Jáaŋ 13
13
Yɛɛ́so a á ega esōko mekhu megaŋ nnɔ pí
1Lekāk Páska é le nɔ̄ŋ ŋgɔ̄ á nziī, Yɛɛ́so á nɔŋ nzhɛ́ɛ á légɛ, ezi njhʉ̄ e é kuʼ. Ńjhʉ̄ zīi, a a lɔk efhó á ŋgɔŋ ega, égʉɔ etswɛ́tte á Mɔʼɔ́ yi. Yɛɛ́so mɛ́t a le kɔ̄ŋ epuɔ pí pīi, é ntē ŋgɔŋ tɛ nzōko. 2Pɔ́ a nnɔ yí é le naŋté á esī nnɔŋ mpfɛ́tɛ azō, mbɔ Sɛ́ta a á ndáʼ ŋkó á ntē Yúdas Iskaliɔt méŋ Simɔŋ, tɛ ntshóne á yí á leswiŋ á Yɛɛ́so. 3Yɛɛ́so á nɔŋ nzhɛ́ɛ á légɛ, Mɔʼɔ́ yi a lē mbú ŋgyá mete á mbū yí á lelɔk ŋghʉ̄ etsō tsem, ńnɔŋ nzhɛ́ɛ á légɛ, yí le fhó á mbū Ndém, ḿbiŋɛ mbīŋɛ mé lezēŋ Ndém. 4Ńnáŋ tɛ ndū á esī, ésɔ̄ŋ nzhó efwɔ̄k zi, ḿbɛ́ á tɛ́wɛlɛ ncúŋ. 5Ńnéŋ ntshi á ntē pɛ́ɛn, ńzī á lesok mekhu megaŋ nnɔ pí, ńdɔ̄k á tɛ́wɛlɛ yīi, a á ncúŋ ánɛ yí, ńtsíʼne.
6Ŋ́gʉɔ tɛ ŋkó ánɛ Simɔŋ Piɛ, á lé á mbū yí ŋ́gɛ: «Ŋ́gɛ wu Mɔʼɔ́ wek, o gʉɔ mé esoók mekhu má a?» 7Á pwɛt á mbū yí ŋ́gɛ: «Ajū mīi meŋ á si ŋghʉ̄ɛ, o gɔ le tsetsɔŋɔ zhɛ́. Táʼ, o o ké eshʉʼ tɛ́ júʼe. » 8Piɛ á pwɛt á mbū yí ŋ́gɛ: «Ŋgáŋ, o gɔ le mekhu má sok. » Á lé á mbū yí ŋ́gɛ: «Meŋ gɔ te mekhu mú sok, mbɔ pɔkɔ te zɛ́t nnɔ ɔ́. » 9Simɔŋ Piɛ á lé á mbū yí ŋ́gɛ: «Á gɔ́ épúp me Mɔʼɔ́ wek, te lɛ esōk áa mekhu má ndaʼ, sok tɛ mbɔɔ mbū pɔ́ athū zá. » 10Yɛɛ́so á pwɛt á mbū yí ŋ́gɛ: «Ŋiŋ yīi a á ndáʼ esōk nnɛ̄t, mɛ́ té zéŋ mbɔ́ŋte á lesok á yí í, [tɛ ńdaʼ mekhu mí], melaʼ mīi a á ndáʼ ŋgɔ́ ndane lané. Pɛ pwɔ̄ é ké ŋgɔ́ ndane lané, táʼ, ŋ́ké te á wɛ́ metsem ɛ́. » 11A le gē elé épúp, ńnɔŋ nzhɛ́ɛ á ŋiŋ yīi, a a swiŋ á yí. É melaʼ épúp tɛ́ a le lé ŋ́gɛ, pɔ́ metsem é té ndane lané ɛ́.
