Matyo 16

Ghə̂ a tə Falasi n ghə̂ a tə Sadusi a ləghə ni koʼ ghə i faalə zə

(Mak 8.11-13; Luk 12.54-56)

1Ghə̂ a tə Falasi nsə ghə̂ a tə Sadusi a loʼ ghə n ndòw bə n səə Yeso ni bə mɔm koʼ wi. Ghə n dza tə̀ Yeso nə̀ tə ghəŋə tsu ghə i faalə i loʼ zə ni dii tsu nə̀ daʼa key tə khənə, à fuu bə Zə̀ kə idəŋ kə. 2Yeso n beeli ndòw ghə nə̀, “Abə bikighow kə zownə n nəŋə i fənə tə, ghaa n dza nə̀, ‘Tsuʼ u tsətsə wə i dzɔbənu.’ 3Ambə n bələbələ tə, abə ghaa koʼnə mbaʼ tə ighow tə idəŋ, ghaa n dza nə̀, ‘Ghow zə î tsuunu na.’ Ghaa tɔʼ khə kə ni tɔŋŋə fə key tsəə tə bikighow tə diinə, nə̀ ghaa maŋ laalə ndòw kə bikighow, ghaa u kee way ni tiilə dza ghəə ghey a shiənə n num tən a loʼnə tii. 4Ghə̂ a bəbə ghə nsə ghə nəb ityim a num tə tən, ghaa bəbə bə ghə i faalə zə tə̀ mə! Ghə i faalə i loʼ i kəm way dzə tə̀ ghaa tsəghəshiə way ghə i faalə zey zə â shinə tə̀ Jona.” Ambə tə dza tsu sey, tə n daŋŋə zəghə tsu ghə, nuu i ndòw.

Mbvùŋ ə tə Falasi nsə Sadusi tə

(Mak 8.14-21)

5Ambə ngəd tə Yeso tə ndòw nyi ndownə n bad kə inyì kə loʼ key, ghə n taa moʼlə tsu nə̀ ghə n neyzəə ni ney kəbaa. 6Yeso n dza ndòw tə̀ ghə nə̀, “Təmi kɔʼ na nə ifuu, ghaa ney ighə̂mə n mbvùŋ ə ghə̂ a tə Falasi nsə ghə̂ a tə Sadusi ghə.”

7Sey, ghə n kaʼ ni ghɔɔmə n wû i ghə, dza nə̀, “N moʼo tə sey dza n təŋkey, sa ka bə n baa kə.”

8Yeso n zowkeeli tsu ghəə zey ghə ghɔɔmənə, tə n dza ndòw tə̀ ghə nə̀, “Bəghəm i fə̀ŋ i ghaa i ngii təbənu, à loʼ kee ghaa fəmmənə wû i ghaa zə a dza ghaa ka bə n baa kə ə? 9Ghaa sey kam zowkeeli way ə? Ghaa kam moʼlə way baa wey utaa mə â dzaw fuunə tə̀ ghə̂ ghey təkam tətaa ə? Ghaa â bɔŋŋə kɔʼ saʼ wə ifuʼ usiʼi? 10Ghaa moʼlə soʼo way baa wey usəghəmbəghə mə â dzaw fuunə tə̀ ghə̂ ghə təkam təkaykə ə? Â loʼ saʼ wə ifuʼ usiʼi ghaa â bɔŋŋə bənə ə? 11À kee loʼ kee ghaa zowkeeli way nə̀ n ghɔɔmə dzə way ghəə a kəbaa ghə ə? Ney na ghə̂mə zə n mbvùŋ ə ghə̂ a tə̀ Falasi nsə ghə̂ a tə Sadusi ghə.” 12Ngəd tə wi tə n daŋŋə zowkeeli tsu nə̀ Yeso â kpaa dzə way ghə nə̀ ghə ghə̂mə tsu n mbvùŋ ə baa kə nkala, tə â fəd dza nə̀ ghə ney ighə̂mə ghi ghəə ghey ghə̂ a tə Falasi nsə ghə̂ a tə Sadusi ghə â diinə.

Pita dza wù wey Yeso loʼnə ghii wə

(Mak 8.27-30; Luk 9.18-21)

13Ambə Yeso ndòw bənə n mboʼo Kayserya Filipi, tə n bəb ndòw tə̀ ngəd tə wi tə nə̀, “Ghə̂ a dza nə̀ Waa Weynum loʼ ndee?”

