Lúkási 24
24
Yɛɛ́so a á ega nzímɛ ánɛ lewhʉ̄
(Mat 28.1-10; Mlk 16.1-8; Jáŋ 20.1-10)
1Njhʉ̄ é lá, ŋ́gɔ́ mvhɔ aleʼé ánɛ ŋgap alāʼ, wɔnzwí mɛ́t, é tswíʼ mevɛ̄t mīi é lemteē azík mbɔŋ, émi pɔ́ ke cuŋtéē, ńdɔk mmé nzemɛ́nzēm, ŋ́gʉ̄ɔ á lesi. 2Ŋ́gē eshʉʼe, ńjʉ́ɔ mía mía tɔ́ yīi, mɛ́ ke lɔ̄k ŋkápte lesi, á gɔ́ mbekne pekne. 3Pɔ́ kó á ntē éwú, ḿbiŋ te apfhō Ndi Yɛɛ́so jʉ́ɔ. 4Ńtshí éwú, anu á pú ntsyā á wɔ́p, pɔ́ té zhɛ́ ajū mīi, á ŋghʉ̄ ɛ́. Ńdɛ ŋgē ejʉ́ɔ, mbaŋa zɛ́pīa é ŋwak á mvhɔ pɔ́p, ḿmāʼ menzhó ánɛ pɔ́p, é ŋwaŋne tɛʼ. 5Pɔ́ jʉ́ɔ ncɔ̄ʼ, ńcʉ́ʼɛ ncʉ̄ʉ esī. Epuɔ mɛ́t é zɛ́tte á wɔ́p ŋ́gɛ: «Pɛ é ghʉ páʼ lā, éfāʼ á ŋiŋ yīi a á nte, á nnɔ mepfhō ó? 6A te ega á. A á nzím ánɛ lewhʉ̄. Pɛ ekímte anu zīi, a le shúŋ á wɛ́, afʉʼ zīi, pɛ a pɔ́p é le zɛ́t á Ŋgaliléa. 7A le lé á mbū pɛ ŋ́gɛ: “Mɛ́ pɔŋteé á leswiŋ á Méŋ‑Ŋiŋnɔŋ á mbū epuɔ tepɔŋ. Mɛ́ ekwɛ̄te á yí ánɛ mbaŋne paŋné, á ezím ánɛ lewhʉ̄ ánɛ páte eleʼé tɛ́t.” »
8Pɔ́ lɛ ŋkímte páʼ Yɛɛ́so a le zī eshúŋ menu muɔ mɛ́t, 9efhó ajʉʼ mɛ́t, ŋ́gʉɔ mbɛ́te menu mīi é ntɔ́k, éshúŋ meziŋ‑ntō Yɛɛ́so ntsɔp zɛ́mɔʼɔ́ mé legēm, mbɔɔ á mbū emɔ̄ʼ epuɔ pí. 10Wɔnzwí mɛ́t é lɛ wɔ Malía mɔ́ Makdala pɔ́ Jáane, ŋ́ghʉ̄ á Malía mía Jáak. Mbɔɔ emɔ̄ʼ wɔnzwí pīi, pɔ́ lɛ éwú, pɔ́ pú nnɔ̄ŋ mbɛ́tɛ menu mɛ́t eshúŋɔ meziŋ‑ntō. 11Pɔ́ júʼ, é gɔ́ páʼ menu te athū lā, ḿbú te véŋ. 12Táʼ, Piɛ á ke ndū á esī, ŋ́kʉte ŋgʉ̄ɔ á lesi, ḿbáne á esī, ńcʉ̄te njʉ́ɔ áa ndaʼ epak nzhó tsīi, mɛ́ ke lɔ̄k nzémte apfhō Yɛɛ́so. Ŋ́gē epiŋ nzem mé mba zi, anu á ziŋɛ ntsyāa á yí. A te zhɛ́ ajū mīi á ke tɔ́k ɔ́.
