Jáaŋ 7
7
Epɔ̄ memía Yɛɛ́so é té fɛ́ nnɛ̄t ŋgyá á mbū yí í
1Ajʉɔ anu á tɔ́k épúp, Yɛɛ́so á zɛ́t ntswīʼnɛ ntɔ́ktɛ á apak ŋgɔŋ Ŋgaliléa tɔkté. Ńnɔŋ te zɛ́t ŋkɔ̄ŋɔ á yí á letɔ̄kte á apak ŋgɔŋ Yudéa á, melaʼ mīi mekém epuɔ Yúda, é ke fāʼ á lezwhī á yí éwú. 2Á ge egɔ́, lekāk epuɔ Yúda tsīi mɛ́ tɔ́ŋɔ lɛ lekāk Mentap, é nɔŋ mbátɛ. 3Epɔ̄ memía Yɛɛ́so é lé á mbū yí ŋ́gɛ: «Fhó ega ŋgʉ̄ɔ mé Yudéa, tɛ́ megaŋ nnɔ pú e ekó éwú, ńjʉ́ɔ azɔ́p mefaʼ mīi, o ghʉɛ. 4Ŋiŋ a nɔɔ̄ŋ ŋkɔŋɔ ŋ́gɛ, mɛ́ ezhɛ́ á yí páʼā, a te ghʉ̄ azō ndʉɔne lʉɔne ɛ́. Páʼ o ó si ŋghʉ̄ɛ ejʉɔ ntií mefaʼ lā, ghʉɛ̄, tɛ epuɔ metsem e ezhɛ́ á ŋiŋ yīi, o ó ewiɛ́. » 5Epɔ̄ memía pí é lɛɛ́ ndʉ́ɛ́ épúp páʼā, ńzi nnɔ̄ŋ te efíɛ́ azɔ́p nnɛ̄t ŋgyáa á mbū yí í. 6Yɛɛ́so á pwɛt á mbū pɔ́p ŋ́gɛ: «Azá afʉʼ á zɛɛ́t te kuʼ. Á mbū pɛ, aziɛ́ afʉʼ lɛ́, á gɔ́ áa afʉʼ mbɔŋ. 7Epuɔ ŋgɔŋ puɔ é gɔ le jʉ́ɔ ajū mīi, pɔ́ lɔk epa á wɛ́ ɛ́. Té ŋké ŋgɔ́ mé meŋ, mbɔ pɔ́ é si mbāa á gá, melaʼ mīi, meŋ á si eshúŋɔ á wɔ́p á légɛ, ŋghʉʉ́‑anu tsɔ́p é té pɔŋ. 8Pɛ epē ŋgʉ̄ɔ lekāk mɛ́t. Ŋ́gɔ́ mé meŋ, mbɔ meŋ te gʉɔ éwú ú. Azá afʉʼ á zɛɛ́t te kuʼ. » 9Yɛɛ́so á shúŋne épúp, ńcʉ́ʼ nnáʼ ńnáŋ á Ŋgaliléa. 10Epɔ̄ memía pí é gʉɔ mé lekāk cɔ̄, á cʉ́ʼ ntsé azí á mɛnzhɛ ndʉɔne lʉɔne, tɛ ŋiŋ á nɔŋ te njʉ́ɔ á yí í.
Anu zīi Yɛɛ́so a le ziʼné epuɔ, á afʉʼ lekāk Mentap
11Á gɔ́ afʉʼ lekāk mɛ́t, mekém epuɔ Yúda é faʼ á Yɛɛ́so, ńnɔŋ ndʉ́ɛ́ ŋ́gɛ: «A gɔ́ɔ egɔ́?» 12Mɛ́ pú ŋgɔ́ á nnɔ alāʼ, ŋ́ŋāka tɛʼ, ánɛ lezēŋ Yɛɛ́so. Emɔ̄ʼ epuɔ é nɔŋ ndʉ́ɛ́ ŋ́gɛ, Yɛɛ́so a á ŋiŋ mbɔŋ. Emɔ̄ʼ é nɔŋ ndʉ́ɛ́ ŋ́gɛ, ŋgáŋ, a á si ŋghʉ̄ɛ epuɔ é faa nzhɛ. 13Táʼ, ŋiŋ á ké te kūʼ á yí á leshūŋne ánɛ yí esia sia á, ḿbɔ́kɔ mekém epuɔ Yúda.
