Lúkási 8
8
Wɔnzwí pīi é le nɔ̄ŋ nzhɛnɛ á Yɛɛ́so
1Á tɔ́k eleʼé shɔ́ʼɔ́ lɛ́, Yɛɛ́so pɔ́ a nnɔ yí, épi mmɔ̄ʼ ntsɔp pīa mé legēm, é nɔŋ ntɔ́ktɛ ánɛ metésɔŋ pɔ́ a mekap alāʼ, ńtswīi ŋke mbɔŋ, ńnɔŋ ŋkɛ́ʼtɛ eshúŋɔ epuɔ páʼ Lefɔ Ndém é épúp. 2Emɔ̄ʼ wɔnzwí é nɔŋ nzhɛ̄nɛ á yí, emɔ̄ʼ é gɔ́ á nnɔ éwú pīi, a ke ghʉ̄ʉ̄, egɔ tsɔ́p é te. Emɔ̄ʼ é gɔ́ pīi, a ke fhó ánɛ pɔ́p, ńjūŋ mesī mīi é kɛɛ́ ŋgyáa á wɔ́p ŋgʉɔ̄ʼ. Épuɔ páʼ Malía, éfhɔ́ɔ á Makdala, éyi Yɛɛ́so a le jūŋ mesī ánɛ yí esambīa. 3Ŋ́ghʉ̄ á Jáane nzwí Shuza, á ncʉte‑mba Elōde, ŋ́ghʉ̄ á Sesána mbɔɔ emɔ̄ʼ wɔnzwí tɛ nzáne. Pɔ́ a pɔ́p é pú nnɔ̄ŋ nzīŋɛ, pɔ́ nɔŋ ndɔ̄kɔ etsō tsɔ́p, ńtswítɛ á Yɛɛ́so pɔ́ nnɔ yí.
Ashuŋne lepúʼ ánɛ mbhi‑etsō
(Mat 13.1-9; Mlk 4.1-9)
4Yɛɛ́so a le nɔ̄ŋ nzīŋɛ épúp, mɛ́ nɔŋ efhɔ́ɔ á meshhʉ̄ meshhʉ̄, éshʉʼɛ njʉ́ɔ á yí. Nnɔ é lɛ ncúʼte tɛ nzáne, á lɔk ashuŋne lepúʼ jʉɔ, ńdé á mbū pɔ́p ŋ́gɛ: 5«Mmɔʼ ŋiŋ a le gʉ̄ɔ á ŋkāʼ yí, á mbhií etsō#8.5 Jʉ́ɔ́ á Mat 13.3., ŋ́kó á lephi etsō mɛ́t, emɔ̄ʼ mesa é whʉte á ndo mɛnzhɛ, epuɔ menɔŋ é nɔŋ ntsīa, ńnēŋte. Meséŋ é shʉʼ azɔ́p ntsókte, ḿbú mpfɛ́t. 6Emɔ̄ʼ mesa é whʉte ánɛ méŋ atsáʼ á ndo metɔ́, éshʉʼ esáʼ, ńdɛ nzó, melaʼ mīi ajʉʼ esī mɛ́t, á lɛ si nzóne zoné. 7Emɔ̄ʼ mesa etsō mɛ́t, é whʉte á ntē mmɔʼ tepɔŋ mvēŋ, pɔ́ yí é púte esáʼ, á pú ŋkwɛ́t etsō mɛ́t, tɛ é pú te júʼ á letswhī ɛ́. 8Emɔ̄ʼ mesa etsō mɛ́t, é le ké ŋgwhʉte á ajʉʼ atsáʼ mbɔŋ, éshʉʼ esáʼ, ńtswhí, ńzém á mbɔŋɔ́, tɛ mɛ́ lu efāʼ, é tɔ́k etsi mɛ́ le phī á ajʉʼ mɛ́t, ŋgʉɔ ŋkhʉ. » Yɛɛ́so á piŋ ŋgē emakne, ńdé mé ŋghi teté ŋ́gɛ: «Ŋiŋ a wiɛ metuúŋ á lelɔk njúʼ ejʉʼ, á júʼ. »
Melaʼ akɔ̄ Yɛɛ́so á lɔkɔ ashuŋne lepúʼ tɛ́ eshúŋnɛ ɛ́?