12Yɛɛ́so a le māk á lesok mekhu megaŋ nnɔ pí, ḿbɛ́ nzhó efwɔ̄k zi mmāʼ, ńzéŋ nnáŋ á esī, ńdé á mbū pɔ́p ŋ́gɛ: «Tɛ pɛ é júʼ ajū mīi, meŋ á ghʉ á mbū pɛ lā a? 13Pɛ é si ntɔ́ŋɔ á gá lɛ Nziʼnɛ, mbɔɔ lɛ Mɔʼɔ́ wɛ, ńdʉ́ɛ́, meŋ gɔ́ ewiɛ́. 14Páʼ meŋ, Nziʼnɛ, ŋ́gɔ́ á Mɔʼɔ́ wɛ, meŋ á piŋ esōk mekhu mɛ́ lā, pɛ azɛ́, pɛ pɔŋteé á lezēŋ esōk mekhu mɛ́ azɛ́, ńzeŋne zeŋné. 15E é páʼa, ŋ́gɔ́ efʉʼ zīi, meŋ á yá á mbū pɛ. Ajū mīi, meŋ á ghʉ ánɛ pɛ, pɛ ezéŋ ŋghʉ̄ azɛ́ ánɛ emɔ̄ʼ epuɔ. 16Kwaʼ anuúnē anuúnē, meŋ shúŋɔ á wɛ́ ŋ́gɛ, nziʼnɛ afaʼ, a te zhɛ́ afaʼ ntsyā á mɔʼɔ́ afaʼ yi í. Nziŋ‑ntō á piŋ te fáŋ ntsyā á ŋiŋ yīi, a á ntó á yí í. 17Tsetsɔŋɔ, páʼ pɛ é si nzhɛ́ɛ menu muɔ mɛ́t lā, pɛ ghʉɛ épúp, mbɔ pɛ é meshhʉ̄ mbɔŋ. 18Meŋ te ndʉ́ɛ́ á wɛ́ metsem ɛ́. Meŋ á si nzhɛ́ɛ epuɔ pīi, meŋ ndē ntsɔ́ʼ á wɔ́p. Á si ŋké nzɛ́ttɛ ŋ́gɛ, anu zīi mɛ́ le lé á ntē aŋwaʼne Ndém, a epō. Mɛ́ le lé éwú ŋ́gɛ: “Ŋiŋ yīi, pek yí é le nɔ̄ŋ mbútɛ etsō mpfɛ́tɛ, a le pīŋ esɛt, ńcʉ́ʼ á ŋgaŋ mbo ga.” 19Meŋ tʉ́ɛ́ njhʉ̄ eshúŋɔ á wɛ́ tsetsɔŋɔ páʼa, tɛ́ anu mɛ́t a eshʉ̄ʼ. Tɛ afʉʼ zīi á piŋ eshʉ̄ʼ, pɛ ezhɛ́ á légɛ, “meŋ á si ŋgɔ́ á ŋiŋ yīi, meŋ á ewiɛ́.” 20Kwaʼ anuúnē anuúnē, meŋ shúŋɔ á wɛ́ ŋ́gɛ, ŋiŋ a kóknɛ á ŋiŋ yīi, meŋ mé tó á yí, mbɔ ŋgaŋ a kóknɛ áa gá méŋwɛ̄t. Ŋiŋ a piŋɛ ŋkókne á gá, mbɔ a lɔkɔ ŋkóknɛ á ŋiŋ yīi, a le tó á gá. »
Yɛɛ́so a á ega mbhʉ́ɛ ŋ́gɛ, taʼ ŋiŋ nnɔ yi, a a swiŋ á yí
(Mat 26.20-25; Mlk 14.17-21; Lúk 22.21-23)
21Yɛɛ́so á shúŋne épúp, ntē yí é pú ntáka, á lé esa saá ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, taʼ ŋiŋ á nnɔ pɛ, a a shʉʼ eswiŋ á gá. » 22Megaŋ nnɔ pí é cʉne mennɛ̄t mɔ́p, awiɛ́ á nɔŋ nzɛ́ttɛ á ntē yí ŋ́gɛ, a á páʼa ndʉ́ɛ́ á awɔ́? 23Mmɔʼ ŋiŋ ánɛ nnɔ Yɛɛ́so, á ŋiŋ yīi, Yɛɛ́so a lɛɛ́ ŋkɔŋɔ á yí tɛʼ, á náŋ mbáte á yí, pɔ́ nɔŋ mpfɛ́tɛ azō. 24Simɔŋ Piɛ, á míŋ á yí lezēk ŋ́gɛ, a ezɛ́tte á Yɛɛ́so á ŋiŋ yīi, a lʉ́ɛ́. 25Ŋiŋ nnɔ Yɛɛ́so wuɔ mɛ́t, á lɛ ŋŋɔ́ʼne á letuúŋ yí, ńzɛ́tte á yí ŋ́gɛ: «Mɔʼɔ́ wek, o ó páʼa ndʉ́ɛ́ á awɔ́?» 26Yɛɛ́so á pwɛt ŋ́gɛ: «A á si ŋgɔ́ á ŋiŋ yīi, meŋ a yá mbwɔ̄ʼ ecū muɔ tsīi, meŋ gɔ á ncɔʼɔ la, á mbū yí. » Ńdé épúp, ńcɔ̄ʼ mbwɔ̄ʼ etsō, ŋ́gyá á mbū Yúdas Iskaliɔt méŋ Simɔŋ. 27Afʉʼ mɛ́t zīi, Yɛɛ́so a lɛɛ́ ŋgyáa mbwɔ̄ʼ etsō á mbū yí, Sɛ́ta á liɛ ŋkúɔ́ á ntē yí. Yɛɛ́so á lé á mbū yí ŋ́gɛ: «Ajū mīi, o ó si ŋkɔ̄ŋɔ á leghʉ lā, lɛ ŋgákne ŋghʉ̄. » 28Tsɔ taʼ ŋiŋ á nnɔ epuɔ pīi, é ŋgɔ́ á ajʉʼ mɛ́t, á pú te júʼ melaʼ épúp, Yɛɛ́so a lʉ́ɛ́ épúp ɔ́. 29Páʼ Yúdas a lɛ á nnɔ, ŋ́gɔ́ á efeŋ‑ŋkāp lā, emɔ̄ʼ epuɔ é kwaŋ ŋ́gɛ, Yɛɛ́so a á nnɔŋ ndʉ́ɛ́ á mbū yí ŋ́gɛ, a egʉ̄ɔ nzó ecū mīi, é pɔŋ á mbū pɔ́p, á lelɔk njhʉ́ lekāk. Ŋ́ké te épúp ɔ́ mbɔ, a á nnɔŋ ŋ́gɛ, a egʉɔ ŋgyá á azō, á mbū wɔ te kuʼ ánɛ azō. 30Yúdas á tswí mbwɔ̄ʼ ecū mwɔ̄, ńdɛ efhó á ŋgyā ntó. Mbɔ nzém e é eséŋ.
