Matío 27
27
Mɛ́ é lɔk á Yɛɛ́so ŋgʉ̄ɔ mé mvhɔ Pilat
(Mlk 15.1; Lúk 22.66; 23.1-2; Jáŋ 18.28-32)
1Njhʉ̄ é lá nzemɛ́nzēm, wɔ nɔŋ‑epɔʼ epi melʉɛ metsem, mbɔɔ mekém alāʼ, é cúʼte, ésāp tɛ nzápa ŋ́gɛ mɛ́ ezwhí á Yɛɛ́so. 2Ńtswī mɛ́ kwɛ́t á Yɛɛ́so, pɔ́ lɔk á yí ŋgʉɔ ŋgyá á mbū ŋgɔpna Pilat.
Yúdas a á kwhʉ́ ntseŋne tseŋne
(MeM 1.18-19)
3Yúdas, á ŋiŋ yīi a le swīŋ á Yɛɛ́so, á lɛ njúʼ páʼ mɛ́ é záʼ ntsaŋ ndé ŋ́gɛ, á pɔŋ ŋ́gɛ mɛ́ ezwhí á Yɛɛ́so lā, á zɛt á yí tɛʼ. Á lɔk ŋkāp zīi mɛ́ ŋgyá á mbū yí epak megēm ntɛ́t lā, ŋ́gʉ̄ɔ á ŋgyáa á mbū wɔ nɔŋ‑epɔʼ epi melʉɛ pɔ́ a mekém alāʼ. 4Ńdé mé pɔ́p ŋ́gɛ: «Meŋ ke fā tɛʼ, páʼ meŋ ke yá á taʼ te fa ŋ́gɛ, mɛ́ ezwhí á yí. » Pɔ́ lé ŋ́gɛ: «Akɔ̄ á ké ncʉ̄te á wék éwú ú? Á júʼ áa me wu. » 5Yúdas á lɛ mmāʼ ŋkāp mɛ́t mé ajʉʼ alɔ́ʼ Mía Ŋgyā Ndém, éfhó á ŋgyā ntó, ŋ́gʉɔ ntsēŋne. 6Wɔ nɔŋ‑epɔʼ epi melʉɛ é lakte ŋkāp mɛ́t, ńdé ŋ́gɛ: «Lepé tsímpɛ é té véŋ ŋ́gɛ, mɛ́ enéŋ ejʉɔ ntií ŋkāp, ánɛ ŋkāp ŋgyā Ndém ɛ́, melaʼ mīi e é páʼa, ŋgɔ́ ŋkāp metshi. » 7Ńdé épúp, ńcúʼte ŋgɔ́ á taʼ nchu. Ńdɔ̄k ŋkāp mɛ́t nzó ŋkāʼ, mɛ́ tɔɔ́ŋ ŋkāʼ mɛ́t lɛ, ŋkāʼ mbɔɔ‑mekʉŋ, ńdɔk ŋghʉ̄ á ajʉʼ zīi, mɛ́ túŋɔ mege éwú. 8É melaʼ épúp tɛ́, tɛ ntshí ayáʼa, mɛ́ gɛ ntɔ́ŋɔ ŋkāʼ mɛ́t lɛ, ŋkāʼ metshi. 9Á gɔ́ épúp, ńdɔk mbō páʼ Jelemi, ntswi‑ŋke Ndém a le lé ŋ́gɛ: «Pɔ́ le tswí ŋkāp epak megēm tɛ́t, é gɔ́ nzwiŋ yīi epuɔ Islaɛl é le néŋ ŋ́gɛ, mɛ́ elɔk eswīŋ á yí. 10Pɔ́ ke lɔ̄k eziɛ́ ŋkāp, ńzó ŋkāʼ mbɔɔ‑mekʉŋ, á gɔ́ anu zīi Atsyapuɔ a le lé ŋ́gɛ meŋ eshúŋ. »
Pilat, á ŋgɔpna a á ega ŋŋāka á Yɛɛ́so
(Mlk 15.2-5; Lúk 23.3-5; Jáŋ 18.33-38)
11Yɛɛ́so á kó á mvhɔ ŋgɔpna Pilat, á ŋak á yí, ńzɛ́tte á yí ŋ́gɛ: «Wu mé efɔ epuɔ Yúda a?» Yɛɛ́so á pwɛt ŋ́gɛ: «Á tó á nchu wu. » 12Wɔ nɔŋ‑epɔʼ epi melʉɛ, pɔ́ mekém alāʼ é tshí menu tɛ é zá tɛʼ á athū Yɛɛ́so. Á ké mbú te amɔ̄ʼ pwɛt. 13Pilat á zéŋ nzɛ́tte á yí ŋ́gɛ: «O te si njúʼɔ menu muɔ mīi, mɛ́ shúŋɔ ánɛ wu la á lɛ̄?» 14Yɛɛ́so á pú te tsɔ taʼ anu pwɛ̄ɛt, tɛ á pú ŋkʉ̄ʼne á ŋgɔpna Pilat tɛʼ.
