Matyo 13

Ghɔɔmə i fənkəfən bòʼ wù usum

(Mak 4.1-9; Luk 8.4-8)

1N tsuʼ fə tii fə kələ, Yeso n nuu shi tsu n ndaw, ndòw n nguŋ inyi. Tə n ndòw doʼo tsu, zey ndòw ni dii aghə̂ n ghəə ghə. 2Nɔɔ kə aghə̂ kə n zuʼu n səə wi, sey tə n nyi doʼo tsu nə kəfən. Nɔɔ kə aghə̂ kə n tey n nguŋ ə inyi. 3Yeso n dii ghə n ndəmə tə aghəə tə n ghɔɔmə i fənkəfən, dza nə̀, “Wù usum u loʼ wə â ndòw ni ndòw təm təndzoʼ. 4Nghee tə̀ tə təmə ndownə, ndzoʼ tə loʼ tə n tsɔʼlə ndòw nə təmbwu, nnən mə n bə kumi fə nuu kɔʼ. 5Ndzoʼ tə loʼ tə n tsɔʼlə bə n luʼu kə atay nə zub tə basə way tii, tə n luumə fòw i kɔʼ, n təŋkey, zub tə â basə way fu. 6Ambə tsə̀ shi kɔʼ bənə, zə n zuʼ maʼa kɔʼ. Nghee tə̀ zub tə â basə way fu n luʼu kə atay kə tii kə tə̀ ghaŋ tə ni nyi tsu tii, key a tii ghə zum nuu kɔʼ. 7Ndzoʼ tə loʼ tə n tsɔʼlə bə n luʼu tə udzɔŋɔmgbay, ambə tə nyim kɔʼnə, dzɔŋɔmgbaay wə n nyim zɔʼi maʼa kɔʼ. 8Ndzoʼ tə loʼ tə n kee tsɔʼlə bə n zub tə dzuŋu tə, tə n nyim, bɔŋ dzɔb kɔʼ. Buʼ a loʼ ghə n fuu asə̂ fəbɔm, a loʼ ghə nghəm ntuubə, a loʼ ghə nghəm ntəghə.”

9Yeso n guŋ kɔʼ dza, “Wù wey tə khənə tuŋŋə wə, tə zow.”

Ghəə zey ghɔɔmə i fənkəfən zən diinə

(Mak 4.10-12; Luk 8.9-10)

10Dzûmə tə Yeso tə n bə bəb bə tə̀ wi nə̀, “À loʼ kee wə ghɔɔmənə tə̀ ghə̂ ghə n ghɔɔmə i fənkəfən ə?” 11Yeso n beeli ndòw ghə dza nə̀, “Ghə n fu naŋa sad i ghəə a fɔ̀ɔ wə idəŋ wə tə̀ ghaa, a way dzə tə̀ ghə. 12N təŋkey, wù wey tə ndəŋ khənə fə kə, Zə̀ kə î fuu kpiʼinu wi, tə i keeli tsəghə tsu. Abə tə wey tə kee khə kìi way fə̂ kə, kasə nyaŋi fey tə khənə, ghə i ney nuulə daŋŋənu. 13Zuŋ kə ighəə key n ghɔɔmənə tə̀ ghə n ghɔɔmə i fənkəfən loʼ nə̀, ghə i mgbaŋa laalə bə kə sa, ghə i koʼo keeli way, nsə nə ghə i mgbaŋa zəllə bə kə sa, zow way, zowkeeli soʼo way. 14Ghəə a tii a luulə tsu ghəə ghey wù tûm Kəzə̀ Ayzaya â dza naŋa zeynə nə̀,

‘Ghə nə mgbaŋa zəllə kə sa, ghə nə kee zowkeeli way,

Ghə nə mgbaŋa laalə kə sa, ghə nə kee koʼo keeli way.

15N təŋkey, ghə̂ ghən n fə̀ŋsə doʼo n fə̀ŋ tə ghə tə n ghəə zən,

Ghə a fii naŋa kɔʼ tuŋŋə u ghə wə,

Ghə a kəmə naŋa tsu sə̂ a ghə ghə,

A may kə nə ghə nə koʼ tɔb kə n sə̂ a ghə,

Ghə zow soʼo n tuŋŋə u ghə,

Ghə khə̂mə təmi bə n səə mə,

N baŋŋə ghə.’”

16“Ghaa kee loʼ kədzuŋ nghee ghaa khə sə̂ ghə, koʼo tii, khə utuŋŋə, zow tii. 17N kuum dza bə tə̀ ghaa nə̀, ndəmə tûm tə Kəzə̀ nsə ghə̂ ghey ghə loʼ tsətsəghə mâ dəm ni koʼ ghəə ghey ghaa koʼo, dəm kìi, dəm soʼo ni zow ghəə ghey ghaa zow, dəm kìi.”

