Matío 16
16
Pɛ ezhɛ́ á leyiŋ ŋghʉʉ́‑anu Ndém
(Mlk 8.11-13; Lúk 11.16, 29; 12.54-56)
1Epuɔ Falísia pɔ́ a epuɔ Sadúsia, é shʉʼ ntshóte nnɛ̄t mé lezēŋ Yɛɛ́so, ńdʉ̄ʼ á yí letā, ńdé á mbū yí ŋ́gɛ, a eghʉ̄ á taʼ ŋkʉʼne anu, a egɔ́ ayiŋne zīi, á tswii á légɛ, mete mí é fhɔ́ɔ á mbū Ndém. 2Yɛɛ́so á pwɛt á mbū pɔ́p ŋ́gɛ: «Á gɔ́ eseéŋ‑njhʉ̄, tɛ lephū é sɛt nnɛ̄t mbāŋ, pɛ lé ŋ́gɛ, njhʉ̄ e e lá, ejʉʼ e epɔ̄ŋ tɛʼ. 3Ŋ́gɔ́ nzemɛ́nzēm, lephū é sɛt nnɛ̄t eséŋ, pɛ lé ŋ́gɛ, ejʉʼ e pék á ayáʼa tɛʼ. Púp, pɛ elɔkɔ ndɛ̄ɛ ncʉ̄ʉ lephū, nzhɛ́ɛ ajū mīi á gɔ á ŋghʉɛ́. Meyiŋne anu mīi, Ndém a á si ntswīi á wɛ́ ánɛ leleŋ njhʉ̄ cʉɔ, pɛ te pīŋ ŋkūʼ á wɛ́ á lezhɛ̄ lɛ̄? 4Epuɔ ŋguʼ puɔ, é epuɔ tepɔŋ, ŋ́gɔ́ wɔ teē‑athū á mbū Ndém. Pɔ́ é si ŋkōnɛ á gá ŋ́gɛ, meŋ eghʉ̄ á taʼ ŋkʉʼne anu, a egɔ́ ayiŋne zīi, á tswii á légɛ, mete má é fhɔ́ɔ á mbū Ndém. Amɔ̄ʼ ayiŋne anu zīi, meŋ gɔ á ntswiī pɔ́p, á té éwú ú, ńdaʼ á leghʉ taʼ ŋkʉʼne anu, páʼ ezi, Ndém a le ghʉ̄ ánɛ Jonási. » Yɛɛ́so á lé épúp, ésákne á wɔ́p á ajʉʼ mɛ́t, ŋ́gʉ̄ɔ.
Yɛɛ́so a á ega nthúɔ alɔ́ʼ ánɛ anu zīi, epuɔ Falísia é zíʼnɛ epuɔ
(Mlk 8.14-21; Lúk 12.1-6)
5Nnɔ Yɛɛ́so é ghʉ ŋgē etó ntshi egʉɔ mé nzéŋ mmɔʼ, ńdēkne á lewɛ mblɛ. 6Yɛɛ́so á lé mé pɔ́p ŋ́gɛ: «Pɛ elāk athū zɛ́. Pɛ epá á mɛt epuɔ Falísia pɔ́ eyi epuɔ Sadúsia, a á páʼ levwi lā. » 7Pɔ́ júʼ épúp, ńnɔŋ esáŋa á tsetsɛlɛ pɔ́p ŋ́gɛ, a lʉ́ɛ́ melaʼ mīi, pɔ́ ndēkne á lewɛ mblɛ. 8Yɛɛ́so á júʼ épúp, ńdé á mbū pɔ́p ŋ́gɛ: «Lefɛ̄ nnɛ̄t wɛ ŋgyá mé meŋ, a te kʉɔ́k e. Melaʼ akɔ̄ pɛ sáŋa á nnɔ pɛ ŋ́gɛ, melaʼ mīi, pɛ te mblɛ wɛ̄ ɛ̄? 9Pɛ lɔkɔ nzɛ́t áa te júʼ lɛ́? Pɛ te zɛ́t ŋkímtɛ mblɛ ntāʼ táa zīi, meŋ nde lɔ̄k nzék á ŋiŋnɔŋ ntsāʼ táa lɛ̄? Pɛ le cuʼté avoʼ, á ló metúŋ méshɔ́ʼɔ́? 10Pɛ ka zéŋ ŋkímte mblɛ ntāʼ esambīa zīi, meŋ nde lɔ̄k nzék á ŋiŋnɔŋ ntsāʼ lekua á lɛ̄? Pɛ le cuʼté avoʼ, á ló metúŋ akelaʼ méshɔ́ʼɔ́? 11Pɛ é gaá, pɛ te júʼ á légɛ, meŋ ndʉ́ɛ́ á mbū pɛ ŋ́gɛ, pɛ epá á levwi epuɔ Falísia, mbɔɔ eyi epuɔ Sadúsia páʼā, meŋ te ndʉ́ɛ́ á kwaʼ mblɛ ɛ̄? 12Pɔ́ lɛ njúʼ á légɛ, Yɛɛ́so a kaá ndʉ́ɛ́ ŋ́gɛ, pɔ́ epá á levwi yīi, mɛ́ lɔkɔ ncūŋtɛ mblɛ lā. A á ndɔkɔ ndʉ́ɛ́ ŋghʉ̄ áa lɛ, pɔ́ epá á mɛt yīi, epuɔ Falísia pɔ́ a epuɔ Sadúsia, é zíʼnɛ epuɔ.
