Malakus 6

Ghə tuu maʼa Yeso n Nazaled

(Mat 13.53-58; Luk 4.16-30)

1Yeso n zəghə tsu fu ndòw dzəŋŋə n naʼ i wi, ngəd tə wi tə n dzûmə ndow soʼo wi. 2Ambə n tsuʼ inaʼ, tə n dii aghəə n ndaw kədzəŋi ə ghə. Ndəmə aghə̂ ghə n loʼ fu, zəllə ghɔɔmə i wi. Dzuu zə n ngii zum ghə, ghə n bəbə nə̀, “Wù wən zoʼlə bə ghee ghəə ghən ə? Tə nuu bə ghee n ndzoʼo tɔb u wən ə? Tə ghəŋŋə daŋŋə soʼo nfaalə. 3À wən way wù wey tə kɔmnə kaʼ mə ə, tɔŋŋə waa Maria ə? Waazə a wi a way Jems, Yosef, Judas, nsə Shimun ə? N dza waazə a wi a zən a mgbaŋ muu kə fa ghi ghey ə?” Sey, ghə n fəələ ndòw n fə̀ŋ n ghəə ghey tə̀ dzanə.

4Yeso n dza tə̀ ghə nə̀, “Ghə ngɔɔmə tsə wù tûm Kəzə̀ luʼu tədzəm a may kə n naʼ i wi nsə n ndaw wi ghə ngɔɔmə way wi.” 5Sey, tə n way ni ghəŋə ndəmə nfaalə fu, a may kə səfə ghə̂ a dzaŋa à loʼ ghə tə a mɔmnə ghə, ghə n taw kɔʼ. 6Ghə i tii zə n tsəghəshi wi, n təŋkey, ghə̂ ghə inaʼ a wi ghə â khə way bəghəm i fə̀ŋ zə.

Yeso tûm shi ngəd tə wi tey ighəm n ghii ghə abəghə

(Mat 10.5-15; Luk 9.1-6)

Yeso n nuu tsu fu, bwey ndow naʼa tə naʼa, dii ndow aghə̂ n ghəə ghə. 7Yeso n tɔŋɔ naŋa bə ngəd tə wi tey ighəm n ghii tə təbəghə, tûm shi ndòw ghə abəghə, abəghə nə̀ ghə ndòw naʼa tûm Kəzə̀. Tə n fuu tsu ghə n daʼa kə ni dzùm shi zay u bwu wə n kow ghə̂ ghə. 8Tə n dza tə̀ ghə nə̀, “Tə̀ ghaa ndownə, kə̂ ghaa nə neynə fə kə loʼ kə a may kə mbaŋ i nyəllə zə. Kə̂ ghaa nə neynə fəzəə wə, kəmbəghə, nkee ukhəə. 9Dzəŋə kɔʼ na gow tə, kə̂ ghaa nə kee neynə ndzə tə loʼ tə ni kweyyə dzəŋə.” 10Tə n ndòw n sə kə dza tə̀ ghə nə̀, “Abə ghə bəghəm naŋanə ghaa n luʼu kə loʼ kə, doʼo tsu na fu n ndaw tii ni ndòw kùm tsuʼ fey ghaa i shiənə fu inaʼ. 11Abə ghaa bənə n naʼ zey ghə ka bəghəm naŋa ghaa fu, tuu soʼo ni zow tə ghaa, ghaa buʼ maʼa tsu bvə kə naʼ i ghə n fuu i ghaa, tə a loʼ tsəə n ghə i bəbə zey ghə ghəŋənə, ghaa shi nuu n naʼ i tii zə.”

12Sey, ghə n nuu shi i ndòw naʼlə kaabə tûm Kəzə̀ nə̀ ghə̂ a kweyyə fə̀ŋ tə ghə. 13Ghə n dzùm shiə zay u bwu wə n kow ndəmə aghə̂, zɔʼlə tsu ndəmə ghə̂ a dzaŋa ghə nə mmbvə, ghə n taw i kɔʼ.