(Mat 13.10-17; Mlk 4.10-12)
9Nnɔ Yɛɛ́so é zɛ́tte á yí ŋ́gɛ: «Ajʉɔ ashuŋne lepúʼ á páʼa, ńdɔkɔ ŋ́gɛ akɔ̄?» 10Yɛɛ́so á lé mé pɔ́p ŋ́gɛ: «Pɛ pwɔ̄, Ndém a ke ghʉ̄ʉ̄, pɛ zhɛ́ ajū mīi á lʉɔneé ánɛ lefɔ tsí. Ḿbiŋ ŋgɔ́ mé emɔ̄ʼ epuɔ, mɛ́ lɔk ashuŋne lepúʼ tɛ́ eshúŋ á wɔ́p anu ánɛ Lefɔ Ndém,
tɛ́ pɔ́ ecʉ̄te ejʉʼ, pɔ́ le azō jʉ́ɔ,
ńzwíʼte ejʉʼ, pɔ́ le azō júʼ, páʼ mɛ́ le láʼ ntí épúp. »
Yɛɛ́so a á ega ŋkɛ́ʼtɛ ashuŋne lepúʼ ánɛ mbhi‑etsō
(Mat 13.18-23; Mlk 4.13-20)
11Yɛɛ́so á zéŋ ndé ŋ́gɛ: «Ashuŋne lepúʼ jʉɔ, á páʼa ndɔkɔ ndʉ́ɛ́ ŋ́gɛ: nzwɛt etsō, é si ŋgɔ́ ashuŋne Ndém. 12Emɔ̄ʼ epuɔ é swhií ndo mɛnzhɛ zīi, ashuŋne mɛ́t á whʉ éwú, pɔ́ juúʼ ashuŋne Ndém, táʼ, Sɛ́ta á shʉʼ efhó á ntē pɔ́p efók, ńdɔkɔ mvɛ́nɛ ŋ́gɛ, ndɛ́ʼ pɔ́ evéŋ, ńtswɛ́t. 13Emɔ̄ʼ epuɔ é zéŋ ŋgɔ́ páʼ, ajʉʼ metɔ́ zīi, ashuŋne mɛ́t á whʉ éwú lā. Pɔ́ juúʼ ashuŋne Ndém, ńtswí mé lekāk. Táʼ, ḿbiŋ te ntē wɔ́p éwú néŋ. Ashuŋne Ndém á mbū pɔ́p, ŋ́gɔ́ páʼ athʉ́ zīi meŋgaŋ é té éwú lā. Méŋ agáʼ ŋgʉɔ̄ʼ á lɛ ŋgē eshʉʼe, pɔ́ pú ŋgwáʼ anu Ndém. 14Emɔ̄ʼ é piŋ eswhí á ajʉʼ tepɔŋ mvēŋ zīi, ashuŋne mɛ́t á whʉ éwú, pɔ́ juúʼ ashuŋne Ndém, ńdɛ ŋgē etém nzem, ńzī á lenēŋ akwaŋte zɔ́p ánɛ etsō esī atsetsáʼ, ńzī á lefaʼ lewūʼ, ńzī á lefaʼ lenāŋ lembɔŋ á esī atsetsáʼ. Anu Ndém á lɛ mbú mbí á ntē pɔ́p, té ghʉ amɔ̄ʼ azō. 15Emɔ̄ʼ epuɔ é piŋ ŋkó ŋ́gɔ́ páʼ ajʉʼ atsáʼ mbɔŋ zīi, ashuŋne mɛ́t á whʉ éwú lā, pɔ́ juúʼ ashuŋne Ndém, ńdɔ̄k ntē mbɔŋ ntswí, ŋ́kúʼte á mbɔŋɔ́, ŋ́gɔ́ ndeŋ ndeŋ, éfhó ánɛ lekak ete, ánɛ mɛnzhɛ Ndém, ńzém ntá. »
Mɛ́ gɛ té ndʉ̄ɔ anu Ndém ɛ́
