Lúkási 3
3
Jáaŋ Mbaptísi á ega ntswīi ŋke Ndém
(Mat 3.1-12; Mlk 1.1-8; Jáŋ 1.19-28)
1-2Éshʉ̄ʼ ánɛ Jáaŋ méŋ Sakalía, á zɛ́t á késáatswɛt, Ndém á shʉʼ nnáŋ tɛ ntó á yí ŋ́gɛ, a egʉɔ ntswī ŋke. Ŋguʼ mɛ́t, mbɔ Tibɛ́ɛ ŋwɛ́t ŋgɔŋ Lóma, a á sáʼ ŋgɔŋ ŋguʼ ntsɔp táa mé legēm. Pɔ́ŋse Pilat á gɔ́ efɔ ntʉɔʼ yi, ńnɔŋ esáʼa apak ŋgɔŋ Yudéa. Elōde á nɔŋ esáʼa azí á apak ŋgɔŋ Ŋgaliléa, méŋ mɔ́ yi Fílíio á nɔŋ esáʼa epak ŋgɔŋ Itwilé pɔ́ Tlakonitíde. Lizanias á kó nnɔ̄ŋ esáʼa Abilɛne. Á zéŋ ŋgē egɔ́ afʉʼ mɛ́t, Hána pɔ́ Kayif é gɔ́ wɔ tɛŋgyā wɔ nɔŋ‑epɔʼ epuɔ Islaɛl. 3Páʼ Ndém a á ntó á Jáaŋ lā, á gʉɔ ŋkʉ́ʼne ánɛ mekap alāʼ mīi, é eshhʉ̄ akʉŋɛ́ ntshi Juldɛŋ, ńziŋɛ ntswīi á mbū alāʼ ŋ́gɛ: «Pɛ ewáʼ atswhī tepɔŋ zɛ́, ńcʉ́ʼ meŋ enōʼ á wɛ́ á ntshi, Ndém a epiŋ ndēkne mefa mɛ́. » 4Ńtswī épúp, á lɔk mbō páʼ, mɛ́ le tí á ntē aŋwaʼne Izayi ntswi‑ŋke Ndém ŋ́gɛ:
«Ŋiŋ a á késáatswɛt, ńdʉ́ɛ́ mé ŋghi teté ŋ́gɛ:
“Pɛ ecūŋte á mɛnzhɛ Atsyapuɔ,
ésēŋte meliɛ́‑nzhɛ mí,
e etshí ndeŋ ndeŋ.
5Pɛ eták memía mekwɛ̄t pɔ́ mezízí,
ŋ́gíŋne efūʼ,
ḿbʉ́ʼte meŋɔʼɔ́‑nzhɛ,
e etshí ndeŋ ndeŋ.
Ŋ́gíŋne ephʉ̄, mɛnzhɛ
a enɔ̄ŋ ndeŋ ndeŋ.