Və i Jɔn wù fuu u mmuu n Kəzə̀ mə

(Mat 14.1-12; Luk 9.7-9)

14Helɔd n zow tsu ghəə ghən, n təŋkey, Zɔŋ wə â ngii fuŋu n zəd i Yeso. Ghə̂ a loʼ ghə n dza kaabə nə̀, “À loʼ Jɔn wù fuu u mmuu n Kəzə̀ mə tə zhəm dzəŋŋə bənə nə ivə, à wey loʼ ghə i tii zə tə khənə daʼa kə ni ghəŋə faalə mən.”

15Ghə̂ a loʼ ghə n kee dza nə̀, “À loʼ wù tûm Kəzə̀ Elayja.” A loʼ ghə n dza nə̀, “Tə maŋ loʼ wù tûm Kəzə̀, tə a loʼ a ghey ghə â loʼ tsənə sə̂ i sə̂.” 16Ambə Helɔd zow tsunə ghəə ghən, tə n dza nə̀, “Jɔn wən mə â gboonə tow kə wi kə, tə n zhəm dzəŋŋə nə ivə.” 17Zə n loʼ nə̀ â lòʼ Helɔd n wû u wi wə, tə̀ â dzanə nə̀ ghə kwu fìi naŋa ndòw Jɔn, bòʼ nə̀, Helɔd â tsìi ney Herodias wey waazə ə wi tɔŋŋə Filip. 18Jɔn wù fuu u mmuu n Kəzə̀ mə n dza kuulə kə tə̀ wi nə̀, “Laŋ kə saa kə ka bəghəm dzə nə̀ wə ney wey waazə wə n wey!”

19Sey, Herodias n khə fənyiʼi n kow Jɔn, ləghə ni wey wi, kəŋŋə kìi jìi bòʼ Helɔd. 20Helɔd â tsəŋənu Jɔn n təŋkey tə â khə nə̀ Jɔn loʼ wù tsətsəghə, loʼ soʼo wù zow wə. Sey Helɔd n baʼa mbaŋ n tow kə wi. Tə â ləghənu ni zəllə ghɔɔmə i Jɔn zə, a kee loʼ nə̀ tə â ləghə way ghəə ghey Jɔn â dzanə.

21Herodias n bə keeli kɔʼ kəbùʼ. Â loʼ n tsuʼ zə̂ key ghə â jinə Helɔd tii. Helɔd n tɔŋɔ naŋa bə kəzə̂ ni zə̂ tsuʼ fə wi fə jiə fə, Tə n tɔŋɔ bə ngəd tə kəfwaʼ tə wi, ngəd tə təsawgoʼ nsə ghə̂ a nii ghey n mboʼo Galili idzəm. 22Waa Herodia u zən wə n bə bən fu sa, zə n dzɔb nay ndòw Helɔd nsə ghə̂ a wi ghə. Sey, Helɔd n dza tə̀ waa u zən wey nə̀, “Dza bə fə kə ghaa kə wə̀ ləghənə nə̀ n fuu tə̀ wɔ, mə i fuu bə tə̀ wɔ.” 23Tə n kaa tsu dza tə̀ wi nə̀, “N dza bə tə̀ wɔ nə̀, fə kə ghaa kə wə bəbnə n wɔ mə, mə î fuunu tə̀ wɔ. Abə a loʼ kə ni dzawwə tsu fɔɔ wuŋ nə ubad ubəghə n fu bə kəbad kəmɔʼ tə̀ wɔ.” 24Sey, waa tii n ndòw bəb ndòw tə̀ zə̂ nə̀, “N loʼ ni bəb wi n kee?” Nay wi n dza nə̀, “Dza tə̀ fu bə wɔ n tow kə Jɔn wù fuu u mmuu n Kəzə̀ mə.” 25Waa tii n nyəŋ dzəŋŋə ndòw, ndòw dza ndòw tə̀ Helɔd nə̀, “N ləghə nə̀ wə fuu bə mə n tow kə Jɔn wù fuu u mmuu n Kəzə̀ mə nə kəneeli!” 26Ghəə zən n fəmmə nay ndòw Helɔd n fə̀ŋ, jii i loʼ zə n kee way ni tuu wi n fə key tə bəbnə bòʼ kaa mey tə mə neynə n sə kə ghə̂ a wi. 27Sey, tə n daŋŋə tsəʼlə kəlaŋ tə̀ wù wey tə keyyənə wi nə̀ tə ndòw gboo bə tow kə Jɔn. Sawgoʼ ə tii n nuu ndòw n ndaw tsaʼ, ndòw gboo tsu tow kə Jɔn. 28Tə n ndòw bə ghi tow kə Jɔn kə nə kəneeli, bə fuu bə tə̀ waa u zən wey. Waa u zən wey n ney ndòw fuu ndòw tə̀ nay wi. 29Ambə dzûmə tə Jɔn tə zow tsunə nə̀ ghə n wey wi, ghə n ndow boʼo nuu kɔʼ vən i wi, ndòw tsəllə tsu wi.

