Matyo 9

Yeso baŋŋə wù nə wû u wi wə n kpuu doʼo

(Mak 2.1-12; Luk 5.17-26)

1Yeso n daŋŋə nyi kɔʼ nə kəfən, bàŋ daŋ dzəŋŋə ndòw n naʼ Kapenum zey tə â muunə a tii. 2Ambə ghə bənə fu, ghə̂ a loʼ ghə n boʼo bə ghi wù loʼ, wû wi u kpuu doʼonə nə kəmbùŋ. Ambə Yeso kòʼ tsunə nə ghə̂ ghey ngii gaʼ fə̀ŋ n kow wi, tə̂ n dza tə̀ wù wey wû u wi wə â kpuu doʼonə nə̀, “Kuu tsu fə̀ŋ zə, n waa, mə n neyzəə ghəə ghə a bəbə ghə adzəm.” 3Ghə̂ a dii a kəlaŋ à loʼ ghə n daŋŋə kaʼ tsu ni tsɔɔmə kaabə n wû i ghə dza nə̀, “Tòw wən bənə kpaalə Kəzə̀ lo!” 4Yeso n kee loʼ nə tə n keeli zey moʼlə tə ghə tə, tə n dza tə̀ ghə nə̀, “Ghaa ney naŋa ndzoʼo ghəə a bəbə ghey n fə̀ŋ tə ghaa bòʼ kee? 5À buulə tsəghəshi ghə i ghaa zə ni dza shi bə ə, ‘Ni dza tə̀ wù nə̀ ghə n bəb zə i neyzəə,’ nkee ni dza tə̀ wi nə̀, ‘Nuu kɔʼ wə bwey ndow ə?’ 6N ghəŋŋə tsuu nii dii bə tə̀ ghaa nə̀ Waa weynum khənu daʼa kə ni neyzəə bəb i ghə fa n mbi.” Tə n daŋŋə dza tsu tə̀ wù wey wû u wi â kpuu doʼonə nə̀, “Nuu kɔʼ, wə ney kɔʼ mbùŋ kə, wə̀ ndòw n ndaw zə.”

7Wù wey wû u wi â kpuu doʼonə n nuu kɔʼ, nuu ndòw n ndaw wi. 8Ambə nɔɔ kə aghə̂ key kòʼnə ghəə ghən, fə̀ŋ tə n shi ghə, ghə n kàʼ ndòw ni fuu nkɔʼlə tə Zə̀ kə nghee tə fuunə ndzòʼò daʼa kən tə̀ ghə̂ ghə.

Yeso tɔŋɔ Matyo

(Mak 2.13-17; Luk 5.27-32)

9Yeso n zəghə tsu luʼu key, nghee tə̀ tə ndownə, tə n kòʼ ndow wù kwɔɔ u kəmàʼlə ù loʼ wə ghə â tɔŋŋə nə̀ à loʼ Matyo, nə̀ tə loʼ n luʼu key ghə kwɔɔnə maʼlə kə tsow kə tii. Tə n dza tə̀ wi nə̀, “Dzûmə bə mə.”

Matyo n nuu kɔʼ, nuu ndòw n bàa wi.

10Yeso n ndòw n ndaw Matyo, ambə ghə sə̂ zə̂ənə, ghə n dza i koʼ ndəmə ghə̂ a kwɔɔ a màʼlə kə tsow kə nsə ghə̂ ghey ghə â dzum nuunə ghə a dza ghə dzûmə way laŋ u Mushi wə, ghə n bə doʼo dzəŋi bə ni zə̂ ghî Yeso nsə ngəd tə wi tə. 11Ambə ghə̂ a tə Falasi à koʼnə ghəə ghən, ghə n bəb tə̀ ngəd tə Yeso tə nə̀, “Mûkəbii ə ghaa zə̂ə dzəŋi ghî ghə̂ a kwɔɔ a màʼlə kə tsow kə, nsə ghə̂ ghey ghə dzum nuunə ghə nə̀ à loʼ kee?”

12Ambə Yeso zow ndòw ghəə ghey ghə dzanə, tə n dza tə̀ ghə nə̀, “Ghə̂ ghey ghə taw dzɔbənə, khə dzə way ghə i ghəŋŋə zə ghi wù ngaŋ, a loʼ kə ghə̂ a dzaŋa ghə, ghə ləghənə wù ngaŋ. 13Ndòw kəŋ shi kɔʼ na ghəə zey i diinə tə ghɔɔmə zən dza nə̀, ‘N ləghə ghə̂ ghey ghə khənə sî i kwɔɔlə zə n wû i ghə, n ka ləghə dzə nə̀ ghə i səghə nyam tə ni fəələ umaʼlə tii tə̀ mə.’ N təŋkey, n ka bə dzə ni bə tɔŋɔ ghə̂ ghey ghə loʼnə tsətsəghə, n fəd bə ni bə tɔŋɔ ghə̂ a bəbə ghə.”