6Púp, epuɔ metsem e eshʉʼ njʉ́ɔ páʼ, Ndém a ghʉɛ, epuɔ menɔŋ é tswɛ́tɛ.” »
7Jáaŋ á tswi ŋke mɛ́t épúp, atʉtʉ epuɔ á nɔŋ eshʉ̄ʼɛ, ŋ́gɛ á enōʼ á wɔ́p á ntshi. Á lé á mbū pɔ́p ŋ́gɛ: «Pɛ pīi pɛ yikɛ, ńzīŋɛ ŋŋɛ́tte ŋɛtté páʼ menū, awɔ́ a á shúŋ á wɛ́ ŋ́gɛ, pɛ gɔ ekʉ̄ʉ ŋgʉɔ̄ʼ zīi, Ndém a gɔ̄ emaʼ á athū epuɔ, tɛ ntswɛ́t é? 8Pɛ eghʉ̄ menu membɔŋ mīi é si ntswīi á légɛ, pɛ é wáʼ atswhī tepɔŋ zɛ́. Ndɛ́ʼ pɛ elɔ̄ɔk áa nchu ndaʼ, ńdé ŋ́gɛ: “Pek é ndhu Ablaham.” Meŋ shúŋɔ á wɛ́ ŋ́gɛ, Ndém a kuūʼ á lesɛt metɔ́ puɔ, ńdɔk ŋghʉ̄ nzwɛt Ablaham. 9Mɛ́ ndáʼ ŋkāʼ nza, ńdɔ̄kɔ ŋgɔ̄ á ŋkʉɔ́ʼ tɛ mbɔɔ aziɛ́ athʉ́ lɛ́ zīi, á ka ntá mbɔŋ zém ɛ́. Éfhó á esī, ékʉɔ́ʼ ánɛ meŋgaŋ, étɔ á mmók. »
10Alāʼ á júʼ épúp, ńzɛ́tte á yí ŋ́gɛ: «Tɛ pek é páʼa, épiŋ eghʉ páʼ lā?» 11Á pwɛt á mbū pɔ́p ŋ́gɛ: «Ŋiŋ yīi a wɛɛ̄ menzhó mɛ́mbīa, a eyá á taʼ á mbū ŋiŋ yīi, a te wɛ̄. Ŋiŋ yīi a wɛɛ̄ etsō lejhʉ̄, a eyá etsi ŋiŋ yīi, a naáŋ nzi. »
12Emɔ̄ʼ epuɔ é shʉʼ azɔ́p, ŋ́gɔ́ é wɔ tswí‑ncup, ŋ́gɛ Jáaŋ a enōʼ á wɔ́p á ntshi. Ńzɛ́tte á yí ŋ́gɛ: «Ŋkɔbé, pek ekó ŋghʉ̄ azék é lɛ akɔ̄?» 13Á pwɛt ŋ́gɛ: «Pɛ etswí áa ndaʼ ajū mīi, lepé é si nzɛ́ttɛ, ńdɛ́ʼ pɛ etswīʼne. »
14Emɔ̄ʼ wɔ lʉɔ́ʼ‑ncu, é shʉʼ azɔ́p, ńzɛ́tte á yí ŋ́gɛ: «Pek ekó ŋghʉ̄ páʼ lā azék é?» Á pwɛt ŋ́gɛ: «Ndɛ́ʼ pɛ eswɛ́t á ŋiŋ, ńtswí ajūɔ zí. Ndɛ́ʼ pɛ etshí esɔ̄ ánɛ ŋiŋ. Pɛ ezwíʼte áa ndaʼ ŋkāp afaʼ zɛ. »
15Á le gē egɔ́ épúp, alāʼ á nɔŋ nzwíʼtɛ á Nzaʼ‑Ŋkhʉ yīi, Ndém a le laʼnēē. Awíɛ awíɛ á nɔŋ ŋkwāŋtɛ á ntē yí ŋ́gɛ, a gɔ́ amɔ̄ʼ, mbɔ Jáaŋ mé Nzaʼ‑Ŋkhʉ mɛ́t. 16Jáaŋ á zhɛ́, ńdé á mbū epuɔ metsem ŋ́gɛ: «Meŋ wɛɛ̄ á lenoʼ pɛ á ntshi, ŋ́ké nnéŋ áa ntshi ndaʼ ánɛ pɛ. Mmɔʼ ndʉɛ á piŋ nnɔ̄ŋ eshʉ̄ʼɛ, ḿbú ntsyā á gá, tɛ meŋ mbú te kūʼ yīi, meŋ gɔ ekɛ́ʼɛ ŋkhʉ meláŋ mí í. A a shʉʼ azí páʼā, énéŋ Azwakne Ndém ánɛ epuɔ, ézéŋ enéŋ mmók ánɛ epuɔ. 17A wɛɛ̄ á túŋ á mbū yí, ńdɔkɔ efwɔ́kɔ etsō tsí. Éfwɔ́k épúp, énéŋ etsi mbɔŋ á ŋkiŋ, épiŋ etɔ ekaŋne á ntē mmók yīi, é té láʼ epí í. »
18Á le lé épúp, ḿbiŋ nzéŋ ŋ́gyá emɔ̄ʼ ntekné tɛ nzáne á mbū alāʼ. Á páʼa, tɛ́ Jáaŋ a le tswī ŋke mbɔŋ Ndém. 19Ńzéŋ ŋkāk á Ŋgɔpna Elōde, melaʼ mīi a le kʉ̄ɛ Elodiade nzwí méŋ mɔ́ yi. Ńzéŋ ŋkāk á yí melaʼ emɔ̄ʼ menu tepɔŋ tɛ nzáne mīi, a le ghʉ̄ʉ̄. 20Elōde á lɛ mbú ŋgē etswiŋ, ńtswī mɛ́ gɔ á Jáaŋ, ńnéŋ á ŋgyā atʉɛ́.
