Matyo 25

Ghɔɔmə i fənkəfən bòʼ waa a zən a fəghaŋ ghə ighəm

1Yeso n dza tə̀ ghə nə̀, “N tsuʼ fey Waa Weynum î bəghənə tii, Fɔɔ u Kəzə̀ wə i loʼ tə̀ a loʼ waa a zən a loʼ ghə ighəm ghə â ney kɔʼnə daa u ghə wə, shi ndòw ni ndòw kpii ney nùm weyzən. 2Ataa ghə n làʼlə, a loʼ ghey ataa ghə n khə utɔb. 3A laʼlə ghey n ney kɔʼ kə daa u ghə, ka ney kpiʼi mmuu n kədaa. 4A tɔbə ghey n kee ney kɔʼ daa u ghə, ney kɔʼ soʼo mmuu n kədaa. 5Zə n bə shi kɔʼ nə̀ num weyzən wey ka khə bə, sey ghə n zey ndòw ni dzoʼ bweeli, bweeli nuu daŋŋə ndow.

6Ambə n fə̀ŋ ə tsuʼu tə, ghə n zow kəbɔŋ nə̀, ‘Num weyzən n bə, bə kpii ney na wi!’ 7Waa a zən ghey n nuu kɔʼ, kɔʼlə kɔʼ daa u ghə. 8A laʼlə ghey n dza ndòw tə̀ a tɔbə ghey nə̀, ‘Fuu bə na ghey n mmuu n kədaa mə, n təŋkey, daa u ghey u nya nəmmə ndòwnu.’ 9A tɔbə ghey n beeli ndòw ghə nə̀, ‘Mmuu n kədaa mən mə î kpii dzə way tə̀ saa adzəm, baa ndòw zuu kɔʼ na mmuu n kədaa mə n wɔ ghə̂ ghey ghə fìilənə.’ 10Sey gheyzən a laʼlə ghey n nuu ndòw ni ndòw zuu mmuu n kədaa. A loʼ ghən ataa ghə â bayyə tən bənə wû i ghə zə n nuu nyi ndòw n dzəŋi kə zə̂ kə ney zə iwû kə ghi nùm weyzən, ghə n fii kɔʼ kəbaʼ. 11Gheyzən a loʼ ghey ghə n ndòw bə ibam, buʼu kəbɔŋ dza, ‘Mûkəbii, mûkəbii! Chi tsu ghey n baʼ kə.’ 12Num weyzən wey n beeli kɔʼ ghə dza nə̀, ‘Ey ngaŋ, n khə dzə way ghaa, n kuum dza bə isəŋə.’

13Sey, təmi kɔʼ na n fuu zə, n təŋkey, ghaa khə dzə way tsuʼ fey nkee nəŋə zey Waa weynum î bəghənə tii.”

Ghɔɔmə i fənkəfən kuum ghə̂ a kəfwaʼ a loʼ ghə abəghə

(Luk 19.11-27)

14Yeso n kəm dza ndow tə ghə nə̀, “Fɔ̀ɔ u Kəzə̀ wə î loʼ tə̀ a loʼ wù loʼ tə â dza i shi bwey, tə n tɔŋɔ bə ghə̂ a kəfwaʼ a wi, fuu naŋa tsu fə̂ u wi n wɔ ghə. 15Tə n fuu ndòw kə tə̀ kay, tə̀ daʼa kə wi kə diinə. Tə n fuu ndòw wù umɔʼ n mbəghə wə ukhəə wə utaa, fuu ndòw u loʼ wə n mbəghə wə ubəghə, fuu ndòw wù loʼ wey n mbəghə kə kəmɔʼ. 16Wù wey tə â khənə mbəghə wə ukhəə wə utaa n daŋŋə kaʼ ndòw ni ghəŋə bikiwən tii, keeli kpiʼi kɔʼ təbənə tii nə umbəghə utaa. 17Tə wey tə a khənə mbəghə wə ubəghə n ghəŋə ndòw soʼo ghə i mɔʼɔ zə, keeli kpiʼi kɔʼ mbəghə wə ukhəə ubəghə. 18Tə wey tə â khənə mbəghə kə kəmɔʼ n kee ndòw təm kɔʼ kəbuʼ aghəlitsə, gəmə naŋa ndòw khəə u mûkəbii ə wi tii.”