14Mɛ́ ghʉ lekāk tɛ eleʼé alāʼ é gapne á tsetsɛlɛ, Yɛɛ́so á pe mé Mía Ŋgyā Ndém, ńzī á lezīʼne epuɔ. 15Ezi ntií lezīʼne é kʉʼne mekém epuɔ Yúda, pɔ́ lé ŋ́gɛ: «Ŋiŋ wuɔ a gɔ egaá, ńzhɛ́ azō tɛ mmāʼ afɛ̄ páʼa, tɛ́ mbɔ a lɛ te tswhī ŋgʉ̄ɔ á asikúu ú?» 16Yɛɛ́so á pwɛt á mbū pɔ́p ŋ́gɛ: «Ajū mīi meŋ zíʼnɛ á wɛ́, á té fhɔ́ɔ á mbū meŋ ɛ́, á fhɔ́ɔ á mbū Ndém, mbɔ yí mé le tó á gá á ŋgɔŋ. 17A gɔ́ éyi, ŋiŋ a á si ŋkɔ̄ŋɔ á leghʉ ajū mīi, Ndém a kɔɔ̄ŋ, mbɔ ŋgaŋ a a zhɛ́ kɛ ajū mīi, meŋ zíʼnɛ epuɔ, á fhɔ́ɔ á mbū Ndém lɛ́ɛ, kɛ á gɔ́ áa anu zīi, meŋ mé shúŋɔ lɛ̄ɛ. 18Ŋiŋ a nɔŋ eshúŋɔ anu ánɛ athū zí méŋwɛ̄t, mbɔ a á páʼa ńdɔkɔ efāʼa ŋ́gɛ, mɛ́ ewūʼte á yí. Ŋiŋ yīi a á si mbiŋɛ efāʼa ŋ́gɛ, mɛ́ ewūʼte áa ŋiŋ yīi, a le tó á yí lā, ŋgaŋ a á si ŋgɔ́ á ŋgaŋ anuúnē. A te si ŋgɔ́ á ŋgaŋ epoó‑anu ú. 19Mɔɔ́sɛ mé lɛ te yá lepé á mbū pɛ ɛ́ lɛ̄? Tsɔ taʼ ŋiŋ wɛ a piīŋ te si ŋghʉ̄ɛ páʼ, lepé mɛ́t é si nzɛ́ttɛ ɛ́. Pɛ faʼa á lezwhī á gá ŋ́gɛ akɔ̄?»
20Yɛɛ́so á shúŋne épúp, alāʼ á pwɛt á mbū yí ŋ́gɛ: «Esī e lē ŋgɔ á wú. Awɔ́ a á si efāʼa á lezwhī á wú ú?» 21Á pwɛt á mbū pɔ́p ŋ́gɛ: «Meŋ á lɛ ŋghʉ̄ áa taʼ ŋkʉʼne anu ndaʼ, á piŋ mbú ŋkʉ̄ʼne á wɛ́ metsem páʼa lɛ́? 22Mɔɔ́sɛ a le tswī ŋ́gɛ, pɛ etém ewɔŋkhʉ̄ pɛ́. A le zī ŋgē etswi épúp, á té fhɔ́ɔ á mbū yí í, wɔ maŋgānjʉʼ pímpɛ mé le zī á letēm ewɔŋkhʉ̄. Pɛ ké mbiŋ ŋkúʼte á letēm epɔ̄ mbaŋa, tɛ ŋkó mbɔɔ aleʼé aswite. 23A piŋɛ ŋgɔ́ éyi, mɛ́ teém á mɔ́ mbaŋa aleʼé aswite, ńdɔkɔ te fāa lepé tsīi, Mɔɔ́sɛ a le yáā, mbɔ melaʼ akɔ̄, pɛ piŋɛ nzáŋa á lɔ́ŋ á mbū meŋ, páʼ meŋ á ghʉ, ŋiŋ á pú ntē á aleʼé aswite ē? 24Ndɛ́ʼ pɛ ezéŋ efhó ánɛ ŋkɔʼ nnɛ̄t ŋiŋ, tɛ́ nzáʼ ntsaŋ zi. Pɛ elɔ̄k á ndeŋ ndeŋ tɛ́ nzáʼ. »
Epuɔ é si nzɛ́ttɛ ŋ́gɛ, tɛ Yɛɛ́so mé Nzaʼ‑Ŋkhʉ kɛɛ́ lɛ́?»