(Mlk 4.21-25)
16Yɛɛ́so á zéŋ ndé ŋ́gɛ: «Mɛ́ gɛ té ndɛ́tɛ á láam, ŋ́káptɛ mé ŋgwʉ́ŋ ɛ́. Ḿbiŋɛ te ntshíɛ á ekesī‑ekó ɔ́. Mɛ́ lɛteé á láam páʼā, ńtshí áa mé athʉ́, á kɛʼɛ ejʉʼ tɛ ŋgɔ́ yīi, ŋiŋ a nɔŋ ŋkúɔ́ á ŋgyā, á jʉ́ɔ ejʉʼ á mbɔŋɔ́. 17Akʉ̄ɛ akʉ̄ɛ zīi á ndʉɔne lʉɔne lɛ́, Ndém a a ké eshʉʼ eghʉ, mɛ́ ezhɛ́ zhɛ́. Akʉ̄ɛ akʉ̄ɛ zīi á ntē ntsem lɛ́, a ekɛ́ʼɛ, mɛ́ epú njʉ́ɔ. 18Pɛ epá ntií zīi, pɛ lɔkɔ njúʼɔ anu Ndém, melaʼ mīi awíɛ awíɛ yīi, a á júʼ ŋkúʼte á mbɔŋɔ́, Ndém a a shʉʼ eghʉ, a etswiʼne nzhɛ́ á mbɔŋɔ́. Táʼ, awíɛ a piŋɛ njúʼ, ŋ́gwák wáke, mbɔ Ndém a a kú á méŋ agáʼ yīi, a á kwaŋ ŋ́gɛ, yí é nzi njúʼ. »
Wɔ awɔ́ é si ŋgɔ́ epɔ̄ memía Yɛɛ́so mbɔɔ mɛ́ wɔp e?
(Mat 12.46-50; Mlk 3.31-35)
19Yɛɛ́so á zɛ́t nzhɛ á nzíʼne epuɔ épúp, epɔ̄ memía pí mbɔɔ mɛ́ wɔp, é shʉʼ á njʉ́ɔ yí. Á gɔ́ páʼ epuɔ é lɛ á ŋgyā tɛ nzáne lā, pɔ́ té kūʼ a letɔ̄k tɛ ntswɛ́tte á yí í. 20Mɛ́ lé á mbū yí ŋ́gɛ: «Mɛ́ wu pɔ́ a epɔ̄ memía pú, é tshiteé á apɛ́, ńzwíʼtɛ á wú. » 21Yɛɛ́so á piŋ mbwɛ̄t ńdé ŋ́gɛ: «Mɛ́ ga, pɔ́ epɔ̄ memía pá, é si ŋgɔ́ epuɔ pīi, pɔ́ é si njúʼɔ ashuŋne Ndém, ńzéŋɛ ŋghʉ̄ɛ ndeŋ ndeŋ épúp. »
Yɛɛ́so a á ega ncɔ́kɔ afēm pɔ́ ntshi
(Mat 8.23-27; Mlk 4.35-41)
22Á lɛ amɔ̄ʼ aleʼé, Yɛɛ́so á lé á mbū nnɔ yí ŋ́gɛ: «Ḿpɛ etó ntshi, ŋ́gʉɔ mé nzéŋ mmɔʼ. » Pɔ́ zíʼ ŋkó á ntē amɔ̄ʼ akɛnūʼ#8.22 Akɛnūʼ jʉɔ mɛ́t, apū nzhó zīi, mɛ́ le tseŋɛ̄ éwú, mé yaá yí eshhʉ̄, á lelɔk nzīŋ., ńdɔk ŋgʉ̄ɔ. 23Akɛnūʼ mɛ́t á ge enɔŋ eziŋɛ, Yɛɛ́so á nɔŋ ndíi, mmɔʼ mía afēm á veŋne, ḿbú ntúʼ á ndo ntshi, ŋ́ghʉ̄, ntshi é pú ŋkó á ntē akɛnūʼ, tɛ pɔ́ pú ncʉ́ʼɛ ŋgɔ̄ áa egʉɔ á ntshi. 