19“Ambə ghə ndəŋə doʼo kəŋə ndownə, mûkəbii ə ghə̂ a kəfwaʼ wey n ndòw bə dzəŋŋə ni bə koʼ nghee ghə fwaʼ kəŋə bənə tii n khəə wey wə â loʼnə n wɔ ghə. 20Wù kəfwaʼ wey tə â khənə mbəghə wə ukhəə wə utaa n bə fuu dzəŋŋə bə, fuu bə soʼo mbəghə wə ukhəə u loʼ wey utaa dza nə̀, ‘Mûkəbii, wə â fuu naŋa mə n mbəghə wə ukhəə wə utaa, mə n fwaʼ keeli kpiʼi mbənə tə tii nə umbəghə utaa. Koʼo u wən ə!’ 21Mûkəbii wey n dza ndòw tə̀ wi nə̀, ‘Wə n fwaʼ dzɔb, wə loʼ wù kəfwaʼ u dzuŋu wə, wù loʼnu ni gaʼ fə̀ŋ n kow wɔ. Wə n kwu keeli dzɔb nyaŋi fən n mə fuunə tə̀ wɔ, sey mə î kɔʼlə naŋa kɔʼɔ wɔ, wə i laalə ndəmə ufə̂. Bə̀ doʼo tsu, wə i saŋŋə ghi mûkəbii wə.’ 22Wù kəfwaʼ wey tə â khənə mbəghə wə ukhəə wə ubəghə n ndòw bə, dza nə̀, ‘Mûkəbii, wə â fuu naŋa mə n mbəghə wə ukhəə wə ubəghə, mə n fwaʼ, keeli kpiʼi mbənə tə tii nə umbəghə ubəghə. Koʼo, u wən ə!’ 23Mûkəbii wey n dza ndòw tə̀ wi nə̀, ‘Wə n ghəŋə dzɔb, wə loʼ wù kəfwaʼ u dzuŋu wə, wù loʼ ni gaʼ fə̀ŋ n kow wɔ. Wə n kwu keeli dzɔb nyaŋi fən n mə fuu naŋanə tə̀ wɔ, sey mə î kɔʼlə naŋŋə kɔʼɔ wɔ, wə i laalə ndəmə ufə̂. Bə̀ doʼo tsu, wə i saŋŋə ghi mûkəbii wə.’

24Tə wey tə â khənə mbəghə kə ukhəə kə kəmɔʼ n ndòw bə, dza nə̀, ‘Mûkəbii, n khə tsənu nə̀ wə̀ khə mwam u taw wə, wə ləghə ni zə̂ə nə̀ wə ka fwaʼ, kpey ufə nə kəluʼu nə̀ wə ka zəghə fə kə loʼ kə. 25À wey loʼ ghə i tii zə mə â tsəŋənə, mə n ney kɔʼ khəə wə ndòw təm tsu kəbuʼ aghəlitsə nyi naŋa ndòw fu, koʼo, khəə wə u wən ə!’

26Mûkəbii wey n beeli ndòw wi dza nə̀, ‘Wə loʼ wù kəfwaʼ u bəbə bəbə wə, lay soʼo, wə â fa khənu nə̀, n ləghə ni zə̂ə nə̀ n ka fwaʼ, kpey ufə n luʼu key n ka zəghə. 27Wə â ka kee ney kuu naŋa ndòw khəə wuŋ n luʼu key ghə maʼlə naŋanə khəə wə tii, n mə bə ney dzəŋŋə khəə wuŋ nə̀ wə n fwaʼ kpiʼi mbənə tə.’ 28Mûkəbii wey n daŋŋə dza ndòw tə̀ wù kəfwaʼ u loʼ wə nə̀, ‘Ney nuu kɔʼ na mbəghə kə ukhəə key tə khənə, ghaa ney fuu ndòw tə̀ wù wey tə khənə mbəghə wə ighəm. 29Kuum nə̀, wù wey tə khənə fə kə ghə î fuu kpiʼinu wi, tə i keeli tsəghə shi tsu. Abə wù wey tə khə way fə kə, kasə̀ nyaŋi fey tə khənə, ghə i ney nuu may kɔʼ n wɔ wi. 30Abə dzə̀ŋsə kə wù kəfwaʼ kən, ney maʼa shi ndòw na wi a bii n tənə kələm, n luʼu key tə deynə fu, fəə asɔŋ.’”