25Emɔ̄ʼ epuɔ Yelósalɛm é le nɔ̄ŋ ndʉ́ɛ́ ŋ́gɛ: «Ŋiŋ wuɔ mé té ŋiŋ yīi, mɛ́ é si nɔŋ efāʼa á lezwhī á yí lā lɛ̄? 26Awuɔ yīi a piīŋ ŋgɔ́ ega eshúŋnɛ esa saá, pɔ́ piŋ nnɔ̄ŋ te ndʉ́ɛ́ anu á mbū yí í la. É lɛ a gɔ egɔ́ yīi mekém alāʼ pímpɛ, é véŋ á légɛ, a á Nzaʼ‑Ŋkhʉ ʉ? 27Ɔɔ táʼ, pek é si ŋké nzhɛ́ɛ ajʉʼ zīi, ewuɔ ŋiŋ mɛ́t a fhɔ́ɔ éwú. Nzaʼ‑Ŋkhʉ a a fú eshʉʼe páʼā, ŋiŋ a á le zhɛ́ á ajʉʼ zīi, a fhɔ́ɔ éwú ú. »
28Yɛɛ́so á gɔ́ á Mía Ŋgyā Ndém nzíʼnɛ epuɔ páʼā, ńdɔ̄k ŋghi teté ndé ŋ́gɛ: «Pɛ kwaāŋ ŋ́gɛ pɛ zhɛɛ́ á gá, ńnɔŋ nzhɛ́ɛ ajʉʼ zīi, meŋ fhɔ́ɔ éwú ká? Tɛ́ á ké ŋgɔ́ páʼa, mbɔ meŋ méŋwɛ̄t mé lɛ te kɔ̄ŋ eshʉ̄ʼ ɛ́. Ŋiŋ yīi a le tó á gá ŋgɔŋ, a á si ŋgɔ́ á ŋgaŋ anuúnē. Pɛ te si nzhɛ́ɛ á yí í. 29Ŋ́ké ŋgɔ́ mé meŋ, mbɔ meŋ á si nzhɛ́ɛ á yí melaʼ mīi, meŋ fhɔ́ɔ á lezēŋ yí, mbɔ yí mé le tó á gá á ŋgɔŋ. » 30Pɔ́ júʼ épúp, ńdɛ nzī á lefaʼ eshhʉ̄ á legɔ á yí. Táʼ, ŋiŋ á ké te apū ánɛ yí zápa, melaʼ mīi azí afʉʼ á le zɛ́t te kuʼ. 31Emɔ̄ʼ epuɔ á nnɔ alāʼ, é ké efɛ́ nnɛ̄t ŋgyá mé yí, ńnɔŋ ndʉ́ɛ́ ŋ́gɛ: «Tɛ Nzaʼ‑Ŋkhʉ a a láʼ eshʉʼ, éghʉ azí meŋkʉʼne menu tɛ e etɔ́k emi, ŋiŋ wuɔ a ghʉɛ ɛ?»