Bùʼ kə Dzuu i bam zə

(Mak 2.18-22; Luk 5.33-39)

14Dzûmə tə Jɔn wù fuu u mmuu n Kəzə̀ mə n bə kòʼ tsu Yeso, bəb tə̀ wi nə̀, “A loʼ kee ghey ghi ghə̂ a tə Falasi a bamnə dzuu ghə, dzûmə tə tey tə a kee bam way ə?

15Yeso n dza tə̀ ghə nə̀, ghaa moʼlə nə̀ fə̂ a num weyzən a loʼnu ni mow n zə̂ kə ney zə iwû loʼ sey nə̀ num weyzən ə tii loʼ fu ghi ghə ə? Ghaa khənu nə̀ i way ni doʼo koʼ sey! Nəŋə i nə kee bəghənu ghə nə ney nuu kɔʼɔ num weyzən n wɔ ghə, ghə nə bam ndow dzuu zə n nəŋə i tii zə.

16Wù loʼ way dzə tə loʼ ni ney kɔʼ bad kə ndzə̂ kə fəghə kə, tə taŋi fìi kɔʼ kəbuʼ n ndzə̂ tə wey tə, n təŋkey, bad kə ndzə̂ kə tii kə î fəə shiə bənu ndzə̂ tə wey tey, buʼ kə tii kə i kəm dow tsəghə shi tsu nghee kə mə buʼ loʼnə tii. 17Wù way soʼo ni ney kɔʼ sə̀ŋ ə nlə tə kuu naŋa tsu n suʼ#9.17 Ghə̂ a Təjuu ghə â kuu naŋŋə tsə nlə n ghə n suʼ nə ghə taŋi n gow nyam. nə̀ zə n kɔ̀ɔlə may, n təŋkey, zə i bənə kaʼinu, nlə mə i kuŋ shi tsu, suʼ zey i bəb soʼo. A fədlə kuu naŋŋə sə̀ŋ ə nlə n suʼ zey i nam khənə fəb kə, sey, nlə mey n loʼ ni doʼo dzɔb nsə suʼ ə tii.”

Yeso zhəm dzəŋŋə bə waa u zən wə, baŋŋə soʼo weyzən u dzaŋa wə

(Mak 5.21-43; Luk 8.40-56)

18Nghee Yeso sə̀ nam khəə ghəə ghə, a n dza i koʼ, wù nii u loʼ wə n ndaw kədzəŋi ə ghə̂ a Təjuu n shi ndòw, nyaʼa ndòw n tənə wi, dza tə̀ wi nə̀, “Waa wuŋ u zən u sa kuʼlə kpu tsunu, kee bə mɔm tsu kə wi n tuʼ i mɔm zə, tə i taw kɔʼ.”

19Yeso n nuu ndòw ghi ngəd tə wi tə n baa wù wey.

20Weyzən u lòʼ wə n shi kɔʼ bə n bàa Yeso, bə mɔm tsu dzuu i təndzə̂ i wi nə̀ kaŋ tə n shi n kow wi nə tənùm ighəm n ghi tə təbəghə 21Tə â dza n fə̀ŋ ə wi nə̀, “Abə n buʼ mɔm tsu kə ndzə̂ tə wi tə, mə i nɔb shi.”

22Yeso n fəd bə uwû, kòʼ tsu wi, dza tə̀ wi nə̀, “Kow tsu fə̀ŋ n waa, n təŋkey, bəghəm i fə̀ŋ zey wə̀ khənə n kow Zə̀ kə, zə n wɔ baŋŋə.” Weyzən wey n taw tən kɔʼ kə n nəŋə i tii zə.

