Malakus 9

1Tə n ndòw n sə kə, dza tə̀ ghə nə̀, “N dza bə isəŋə tə̀ ghaa nə̀, ghə̂ a loʼ fa nə̀ ghə i kpu way nə̀ ghə ka koʼ fɔɔ u Kəzə̀ wə u bəghənə n daʼa kə.”

Yeso kweyyə kɔʼ koʼ i wi

(Mat 17.1-13; Luk 9.28-36)

2Ambə tsuʼu n tsəghə tsunə ntuubə, Yeso n ney kɔʼ Pita, Jems nsə Jɔn, nuu kɔʼ ndòw ghi ghə nə̀ ukaʼ. Ghə n loʼ fu n nəŋə ghə. Nghee ghə loʼnə fu, Yeso n kweyyə kɔʼ n sə kə ghə, 3ndzə tə wi tə n nyiəllə tə̀ a loʼ tsə̀, tə n fəmmə sa, fəm tsəghə tsu ufə udzəm fa n mbi. 4Ghə n dza i laalə, ghə n koʼ Elayja nsə Mushi bən shi kɔʼnə fu, zey ndow ni ghɔɔmənə ghi Yeso. 5Pita n dza ndòw tə̀ Yeso nə̀, “Wù dii, i dzɔbənu nghee ghey loʼ fa. Ghey loʼ ni bəghə kɔʼ nfəə ntəghə tə̀ ghaa. Fəmɔʼ tə̀ wɔ, fəmɔʼ tə̀ Mushi, nsə fəmɔʼ tə̀ Elayja.” 6Pita â buʼ khə way ghəə zey tə dzanə, n təŋkey ghə â loʼ nə itsəŋ.

7Ghə n dza i koʼ, mbaʼ tə n bə tsəd bə ghə, dzə̀ i loʼ zə n shi bə fu tii dza nə̀, “À wən loʼ waa wuŋ u tsuʼu wə, zow na tə̀ wi!” 8Ghə n tsaŋŋə laalə kaabə tsə təluʼu, ka kəm koʼ wù loʼ, a n loʼ kə ghə ghi Yeso.

9Nghee tə̀ ghə dzəŋŋə tsuu bənə nə̀ ukaʼ, Yeso n fu tsu kəlaŋ tə̀ ghə nə̀ kə̂ ghə nə dzanə ghəə zən tə̀ wù loʼ ni ndòw kùm tsuʼ fey Waa Wù Sɔŋtsuʼ î zhəm dzəŋŋə bənə nə ivə. 10Ghə n nyì naŋa ndòw ghə i tii zə n wû i ghə tə̀ tə â dzanə, kee kaʼ ni ghɔɔmə n wû i ghə dza nə̀, “Zhəm dzəŋŋə zə ivə zey baa dii nə̀ ngee.” 11Ghə n bəb ndòw tə̀ Yeso nə̀, “À loʼ kee ghə̂ a dii a kəlaŋ a dzanə nə̀ a i bəghə dzə Elayja isə tə wù wən tə khə ni bə i sə bəghə?” 12Yeso n dza ndòw tə̀ ghə nə̀, “Elayja teeli khə ni bə isə ni bə bayyə naŋa tsu aghəə. À kee nam loʼ kee ghə tɔ̀ɔ naŋanə n màʼlə K-a-zə̀ nə̀ Waa Wù Sɔŋtsuʼ khə ni koʼ ndəmə uchɔd, ghə i tuu maʼa wi ə? 13N kee dza bə tə̀ ghaa nə̀, Elayja mâ bə, ghə̂ ghə n ghəŋə aghəə tə̀ wi tə̀ ghə ləghənə, ighələ tə̀ màʼlə K-a-zə̀ kə â dzanə kuum wi.”

Yeso baŋŋə waa u num wə zay kə bəbə kə loʼnə n kow wi

(Mat 17.14-21; Luk 9.37-43a)

14Ambə ghə dzəŋŋə tsu bənə nə ukaʼ, ghə n bə koʼ bə ngəd tə̀ loʼ tey, nə nɔɔ kə aghə̂ kə n dzəŋ tsəghə kɔʼ ghə nsə ghə̂ a dii a kəlaŋ a loʼ ghə, ghə ghɔɔmə ballənə. 15Nghee tə̀ ghə̂ a koʼ ndòwnə Yeso, dzuu zə n zum ghə, ghə n nyəŋ ndow kpii ney bə wi. 16Yeso n bəb ndòw tə̀ ngəd tə wi tə nə̀, “Ghaa baŋŋə ghɔɔmə kee fa ghi ghə ə?”

17Wù loʼ n nɔɔ key n buʼ shi kɔʼ kəbɔŋ nə̀, “Wù dii wə, n mə ney bə waa wuŋ ni bə koʼ wɔ n təŋkey zay kə bwu kə loʼ n kow wi, kə ghəŋənə wi tə u way ni ghɔɔmə. 18Nəŋə zey zay kə bwu key kwu tsunə wi, kə n mbvuŋə maʼa bə wi aghəd, tsəbə tə n kaʼ ni shi n dzuu i wi, tə n fəə asɔŋ, wû u wi wə tə̀ghə̀ doʼo kɔʼ. Mə u dza tsunə tə̀ ngəd tə tə̀ nə̀ ghə dzùm shi zay kə bwu key, ghə u dəm kìi tsunə.”