14Ghə n beeli ndòw wi nə̀, “Ghə̂ a loʼ a dza nə̀, wə̀ loʼ Jɔn wù fuu u mmuu n Kəzə̀ mə, a loʼ a dza nə̀ wə loʼ Elayja, a loʼ ghə a dzanə nə̀ wə loʼ Jeremaya nkee Wù Tûm Kəzə̀ u loʼ wə.”

15Yeso n bəb ndòw tə̀ ghə nə̀, “Abə ghaa, ghaa kee dza nə̀ n loʼ ndee?”

16Shimun Pita n beeli ndòw wi nə̀, “Wə loʼ Klisto#16.16 Wù wey Zə̀ kə tûm bə nə tə bə bəghəshi mbi, Waa Kəzə̀, Zə̀ kən kə loʼnə utaw nəŋə tədzəm.”

17Sey, Yeso n beeli ndòw wi nə̀, “Buulə i loʼ tə̀ wɔ a Shimun waa Jona, n təŋkey, à way dzə wù sɔŋtsuʼ tə chi diinə ghəə ghən tə̀ wɔ, à loʼ Bày wuŋ idəŋ. 18N dza bə tə̀ wɔ a Pita nə̀ wə loʼ kənaa, a loʼ n naa kən mə i səd ə kɔʼɔnə dzəŋi kə dzûmə tuŋ tə tii, kasə ivə, i nə̂ way ni taw tsəghə koʼ ndaw tii. 19Mə i fuu wɔ n chi kə fɔɔ wə idəŋ wə, nsə sey, ghəə zey wə î tuu maʼanə fa mbi, ghə i tuu maʼa soʼo idəŋ, ghəə zey wə bəghəm naŋanə fa n mbi ghə i bəghəm soʼo idəŋ.” 20Ambə Yeso dza may tsu ghəə ghən, tə n tɔʼ kii naŋa tsu ngəd tə wi nə̀ kə̂ ghə nə̀ dzanə tə̀ wù loʼ nə̀ tə loʼ Klisto.

Yeso ghɔɔmə nghee tə i fəghənə tii nsə və i wi zə

(Mak 8.31–9.1; Luk 9.22-27)

21Sey ni zey tsu n nəŋə i tii zə, Yeso n kaʼ ni dza tə̀ ngəd tə wi tə nə̀, “N khə ni teeli ndòw n Yerosalem, mə i fəghə n wɔɔ kə ngəd tə inaʼ tə, ghə fɔɔngili a nii ghə, nsə ghə̂ a dii a kəlaŋ ghə. Ghə i wey mə, a i bə n bam zə ntsuʼu ntəghə Zə̀ kə i zhəm dzəŋŋə bə mə nə ivə.”

22Sey, Pita n bɔɔ təmi tsu ghi wi, kaʼ ni kpaa wi dza nə̀, “Mûkəbii, Zə̀ kə way ni bəghəm ndzoʼo ghəə ghey, ndzoʼo ighəə tə̀ a loʼ i zən i way dzə ni shi ghi wɔ.”

23Yeso n khə̂mə tsəghə bə, dza tə̀ Pita nə̀, “Nuu n baa mə, Satan! Wə təʼlə maʼa mə n təŋkey, wə moʼlə dzə way ghəə ghey Zə̀ kə moʼlənə, wə fədlə moʼlə ndòw kə ghəə ghey wù sɔŋtsuʼ moʼlənə.” 24Sey, Yeso n dza ndòw tə̀ ngəd tə wi tə nə̀, “Abə wù dza i dzûmə mə̀, tə khə ni ney tsu nə̀ wû u wi u way dzə fə kə loʼ kə, tə boʼo kɔʼ zat kə fəkaʼ kə wi#16.24 Tə bəghəm kɔʼ ifəghə., tə dzûmə bə mə. 25Wù wey tə ləghənə ni bəghəshi muu i wi, î guŋŋənu, wù wey tə guŋunə muu i wi zə bòʼ mə î fəd keeli ibəghəshi. 26Naamə kə wù kə loʼ kee abə tə keelinə fə u mbi wə udzəm, tə kee guŋu tow kə wi ə? Nkee, wù î loʼ ni fuu ndzoʼo fə kə ghaa kə ni zuu tow kə wi ə? 27Waa weynum bəghənu n ghaʼ i bày wi zə nsə tsətəndəghə tə Kəzə̀ tə. Tə î naamə kə wù n fwaʼ key tə fwaʼnə. 28N dza bə isəŋə tə̀ ghaa nə̀, ghə̂ a loʼ a loʼ fa ghə i koʼ way və zə nə̀ ghə ka koʼ Waa Weynum tə bəghənə n wû u Kədə̀ŋ.”

Currently Selected:

Matyo 16: WEH

Highlight

Copy