23Ambə Yeso ndòw kuum tsunə n ndaw wù nii ə ndaw kədzəŋi ə ghə̂ a Təjuu zey, tə̂ n ndòw kòʼ ndòw kə nə̀ luʼu tə zuʼu fu n wɔ ghə̂ ghə, nə ndɔŋ n kaʼ ni bən n luʼu kə ivə, nə̀ ghə̂ ghə n zey soʼo nə̀ u deyyə wə. 24Tə̂ n dza tsu nə̀, “Sàli nuu na, n təŋkey, zən fə tii fə bweelinu, tə ka kpuu dzə.” Ambə tə dza tsunə sey, ghə̂ ghey adzəm n kee kàʼ ndòw wi ni tsoʼ. 25Ambə ghə kee dzùm naŋa may shi bənə ghə̂ ghə a bii, Yeso n nyi ndòw, kwu tsu zən fə tii fə n wɔ, waa tii n nuu doʼo bə. 26Zɔŋ u tii wə n fuŋ ngəə tsəghə ndòw mboʼo tii idzəm.

Yeso ghəŋə ghə̂ a fəbə a loʼ ghə abəghə nə̀ ghə i koʼo luʼu tə

27Nghee tə̀ Yeso zə̀ghə tsunə fu, nuu daŋŋə ndow, ghə̂ à fəbə a loʼ ghə abəghə n nuu ndòw n bàa wi. Ghə n dey dza ndòw tə̀ wi nə̀, “A waa Devid looo, kwɔɔlə sî zə n kow ghey!”

28Ambə Yeso ndòw nyi ndòwnə n ndaw, ghə̂ à fəbə ghey n bə kòʼ bə wi, Yeso n daŋŋə bəb tə̀ ghə nə̀, “Ghaa bəghəmnu nə tə̂ N fwaʼ ndzoʼo ighəə tə̀ a loʼ i zən ə?”

Ghə n bəghəm kɔʼ nə̀, “Ow a Mûkəbii, ghey bəghəmnu!”

29Yeso n daŋŋə mɔm tsu sə̂ a ghə, dza tsu nə̀, “I bɔɔmə doʼo kə n nghee ghaa bəghəm kɔʼnə.” 30Ghə n daŋŋə kəm kaʼ ndòw luʼu tə koʼo tə. Yeso sey kii naŋa ndownu ghə nə̀, “I kə̂ wù lòʼ nə̀ zownə ghəə zən.” 31Ghə n kee nuu tsu kənu, naʼlə ndòw zɔŋ u Yeso n mboʼo i tii zə idzəm.

Yeso ghəŋə kəmuʼ nə tə khəə aghəə

32Nghee tə ghə̂ ghey nuu ndòwnə, ghə̂ à loʼ ghə n ney bə wù loʼ n səə wi nə̀ tə ghɔɔmə way, kuumnə zay kə bwu kə â loʼ n kow wi.

33Ambə Yeso dzum shi tsunə zay kə bwu kə tii kə, wù kəmùʼ wey n khəə shi bə aghəə. Dzuu zə n ngii zum ghə̂ ghey, ghə n dza nə̀, “A ka kam koʼ kòʼ tsə ghəə zə tə̀ a loʼ i zən fa n naʼ zə Izree.” 34Ghə̂ a tə Falasi ghə n kee dza nə̀, “À loʼ də̀ŋ kə zay u bəbə key kə loʼnə n kow wi, kə fuunə wi n daʼa kə nə̀ tə i dzûm shiə vəətsəə ghə.”

Yeso kwɔɔlə isî n kow ghə̂ ghə

35Yeso n ngəə ndòw naʼa tə nii tə tədzə̀m nsə nyaŋi n tənaʼa mən n dzəm, dii ndòw aghə̂, naʼlə ndòw soʼo tûm i dzuŋu zə kuum fɔɔ u Kəzə̀ n ndaw tə udzəŋi tə ghə̂ a Təjuu. Tə n baŋŋə ndòw soʼo aghə̂ n dzaŋa tə ghə tədzə̀m. 36Ambə tə koʼnə nɔ̀ɔ kə aghə̂ kə, sî zə n kwu wi n kow ghə, n təŋkey, ghə â muu nə uchɔd, khə soʼo way wù ni gaamə ghə, sey, ghə n làʼ loʼ tə̀ a loʼ njì tey tə khə way wù keyyə wə. 37Tə̂ n daŋŋə dza tə̀ ngəd tə wi tə nə̀, “Fəzəə u ndzəm ndəŋ loʼnu n mbvən, a kee loʼ kə nə̀ ghə̂ a kəfwaʼ a dow way ni ney fən bə. 38Ghaa sey khə ni gɔŋŋə tə̀ muu usum tə̀ tə tûm bə ghə̂ a kəfwaʼ, ghə bə kpey fəzəə u wi.”

Currently Selected:

Matyo 9: WEH

Highlight

Copy