19Yeso n dza ndòw tə̀ ghə nə̀, “Ghaa sey laʼa bəghəm i fə̀ŋ nə̀ a loʼ kee? Mə i kow fə̀ŋ ghi ghaa n ndow kuum ghee? Mə î boʼo doʼlə ghi ghaa ni ndòw kùm zeeli? Ney bə na waa tii fa.” 20Ghə n ney bə wi n səə Yeso. Nghee tə̀ zay kə bwu key koʼ tsunə Yeso, kə n mbvuŋŋə maʼa bə waa wey aghəd, tə n bəŋŋə kaabə tsə, tsəbə tə n shiəə n dzuu i wi. 21Yeso n bəb ndòw tə̀ bày waa wey nə̀, “Ghəə a tii ghə â kaʼ zeeli?” Bày waa tii n dza nə̀, “Ghəə tii ghə â kaʼ nə̀ tə nam təbənu.”

22Ndəmə tənəŋə, zay kə bwu key n maʼa wi nə uvəllə, nkee nə mmuu tə̀ tə kpu. Abə jìi loʼnə, kwɔɔlə sî zə n kow ghey, wə gaamə ghey.

23Yeso n dza tə̀ wi nə̀, “Wə bəb bə nə̀ ‘Abə n khənə jìi ə?’ Ghə i loʼ i way ni taw tsəghə wù wey tə khənə bəghəm i fə̀ŋ zə.”

24Bày waa wey n daŋŋə dza, “N khənu bəghəm i fə̀ŋ zə̀, kee gaamə mə nə̀ n ndəŋ keeli tsu.”

25Yeso n daŋŋə koʼ nə̀ nɔɔ kə aghə̂ kə nya kuʼu bənu, sey, tə n tsəʼlə tsu kəlaŋ tə̀ zay kə bwu key nə̀, “Wɔ zay kən wə ghəŋŋənə nə̀ waa wən kuʼ doʼo, tə doʼo soʼo kəmùʼ, bə tsəghə shi n kow wi, wə̀ nuu tən.”

26Zay key n buʼ shi kɔʼ kəbɔŋ, mbvuŋŋə maʼa bə waa wey aghəd, daŋŋə bə tsəghə shi n kow wi. Waa wey n nyə̀ŋ tə̀ tə kpu doʼonu. Ghə̂ ghə n kaʼ ni dza nə̀, “Tə n kpu!”

27Yeso n kwu tsu wɔɔ kə waa tii, ney nuu kɔʼ wi idəŋ, tə n təmi kɔʼ n fuu i wi.

28Ambə Yeso ghi ngəd tə wi tə nyi ndòwnə n ndaw, ngəd tə wi tə n bə tsɔŋ bəb bə tə̀ wi nə̀, “A kee loʼ kee ghey mə way ni dzùm shi zay kə bwu key ə?”

29Yeso n beeli ndòw ghə nə̀, “Ghə i loʼ i way wù loʼnə ni ghəŋə ni dzùm shi ndzoʼo zay kən, a may kə nə̀ tə ndəŋ gɔŋŋə tsunu, bam idzuu soʼo.”

Yeso ghɔɔmə kpiʼi kuum və i wi

(Mat 17.22, 23; Luk 9.43b-45)

30Yeso ghi ngəd tə wi tə n nuu tsu fu, tsəghə tɔɔlə ndow n mboʼo Galili. Yeso â ləghə way nə̀ ghə̂ a keeli luʼu key tə loʼnə tii, 31boʼnə tə â bwey dii ndow ngəd tə wi n ghəə ghə n jìi dza nə̀, “Ghə i ney fuu tsəghə ndòw Waa Wù sɔŋtsuʼ tə̀ ghə̂ ghey ghə i weynə wi. A i bə nə ntsuʼu ntəghə, tə i zhəm dzəŋŋə bə nə ivə.”

32Ngəd tə wi tə n ka kee zowkeeli ghəə zey i diinə, ghə n tsəŋə soʼo ni bəb tə̀ wi.

À tow kə loʼ ndee

(Mat 18.1-5; Luk 9.46-48)

33Ghə n ndòw bə n naʼ i Kapenum, ambə ghə nyi ndòwnə n ndaw, Yeso n bəb ndòw tə̀ ngəd tə wi tə nə̀, “Ghaa mə ghɔɔmə ballə kee n jìi ə?”

