Lúkási 18
18
Ashuŋne lepúʼ ánɛ leŋīŋ mmɔʼ mpfók menzwí pɔ́ ŋgaŋ asāʼ
1Yɛɛ́so á zéŋ ndɔ̄k ashuŋne lepúʼ jʉɔ, ńzíʼne nnɔ yí páʼ á mbɔŋ leswīŋte Ndém efʉʼ metsem, té láʼ ŋká. 2Ńdé á mbū pɔ́p ŋ́gɛ: «Mmɔʼ ŋgaŋ asāʼ a lɛ á ntē mmɔʼ tésɔŋ, a te á Ndém pɔ́k, ńzéŋ mbú te lɔ̄k á ŋiŋ ntɔ́ŋ á azō ɔ́. 3Mmɔʼ menzwí a le zéŋ ŋgɔ́ á tésɔŋ mɛ́t, ŋ́gɔ́ á mpfók, ńnáŋ efʉʼ metsem, éshʉʼɛ njʉ́ɔ á ŋgaŋ asāʼ, éswíŋtɛ á yí ŋ́gɛ, a elɛ̄ nzáʼ ntsaŋ zɔp ŋgaŋ mbo yi, páʼ lepé é si nzɛ́ttɛ épúp. 4Ŋgaŋ asāʼ á lʉʼ lʉʼe. Á ké nzɛ́t eshʉ̄ʼ shʉʼe, á tsya á yí, á lé á ntē yí ŋ́gɛ: “Meŋ te á Ndém pɔ́k, ńzéŋ te lɔ̄k á ŋiŋ ntɔ́ŋ azō ɔ́. 5Ɔ táʼ, páʼ mpfók menzwí wuɔ, á si eshʉʼɛ mbáknɛ á gá efʉʼ metsem lāa, meŋ a záʼ ntsaŋ zi, páʼ lepé é si nzɛ́ttɛ, ḿbɔ́k á yí á lenāŋ ŋghʉ̄ɛ épúp efʉʼ metsem, tɛ ntɔ̄ŋ za é pék.”»
6Ndi Yɛɛ́so á shúŋne épúp, ḿbiŋ ndé ŋ́gɛ: «Pɛ méŋwɛ̄t e ejúʼ anu zīi ŋgaŋ asāʼ wɔ̄, ŋ́gɔ́ á ŋgaŋ mekɛ̄t, a á lé. 7A á ké nzáʼ ntsaŋ mɛ́t páʼ lepé é si nzɛ́ttɛ, tɛ ŋgʉɔ shɔ́ʼɔ́, Ndém a te láʼ ezéŋ eghʉ azí épúp, á mbū epuɔ pí pīi, a lē ŋkaŋ á wɔ́p lɛ̄? Épuɔ pīi pɔ́ gɛ nzóko ndāa á mbū yí, é táŋ‑azokó pɔ́ ŋkɔʼɔ́‑atswɛt, éswíŋtɛ á yí ŋ́gɛ, a eshʉʼ ntswíte á wɔ́p. Afʉʼ mɛ́t á kuʼɔ, á zi nnáʼ ḿmīʼte á leghʉ épúp e? 8Pɛ ezhɛ́ á mbɔŋɔ́ á légɛ, afʉʼ mɛ́t á kuʼɔ, a á le zī nnáʼ ḿmīʼte á lezāʼ ntsaŋ zɔp ndeŋ ndeŋ ɛ́. Táʼ, afʉʼ mɛ́t zīi Méŋ‑Ŋiŋnɔŋ a fú eshʉ̄ʼɛ á ndo esī atsetsáʼ á nzáʼ ntsaŋ, a gɔ fú nzī njʉ́ɔ tsɔ ŋiŋ yīi, a zɛɛ́t ŋŋíŋɛ efíɛ́ nnɛ̄t zi, ŋ́gyáa á mbū Ndém m?»