Yeso chi aghə̂ təkam tətaa

(Mat 14.13-21; Luk 9.10-17; Jɔn 6.1-14)

30Ngəd tə Yeso tə n dzəŋŋə bə, bə dza bə tə̀ Yeso ghəə ghey ghə fwaʼnə nsə ghəə ghey ghə mə diinə adzəm. 31Ndəmə aghə̂ ghə n bəghə ni bə koʼ Yeso, Yeso ghi ngəd tə wi tə n buʼ way ni doʼo zə̂ kɔʼ. Sey tə n dza tə̀ ngəd tə wi tə nə̀, “Bəghə na a ndòw n luʼu key ghə̂ a way fu, tə̀ a zayyə tsu fənyaŋi.” 32Sey, ghə n nyi kɔʼ nə kəfən nuu ndòw n luʼu key ghə̂ a way fu.

33Ndəmə aghə̂ n nam koʼ keeli ndòw ghə nghee ghə nuulə ndownə, kee nuu ndòw naʼa tə naʼa n nyəŋ zə nə aghow, ndòw nyi ndòw fu isə nə̀ Yeso ghi ngəd tə wi tə ka kam bə nyi. 34Ambə Yeso shi tsunə nə kəfən, koʼ ndòw nɔɔ kə aghə̂ key kə teynə, sî zə n kwu wi n kow ghə, n təŋkey, ghə â loʼ tə̀ a loʼ tənjì nə tə khə way wù baʼa wə. Sey tə n kaʼ ndòw ni dii ghə n ndəmə tə aghəə tə. 35Ambə tsuʼ u dzəə bənə, ngəd tə wi tə n bə dza bə tə̀ wi nə̀, “Nəŋə zə n ndòw, a wən loʼ luʼu kə mbvən. 36Dza nə̀ ghə̂ ghən nuu, ghə ndòw kəŋ zuu ufəzəə n naʼa tən tə kuʼlə loʼnə fa.”

37Yeso n dza tə̀ ghə nə̀, “Kəŋ fu na ghə n fəzəə wə.” Ghə n bəb tə̀ wi nə̀, “Wə dza a ndòw bəəbə maʼa ndòw ndəmə khəə wən a loʼ ni tsə wù kəfwaʼ nə təndzɔŋɔ ifam ni zuu ufəzəə tə̀ ghə̂ ghən ə?”

38Yeso n bəb ndòw tə̀ ghə nə̀, “Ghaa khə ubaa usiʼi fey ə? Ndòw laalə tsu na.” Ambə ghə ndòw laalə tsunə, ghə n dza tə̀ wi nə̀, “A khə ubaa utaa nsə tsəghə tə təbəghə.”