24Nnɔ Yɛɛ́so é ziɛ á yí, ńdé á mbū yí ŋ́gɛ: «Mɔʼɔ́ wek, mɔʼɔ́ wek, a ayi ḿpɛ é mi lāa. » Yɛɛ́so á ziɛ, ńcɔ́k afēm mɛ́t, ńzéŋ ncɔ́k ntshi yīi é nɔŋ ncʉ̄ʼnɛ akɛnūʼ. Afēm á záʼa lɛ kók. Ntshi é pwɛ́t lɛ jɔʼ. 25Yɛɛ́so á lɛ ntúŋte nnɔ yí ŋ́gɛ: «Pɛ lɔkɔ nzɛ́t áa te fɛ́ nnɛ̄t zɛ, ŋ́gyá á mbū meŋ lɛ́?» Ecɔʼ é piŋ mbú ŋgɔ̄ á wɔ́p, ejʉʼ é pú ŋkʉ̄ʼne á wɔ́p. Pɔ́ lé á tsetsɛlɛ pɔ́p ŋ́gɛ: «Eziɛ́ ntií ŋiŋ e ejʉɔ páʼa ā? A á ega ncɔ́kɔ afēm pɔ́ ntshi, é júʼɔ nchu yí. »
Yɛɛ́so a á ega njūŋɔ mesī ánɛ ŋiŋ
(Mat 8.28-34; Mlk 5.1-20)
26Pɔ́ le tó ntshi, ńdɛ ŋkó á lezēŋ mmɔʼ tésɔŋ, mɛ́ tɔ́ŋ lɛ Jeláza, pɔ́ ŋgɔŋ Ŋgaliléa zīi pɔ́ fhó éwú lā, é lɛ á nzéŋ nzéŋ. 27Yɛɛ́so á lɛ ŋgē efhó á ntē akɛnūʼ esóʼo, mmɔʼ ŋiŋ tésɔŋ mɛ́t, mbɔ mesī é lē ŋgɔ á yí, á shʉʼ ntswɛ́tte á yí. Mbɔ a le láʼ ntó á mba yí tɛ efhó tɛ afʉʼ, ńzīŋɛ atseŋ te nzhó, ḿbiŋɛ nnáŋa á ajʉʼ zīi, mɛ́ gɛ ntúŋɔ mepfhō éwú. 28Ńdɛ ŋgē ejʉ́ɔ á Yɛɛ́so, ŋ́gwhʉ̄ á mekhu yí, ŋ́gɔ́ si nnɔŋɔ ŋgāʼtɛ mé nte ŋ́gɛ: «Yɛɛ́so, Méŋ Ndém‑tɛ‑athʉ́‑lephū, o tswíi akɔ̄ á mbū meŋ ŋ̄? Tsɔ́ʼɔtsɔ́ʼ, te néŋ á gá ánɛ ŋgʉɔ̄ʼ. » 29A lɛɛ́ ndʉ́ɛ́ épúp, melaʼ mīi Yɛɛ́so a á ncɔ́k esī mɛ́t, ŋ́gɛ e efhó ánɛ yí ntó. Esī mɛ́t e lɛɛ́ nnáŋa tɛ mbʉ́ʼɛ nnɛ̄t ánɛ ŋiŋ wɔ̄, mɛ́ ená á yí, ŋ́gɔ̄ á yí, ŋ́kwɛ́t á yí. Mɛ́ lé zi ŋgɔ̄ yí tsɔ ŋgʉɔ shɔ́ʼɔ́ lɛ́, ńdɔ̄k methʉ́ ŋkwɛ́t mekhu mí, ńdɔ̄k á atʉɛ́ ŋkwɛ́t mbū mí, á shuŋ nzáʼ záʼe. Ḿbiŋ mbwɔ́ʼte methʉ́ á mekhu yí. Esī mɛ́t e epiŋ ntshóne á yí, á ekʉ ŋgʉ̄ɔ ŋkʉ́ʼne ŋgáne á késáatswɛt.