Ashuŋne lepúʼ ánɛ ntií leghʉ aswiŋte
9Yɛɛ́so á náŋ tɛ mbɛ́te ashuŋne lepúʼ jʉɔ á mbū epuɔ pīi, pɔ́ é si ŋkwāŋa ŋ́gɛ, pɔ́ é epuɔ membɔŋ, ḿbiŋɛ ŋŋyāŋnɛ epi emɔ̄ʼ ŋ́gɛ, epuɔ tepɔŋ. 10Ḿbɛ́te ŋ́gɛ: «Á lɛ amɔ̄ʼ aleʼé, epuɔ mémpīa é pe mé Mía Ŋgyā Ndém á Yelósalɛm á eswíŋte Ndém, mmɔʼ ŋgaŋ á gɔ́ ŋiŋ Falísia, eyi mmɔʼ á gɔ́ ntswi‑ncup alāʼ. 11Ŋiŋ Falísia wɔ̄, á lɛ ŋgē ekó á ŋgyā mɛ́t, ŋ́gʉɔ ntshí á mvhɔ, ńzī á leswīŋte Ndém ŋ́gɛ: “Ndém, meŋ á syákne á wú páʼ meŋ te páʼ emɔ̄ʼ epuɔ lā á, páʼ meŋ te páʼ ntswi‑ncup yi lē é. Meŋ gɛ te nzáa ŋgɛ́tté ɛ́, meŋ te nzáa mekɛ̄t ɛ́, ḿbiŋɛ te ŋghʉ̄ɛ agā á. 12Meŋ gɛ ŋkɔ̄ŋɔ nnáŋa nzi eleʼé epīa ánɛ taʼ ŋgap, ánɛ lezēŋ cú. Ŋ́gāptɛ etsō tsá ntsem ntsem nzhɛ legēm, ŋ́gyáa á taʼ nzhɛ á mbū wu.” 13Ḿbiŋ ŋgɔ́ mé ntswi‑ncup wɔ̄, á tshí tɛ mé nzem, ŋ́ŋɔ́ʼne athū zí mé esī, ńzém mbū á ntɔ̄ŋ, ńdā á mbū Ndém ŋ́gɛ: “Ndém, lɛ ntsá mezeŋɛ má, meŋ, ŋgaŋ mefa wuɔ.”»
14Yɛɛ́so á ge emakne, ńdé ŋ́gɛ: «Pɛ ezhɛ́ á légɛ, ŋiŋ wuɔ mɛ́t, á ge epiŋ nzem mé mba zi, mbɔ Ndém a á ndáʼ mvéŋ á yí páʼ ŋiŋ yi, ḿbiŋ te ŋiŋ Falísia véŋ. Á épúp tɛ́, ŋiŋ yīi a kɔʼneé nnɛ̄t kɔʼné, Ndém a a shʉʼ esóʼne á yí. Ŋiŋ yīi a piīŋ nnɔŋ nnɛ̄t á esī nɔŋ, Ndém a a shʉʼ ekɔ́ʼne á yí. »
Lepɔŋ ánɛ Lefɔ Ndém é mbū epuɔ pīi é páʼ ewɔŋkhʉ̄ lā
(Mat 19.13-15; Mlk 10.13-16)
15Afʉʼ á kuʼ, epuɔ é zi á lelɔk ewɔŋkhʉ̄ eshʉ̄ʼ njʉ́ɔ á Yɛɛ́so ŋ́gɛ, a ezápa mbū á athū pɔ́p. Nnɔ Yɛɛ́so é jʉ́ɔ épúp, ńtɔ̄ʼ á wɔ́p. 16Táʼ, Yɛɛ́so á tswi mɛ́ lɔk ewɔŋkhʉ̄ eshʉ̄ʼ mé lezēŋ tsí, á lé á mbū nnɔ yí ŋ́gɛ: «Pɛ etshī ewɔŋkhʉ̄ nnéŋ, pɔ́ eshʉ̄ʼ á mbū meŋ, ndɛ́ʼ pɛ ezéŋ á wɔ́p ntɔ̄ʼ, melaʼ mīi, lepɔŋ ánɛ Lefɔ Ndém é mbū epuɔ pīi, é páʼ pɔ́p lā. 17Meŋ shúŋɔ á wɛ́ á kwaʼ anuúnē, ŋiŋ a gɔ te véŋ páʼ méŋ agáʼ mɔ́ lā, ŋ́gɛ, Ndém mé ecʉ́ʼɛ esáʼa á yí í, mbɔ a te e láʼ ekó á ntē Lefɔ Ndém ɛ́. »
Yɛɛ́so pɔ́ ŋgaŋ lewūʼ
(Mat 19.16-30; Mlk 10.17-31)