Yeso tiilə ghɔɔmə i fənkəfən kuum wù usum

(Mak 4.13-20; Luk 8.11-15)

18Yeso n dza kpiʼi ndow tə ghə nə̀, “Zow na ghəə zey ghɔɔmə i fənkəfən zən kuum wù usum diinə. 19Ghə̂ ghey ghə zownə ghɔɔmə i fɔɔ u Kəzə̀ wə, ka zowkeeli, vəətsəə ghə n bə bəkeeli nuu kɔʼ ghəə ghey ghə zəllə naŋa n fə̀ŋ tə ghə. Ghə sey loʼ tə a loʼ ndzoʼ tey tə â tsɔʼlənə nə təmbwu. 20Abə tə tey tə â tsɔʼlənə n kaŋŋə mə atay, à loʼ ghə̂ ghey ghə zow tsu ghɔɔmə i tii zə, ghə n kpii ney nə iduʼlə, 21ghə n ka ngii taw tii, ghə n dzə kòw tsu kə fə̀ŋ fənyaŋi, ambə ghəə a dza i bə taw tsu kə n kow ghə, nkee ghə chɔdlɔnə ghə bòʼ ghəə zey ghə bəghəm, ghə n kəm ghaʼi tyi zəghə i tsu. 22Abə tə tey tə â tsɔʼlənə n fəŋŋə kə udzɔŋɔmgbay, a loʼ ghə̂ ghey ghə zow tsuu ghɔɔmə i tii zə, nghee ghə kee gaʼ fə̀ŋ tə n fə̂ u mbi, nsə nə ikum, wə n kwu zɔʼlə naŋa tsu ghɔɔmə i tii zə, zə n ka mə̂ utam. 23Abə tə tey tə â tsɔʼlənə n zub tə dzuŋu tə, a loʼ ghə̂ ghey ghə zow tsuu ghɔɔmə i tii zə, ghə n ndzəm zowkeeli i tsu, ghə a nyim bɔŋ dzɔb tsu buʼ a dzuŋu ghə, buʼ a loʼ ghə n fuu kɔʼɔ asə̂ fəbɔm, a loʼ ghə n fuu kɔʼ asə̂ nghəm ntuubə, a loʼ ghə nghəm ntəghə.”

Ghɔɔmə i fənkəfən kuum uzhìi nə usum

24Yeso n kəm fu kpiʼi ndow ghɔɔmə i fənkəfən zən tə ghə nə̀, “Fɔɔ wə idəŋ u loʼ tə a loʼ wù loʼ tə â zəghə tsu ndzoʼ i dzuŋu zə n sum u wi, 25ambə n tsuʼu tə nə̀ ghə̂ a bweelinu, wù təngəmə ə wi n bə zəghə tsu uzhìi n səb a tii ghə, nuu ndow i wi zə. 26Nghee səb a tii a nyim kɔʼ, kaʼ ndow ni bɔŋ, zhìi wey wə n daŋŋə dii shi kɔʼ soʼo uwû.

27Ghə̂ a kəfwaʼ a mûkəbii wey n bə bəb tə̀ wi nə̀, ‘Mûkəbii, n dza wə â mgbaŋ zəghə ndzoʼ tə dzuŋu tə n sum wə ə? Zhìi u sə nuu bə ghee tii ə?’

28Tə n beeli ndow ghə nə̀, ‘A zhìi wən zəghə kə wù təngəmə wuŋ.’

Ghə̂ a kəfwaʼ ghey n bəb tə̀ wi nə̀, ‘Wə ləghənu nə̀ ghey ndow suulə maʼa zhìi u tii wə?’

29Tə n fəd dza tə ghə nə̀, ‘Ngaŋ, i kə ghaa i ndow zə̀ suulə maʼa daŋŋə tsə mə n səb ghə. 30Zəghə ghə dzəŋi nyim ndow kənu, a nə loʼ kə n nəŋə i kpey zə, n nə dzanə tə̀ ghə̂ a kpey ghə nə̀ ghə buʼ suulə kow naŋa kɔʼ dzə zhìi u tii wə nə ukaʼ ni kpəghə maʼa, ghə daŋŋə kpèy kɔʼ asəb, ghə bə fən kɔʼlə naŋa kɔʼ nə utaa.’”

Ghɔɔmə i fənkəfən kuum sam i Mɔstad#13.31 Sam i Mɔstad i loʼ nyaŋi fə isam fə təb tsəghəshinə sam tə tədzəm, abə wə kee zəghə tsunə, fə n nyim dzəə tsəghə tsu ndəmə nkaʼ tə̀ nnən n loʼ ni bə bəghə doʼo tii.