Mɛ́ é zápa ŋ́gɛ mɛ́ ezwhí á Yɛɛ́so
(Mlk 15.6-15; Lúk 23.13-25; Jáŋ 18.39–19.16)
15Ŋgɔpna a lɛɛ́ ŋgwīɛ̄ á mɛt ánɛ etsiɛ́ lekāk Páska lɛ́, á lefōk taʼ ŋgaŋ atʉɛ́ yīi, alāʼ á si nzɛ́ttɛ, ŋ́gyá mé pɔ́p. 16Á ge egɔ́ épúp, mmɔʼ ŋiŋ á gɔ́ á ŋgyā atʉɛ́, mɛ́ zhɛ́ á yí á mbɔŋɔ́ ánɛ efʉʉ́ʼ‑enu tsí, lezēŋ tsí é gɔ́ lɛ Yɛɛ́so Balabas. 17Pilat á zɛ́tte alāʼ zīi á ŋkɔ́ʼ ncúʼte, ŋ́gɛ: «Pɛ é si ŋkɔ̄ŋɔ ŋ́gɛ, meŋ efók á awɔ́ ŋgyá á mbū pɛ ɛ̄? Á Yɛɛ́so Balabas kɛ á Yɛɛ́so yīi, mɛ́ tɔ́ŋɔ lɛ Nzaʼ‑Ŋkhʉ lā a?» 18A lɛɛ́ nzɛ́ttɛ épúp melaʼ mīi, a le nɔ̄ŋ nzhɛ́ɛ á légɛ, mɛ́ záa esɔ̄ ánɛ Yɛɛ́so zaá, tɛ́ eswīŋɛ á yí. 19Pilat a le náŋ ajʉʼ asāʼ, ńnɔŋ ŋŋāka á Yɛɛ́so épúp, nzwí yí á tó ŋ́gɛ mɛ́ egʉɔ ntswī á mbū yí ŋ́gɛ, ndɛ́ʼ á néŋ nchu yí ánɛ anu te fa wɔ̄. Ŋ́gɛ yí é ndí amɔ̄ʼ athū á ayáʼa, ńjʉ́ɔ mɛ́ pú ŋgɔ́ si ŋgēnɛ á yí tɛʼ, melaʼ te fa mɛ́t.