Yɛɛ́so a á ega ŋŋwāka á mvhɔ megaŋ nnɔ pí mémpīa, á mɛnzhɛ Emayus
(Mlk 16.12-13)
13Aleʼé mɛ́t, epuɔ mémpīa ánɛ nnɔ Yɛɛ́so é lu á esī á Yelósalɛm, ńnɔŋ ŋgʉ̄ɔ mé amɔ̄ʼ akap alāʼ, mɛ́ tɔ́ŋ lɛ, Emayus. Ŋgia á lekō éwú, é nɔŋ ŋkūʼɔ ajūɔ mekílo ntsɔp zɛ́mɔʼɔ́ mé legēm. 14Ńziŋɛ eshúŋnɛ ánɛ menu ntsem mīi, é ke tɔ́kē. 15Pɔ́ le nɔ̄ŋ eshúŋnɛ, ńnɔŋ ŋŋāka, Yɛɛ́so yí méŋwɛ̄t á shʉʼ ŋkó á nnɔ pɔ́p, pɔ́ a pɔ́p é nɔŋ nzīŋɛ. 16Táʼ, azō á kʉɛ leghi tsɔ́p, tɛ pɔ́ té á yí yiŋ. 17Yɛɛ́so á zɛ́tte á wɔ́p ŋ́gɛ: «Pɛ púu nzīŋɛ ŋŋāka akɔ̄ páʼa ā?» Pɔ́ tshí ajʉʼ, ńcʉ̄ʼne athū. 18Mmɔ̄ʼ ŋiŋ wɔp, lezēŋ tsí é gɔ́ lɛ Kleopás, á zɛ́tte á yí ŋ́gɛ: «O lɔkɔ ŋgɔ́ɔ wulewu á ntē Yelósalɛm, éyi o ka zhɛ́ menu mīi, é tɔ́k ega ánɛ meleʼé muɔ lɛ̄. » 19Á zɛ́tte ŋ́gɛ: «Akɔ̄ á ke ghʉ̄ éwú ú?»
Pɔ́ gɛ: «Ménu mīi, é ke ghʉ̄ á Yɛɛ́so ŋiŋ Naázalɛt. A kɛ á kwaʼ ntswi‑ŋke Ndém, tɛ epuɔ metsem é jʉ́ɔ ánɛ mefaʼ mí, mbɔɔ ánɛ ashuŋne zí. Ndém á zéŋ nnɔ̄ŋ ŋkɔ̄ŋtɛ á yí. 20Tɛ́ wɔ nɔŋ‑epɔʼ epi melʉɛ, pɔ́ mekém alāʼ pék, é gɔ á yí, ŋ́gyá ŋ́gɛ, mɛ́ ezwhí á yí, mɛ́ kwɛte á yí ánɛ mbaŋne paŋné. 21Mbɔ pek kɛ si nnɔŋ ŋkwāŋa ŋ́gɛ, yí mé pɔŋteé á lezāʼ ŋkhʉ apuʼ á ntɔ̄ŋ epuɔ Islaɛl. Á ayáʼa eleʼé tɛ́t, páʼ emuɔ menu mɛ́t é ke tɔ́kē. 22É té ndaʼ épúp ɔ́, emɔ̄ʼ wɔnzwí á nnɔ pek, é ntsɔ́ʼ ntē wék. Pɔ́ mmé melanjhʉ̄, ŋ́gʉ̄ɔ á ajʉʼ zīi, mɛ́ ke túŋ á Yɛɛ́so éwú, 23ŋ́kó éwú, éfāʼ apfhō zí, pɔ́ té jʉ́ɔ, ḿbīŋ nzem eshúŋ á wék ŋ́gɛ, mecɔʼ Ndém é ŋŋwāk á mvhɔ pɔ́p, éshúŋ á wɔ́p ŋ́gɛ, Yɛɛ́so a gɔ́ áa nte. 24Emɔ̄ʼ epuɔ pék é njúʼ épúp, ŋ́gʉ̄ɔ á lesi, ŋ́kó njʉ́ɔ á gɔ́ ndeŋ ndeŋ páʼ wɔnzwí é eshúŋ á wɔ́p épúp. Tɛ́ ŋké te á Yɛɛ́so jʉ́ɔ. »
25Yɛɛ́so á lɛ ndé á mbū pɔ́p ŋ́gɛ: «Pɛ gɔ́ áa metsetseŋ. Ntē wɛ́ é si ŋká kaá á levēŋ ajū mīi, metswi‑ŋke Ndém é le léē. 26Pɛ ka zhɛ́ á légɛ Nzaʼ‑Ŋkhʉ yīi Ndém a le laʼnēē, a ke pɔŋté á lejʉ̄ɔ ŋgʉɔ̄ʼ tɛʼ, tɛ́ ŋkó ánɛ lewūʼ tsí lɛ̄?» 27Ńdé épúp, ńzī á lekɛ̄ʼte menu ntsem mīi é cʉteē á yí á ntē aŋwaʼne Ndém, éshúŋ á wɔ́p, tɛ efhó ánɛ aŋwaʼne Mɔɔ́sɛ, ŋ́gʉ̄ɔ ŋkó ánɛ etsi metswi‑ŋke Ndém metsem.