(Mak 4.30-32; Luk 13.18-19)

31Yeso n kəm ghɔɔmə kpiʼi ndow tə̀ ghə n ghɔɔmə i fənkəfən nə̀, “Fɔɔ wə idəŋ u loʼ tə a loʼ sam i Mɔstad wù loʼ â ney zəghə tsu n sum u wi. 32I təb tsəghəshi təsam tədzəm, abə i kee nyim kɔʼ, fə n nyim dow tsu nə fəkaʼ, kaʼ fə tii fə n nyim zaamə tsəghə tsu fə wey ghə zəghə tsu udzəm fu nə usum, n jìi zey nnən mən n zəʼlənə idəŋ, loʼ ni bə bəghə ndaw tə ghə n kpìi tə tii tə.”

Ghɔɔmə i fənkəfən kuum Mbvùŋ

(Luk 13.20-21)

33Yeso n nam dza kpiʼi ndow ghə n ghɔɔmə i fənkəfən zən nə̀, “Fɔɔ wə idəŋ u loʼ nyaŋi fə mbvuŋ, weyzən u loʼ wə â ney kɔʼnə, nyuʼ dzəŋi kɔʼ ghi kaŋ wə nfuŋ wə utəghə, zə n nyə̀ŋ dzəŋi ndow tii, fuŋ n tii mə ndzəm mə n kɔʼ i kɔʼ.”

Zuŋ key Yeso â dii tənə kə ghəə ghə n ghɔɔmə i fənkəfən

(Mak 4.33-34)

34Ghəə ghən adzəm Yeso â ghɔɔmənə tə̀ nɔɔ wə aghə̂ wey, tə â teeli khəə kə n ghɔɔmə i fənkəfən. Tə â ka tsəm khəə kìi ghəə zə nə̀ tə ka khəə n ghɔɔmə i fənkəfən. 35À wən â loʼ ni luulə ghəə ghey tûm tə Kəzə̀ tə â dza naŋanə nə̀,

“N nə ghəə ghə tə̀ ghə khəə kə n ghɔɔmə i fənkəfən

N nə dza ndow ghə n ghəə ghə

Nə ghə ka kam zow koʼ tsə tə̀ mbi â nə kaʼnə.”

Yeso tiilə dza ghɔɔmə i fənkəfən kuum uzhìi

36Yeso n daŋŋə zə̀ghə̀ tsu nɔɔ kə aghə̂ key, nuu nyi ndow n ndaw. Ngəd tə wi tə n dzûmə nyi ndow wi, dza tə̀ wi nə̀, “Tiilə dza bə ghey n ghɔɔmə i fənkəfən zey kuum zhìi wey nə usum.”

37Yeso n beeli kɔʼ nə̀, “Wù wey tə zəghə ndzoʼ i dzuŋu zey loʼ Waa wù sɔŋtsuʼ.” 38Sum u tii u loʼ mbi, ndzoʼ i dzuŋu zey sey loʼ ghə̂ ghey ghə loʼ n fɔɔ u Kəzə̀, zhìi wən loʼ ghə̂ ghey ghə loʼ n fɔ̀ɔ u Satan. 39Wù təngəmə wey tə â zəghə zhìi wey loʼ Satan, nəŋə i kpey zə ufə i loʼ tə̀ mbi nə bə maynə, ghə̂ a kpey a loʼ tsətəndəghə tə Kəzə̀.

40Nghee tə̀ ghə zuŋŋə bə zhìi wə ghə n kpəghə maʼa kɔʼ nə uvəllə, a loʼ soʼo ighələ ghə nə zuŋŋə bə ghə̂ a bəbə ghə, ghə kpəghə ghə abə mbi nə may. 41Waa wù sɔŋtsuʼ nə tûm bə tsətəndəghə tə Kəzə̀ tə wi, ghə nə bə say nuu shi bə ghə̂ ghey ghə ghəŋŋə nə̀ ghə̂ ghə i naŋŋə way laŋ u wi wə nsə ghə̂ ghey ghə ghəŋŋə ghəə a bəbə ghə n fɔ̀ɔ u wi, 42ghə maʼa ndow ghə n buʼ kə uvəllə key kə numnə tə a loʼ vəllə u kənam. Ghə̂ a nə dey fu, fəə asɔŋ. 43Ghə̂ ghey ghə loʼ tsətsəghə nə kee nyiəllə kə tə a loʼ inyi n fɔ̀ɔ u Bày ghə. Nə wə khə utuŋŋə, wə zow.