20Wɔ nɔŋ‑epɔʼ epi melʉɛ pɔ́ a mekém alāʼ, é ké ŋgɔ́ si ntshónɛ alāʼ ŋ́gɛ, pɔ́ etswī, Pilat a efók áa Balabas ŋgyá mé pɔ́p, ḿbiŋ ntswī mɛ́ ezwhí á Yɛɛ́so. 21Ŋgɔpna á zéŋ ntswí á ashuŋne, ńzɛ́tte á wɔ́p ŋ́gɛ: «Á shʉʉ̄ʼ ánɛ epuɔ puɔ mémpīa, pɛ é kɔŋ ŋ́gɛ, meŋ etshī á awɔ́ nnéŋ á mbū pɛ ɛ̄?» Alāʼ á pwɛt ŋ́gɛ: «Á Balabas. » 22Pilat á zéŋ nzɛ́tte á wɔ́p ŋ́gɛ: «Ḿbiŋ ŋghʉ̄ áa páʼ lā ánɛ Yɛɛ́so yīi, mɛ́ tɔ́ŋɔ lɛ Nzaʼ‑Ŋkhʉ lā a?» Alāʼ ntsem á pú ndé ŋ́gɛ: «Mɛ́ ekwɛ̄te á yí ánɛ mbaŋne paŋné. » 23Pilat á zéŋ ŋ́gɛ: «Anu tepɔŋ zīi a á ghʉ, á lɛɛ̄ ŋgɔ́ á aziɛ́ ɛ́?» Tɛ́ pɔ́ tswiʼne ndéŋte meŋguŋ mé ntē, ńdé ŋ́gɛ: «Mɛ́ eké ŋkwɛ̄te á yí kwɛte. » 24Pilat á jʉ́ɔ páʼ yí ka ezéŋ ŋkūʼ á lepwɛ̄ne alāʼ á, ḿbɔ́k ŋ́gɛ ndɛ́ʼ á sɛnne, epuɔ eták ejʉʼ. Ńtswíʼ ntshi, ńdɔk ntshí á nnɔ alāʼ, ŋ́gē esok mbū mí, ńnɔŋ ndʉ́ɛ́ ŋ́gɛ: «Meŋ te azō ánɛ lewhʉ̄ mbaŋa wuɔ zhɛ́ ɛ́, á anu ncʉ̄te á wɛ́. » 25Alāʼ ntsem á pú mbwɛ̄t ŋ́gɛ: «Metshi mí e egʉ̄ɔ á athū pek, mbɔɔ á athū ewɔŋkhʉ̄ pék. » 26Á ghʉ épúp, ńdɛ ntswī mɛ́ fhó á ŋgyā atʉɛ́ efók á Balabas. Ḿbiŋ ntswī mɛ́ lɔk ntɛ̄ ntswá á Yɛɛ́so, ńdɔ̄k á yí ŋgʉɔ ŋkwɛ̄te ánɛ mbaŋne paŋné.
Wɔ lʉɔ́ʼ‑ncu é ega nzɔ̄tɛ á Yɛɛ́so
(Mlk 15.16-20; Lúk 23.11; Jáŋ 19.2-3)
27Wɔ lʉɔ́ʼ‑ncu Pilat, é lɔk á Yɛɛ́so ŋgʉ̄ɔ mé mba ŋgɔpna, ńtɔ́ŋ nnɔ wɔ́p ntsem, pɔ́ metsem é pú ncúʼte éwú, á lezēŋ Yɛɛ́so, 28ésɔ̄ŋ menzhó ánɛ yí, ḿbɛ́ á kwaʼ paŋ nzhó mmāʼ ánɛ yí. 29Ḿbáʼ acɔʼ menzɔ̄ŋ menzɔ̄ŋ, éshū á athū yí, ŋ́gɛ acɔʼ lefɔ. Éfāʼ á akekaʼa, ńnéŋ á apū ete yí. Ńtswíʼte á mvhɔ yí, ńzī á lezɔte á yí ndé ŋ́gɛ: «Zaá efɔ epuɔ Yúda. » 30Ńnɔŋ ntsōko mekī ánɛ yí, ńtswí á taʼ akekaʼa wɔ̄, ńdɔk ntswá á yí á athū yí. 31Ńzɔ̄te á yí épúp tɛ afʉʼ á kuʼ, pɔ́ zéŋ esɔ̄ŋ nzhó jɔ̄ ánɛ yí, ḿbɛ́ menzhó mí nzéŋ mmāʼ ánɛ yí, ńdɔ̄k á yí ŋgʉ̄ɔ mé ŋkwɛtɛɛ̄ ánɛ mbaŋne paŋné.
