u toquen xan ti' tuláacal kaas yéetel bíin u cananten u ti'al u ajawil te j ca'ano'. ¡Nojbe'enil ti' leti' u ti'al kiino'ob mina'an u xuul! Amén.
U dzo'oc tziquil t'aano'ob
19Tziquil t'aano'ob ti' Prisca yéetel ti' Aquila, bey xan ti' u láaktzilo'ob Onesíforo. 20Erastoe' j p'áat Corinto, yéetel Trófimoe' koja'an tin p'atil Mileto. 21Il a wil a taal ma'ili' cáajac u kiinil que'elil. Tan u túuxtico'ob teech tziquil t'aano'ob Eubulo, Pudente, Lino, Claudia yéetel tuláacal le sucu'uno'obo'.
22Yuumtzil Jésucristo ca yanac ta wéetel, yéetel u siibal utzil Ku ca yanac ta wéetele'ex.
Currently Selected:
2 Timoteo 4: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