28Pɔ́ a pɔ́p é gʉɔ tɛ nnɔ̄ŋ ŋkúɔ́ akap yīi, pɔ́ mémpīa é nnɔŋ ŋgʉ̄ɔ mé éwú, Yɛɛ́so á ghʉ páʼ a zɛɛ́t ŋgɔ etswiʼne eziŋ egʉɔ mé mvhɔ lā, 29tɛ́ pɔ́ lɔk ashuŋne ŋkúʼte á yí, ńdé ŋ́gɛ: «Ḿpɛ epú ndáʼ ega, njhʉ̄ e é tɔ́k. Nzém e cʉ́ʼɛ eséŋ seéŋ. » Á véŋ, pɔ́ a pɔ́p é gʉɔ me ŋgyā á ndáʼa.
30Afʉʼ á lejhʉ̄ etsō á kuʼ, pɔ́ gʉɔ nnáŋ á esī, Yɛɛ́so á pɛ́ mblɛ, ésyákne á Ndém, ḿbwɔ́ʼte, ŋ́gyá mé pɔ́p. 31Leghi tsɔ́p é lɛ ntsɔ́ʼɔ, pɔ́ yiŋ á yí. Á lɛ mbí á mvhɔ pɔ́p. 32Pɔ́ sɛt nnɛ̄t ndé á tsetsɛlɛ pɔ́p ŋ́gɛ: «Á té páʼa ŋgɔ́ ajū mīi, á nnɔŋ ŋghʉ̄ɛ, ntē wɔ́kɔ é gáŋtɛ, afʉʼ zīi ḿpɛ a pɔ́p é ŋgɔ́ á mɛnzhɛ, á nɔŋ ŋkɛ́ʼtɛ menu á ntē aŋwaʼne Ndém, éshúŋɔ á wɔ́kɔ lā kɛ?»
33Pɔ́ lɛ ndū á esī afʉʼ mɛ́t, ḿbīŋ nzem á Yelósalɛm, ńtswɛ́tte meziŋ‑ntō Yɛɛ́so ntsɔp zɛ́mɔʼɔ́ mé legēm, pɔ́ emɔ̄ʼ epuɔ pɔ́p, mbɔ pɔ́ mbú ncúʼte. 34Pɔ́ shúŋ epuɔ mémpīa mɛ́t ŋ́gɛ: «Anuúnē ŋ́gɛ, Ndi a á nzím ánɛ lewhʉ̄. Simɔŋ a á njʉ́ɔ á yí. » 35Pɔ́ zéŋ mbɛ́te azɔ́p ajū mīi pɔ́ ŋkó á mɛnzhɛ njʉ́ɔ, ńzéŋ eshúŋ á wɔ́p páʼ, a á nɔŋ mbwɔ́ʼtɛ mblɛ ŋgāptɛ, tɛ́ pɔ́ yiŋ á yí.
Yɛɛ́so a á ega ntswīi athū nnɛ̄t zí á mbū nnɔ yí
(Mat 28.16-20; Mlk 16.14-18; Jáŋ 20.19-23; MeM 1.6-8)
36Pɔ́ le zɛ́t eshúŋne shuŋné, Yɛɛ́so á ŋwak á tsetsɛlɛ pɔ́p, ńtsāʼte á wɔ́p ndé ŋ́gɛ: «Apwɛne a egɔ́ mé pɛ. » 37Além zɔ́p á tsɔ́ʼɔ, ecɔʼ é pú ŋgɔ̄ á wɔ́p, pɔ́ nɔŋ ndɔ̄kɔ á yí ntɔ́ŋɔ agega ŋiŋ yīi, a lē ŋkwhʉ́. 38Tɛ́ Yɛɛ́so á gɛ: «Além zɛ́ á tsɔ́ʼɔ páʼa melaʼ akɔ̄? Pɛ miʼtɛ á levēŋ ajū mīi, pɛ é si njʉ́ɔ melaʼ akɔ̄? 39Pɛ ecʉ̄te mbū má pɔ́ mekhu má njʉ́ɔ, a gɔ́ á gá. Pɛ emɔ̄te á gá njúʼ, agega ŋiŋ á té mbap nnɛ̄t pɔ́ mekwɛ́ wɛ, páʼ pɛ jʉ́ɔ meŋ ŋgwīɛ̄ la á. » 40Á ge elé épúp, ńnɔŋ ntswīi á wɔ́p mbū mí pɔ́ mekhu mí. 41Pɔ́ jʉ́ɔ épúp, ŋ́kák tɛʼ, táʼ, á ke nzɛ́t ŋkʉ̄ʼnɛ á