Mɛ́ é ega ŋkwɛ̄tɛ á Yɛɛ́so ánɛ mbaŋne paŋné
(Mlk 15.21-32; Lúk 23.26-43; Jáŋ 19.16-27)
32Wɔ lʉɔ́ʼ‑ncu é nɔŋ ndɔ̄kɔ á Yɛɛ́so efhɔ́ɔ á tésɔŋ ntúɔ́, ńjʉ́ɔ mmɔʼ ŋiŋ, lezēŋ tsí é gɔ́ lɛ Simɔŋ, á gɔ́ á ŋiŋ tésɔŋ Silɛ̄ne, pɔ́ lɔk mbʉʼ ŋgɔ̄ á yí, ŋ́gɛ a epīʼ á mbaŋne paŋné Yɛɛ́so. 33Pɔ́ gʉɔ tɛ ŋkó amɔ̄ʼ ajʉʼ, mɛ́ tɔ́ŋ lɛ Gɔlgota, ńdɔkɔ ŋ́gɛ, Akwɛ́ Athū. 34Ńdɔ̄k amɔ̄ʼ awhiɛ́‑azō, ḿvūŋ meluʼ, ŋ́gyá ŋ́gɛ Yɛɛ́so a enú. Yɛɛ́so á zwíʼ, a te kɔ̄ŋ á lenū ú. 35Pɔ́ kwɛte á yí ánɛ mbaŋne paŋné. Ḿbɛ́ menzhó mí, ŋ́gē egapte, ńdɔ̄k nzikɛ́. 36Ŋ́ghʉ̄ épúp, ńnáŋ á esī, ńnɔŋ mbípɛ á yí. 37Pɔ́ tí nthū lewhʉ̄ yí, ḿblɛ́ mé athʉ́ ánɛ mbaŋne paŋné á ndo athū yí ŋ́gɛ: «Ŋiŋ wuɔ a á Yɛɛ́so, á efɔ epuɔ Yúda. » 38Mɛ́ le zéŋ ŋkwɛte metsɔ́ŋ azɔ́p mémpīa, ánɛ epɔ́p membaŋne paŋné. Mmɔʼ ŋgaŋ á gɔ́ á ŋkɔʼɔ́ apū ete Yɛɛ́so, mmɔʼ á gɔ́ á ŋkɔʼɔ́ apū tswioɛ yí. 39Yɛɛ́so á zɛ́t ánɛ mbaŋne paŋné ntsēŋne, metsia‑nzhɛ é ge etɔ́ke, ésɛ̄ á po ŋgyá á mbū yí, ńzɔ̄te á yí, 40ńnɔŋ ndʉ́ɛ́ ŋ́gɛ: «Wu yīi o ke nɔ̄ŋ ndʉ́ɛ́ ŋ́gɛ, o o shʉʼ eták á Mía Ŋgyā Ndém, épiŋ elɔk eleʼé tɛ́t, ékwɛ́t ezi ndɛʼɛ. O gɔ́ ŋké ŋgɔ́ á Méŋ Ndém, o etswí athū jú á mbū lewhʉ̄ wu méŋwɛ̄t, éfhó ánɛ mbaŋne paŋné esóʼo. » 41Wɔ kɛ́ʼte‑mbé Ndém, pɔ́ a mekém alāʼ mbɔɔ wɔ nɔŋ‑epɔʼ epi melʉɛ, é zéŋ nnɔ̄ŋ nzɔ̄tɛ Yɛɛ́so azɔ́p, 42ńdʉ́ɛ́ ŋ́gɛ: «A lɛɛ́ ŋkʉ́ʼnɛ ntswíi epuɔ á mbū lewhʉ̄, a etswí athū nnɛ̄t zí lɔ. A gɔ́ ŋké ŋgɔ́ á efɔ epuɔ Islaɛl, á fhó ánɛ mbaŋne paŋné tsetsɔŋɔ esóʼo, pek ejʉ́ɔ épúp, ḿvéŋ á mbū yí. 43Nɔ́ŋ ŋ́gɛ, a lɛɛ́ nnéŋɛ ntē yí ánɛ Ndém tɛ ndʉ́ɛ́ ŋ́gɛ, yí é si ŋgɔ́ á Méŋ Ndém. A gɔ́ ŋké ŋgɔ́ éyi Ndém mɛ́t a kɔɔ̄ŋ á yí, á shʉʼ tsetsɔŋɔ, ntswí á yí á mbū lewhʉ̄. » 44Tɛ mbɔɔ metsɔ́ŋ pīi mɛ́ ŋkwɛ̄te á wɔ́p a pɔ́p, é zéŋ nnɔ̄ŋ nzɔ̄tɛ á yí azɔ́p ndeŋ ndeŋ épúp.