18Mmɔʼ ŋkém ŋiŋ Yúda, á shʉʼ nzɛ́tte á Yɛɛ́so ŋ́gɛ: «Ńziʼnɛ, wu ŋiŋ mbɔŋ, meŋ gɔ eghʉ̄ʉ azá lɛ akɔ̄, tɛ́ Ndém á fú ŋghʉ̄, pek yí mé cʉ́ʼɛ mbúu nnáŋa á?» 19Yɛɛ́so á zɛ́tte á yí ŋ́gɛ: «O tɔ́ŋɔ á gá lɛ ŋiŋ mbɔŋ melaʼ akɔ̄? Ŋiŋ mbɔŋ a te éwú ú, ńdaʼ Ndém yíléyī. 20Páʼ o zɛ́ttɛ á gá lā, o ó si nzhɛ́ɛ á légɛ, mbé Ndém é leé ŋ́gɛ: “Ndɛ́ʼ ŋiŋ á gɔ́ aleʼé ŋghʉ̄ agā. Ndɛ́ʼ ŋiŋ á zwhí á ŋiŋ. Ndɛ́ʼ ŋiŋ á jʉ. Ndɛ́ʼ ŋiŋ á tɔ́k ekém ŋkɔŋ. Awíɛ a eghʉ̄ mekuʼ mɔʼɔ́ yi pɔ́ mɛ́ wɔp#18.20 Jʉ́ɔ́ á ntē aŋwaʼne Letō 20.12-16 mbɔɔ á ntē aŋwaʼne Akimté Mbé 5.16-20..” » 21Ŋkém mɛ́t á pwɛt ŋ́gɛ: «Meŋ gɛ ŋkúʼtɛ mbé muɔ mɛ́t, tɛ ndáʼ efhó á aluú‑esī zá. » 22Yɛɛ́so á júʼ épúp, ńdé á mbū yí ŋ́gɛ: «Taʼ azō a zɛɛ́t ŋkíŋɛ á mbū wu, ázi o o zéŋ eghʉ. Gʉɔ eswīŋ ŋgɔŋ etsō cú ntsem, ńdɔ̄k ŋkāp ntswíte wɔ te kuʼ ánɛ azō, éshʉʼ ntsé á nzem meŋ. O ghʉɛ épúp, mbɔ o o shʉʼ ewɛ á kwaʼ lewūʼ á lezēŋ Ndém, á athʉ́ lephū. » 23Á júʼ épúp, eshhʉ̄ yí é gɛ swɛt, melaʼ mīi, a lɛ á mía ŋgaŋ lewūʼ tɛʼ. 24Yɛɛ́so á jʉ́ɔ páʼ á pék á yí épúp, ńdé ŋ́gɛ: «Á teē tɛʼ, á mbū ŋgaŋ lewūʼ, á levēŋ ŋ́gɛ, Ndém mé ecʉ́ʼɛ esáʼa á yí, tɛ a eláʼ ŋgwɛ̄ lepɔŋ ánɛ Lefɔ Ndém. 25Á zaŋneē tɛʼ á mbū shamo#18.25 Shamo a á si ŋgɔ́ mmɔʼ na, éfáŋ tɛʼ. á letɔ̄k ánɛ lephʉ̄ leswáʼ, ńtsyā á ŋgaŋ lewūʼ á levēŋ ŋ́gɛ, Ndém mé ecʉ́ʼɛ esáʼa á yí, tɛ a eláʼ ŋgwɛ̄ lepɔŋ ánɛ Lefɔ Ndém. »
26Epuɔ pīi é nnɔŋ njúʼɔ á yí, é zɛ́tte á yí ŋ́gɛ: «Á gɔ́ épúp, mbɔ awɔ́ mé gɔ eláʼ ntswɛ́t é?» 27Yɛɛ́so á pwɛt ŋ́gɛ: «Ajū mīi á gɔ etsyāa á ŋiŋnɔŋ, Ndém a ghʉʉ̄ áa aziɛ́. »
28Piɛ á lɛ ndé á mbū yí ŋ́gɛ: «Jʉ́ɔ́ páʼ pek lē mbú ntém nzem, ánɛ etsō tsék ntsem, éshʉʼ ntsé á nzem wu. » 29Yɛɛ́so á pwɛt á mbū wɔ Piɛ ŋ́gɛ: «Meŋ shúŋɔ á wɛ́ á kwaʼ anuúnē ŋ́gɛ, ŋiŋ a gɔ le wáʼ mba zi, ŋ́gwáʼ á nzwí yi pɔ́ ewɔŋkhʉ̄ pí, ŋ́gwáʼ á mɔʼɔ́ yi pɔ́ mɛ́ wɔp, ŋ́gwáʼ epɔ̄ memía pí, mélaʼ anu Lefɔ Ndém, 30éshʉʼ nnéŋ té zéŋ ŋgwɛ̄ ecʉɔ etsō mɛ́t, á ntē ŋgɔŋ ega tɛ ntɔ́k aziɛ́ afʉʼ, Ndém á piŋ ŋghʉ̄, pɔ́ yí mé cʉ́ʼɛ mbúu nnáŋa á ntē ŋgɔŋ zīi, e e fú tɛ́ shʉʼ ɛ́. »