Jáaŋ a á ega nnōʼo á Yɛɛ́so á ntshi
(Mat 3.13-17; Mlk 1.9-11)
21Á lɛ amɔ̄ʼ aleʼé, tɛ mɛ́ zɛ́t té néŋ á Jáaŋ á ŋgyā atʉɛ́, á noʼ alāʼ á ntshi tɛ á mi, Yɛɛ́so á shʉʼ azí, á noʼ á yí á ntshi. Yɛɛ́so á nɔŋ eswíŋtɛ á Ndém, lephū é lɛ ntsɔ́ʼɔ ntshí. 22Azwakne Ndém á fhó éwú esóʼo, ŋ́gɔ́ páʼ akepēŋ lā, ńnáŋ ánɛ yí. Mmɔʼ ŋghi é fhó éwú ndé ŋ́gɛ: «O ó Méŋ ga, meŋ kɔ̄ɔŋ á wú tɛʼ, o ghʉʉ̄ ntē gá é gáŋte#3.22 Emɔ̄ʼ membúʼ meŋwaʼne tɛ efʉʼ mvhɔ, é lé ŋ́gɛ: «O ó Méŋ ga. Tɛ efhó á ayáʼa, meŋ á chʉ́ á wú».. »
Elhu ŋgyā wɔ Yɛɛ́so
(Mat 1.1-17)
23Yɛɛ́so a le gē ezi afaʼ zí, ŋ́gwɛ̄ ajūɔ ŋguʼ megēm ńtɛ́t. Mɛ́ kwaŋ ŋ́gɛ, a á méŋ Yosɛ́p.
Yosɛ́p mɛ́t a lɛ á méŋ Eli.
24Eli á kó ŋgɔ́ á méŋ Matat,
Matat á kó ŋgɔ́ á méŋ Levi,
Levi á kó ŋgɔ́ méŋ Mɛlki,
Mɛlki mɛ́t a lɛ á méŋ Janayi,
Janayi á kó ŋgɔ́ á méŋ Yosɛ́p,
25Yosɛ́p á kó ŋgɔ́ á méŋ Matátias,
Matátias á kó ŋgɔ́ á méŋ Amɔs,
Amɔs á kó ŋgɔ́ azí á méŋ Nahum,
Nahum á kó ŋgɔ́ á méŋ Ɛsli,
Ɛsli á kó ŋgɔ́ á méŋ Nagaye.