Piɛ a á ega ndʉ́ɛ́ ŋ́gɛ, Yɛɛ́so a á Méŋ Ndém
(Mlk 8.27-30; Lúk 9.18-21)
13Yɛɛ́so á gʉɔ tɛ ŋkó á amɔ̄ʼ apak alāʼ, mɛ́ tɔ́ŋ lɛ Sezale Fílíio#16.13 Sezale Fílíio a á si ŋgɔ́ á mía mía tésɔŋ ánɛ apak alāʼ jʉɔ mɛ́t., ńzɛ́tte nnɔ yí ŋ́gɛ: «Epuɔ menɔŋ é si ndʉ́ɛ́ ŋ́gɛ akɔ̄, ánɛ Méŋ‑Ŋiŋnɔŋ wuɔ ɔ̄?» 14Pɔ́ pwɛt ŋ́gɛ: «Emɔ̄ʼ epuɔ é si ndʉ́ɛ́ ŋ́gɛ, o ó Jáaŋ nnoʼ‑epuɔ á ntshi. Emɔ̄ʼ é nɔŋ ndʉ́ɛ́ ŋ́gɛ, o ó Eli. Emɔ̄ʼ é kó nnɔ̄ŋ ndʉ́ɛ́ azɔ́p ŋ́gɛ, o ó Jelemi, ŋ́ké te épúp ɔ́ mbɔ, o ó mmɔʼ ntswi‑ŋke Ndém. » 15Á pwɛt á mbū pɔ́p ŋ́gɛ: «Ḿbiŋ ŋgɔ́ mé pɛ, pɛ nɔ̄ɔŋ ndʉ́ɛ́ azɛ́ ŋ́gɛ akɔ̄?» 16Simɔŋ Piɛ á tswí ashuŋne, ńtsɔ́ʼ ŋ́gɛ: «O ó páʼā, ŋ́gɔ́ á Nzaʼ‑Ŋkhʉ á ntɔ̄ŋ apuʼ, á Méŋ Ndém yīi a naáŋ nte. » 17Yɛɛ́so á lé á mbū yí ŋ́gɛ: «Simɔŋ méŋ Jonási, o ó eshhʉ̄ mbɔŋ, ŋiŋnɔŋ mesɔŋ á nchu mé ka shúŋ á wú anu zīi, o ó lé lā á. Mɔʼɔ́ ga yīi, a á lephū mé shúŋ á wú. 18Meŋ á ké ndé á mbū wu ŋ́gɛ: o ó lɛ Piɛ, ńdɔkɔ ŋ́gɛ tɔ́. Meŋ a shʉʼ etshí alúŋ zá á ndo tɔ́ wuɔ mɛ́t. Emɔ̄ʼ mete lewhʉ̄, e epiŋ mbú ńdáʼ le alúŋ mɛ́t cʉʼne. 19Meŋ a shʉʼ eyá mekí, á lelɔk ntsɔ́ʼ nchu Lefɔ Ndém á mbū wu. Akʉ̄ɛ akʉ̄ɛ ntsem zīi, o ó cʉ tɛ mvéŋ á esī atsetsáʼ, a egɔ́ á athʉ́ lephū, ŋ́gɔ́ mvéŋ veéŋ. Akʉ̄ɛ akʉ̄ɛ ntsem zīi, o ó cʉ tɛ ndʉ̄ʼ, á esī atsetsáʼ, a egɔ́ á athʉ́ lephū, ŋ́gɔ́ ndʉʼ lʉʼe. » 20Á lé épúp, ḿbiŋ nchʉ́ nnɛ̄t ntswɛ̄te nnɔ yí ŋ́gɛ, ndɛ́ʼ pɔ́ shúŋ á ŋiŋ ŋ́gɛ, yí é Nzaʼ‑Ŋkhʉ á ntɔ̄ŋ apuʼ.