30Yɛɛ́so á ghʉ nzɛ́tte á ŋiŋ mɛ́t ŋ́gɛ: «Lezēŋ cú é lɛ awɔ́?» Á pwɛt ŋ́gɛ: «Meŋ á lɛ, Atʉtʉ. » A lɛɛ́ ndʉ́ɛ́ epúp melaʼ mīi, mesī é ánɛ yí tɛ nzáne. 31Mesī mɛ́t, é swíŋte á Yɛɛ́so ŋ́gɛ, ńdɛ́ʼ á juŋ á wɔ́p mmāʼ á apeŋte, pɔ́ ge nnáŋa éwú, ńjʉ́ɔ ŋgʉɔ̄ʼ. 32Amɔ̄ʼ akɛt mekúna á lɛ ánɛ mmɔʼ ndo lekwɛ̄t, ḿpfɛ́tɛ etsō. Mesī mɛ́t é swíŋte á Yɛɛ́so ŋ́gɛ, a elɛ ntswī, pɔ́ egʉɔ ŋkó ánɛ mekúna mɛ́t. Yɛɛ́so á véŋ. 33Pɔ́ fhó ánɛ ŋiŋ wɔ̄, ńtó ŋgʉ̄ɔ ŋ́kó ánɛ pɔ́p. Akɛt mekúna jɔ̄, á pú ntáka, éfɛ́ ŋkʉŋɛ́, ḿbú ŋgʉ̄ɔ á ntshi. 34Mepfɛnne‑mekúna, é jʉ́ɔ anu zīi á tɔ́k, ŋ́gákne mbīŋ nzem, ŋ́kʉte ŋgʉ̄ɔ á tésɔŋ, mbɔɔ ánɛ mekap alāʼ, ḿbɛ́te eshúŋ epuɔ.
35Epuɔ é júʼ anu jʉɔ mɛ́t, ńtóte eshʉ̄ʼ, á ńjʉ́ɔ anu zīi á ghʉ, ńcúʼte á lezēŋ Yɛɛ́so, ńnɔŋ njʉ́ɔ á ŋiŋ yīi, mesī é tó ánɛ yí lā, á náŋ á esī á mvhɔ Yɛɛ́so, ḿmāʼ menzhó. Mbɔ leghi tsí é ndáʼ eshʉ̄ʼ. Pɔ́ jʉ́ɔ épúp, ecɔʼ é pú ŋgɔ̄ á wɔ́p. 36Epuɔ pīi pɔ́ njʉ́ɔ ajū mīi, á ntɔ́k ánɛ ŋiŋ yīi, mesī é ŋgɔ́ ánɛ yí, pɔ́ pɛ́te eshúŋ epuɔ pīi, pɔ́ é shʉʼ, páʼ á tsia épúp tɛ́ á te. 37Epuɔ alāʼ mɛ́t, é cʉ́ʼɛ ncɔ̄ʼ cɔʼe, éswíŋte á Yɛɛ́so ŋ́gɛ á efhó á alāʼ pɔ́p ŋgʉ̄ɔ. Yɛɛ́so á lɛ ŋgɔ̄ ŋkó á ntē akɛnūʼ, ŋ́gʉ̄ɔ. 38Yɛɛ́so a le nɔ̄ŋ ŋgʉɔ, ŋiŋ yīi mesī é ntó ánɛ yí lā, á swíŋte á yí ŋ́gɛ, pɔ́ yí e elɛ ŋgʉ̄ɔ. Yɛɛ́so á lʉʼ, ḿbiŋ ndé á mbū yí ŋ́gɛ: 39«Piŋ nzem mé mba ju, ŋ́kó mbɛ́te éshúŋ epuɔ ŋkʉʼne zīi, Ndém a á ghʉ ánɛ wu. » Ŋiŋ mɛ́t á gʉɔ, ńtɔ́kte ánɛ metésɔŋ, ḿbɛ́te eshúŋ epuɔ anu mbɔŋ zīi, Yɛɛ́so a á ghʉ ánɛ yí.