39Yeso n dza ndòw tə̀ dzûmə tə wi tə nə̀ ghə doʼlə naŋa ndòw ghə̂ ghey nə ntuʼu aghəd. 40Sey, ghə n doʼlə naŋa ndòw ghə nə ntuʼu. Tuʼu n loʼ mə n loʼ aghə̂ fəbɔm fəbɔm, tuʼu n loʼ mə n loʼ aghə̂ nghəm ntaa ntaa. 41Sey Yeso n ney kɔʼ baa wey utaa nsə tsəghə tey təbəghə, laalə kɔʼ ndòw idəŋ, fuu tsu zɔŋŋə K-a-zə̀, boʼlə fuu ndòw baa wey tə̀ ngəd tə wi tə nə̀ ghə dzawwə fuu ndòw tə̀ ghə̂ ghey. Tə n dzawwə fuu tsu soʼo tsəghə tey tə̀ ghə. 42Ghə adzəm n zə̂, zə̂ kow i tsu. 43Ngəd tə wi tə n nam kûmmi kɔʼ ukhəə ighəm nsə khəə wə ubəghə n boʼo mə nbaa mey nsə sadla n tətsəghə mey mə â doʼo səənə. 44Taŋ ə gheynum ghey ghə â zə̂nə â loʼ aghə̂ təkam tətaa.

Yeso bwey n tow kə dzuu

(Mat 14.22-33; Jɔn 6.15-21)

45Yeso n daŋŋə kuu nyi kɔʼ ngəd tə wi nə kəfən nə̀ ghə nuu ndòw isə n naʼ i Bedsayda. Tə n kee doʼo səə tsu ni sali maʼa nɔɔ kə aghə̂ key. 46Ambə tə saali maʼa tsunə nɔɔ kə aghə̂ key, tə n kɔʼ ndòw nə ukaʼ ni ndòw gɔŋŋə. 47Ambə n kuubə tə, fən key kə n loʼ n fə̀ŋ inyi, Yeso n nam loʼ fa n nəŋə wi n nguŋ inyi. 48Tə n koʼ ndòw nə̀ ngəd tə wi tə dəmənu ni bàŋ kəfən, n təŋkey zəŋ i taw zə â fədlə tənə dzəŋŋə ndow ghə ibam. Sey, n key kə utsuʼ, Yeso n ndòw bə n səə ghə nə̀ tə bwey bə n tow kə dzuu, tə n ndza i buʼ tsəghə daŋŋə ghə. 49Ghə n koʼ ndòw wù loʼ tə bwey bənə n tow kə dzuu, kaʼ ni dey, buʼlə shiə kɔʼɔ nbɔŋ dza kə nə̀ a loʼ avəətsəə. 50N təŋkey, tsəŋ zə â ngii kwu ghə nghee ghə koʼ ndownə wi. Yeso n daŋŋə ghɔɔmə ndòw tə̀ ghə dza nə̀, “Tsuulə tsu na fə̀ŋ tə ghaa tə, à loʼ mə, Kə̂ ghaa nə tsəŋənə.” 51Sey, tə n nyi kɔʼ nə kəfən ghi ghə. Zəŋ zey n daŋŋə fuŋ doʼo ndòw mɔŋ. Dzuu zə n zum ngəd tə wi, 52boʼnə ghə â ka kam zowkeeli dzə nghee Yeso a chinə ghə̂ ghey təkam tətaa nə ubaa utaa nsə tsəghə tə təbəghə. Ghə n kam way ni tɔʼ bəghəm n fə̀ŋ tə ghə.

Yeso baŋŋə ghə̂ a dzaŋa ghə n Jenesaret

(Mat 14.34-36)

53Ambə ghə daŋ shi bənə n nguŋ inyi n bad kə mboʼo Jenesalet, ghə n kow naŋa tsu kəfən fu. 54Nghee tə̀ ghə shi tsunə nə kəfən, ghə̂ ghə n koʼ keeli ndòw Yeso. 55Ghə n nyəŋ kaabə tsəghə ndòw mboʼo tii idzəm, luʼu kə ghaa kə ghə a zownə tə loʼ fu, ghə n boʼo bə ghə̂ a dzaŋa ghə n səə wi n mbùŋ u ghə. 56Luʼu u ghaa wə Yeso â ndòwnə n naʼa tə tii tə tədzəm, ghə̂ ghə n ney naŋŋə bə ghə̂ a dzaŋa ghə n faabə tə jìi, ghə n buʼu wi n wɔɔ kə nə̀ ghə mə labi mɔm tsu kə dzuu i təndzə̂ i wi. Ghə̂ ghey adzəm ghə â mɔmnə wi, ghə n taw i kɔʼ.

Currently Selected:

Malakus 6: WEH

Highlight

Copy