Nnɔ epuɔ Falísia é tó epuɔ ŋ́gɛ, pɔ́ egʉɔ ŋgɔ̄ á Yɛɛ́so
32Anu zīi, mɛ́ ŋgɔ́ á nnɔ alāʼ mvhótɛ ánɛ Yɛɛ́so, á kó á metuúŋ nnɔ epuɔ Falísia. Wɔ nɔŋ‑epɔʼ epi melʉɛ mbɔɔ epuɔ Falísia, é tó wɔ píp‑Mía Ŋgyā Ndém ŋ́gɛ, pɔ́ egʉɔ ŋgɔ̄ á yí. 33A ge egɔ́, Yɛɛ́so á nɔŋ ndʉ́ɛ́ á mbū alāʼ ŋ́gɛ: «Meŋ zɛɛ́t á tsetsɛlɛ pɛ áa méŋ afʉʼ páʼa ndaʼ, tɛ́ égʉɔ etswɛ́tte á ŋiŋ yīi, a le tó á gá á ŋgɔŋ. 34Pɛ e shʉʼ efaʼ á gá, épīŋ le á gá jʉ́ɔ. Ajʉʼ zīi, meŋ gʉɔ mé éwú, pɛ gɔ le kūʼ á leshʉʼ éwú ú. » 35Mekém epuɔ Yúda é zi á lelē á tsetsɛlɛ pɔ́p ŋ́gɛ: «A á páʼa ŋgʉ̄ɔ mé egɔ́, tɛ ŋgɔ́ yīi ḿpɛ e gɔ le zéŋ á yí njʉ́ɔ ɔ̄? Élɛ a gʉɔ mé ntswɛtteé epuɔ alāʼ pímpɛ pīi, pɔ́ lē esaŋa ŋgʉ̄ɔ mé alāʼ epuɔ Glɛk e? Kɛ a gʉɔ mé nziʼné epuɔ Glɛk lóo? 36Anu jʉɔ zīi, a á lé la, á páʼa ńdɔkɔ ŋ́gɛ akɔ̄? Páʼ a á lé ŋ́gɛ, ḿpɛ e shʉʼ efaʼ á yí, épīŋ le á yí jʉ́ɔ. Mbɔɔ lɛ̄ɛ, ajʉʼ zīi yí gʉɔ mé éwú, ḿpɛ gɔ le kūʼ á leshʉʼ éwú ú. »
Ntshi yīi é ghʉɛ mɛ́ gɔ́ɔ éwú
37Á shʉʼ ŋgɔ́ nzoknzem aleʼé lekāk, ŋ́gɔ́ á kwaʼ mía mía aleʼé, Yɛɛ́so á lu á esī ntshí ajʉʼ, ńdé mé ŋghi teté ŋ́gɛ: «Agāk ŋiŋ á nɔŋ eshhʉ́ɛ, á shʉʼ njʉ́ɔ á gá, meŋ ŋgyá ntshi á nú. 38“Ŋiŋ a fíɛ́ nnɛ̄t ŋgyá mé meŋ, mbɔ ntshi yīi é ghʉɛ mɛ́ gɔ́ɔ éwú, e fhó á ntē yí esáʼe”, ńdeŋ ndeŋ páʼ Ndém á leé á ntē aŋwaʼne yí épúp. » 39Yɛɛ́so a le gē elé épúp, ńdɔkɔ ndʉ́ɛ́ páʼ, Azwakne Ndém a shʉʼ esóʼo ánɛ epuɔ pīi, pɔ́ fɛɛ́ nnɛ̄t ŋgyá mé yí. Ndém a le zɛ́t te yá Azwakne zí á mbū wɔ fɛ́‑nnɛ̄t, melaʼ mīi, Yɛɛ́so a le zɛ́t te kɔ́ʼ tɛ ŋkó á ntē shʉ́shɔ́k yí.