Ghɔɔmə i fənkəfən kuum fə kə wən i taw kə loʼ kə, kə nyi doʼo

44Yeso n dza kpiʼi ndow ghɔɔmə i fənkəfən tə̀ ghə nə̀, “Fɔɔ wə idəŋ u loʼ tə a loʼ fə̂ kə wən i taw kə, kə nyi doʼonə nə usum, wù loʼ â kəŋ koʼ tsu, kəm tsəd nyì naŋa tsu. Tə n daŋŋə nuu tsu nə iduʼlə, ndow kûmmə fìi tsu fəghə n wi n dzəm, ni ndow zuu bəghə zey tii.”

Ghɔɔmə i fənkəfən bòʼ sə̂ i khəm

45“Fɔɔ wə idəŋ u kəm loʼ kpiʼi soʼo tə a loʼ wù bikiwən tə kəŋənə sə̂ akhəm a dzuŋu ghə, 46tə u kəŋ koʼ tsu sə̂ i khəm zə imɔʼ nə̀ wən i tii i ngii tawnu, daŋŋə ndow kûmmə fìi tsu fəghə n wi n dzəm, ney zuu kɔʼ sə̂ i khəm i tii zə tii.”

Ghɔɔmə i fənkəfən kuum wûu u tətsəghə

47Yeso n dza kpiʼi ndow ghɔɔmə i fənkəfən zən tə̀ ghə nə̀, “Fɔɔ wə idəŋ u kəm loʼ kpiʼi soʼo tə a loʼ uwûu, ghə̂ a kwɔɔ a tətsəghə ghə â maʼa nyi tsu ndow nə inyi, kwu kɔʼ lii tə tətsəghə tey tə nyinə tii nə uwuu tədzəm. 48Nghee wûu u tii u luu kɔʼ, ghə n shiələ kɔʼ bə n nguŋ ə inyi, doʼo tsu, sày kɔʼ tə dzuŋu tey, kuu kɔʼ nə kəkaŋ, kee feeli maʼa ndow tə tey tə â khə way fwaʼ kə n wɔ ghə. 49Zə i bɔɔmə doʼlə soʼo sa bə mbi nə may. Tsətəndəghə tə Kəzə̀ tə nə shiə bənu, tə sày nuu shi bə ghə̂ a bəbə ghə n fəŋŋə kə ghə̂ ghey ghə loʼnə tsətsəghə, 50ghə maʼa ndow ghə n buʼ kə vəllə u kənam, ghə nə deyyə fu, fəə asɔŋ fu tii.”

Ghəə a fə u wey wə nsə fə u fəghə wə

51Yeso n bəb tə̀ ngəd tə wi tə nə̀, “Ghaa n zowkeeli ghəə ghən ə?”

Ghə n mə i bəghəm nə̀, “Ow.”

52Tə n daŋŋə dza ndow tə ghə nə̀, “A sey loʼ nə̀, wù dii u kəlaŋ wey ghə dii tsunə wi nə̀ tə doʼo dzûmə n fɔ̀ɔ wə idəŋ wə, loʼ tə a loʼ mûkəbii wən tə ney shiə bənə n taw u wi, fə u wey wə nsə u fəghə wə.”

Ghə ka ney Yeso tə a loʼ kəfə n Nazaled

(Mak 6.1-6; Luk 4.16-30)

53Ambə Yeso khəə may tsu ghɔɔmə tə fənkəfən tə, tə n zə̀ghə̀ tsu luʼu key. 54Nghee tə fən nyi bənə n naʼ i wi, tə n dii aghə̂ n ndaw kədzəŋi ə ghə̂ a Təjuu n jìi zey dzuu zə â ngii zumnə ghə fu, ghə n bəbə nə̀, “Tow wən faalə kə utɔb kən boʼo ney bə ghee, nsə kɔb tə aghəə tən ə? 55À wən way waa Kamenda wən ə? Zə mgbaŋ way Maliya a? Waazə a wi a mgbaŋ way Jems, Yosef, Shimun nsə Judas ə? 56Waazə a wi a zən ghə adzəm mgbaŋ way kə fa ghi saa a? Tə ghəə ghən adzəm kee ney bə ghee?” 57Fə̀ŋ tə sey daŋŋə bəbnu ghə n kow wi, ghə n ka ney wi tə a loʼ kəfə, tuu maʼa wi.

Yeso n kee dza tə̀ ghə nə̀, “Ghə ngɔɔmənu wù tûm Kəzə̀ nə tənaʼa tədzəm, a may kə n naʼ i wi nsə n sali ndaw i wi ghə ngɔɔmə way wi.” 58Tə n ka ngii dii ghəə a faalə ghə fu, nghee ghə â khə way bəghəm fə̀ŋ zə n ghəə a wi.

Currently Selected:

Matyo 13: WEH

Highlight

Copy