Yɛɛ́so a á ega ŋgyáa lepé eswhī
31Yúdas á lɛ ŋgē efhó á ŋgyā etó, Yɛɛ́so á lé ŋ́gɛ: «Tsetsɔŋɔ wuɔ, shʉ́shɔ́k Méŋ‑Ŋiŋnɔŋ wuɔ, a á tó á ntentā. Epuɔ menɔŋ e zápa ánɛ yí, éjʉ́ɔ á shʉ́shɔ́k Ndém. 32[Páʼ mɛ́ e zápa ánɛ Méŋ‑Ŋiŋnɔŋ ejʉ́ɔ á shʉ́shɔ́k Ndém lā], Ndém a a zéŋ eghʉ azí, mɛ́ ejʉ́ɔ á shʉ́shɔ́k Méŋ‑Ŋiŋnɔŋ. Tɛ ŋgia á yí á leghʉ mɛ́ jʉ́ɔ, é té zɛ́t esāk á. 33Ewɔŋkhʉ̄ pá, ḿpɛ te e zéŋ enáŋ tɛ ŋgia e esāk á. Pɛ e shʉʼ efaʼ á gá. Táʼ, anu zīi, meŋ ke lé á mbū epuɔ Yúda, meŋ á zéŋ ndé á mbū pɛ azɛ́ tsetsɔŋɔ. Ŋ́gɛ: “Ajʉʼ zīi, meŋ gʉɔ mé éwú, pɛ gɔ le kūʼ á leshʉʼ éwú ú.”
34Meŋ á yá lepé leswhī á mbū pɛ, é gɔ́ lɛ̄ɛ: pɛ ekɔ̄ŋne mennɛ̄t mɛ́ nzeŋne zeŋné. Ndeŋ ndeŋ páʼ meŋ kɔɔ̄ŋ á wɛ́ lā, pɛ ekɔ̄ŋne mennɛ̄t mɛ́ nzeŋne zeŋné. 35Epuɔ menɔŋ ntsem e shʉʼ efhó ánɛ ŋkɔŋne nzeŋne zeŋné zīi pɛ wɛɛ̄, tɛ́ ezhɛ́ á légɛ, pɛ́ é si ŋgɔ́ megaŋ nnɔ pá. »
Yɛɛ́so a á ega mbhʉ́ɛ ŋ́gɛ, Piɛ a a shʉʼ epuŋne á yí
(Mat 26.31-35; Mlk 14.27-31; Lúk 22.31-34)
36Á shúŋne épúp, Simɔŋ Piɛ á zɛ́tte á yí ŋ́gɛ: «Mɔʼɔ́ wek, o gʉɔ áa me egɔ́?» Yɛɛ́so á pwɛt á mbū yí ŋ́gɛ: «Ajʉʼ zīi, meŋ gʉɔ mé éwú, o gɔ le á nzem meŋ tsetsɔŋɔ gɔ́. Táʼ, o o ké efú tɛ́ egɔ́ á nzem meŋ. » 37Á pwɛt á mbū yí ŋ́gɛ: «Mɔʼɔ́ wek, melaʼ akɔ̄ meŋ gɔ le kūʼ á gá á legɔ̄ á nzem wu tsetsɔŋɔ ɔ̄? Meŋ tshií páʼ, meŋ gɔ eyá athū nnɛ̄t zá melaʼ mú. » 38Yɛɛ́so á pwɛt á mbū yí ŋ́gɛ: «Ŋ́gɛ, o o yá athū nnɛ̄t jú melaʼ má a? Kwaʼ anuúnē anuúnē, meŋ shúŋɔ á wú ŋ́gɛ, ŋkʉɔʼ a ghʉ ege etɔ́ŋ, mbɔ o ó lɛʼte ŋgʉɔ ntɛ́t ŋ́gɛ, o ka á gá zhɛ́ ɛ́. »
Currently Selected:
Jáaŋ 13: ybb
Highlight
Share
Copy
Want to have your highlights saved across all your devices? Sign up or sign in
© CABTAL