Lekwhʉ̄ Yɛɛ́so
(Mlk 15.33-41; Lúk 23.44-49; Jáŋ 19.28-30)
45Á kó ŋgɔ́ á táŋ‑azokó ndeŋ ndeŋ, nzém é pú eséŋ á esī atsetsáʼ ntsem, tɛ ndáʼ ntshí menu ntɛ́t mbwɛɛ́t‑njhʉ̄. 46Menu ntɛ́t mɛ́t á kuʼ páʼā, Yɛɛ́so á gaʼte mé ŋghi teté ŋ́gɛ: «Eli, Eli lema sabaktani. » Ńdɔkɔ ŋ́gɛ: «Ndém ga, Ndém ga, o ó wáʼ á gá melaʼ akɔ̄?» 47Emɔ̄ʼ epuɔ á nnɔ epuɔ pīi, é ŋgɔ́ éwú, é júʼ ndé ŋ́gɛ: «Pɛ ejúʼ páʼ a á ege ntɔ́ŋɔ á Eli. » 48Mmɔʼ ŋiŋ nnɔ wɔp á lɛ ŋkʉ̄te, ŋ́gʉɔ mbɛ́ á pwɛt, ńcɔ̄ʼ ánɛ akiɛ́‑meluʼ, éswík ánɛ athū akekaʼa, ńtsakne nnéŋ á nchu Yɛɛ́so, ŋ́gɛ a eswɛ́te. 49Emɔ̄ʼ epuɔ é nɔŋ ndʉ́ɛ́ ŋ́gɛ: «Ḿpɛ ecʉ́ʼ njʉ́ɔ, kɛɛ Eli a a shʉʼ etswí á yí á mbū lewhʉ̄ lɛ́ɛ. » 50Yɛɛ́so á zéŋ ŋgāʼte leswhī leswhī mé ŋghi teté, ńdɛ ŋkwhʉ́. 51Ŋ́kwhʉ́ épúp, nzhó zīi mɛ́ le lɔ̄k esáne ntē Mía Ŋgyā Ndém, é lɛ efhó á ŋkɔŋ, ésīa nnɛ̄t epak pīa, tɛ ntshí á ntsēŋ. Esī atsetsáʼ é cʉʼne, memía metɔ́ é sáte nnɛ̄t. 52Mesi epuɔ é tsɔ́ʼɔ ntshí, mepfhō epuɔ tɛ nzá pīi, pɔ́ le gē ekwhʉ́, éfɛ́ nnɛ̄t zɔp ŋgyá á mbū Ndém, é zím, 53éfhó á lesi ntóte. Yɛɛ́so á shʉʼ nzím ánɛ lewhʉ̄, pɔ́ pú ŋkó á ntē te alɔ́ʼ tésɔŋ, epuɔ tɛ nzáne é jʉ́ɔ á wɔ́p. 54Tɛŋgyā wɔ lʉɔ́ʼ‑ncu pɔ́ a epuɔ pīi, é nnɔŋ mbípɛ á Yɛɛ́so, é jʉ́ɔ páʼ esī atsetsáʼ e é cʉʼne, ńjʉ́ɔ menu mīi é tɔ́k, mía mía ecɔʼ á pú ŋgɔ̄ á wɔ́p, pɔ́ lé ŋ́gɛ: «Anuúnē, ŋiŋ wuɔ a á ŋgɔ́ á Méŋ Ndém. »
55Wɔnzwí tɛ nzáne é le tshí azɔ́p tɛ éwú, tɛ́ njʉ́ɔ emuɔ menu mɛ́t. Ŋ́gɔ́ wɔnzwí pīi, pɔ́ le tsé á nzem Yɛɛ́so tɛ efhó á Ŋgaliléa, ńzīŋɛ ntswítɛ á yí. 56Á lɛ á nnɔ pɔ́p, ŋ́gɔ́ Malía mɔ́ Makdala, ŋ́ghʉ̄ á Malía mía Jáak, ńzéŋ ŋgɔ́ á mía Yosɛ́p, ŋ́ghʉ̄ á mía ewɔŋkhʉ̄ Zebedé.