Nchu nchu a á kó á nnɔ alāʼ, melaʼ Yɛɛ́so
40Emɔ̄ʼ epuɔ á nnɔ alāʼ, é júʼ ashuŋne mɛ́t, emɔ̄ʼ epuɔ é nɔŋ ndʉ́ɛ́ ŋ́gɛ: «Ŋiŋ wuɔ a á kwaʼ ntswi‑ŋke Ndém yīi, pek gɛ nzwíʼtɛ. » 41Emɔ̄ʼ epuɔ é nɔŋ ndʉ́ɛ́ azɔ́p ŋ́gɛ: «Ŋiŋ wuɔ a á Nzaʼ‑Ŋkhʉ yīi, Ndém a le laʼnēē. » Emɔ̄ʼ é kó nnɔ̄ŋ ndʉ́ɛ́ azɔ́p ŋ́gɛ: «Ŋgáŋ, Nzaʼ‑Ŋkhʉ a gɔ le fhó á Ŋgaliléa á. 42Nɔ́ŋ ŋ́gɛ Ndém a leé á ntē aŋwaʼne yí ŋ́gɛ, Nzaʼ‑Ŋkhʉ a a láʼ efhó ánɛ ndhu Efɔ Ndavít, égɔ́ á ŋiŋ Bétlehɛm, á méŋ agáʼ tésɔŋ yīi, Ndavít a á ŋiŋ éwú. » 43Á páʼa tɛ́ alāʼ, á le wɛ̄ á nchu nchu ánɛ Yɛɛ́so. 44Emɔ̄ʼ epuɔ á nnɔ pɔ́p, é nɔŋ efāʼa á legɔ á yí, táʼ, ŋiŋ á ké te apū ánɛ yí zápa.
Mekém epuɔ Yúda é té fɛ́ nnɛ̄t ŋgyá á mbū Yɛɛ́so ó
45Wɔ píp‑Mía Ŋgyā Ndém pwɔ̄, é piŋ nzem njʉ́ɔ wɔ nɔŋ‑epɔʼ epi melʉɛ mbɔɔ epuɔ Falísia, pɔ́ zɛ́tte á wɔ́p ŋ́gɛ: «Melaʼ akɔ̄ pɛ ka lɔ̄k á Yɛɛ́so mɛ́t eshʉ̄ʼɛ ɛ̄?» 46Pɔ́ pwɛt ŋ́gɛ: «Pek laá njʉ́ɔ á ŋiŋ, á shúŋne páʼ ŋiŋ mɛ́t ɛ́. » 47Epuɔ Falísia é zɛ́tte á wɔ́p ŋ́gɛ: «Pek é kwaŋ ŋ́gɛ, pɛ kaá ncʉ́ʼ á pɔp á wɛ́ azɛ́ ɛ́? 48Á shʉʉ̄ʼ ánɛ nnɔ mekém alāʼ, mbɔɔ ánɛ nnɔ epuɔ Falísia, pɛ é jʉ́ɔ tsɔ awɔ́ yīi, a á fɛ́ nnɛ̄t ŋgyá mé yí í? 49Ńdaʼ nnɔ alāʼ wuɔ yīi, pɔ́ te si nzhɛ́ɛ lepé Mɔɔ́sɛ ɛ́. Ndém a a láʼ enéŋ ndɔ á athū pɔ́p. » 50Taʼ ŋiŋ á nnɔ epuɔ Falísia, lezēŋ tsí é gɔ́ lɛ Nikodɛm, á ŋiŋ yīi, a le gʉ̄ɔ njʉ́ɔ á Yɛɛ́so lā, á lé ŋ́gɛ: 51«Lepé tsímpɛ é zi te véŋ ŋ́gɛ, mɛ́ etswá á ŋiŋ ŋgʉɔ athʉ́ lepé té gɔ́ yīi, mɛ́ é júʼ nchu yí í, té gɔ́ yīi mɛ́ é zi nzhɛ́ ajū mīi, a á fa á. » 52Pɔ́ pwɛt á mbū yí ŋ́gɛ: «É lɛ o ó páʼa ŋgɔ́ ajú á ŋiŋ Ŋgaliléa a? Túŋ á atseŋ á mbɔŋɔ́, ńjʉ́ɔ páʼ, ntswi‑ŋke Ndém a gɔ le fhó á Ŋgaliléa á. »
Ŋgaŋ agā menzwí
[ 53Pɔ́ lɛ efākne, awíɛ awíɛ á gʉɔ mé mba zi.
Currently Selected:
Jáaŋ 7: ybb
Highlight
Share
Copy
Want to have your highlights saved across all your devices? Sign up or sign in
© CABTAL