Yɛɛ́so a á ega ŋghʉ̄ɛ, menzwí á tʉɛ, ńzéŋɛ ŋghʉ̄ɛ, méŋ Jayilus á zímɛ
(Mat 9.18-26; Mlk 5.21-43)
40Yɛɛ́so á tó ntshi, ḿbīŋ nzem tɛ ŋgē ekó á nzéŋ mmɔʼ, nnɔ epuɔ é pú ntswí á yí, melaʼ mīi mɛ́ nnɔŋ mbúu nzwíʼtɛ á yí. 41Mmɔʼ ŋiŋ á shʉʼ á ajʉʼ mɛ́t, lezēŋ tsí é gɔ́ lɛ Jayilus, ŋ́gɔ́ á ŋiŋ yīi, a cʉtɛ menu á ŋgyā aswiŋte á ajʉʼ mɛ́t. A shʉʼ ntɔ́k ndeŋ ndeŋ mé lezēŋ Yɛɛ́so, ŋ́gwhʉ̄ á mekhu yí, ḿbúʼ mbū ŋ́gɛ, a elɛ eshʉ̄ʼ á mba yí, 42tséŋ méŋ yi a á mba, ńcʉ́ʼɛ ŋkwhʉ́ kwhʉʉ́, ŋ́gɔ́ á mɔ́ menzwí, ŋ́gwɛ̄ ŋguʼ ntsɔp pīa mé legēm. Pɔ́ Yɛɛ́so lɛ ntsé á mɛnzhɛ, ńnɔŋ ŋgʉ̄ɔ, nnɔ epuɔ é nɔŋ ŋŋyɛ̄nɛ á yí á ŋkɔʼɔ́ ŋkɔʼɔ́. 43Mmɔʼ menzwí á gɔ́ á ntē nnɔ mɛ́t, mbɔ mɛ́sɔ̄ a á náŋ ánɛ yí, ŋguʼ ntsɔp pīa mé legēm. [Mbɔ a lé tseŋ azí azō tɛ á mi, á mbū megaŋ afho, ánɛ agɔ mɛ́t#8.43 Emɔ̄ʼ membúʼ meŋwaʼne tɛ efʉʼ mvhɔ, é té menu mīi, é ntē akɛ [..] lāa wɛ̄ɛ.], ŋiŋ á piŋ ndáʼ te kūʼ á lepɛ̄t á yí í. 44Á náʼte efhó mé nzem, ńnā apū zí, ḿpfēŋ lepap nzhó Yɛɛ́so, agɔ zí á lɛ nzáʼa. 45Yɛɛ́so á pekne nnɛ̄t, ńzɛ́tte ŋ́gɛ: «Awɔ́ a á pfeŋ á gá á?» Epuɔ metsem é pú ndɛ̄ʼte. Piɛ á lɛ ndé á mbū yí ŋ́gɛ: «Mɔʼɔ́ wek, o ka jʉ́ɔ ŋ́gɛ, mɛ́ é si ŋŋyɛ̄nɛ á wú meshhʉ̄ meshhʉ̄ ɛ́ lɛ̄?» 46Yɛɛ́so á ké ŋŋíŋ ŋīŋ, ńdé ŋ́gɛ: «Ŋiŋ a á ŋɛ́te mpfēŋ á gá. Meŋ á júʼ páʼ mbʉʼ e é tó ánɛ meŋ, ŋ́ghʉ̄ amɔ̄ʼ afaʼ. »