Mɛ́ é ega ntúŋɔ á Yɛɛ́so
(Mlk 15.42-47; Lúk 23.50-56; Jáŋ 19.38-42)
57Á ghʉ ŋgɔ́ mbwɛɛ́t‑njhʉ̄, mmɔʼ mía ŋiŋ á shʉʼ, lezēŋ tsí é gɔ́ lɛ Yosɛ́p, ŋ́gɔ́ á ŋiŋ tésɔŋ Alimaté, mbɔ a le cʉ́ʼ azí á ŋiŋ nnɔ Yɛɛ́so. 58Ŋiŋ wuɔ mɛ́t á gʉɔ njʉ́ɔ á Pilat, ńdɔ́ á apfhō Yɛɛ́so á mbū yí, ŋ́gɔ̄ á ntúŋɔ. Pilat á tswi ŋ́gɛ, mɛ́ eyá á mbū yí. 59Yosɛ́p á tswíʼ apfhō Yɛɛ́so, ńdɔ̄k mmɔʼ ntií mɛkúkú#27.59 Mɛ́ lɔɔ̄k mmɔʼ ntií ndap, mɛ́ tɔ́ŋ lɛ lɛ́ɛŋ, tɛ́ ndɔk ncūŋte ejʉɔ ntií mɛkúkú mɛ́t. eswhī, ńzémte. 60Ńdɔk ŋgʉ̄ɔ ńnɔ̄ŋ á ntē lesi tsí méŋwɛ̄t tsīi a le tswīī, mɛ́ gʉɔ́p á mbe mía tɔ́, é pú nzɛ́t eswhī. Ŋ́kʉ̄ŋte mmɔʼ mía tɔ́, ńdɔk ŋkápte nchu, ŋ́gʉ̄ɔ. 61Á ge enéŋ épúp, Malía mɔ́ Makdala, mbɔɔ eyimɔʼ Malía, é náŋ mbēŋne nchu lesi, ńnɔŋ njʉ́ɔ.
Wɔ lʉɔ́ʼ‑ncu é ega mbípɛ lesi Yɛɛ́so
62Njhʉ̄ é lá, ŋ́gɔ́ aleʼé zīi, á páte aleʼé zīi, mɛ́ pɛ́ttɛ aleʼé aswite. Wɔ nɔŋ‑epɔʼ epi melʉɛ pɔ́ epuɔ Falísia é pú ŋgɔ́ á taʼ nnɔ, ŋgʉ̄ɔ á mba Pilat, 63ńdé á mbū yí ŋ́gɛ: «Ŋkɔbé, Pek é si ŋkímtɛ páʼ, ŋgaŋ epoó‑anu wɔ̄ a ke zɛ́t nte, ndé ŋ́gɛ, a tɔ́k eleʼé tɛ́t, yí ezím ánɛ lewhʉ̄. 64Púp, lɛ ntswī ŋ́gɛ mɛ́ epíp lesi, tɛ ndáʼ ntshí ánɛ eleʼé tɛ́t, ḿbɔ́k megaŋ nnɔ pí á leshʉʼ njʉ̄ á apfhō zí, ḿbiŋ ndé á mbū alāʼ ŋ́gɛ, a á zím ánɛ lewhʉ̄. Mɛ́ gɔ́ te ghʉ̄ épúp ɔ́, mbɔ ecʉɔ epoó‑anu mɛ́t, é piŋ epú egáʼ etɔ́k etsi mvhɔ. » 65Pilat á tsɔ́ʼ á mbū pɔ́p ŋ́gɛ: «Wɔ lʉɔ́ʼ‑ncu e epwɔ̄. Pɛ egʉ̄ɔ, ŋ́gɔ ŋghʉ̄ mɛ́ epíp lesi, páʼ pɛ é si ŋkɔ̄ŋɔ. » 66Pɔ́ gʉɔ ncūŋte páʼ mɛ́ e píp lesi épúp, ńcuŋte efē á tɔ́ yīi mɛ́ ke lɔ̄k ŋkápte nchu lesi, ńtshí wɔ lʉɔ́ʼ‑ncu éwú ŋ́gɛ, pɔ́ enɔŋ mbípɛ.
Currently Selected:
Matío 27: ybb
Highlight
Share
Copy
Want to have your highlights saved across all your devices? Sign up or sign in
© CABTAL