Tsuʼ fə saʼ

31Yeso n dza tə ghə nə̀, “Abə waa weynum î bənə n wû u kədə̀ŋ ghi tsətəndəghə tə Kəzə̀ tə tədzəm ghi wi, tə i bə doʼo tsu n kuu kə ufɔɔ kə wi. 32Ghə̂ ghən n naʼa tə mbi tədzəm, i zuŋŋə bə n səə wi. Tə i dzawwə tsu ghə nə ubad ubəghə tə̀ wù baʼa u tənjì u nə̂ dzawwə naŋanə ji tə nsə njì tə. 33Tə i ney naŋa bə tənjì n kpii u wi u təmə wə, tə naŋa ndòw təji n kpii kə wi kə kwɔɔ kə. 34Tə i daŋŋə dza ndòw tə̀ ghə̂ ghey n kpii u wi u təmə wə nə̀, ‘Bə na n səə mə, ghaa ghən ghaa loʼ nə̀ Bày wuŋ n ghaa buulə, bə zə̂ na fɔɔ u Kəzə̀ wən ghə â bayyə naŋa nə nzeyyə tə̀ ghaa nə̀ mbi ka kam kaʼ. 35Kuum nə̀, mə â loʼ n dzəŋ, ghaa n fu mə̀ n fəzəə wə, fə̀ŋ ə mmuu n zuʼlə mə, ghaa n fuu mə n mmuu mə, mə n bweyyə bə nə ghaa, ghaa n kpii ney mə n ndaw tə ghaa. 36Mə â laʼa təndzə̂, ghaa n fuu mə n ndzə̂ tə, mə â dzaŋanu, ghaa n laalə tə̀ mə̀, mə â loʼ n ndaw tsaʼ, ghaa n bə tɔŋɔ zow mə.’

37Ghə̂ ghən ghə loʼnə tsətsəghə i daŋŋə beeli ndòw wi nə̀, ‘Mûkəbii, à loʼ zeeli ghey â koʼnə wɔ nə wə loʼ n dzəŋ, fuu tsu wɔ n fəzəə wə ə? Nkee fə̀ŋ ə mmuu â zuʼlənə wɔ ghey n fuu wɔ n mmuu n məə mə ə? 38Ghey â koʼ wɔ zeeli wə bwey bənə, ghey n kpii ney wɔ n ndaw tə ghey ə? Nkee wə â laʼanə ndzə̂ tə, ghey n fuu wɔ n ndzə̂ tə ə? 39Â loʼ zeeli, ghey â koʼnə wɔ wə dzaŋanə nkee n ndaw tsaʼ, ghey n bə tɔŋɔ zow wɔ ə?’ 40Tə i beeli ndòw ghə nə̀, ‘N kuum dza bə tə̀ ghaa nə̀, ghəə ghey ghaa â ghəŋənə tə̀ waazə wuŋ u ghaa wə, ghaa â sey ghəŋə tə̀ mə̀.’”

41“Tə i dza ndòw tə̀ ghə̂ ghey n kpii kə wi kə kwɔ kə nə̀, ‘Nuu na n səə mə, ghaa ghən Zə̀ kə ləŋ naŋanə, ndòw na n vəllə wey u nəmmə tsə way ghə bayyə naŋanə tə̀ Satan nsə tsətəndəghə tə wi. 42Kuum nə̀, mə â loʼ n dzəŋ, ghaa n ka fuu mə n fəzəə wə, fə̀ŋ ə mmuu â zuʼlə mə, ghaa n ka fuu mə n mmuu n məə mə, 43mə â bwey bə nə ghaa, ghaa n ka kpii ney mə̀, mə â khə way ndzə̂ tə, ghaa n ka fuu mə n ndzə̂ tə, mə n dzaŋa, loʼ n ndaw tsaʼ, ghaa n ka bə tɔŋɔ zow mə.’”

44“Ghə i beeli kɔʼ nə̀, ‘Mûkəbii, â loʼ zeeli ghey â koʼnə wɔ n dzəŋ, nkee nə fə̀ŋ ə mmuu zuʼlə wɔ, nkee nə̀ wə khə way ndzə̂ tə, nkee wə dzaŋanə, nkee wə loʼnə n ndaw tsaʼ, ka gaamə wɔ ə?’ 45Tə i beeli kɔʼ nə̀, ‘N kuum dza bə tə̀ ghaa nə̀, ghəə ghey ghaa â tuunə ni ghəŋə tə̀ waazə wuŋ u ghaa wə, ghaa â sey tuu ni ghəŋə tə̀ mə̀.’ 46Sey, ghə i tûm nuu ndòw ghə n luʼu key ghə̂ a fəʼlənə tii nəŋə tədzəm, ghə̂ ghey ghə loʼnə tsətsəghə i zə̂ itsali.”

Currently Selected:

Matyo 25: WEH

Highlight

Copy