Yɛɛ́so a á ega ndʉ́ɛ́ ŋ́gɛ, yí e shʉʼ ejʉ́ɔ ŋgʉɔ̄ʼ, ékwhʉ́, épiŋ ezím
(Mlk 8.31-33; Lúk 9.22)
21Á fhó afʉʼ mɛ́t, Yɛɛ́so Klísto á zi á leshūŋne á mbū nnɔ yí esá saá ŋ́gɛ, yí pɔŋteé á legʉɔ mé Yelósalɛm, ékó éwú, mekém alāʼ, ŋ́ghʉ̄ wɔ nɔŋ‑epɔʼ epi melʉɛ mbɔɔ wɔ kɛ́ʼte‑mbé Ndém, e eyá á yí ŋgʉɔ̄ʼ tɛʼ, tɛ ŋghʉ̄ mɛ́ ezwhí á yí. A epiŋ ŋgɔ́ eleʼé tɛ́t, Ndém a eghʉ̄, yí ezím ánɛ lewhʉ̄. 22Piɛ á júʼ épúp, ńtɔ́ŋ á yí, pɔ́ yí é náʼ efwɔ̄ʼ nnɛ̄t, á zi á lecɔ̄k á yí ŋ́gɛ: «Ndém a elɛ̄ ŋkápte á wú me Mɔʼɔ́ wek. Ndɛ́ʼ ntií anu páʼa, é ghʉ á wú. » 23Yɛɛ́so á pekne nnɛ̄t, ńdé mé Piɛ ŋ́gɛ: «Sɛ́ta, fhó á nzem meŋ ŋgʉ̄ɔ. O ó si mvɛ́nɛ á gá á leghʉ ajū mīi, Ndém a á si ŋkɔ̄ŋɔ. Akwaŋte jú á té si ŋgɔ́ akwaŋte Ndém ɛ́, á si ŋgɔ́ áa azi epuɔ menɔŋ. »
Ntií ŋiŋ zīi e gɔ etsé á nzem Yɛɛ́so
(Mlk 8.34–9.1; Lúk 9.23-27)
24Yɛɛ́so á zéŋ ndé á mbū nnɔ yí ŋ́gɛ: «Ŋiŋ a nɔŋ ŋkɔ̄ŋɔ á yí á letsē á nzem meŋ, á tshi á yí á lelhʉ athū zí yí méŋwɛ̄t nnéŋ, ḿvéŋ á yí á lekʉɛ á mbaŋne paŋné yi mbīʼ#16.24 Ḿbīʼ á mbaŋne paŋné, ńdɔkɔ ŋ́gɛ, ḿvéŋ á lekwhʉ̄ melaʼ Yɛɛ́so., ńdɔk ŋgɔ́ á nzem meŋ. 25Ŋiŋ a nɔŋ ŋkɔ̄ŋɔ á lepīp nnɛ̄t zi, ḿbɔ́kɔ á lewhʉ̄, mbɔ a a ké eláʼ ekwhʉ́, épíi. Ŋiŋ a piŋɛ ŋgwáʼ athū nnɛ̄t zí melaʼ má, mbɔ a a láʼ egɔ́ éwú. 26Ŋiŋ a púu ŋgwɛ̄ lewūʼ ŋgɔŋ ntsem, á ndo esī atsetsáʼ, ḿbīŋ ŋkwhʉ́ ḿbí ndaʼ, mbɔ a á jhʉ́ akɔ̄ apɛ ɛ̄? Ŋiŋ a gɔ elɔ̄k akɔ̄, ńdɔk ŋkúmne athū nnɛ̄t zí í? 27Pɛ ezhɛ́ á légɛ, Méŋ‑Ŋiŋnɔŋ a a láʼ epiŋ nzem pɔ́ a mecɔʼ Ndém, á ntē shʉ́shɔ́k Mɔʼɔ́ yi, éfhó ánɛ meziŋɛ́ awíɛ awíɛ, tɛ́ eyá ntsɔʼɔ́ afaʼ yí. 28Kwaʼ anuúnē, meŋ shúŋɔ á wɛ́ ŋ́gɛ, emɔ̄ʼ epuɔ é nnɔ pɛ ega tsetsɔŋɔ pīi, pɔ́ té shʉʼ ekwhʉ́ té gɔ́ yīi, pɔ́ é jʉ́ɔ á Méŋ‑Ŋiŋnɔŋ á leshʉʼ páʼ taʼ efɔ lā á.
Currently Selected:
Matío 16: ybb
Highlight
Share
Copy
Want to have your highlights saved across all your devices? Sign up or sign in
© CABTAL