26Nagaye á kó ŋgɔ́ á méŋ Máat,
Máat á kó ŋgɔ́ á méŋ Matatias,
Matatias á kó ŋgɔ́ á méŋ Semɛin,
Semɛin a lɛ á méŋ Yosɛ́k,
Yosɛ́k á kó ŋgɔ́ á méŋ Íóda,
27Íóda á kó ŋgɔ́ á méŋ Yohánan,
Yohánan á kó ŋgɔ́ á méŋ Léza,
Léza á kó ŋgɔ́ á méŋ Zolobabɛl,
Zolobabɛl á kó ŋgɔ́ á méŋ Salatiɛl,
Salatiɛl á kó ŋgɔ́ azí á méŋ Neli,
28Neli á kó ŋgɔ́ á méŋ Mɛlki,
Mɛlki á kó ŋgɔ́ á méŋ Adi,
Adi á kó ŋgɔ́ á méŋ Kozam,
Kozam á kó ŋgɔ́ á méŋ Ɛlmadam,
Ɛlmadam á kó ŋgɔ́ á méŋ Ɛɛ,
29Ɛɛ a lɛ á méŋ Yɛɛ́so,
Yɛɛ́so á kó ŋgɔ́ á méŋ Eliɛzɛɛ,
Eliɛzɛɛ á kó ŋgɔ́ á méŋ Jolim,
Jolim á kó ŋgɔ́ á méŋ Matat,
Matat á kó ŋgɔ́ á méŋ Levi,
30Levi á kó ŋgɔ́ á méŋ Simeɔŋ,
Simeɔŋ á kó ŋgɔ́ azí á méŋ Yúda,
Yúda á kó ŋgɔ́ á méŋ Yosɛ́p,
Yosɛ́p á kó ŋgɔ́ á méŋ Jonam,
Jonam á kó ŋgɔ́ á méŋ Eliakim,
31Eliakim á kó ŋgɔ́ á méŋ Mɛlea,
Mɛlea á kó ŋgɔ́ á méŋ Ména,
Ména á kó ŋgɔ́ á méŋ Matáta,
Matáta a lɛ á méŋ Nataŋ,
Nataŋ á kó ŋgɔ́ á méŋ Ndavít,
32Ndavít á kó ŋgɔ́ á méŋ Jɛsɛ,
Jɛsɛ á kó ŋgɔ́ á méŋ Jobɛd,
Jobɛd á kó ŋgɔ́ á méŋ Booz,
Booz á kó ŋgɔ́ á méŋ Sála,
Sála á kó ŋgɔ́ á méŋ Nashɔŋ,
33Nashɔŋ á kó ŋgɔ́ azí á méŋ Aminadab,
Aminadab á kó ŋgɔ́ á méŋ Admin,
Admin á kó ŋgɔ́ á méŋ Alni,
Alni á kó ŋgɔ́ á méŋ Ɛslɔm,
Ɛslɔm á kó ŋgɔ́ á méŋ Pɛlɛs,
Pɛlɛs á kó ŋgɔ́ á méŋ Yúda,
34Yúda á kó ŋgɔ́ á méŋ Yakɔ́p,
Yakɔ́p a lɛ á méŋ Izak,
Izak á kó ŋgɔ́ á méŋ Ablaham,
Ablaham á kó ŋgɔ́ á méŋ Táala,
Táala á kó ŋgɔ́ á méŋ Nakɔ̄ɔ,
35Nakɔ̄ɔ á kó ŋgɔ́ á méŋ Seluk,
Seluk á kó ŋgɔ́ á méŋ Lago,
Lago á kó ŋgɔ́ á méŋ Falɛk,
Falɛk á kó ŋgɔ́ azí á méŋ Ebɛɛ,
Ebɛɛ á kó ŋgɔ́ á méŋ Sála,
36Sála á kó ŋgɔ́ á méŋ Kayínam,
Kayínam á kó ŋgɔ́ á méŋ Alfasad,
Alfasad á kó ŋgɔ́ á méŋ Sɛ́ɛm,
Sɛ́ɛm á kó ŋgɔ́ á méŋ Noe,
Noe á kó ŋgɔ́ azí á méŋ Lamɛk,
37Lamɛk á kó ŋgɔ́ á méŋ Mɛtúzala,
Mɛtúzala á kó ŋgɔ́ á méŋ Enɔk,
Enɔk á kó ŋgɔ́ á méŋ Yɛlɛd,
Yɛlɛd á kó ŋgɔ́ á méŋ Maleliɛl,
Maleliɛl á kó ŋgɔ́ á méŋ Kayínam,
38Kayínam a lɛ á méŋ Enɔs,
Enɔs á kó ŋgɔ́ á méŋ Sɛ́ɛt,
Sɛ́ɛt á kó ŋgɔ́ á méŋ Ádam,
Ádam á kó ŋgɔ́ á méŋ Ndém.
Currently Selected:
Lúkási 3: ybb
Highlight
Share
Copy
Want to have your highlights saved across all your devices? Sign up or sign in
© CABTAL