47Menzwí wɔ á jʉ́ɔ páʼ Yɛɛ́so a á zhɛ́, ńzī á lepū mvɛ̄t, éshʉʼ ŋgwhʉ̄ á mekhu yí, ḿbɛ́te eshúŋ, agɔ zīi á ŋgɔ́ ánɛ yí, tɛ́ yí pfeŋ á Yɛɛ́so, ńdɛ ntē, epuɔ metsem é júʼ. 48Yɛɛ́so á lé á mbū yí ŋ́gɛ: «Maá, agɔ jú á mi, melaʼ mīi o ó fɛ́ nnɛ̄t ju ŋgyá mé meŋ. Zhɛ́ á leziŋ. »
49Yɛɛ́so á zɛ́t á nzhɛ eshúŋnɛ, ŋiŋ á fhó á mba, éshʉʼ ndé á mbū Jayilus ŋ́gɛ: «Méŋ wu a á ndáʼ ŋkwhʉ́, te zóko ŋgēnɛ á nziʼnɛ. » 50Ŋ́gē elé, Yɛɛ́so á nɔŋ njúʼɔ, ńdé á mbū Jayilus ŋ́gɛ: «Te pɔ́k azō, fɛ́ áa nnɛ̄t ju ŋgyá mé meŋ. Méŋ wu a a gɔ́ éwú. » 51Pɔ́ yí é gʉɔ tɛ ŋkó á mba, Yɛɛ́so a te véŋ ŋ́gɛ, pɔ́ ŋiŋ e ekó á ŋgyā á. Ńdaʼ Piɛ pɔ́ Jáaŋ mbɔɔ Jáak, ŋ́ghʉ̄ á mía mɔ́ pɔ́ mɔʼɔ́ mɔ́. 52Mvuʼ epuɔ zīi, é nzɛ́t á atetá, ŋ́gɔ́ á si nnɔŋ ndāa lewhʉ̄, Yɛɛ́so á lɛ ndé á mbū pɔ́p ŋ́gɛ: «Ndɛ́ʼ pɛ ezéŋ ndā, mɔ́ a ka kwhʉ́ ɛ́, a á si ndíi lií. » 53Pɔ́ júʼ épúp, ńcʉ́ʼɛ nzwī á Yɛɛ́so zwi, melaʼ mīi, pɔ́ é zhɛ́ á mbɔŋɔ́ á légɛ, mɔ́ a a ndáʼ ŋkwhʉ́. 54Táʼ, Yɛɛ́so á ké ŋgʉ̄ɔ gʉɔ mé ajʉʼ zīi, mɔ́ a á nnɔ̄ŋ éwú, ńtá apū mɔ́ ŋkímne, ńdé á mbū yí ŋ́gɛ: «Méŋ ga, lu á esī. » 55Á zím, ńdɛ efhó á esī ndū. Yɛɛ́so á tswi ŋ́gɛ, mɛ́ efāʼ azō ŋgyá á mbū yí, a epfɛ́t. 56Mɔʼɔ́ yí pɔ́ mɛ́ wɔp, é jʉ́ɔ épúp, á kʉʼne á wɔ́p tɛʼ. Yɛɛ́so á piŋ ntsɛ̄ne á wɔ́p ŋ́gɛ, ńdɛ́ʼ pɔ́ ghʉ tɛ mɛ́ zhɛ́ ajū mīi á tɔ́k.
Currently Selected:
Lúkási 8: ybb
Highlight
Share
Copy
Want to have your highlights saved across all your devices? Sign up or sign in
© CABTAL