wɔ́p kʉʼne, pɔ́ té kūʼ á levēŋ ɛ́. Yɛɛ́so á jʉ́ɔ, ńdɛ nzɛ́tte á wɔ́p ŋ́gɛ: «Pɛ wɛɛ̄ ajūɔ mpfɛ́ɛt á esī egā a?» 42Pɔ́ faʼ akem esōh ntɔɔ̄ɔ, ŋ́gyá mé yí. 43Á tswí, ńtshí á mvhɔ pɔ́p mpfɛ́t. 44Ḿbiŋ ndé á mbū pɔ́p ŋ́gɛ: «Á páʼa ŋgɔ́ anu zīi meŋ ndɛɛ́ eshúŋɔ á wɛ́, afʉʼ zīi ḿpɛ kɛɛ́ nzóko. Meŋ nde shúŋ á wɛ́ ŋ́gɛ: «Ajūɔ tsem zīi mɛ́ le tí ánɛ meŋ, á ke pɔŋté á legɔ̄ mbo poo. Á akɔ̄ lɛ́ zīi, á ntē aŋwaʼne Mɔɔ́sɛ, pɔ́ etsi metswi‑ŋke Ndém, mbɔɔ á ntē aŋwaʼne azɔp ntshi. »
45Á lɛ ŋkɛ́ʼte leghi tsɔ́p á lelɔk njúʼ menu mīi, é ntē aŋwaʼne Ndém. 46Á zéŋ ndé á mbū pɔ́p ŋ́gɛ: «Mɛ́ le tí á ntē aŋwaʼne Ndém ŋ́gɛ: Nzaʼ‑Ŋkhʉ yīi Ndém a le laʼnēē, a pɔŋteé á yí á lejʉ̄ɔ ŋgʉɔ̄ʼ, ŋ́kwhʉ́, ḿbiŋ nzím ánɛ lewhʉ̄ ánɛ páte eleʼé tɛ́t. 47Ńzéŋ ŋgɔ́ lɛ, mɛ́ e ké eláʼ ezi á Yelósalɛm, á lelɔk lezēŋ tsí ntswī á mbū ŋgɔŋ ŋgɔŋ ŋ́gɛ, awíɛ awíɛ a egɔ̄ nnɛ̄t zi, ŋ́gwáʼ atswhī tepɔŋ zí, Ndém a shʉʼ ndēkne mefa mí. 48Pɛ pwɔ̄ mé pɔŋteé á leshūŋ menu muɔ mīi, pɛ é njʉ́ɔ. 49Pɛ ezhɛ́ ŋ́gɛ, meŋ a shʉʼ etó ajū mīi mɔʼɔ́ ga a le laʼnēē, á leyā mé pɛ. Pɛ eké nnáŋ á tésɔŋ nzwíʼte, tɛ ndáʼ ŋkó afʉʼ zīi, mete Ndém é fhó á lephū, ésóʼo ŋkó ánɛ pɛ. »
Yɛɛ́so a á ega ŋkɔ́ʼɔ mé lephū
(Mlk 16.19-20; MeM 1.9-11)
50Ńdé épúp, ńdɔ̄k á wɔ́p efhó á tésɔŋ ntó, pɔ́ a pɔ́p é gʉɔ tɛ ncʉ́ʼ á lekō á Betani, á kɔ́ʼne mbū mí mé athʉ́, ńnéŋ mbwɛ́né ánɛ pɔ́p. 51Ŋ́gē enéŋ mbwɛ́né ánɛ pɔ́p épúp, ńnɔŋ ŋkɔ́ʼɔ ŋgʉ̄ɔ mé lephū, tɛ mbíte. 52Pɔ́ cʉ́ʼ ntshí ajʉʼ mɛ́t, ŋ́gūʼte á yí, ḿbiŋ ndɔ̄k á mía lekāk, ésɛ̄t nnɛ̄t mé Yelósalɛm. 53Ŋ́gʉɔ tɛ ŋkó éwú, ńcʉ́ʼɛ mbúu nnáŋa áa Mía Ŋgyā Ndém efʉʼ metsem, ŋ́gūʼtɛ á Ndém.
Currently Selected:
Lúkási 24: ybb
Highlight
Share
Copy
Want to have your highlights saved across all your devices? Sign up or sign in
© CABTAL