34Ghə n ləghə way ni beeli wi n təŋkey ghə â baŋŋə bə təfəghəm n jìi ni koʼ nə̀ a loʼ ndee tow kə n fəŋŋə kə ghə ə? 35Yeso n doʼo tsu aghəd, tɔŋɔ bə ngəd tə wi tey ighəm n ghii tə təbəghə, dza tə̀ ghə nə̀, “Wù wey tə ləghənə ni doʼo kətow n fəŋŋə kə ghaa, khə ni doʼo wù kəfwaʼ tə̀ ghaa adzəm.” 36Sey, tə n ney kɔʼ waa fə loʼ fə, teyyə naŋa bə wi n sə kə ghə. Tə n maŋŋə keeli tsəghə ndòw waa tii, dza tsu tə̀ ghə nə̀, 37“Wù wey tə kpii neynə waa tə̀ a loʼ u wən n zəd zuŋ, sey kpii ney mə. Wù wey tə kpii neynə mə, ka kad kpii ney dzə mə, tə kpii ney soʼo wù wey tə tûmnə mə̀.”

A loʼ ndee tə taʼanə ghi saa?

(Luk 9.49, 50)

38Jɔn n dza tə̀ wi nə̀, “Wù dii, a mə koʼ wù loʼ tə dzùm shiənə zay u bwu wə n zəd zə, a u buu naŋa ndòwnə wi, n təŋkey tə way dzə ghi saa.”

39Yeso n dza ndòw tə̀ ghə nə̀, “Kə̂ ghaa nə buu naŋŋənə wi. N təŋkey, wù way dzə ni ghəŋə dzə nfaalə n zəd zuŋ, tə kəm kaʼ ni dza ghəə a bəbə ghə bòʼ mə. 40Kuum nə̀, wù wey tə zuulə baallə way ghi saa, sey taʼa ghi saa. 41N kùm dza bə tə̀ ghaa nə̀, wù wey tə fuu kənə ghaa n mmuu n məə mə n zəd i Klisto, î teeli keelinu naamə kə wi kə.”

Ghəə ghən a ghəŋŋə nə̀ wù i ghəŋŋə bəb zə

(Mat 18.6-9; Luk 17.12)

42Yeso n kəm dza tsu nə̀, “Wù wey tə ghəŋənə nə̀ wù umɔʼ n ghiinətəghə ghən ghə bəghəmnə tə̀ mə, nə̀ ghə bwù n ghəə a bəbə ghə, dzɔb loʼ tə wù tii nə̀ ghə baa kow kɔʼ tay i nii zə n mwey u wi, ghə maʼa nyi tsu wi n fə̀ŋ ə inyi. 43I loʼ soʼo nə̀, abə wɔɔ kə kə̀ ghəŋənə wɔ̀ nə̀ wə bwù n ghəə a bəbə ghə, khəə nuu kɔʼ wɔɔ kə tii kə. Dzɔb loʼ tə̀ wɔ̀ nə̀ wə keeli muu zə itsali n wɔɔ kə kəmɔʼ, tsəghəshi tə̀ wɔ̀ ni ndòw n vəllə u tsali wə n wɔɔ ghə ghə̀ abəghə. 44[Nyuŋŋə tey tə fəənə ghə̂ ghə fu, kpuu koʼo tsə way, vəllə wey fu, nəmmə koʼo tsə soʼo way.]#9.44 Màʼlə u loʼ u khə way ghəllə zən. 45Abə fuu kə kə̀ ghəŋənə wɔ̀ nə̀ wə bwù n bəghəm i fə̀ŋ zə, khəə nuu kɔʼ fuu kə tii kə. Dzɔb loʼ tə̀ wɔ nə̀ wə keeli muu zə itsali n fuu kə kəmɔʼ, tsəghəshi tə̀ wɔ ni ndòw n vəllə u tsali wə n fuu zə zə̀ ibəghə. 46[Nyuŋŋə tey tə fəənə ghə̂ ghə fu, kpuu koʼo tsə way, vəllə wey fu, nəmmə koʼo tsə soʼo way.]#9.46 Màʼlə u loʼ u khə way ghəllə zən. 47Abə sə̂ zə i ghəŋənə nə̀ wə bwù n bəghəm i fə̀ŋ zə, bɔʼi nuu kɔʼ sə̂ i tii zə. Dzɔb loʼ tə̀ wɔ nə̀ wə nyi n fɔɔ u Kəzə̀ n sə̂ zə imɔʼ, tsəghəshi tə̀ wɔ ni ndòw n vəllə u tsali wə n sə̂ ghə abəghə. 48Nyuŋə tey tə fəənə ghə̂ ghə fu, kpuu koʼo way, vəllə u tii u nəmmə way. 49Ghə̂ adzəm a khə ni tsəghə tɔɔlə nə uvəllə, tə̀ ghə ni doʼo dzɔb, ighələ tə̀ ghə kuu tsoʼ mə nə ufəzəə ni ghəŋŋə nə̀ u dzɔb. 50Tsoʼ n dzɔbənu, a kee loʼ nə̀ abə tsoʼ n kuŋ shi tsunə, n kəm way ni fwaʼ fwaʼ kə ntsoʼ. Ghaa khə ni tɔbə n wû i ghaa tə̀ a loʼ ntsoʼ, ghaa i muu nə ibuulə n wû i ghaa nsə ghə̂ ghə adzəm.”

Currently Selected:

Malakus 9: WEH

Highlight

Copy