Yɛɛ́so a á ega nzéŋɛ eshúŋɔ anu lewhʉ̄ zí
(Mat 20.17-19; Mlk 10.32-34)
31Yɛɛ́so á náŋ tɛ eshʉ̄ʼ ánɛ nnɔ yí, éfók epi emɔ̄ʼ ntsɔp pīa mé legēm, ńdé á mbū pɔ́p ŋ́gɛ: «Ḿpɛ é ega mbʉ̄ɛ̄ mé Yelósalɛm páʼa, ékó éwú, menu ntsem mīi metswi‑ŋke Ndém é le tíī ánɛ Méŋ‑Ŋiŋnɔŋ wuɔ, e epō. 32Ńdɔkɔ ŋ́gɛ, mɛ́ e shʉʼ eswiŋ á yí á mbū mege pīi, é sáʼa alāʼ, pɔ́ ezɔ̄te á yí, ńzwī á yí, ńtsōk mekī ánɛ yí. 33Ńtswá á yí, ńzwhí á yí, a epiŋ ŋgɔ́ eleʼé alāʼ tɛ́t, a ezím ánɛ lewhʉ̄. » 34Yɛɛ́so á lé épúp, pɔ́ té júʼ ashuŋne mɛ́t ɛ́, á gɛ́tte, tɛ pɔ́ té júʼ ajū mīi, á lɔkɔ ndʉ́ɛ́ ɛ́.
Yɛɛ́so a á ega ŋŋáʼa menēk ŋiŋ
(Mat 20.29-34; Mlk 10.46-52)
35Yɛɛ́so a le nɔ̄ŋ mbátɛ á tésɔŋ Jeliko, amɔ̄ʼ afʉʉ́‑menēk á náŋ á legʉ̄ŋ mɛnzhɛ, ńdɔ́ɔ ndɔ̄. 36Ńjúʼ páʼ alāʼ á si nzwɛ̄nɛ ntsīa, ńzɛ́tte ajū mīi, á ghʉɛ. 37Mɛ́ shúŋ á yí ŋ́gɛ, Yɛɛ́so ŋiŋ Naázalɛt mé si ntsīa. 38Á lɛ ntɔ́ŋ mé nte ŋ́gɛ: «Yɛɛ́so, méŋ Efɔ Ndavít, lɛ ntsá mezeŋɛ má. » 39Epuɔ pīi é lɛ mvhɔ nzīŋɛ, é tɔʼ á yí ŋ́gɛ, a eláŋte. Tɛ́ á tswiʼne ŋkɔ́ʼne ŋghi zi mé athʉ́ ŋ́gɛ: «Méŋ Efɔ Ndavít, lɛ ntsá mezeŋɛ má. » 40Yɛɛ́so á júʼ, ńtshí á ajʉʼ. Ńtswī ŋ́gɛ, mɛ́ elɔ̄k á yí eshʉ̄ʼ. Mɛ́ lɔk á yí eshʉ̄ʼ, á zɛ́tte á yí ŋ́gɛ: 41«O kɔŋɔ ŋ́gɛ, meŋ eghʉ̄ páʼ lā á mbū wu ū?» Apií‑menēk, á pwɛt ŋ́gɛ: «Ndi, lɛ ŋghʉ̄ meŋ ezéŋ njʉ́ɔ ejʉʼ. » 42Yɛɛ́so á lé á mbū yí ŋ́gɛ: «Páʼ o ó fɛ́ nnɛ̄t ju ŋgyá á mbū meŋ lā, menēk mú e ezɛ́ʼɛ. » 43Menēk ŋiŋ mɛ́t é lɛ ŋŋáʼa efʉʼ mɛ́t efʉʼ mɛ́t. Á tsé á nzem Yɛɛ́so, ńziŋɛ ŋgūʼtɛ á Ndém. Epuɔ metsem é jʉ́ɔ ajʉɔ anu mɛ́t, ḿbú ŋgūʼte á Ndém.
Currently Selected:
Lúkási 18: ybb
Highlight
Share
Copy
Want to have your highlights saved across all your devices? Sign up or sign in
© CABTAL
