Jɔn 12

Maria tsoʼlə Yeso nə mmbvə n Betani

(Mat 26.6-13; Mak 14.3-9)

1Ambə tsuʼu n doʼo səə tsunə ntuubə tə Zə̂ kə taa zaʼa kə ni bə, Yeso n ndow bə n naʼ i Betani, ndow n ndaw Lazarɔs wən tə â zhəm dzəŋŋə bənə nə ivə. 2Nghee ghə tsu doʼo tsu n nəŋə i fənə tə, fə a Yeso ghə n khəələ bə wi n fəzəə wə, Mata n dzawwə bə ufəzəə, Lazarɔs n kee doʼ dzəŋi ni zə̂ ghi Yeso. 3Maria n ney kɔʼ sɔʼ mbvə n ləmmə dzɔbə mə nə̀ a loʼ tən kə mbvə n nad#12.3 Nad â loʼ kaʼ fə loʼ fə ghə â faalənə mbvə n ləmmə dzɔbə mə tii. nə̀ wən i tii i ngii tawnu, feeli tsu n fuu i Yeso, ney kɔʼ nyuŋ tə kətow tə wi, zəd tsu fuu i wi tii. Zuʼ kə tii kə n dzoʼlə tsəghə kaabə ndow n ndaw idzəm. 4Ngəd ə wi u loʼ wə tɔŋŋə Judas Iskariɔt, tə wən tə â khə ni fìi fuu Yeso n kee sənnə dza nə̀, 5“Ghə mə way ni fìi mbvə mən n ndəmə ukhəə, ghə fu khəə u tii wə tə̀ ghə̂ a laa ghə ə? Wən zə mmbvə i tii zə â loʼ tə a loʼ khəə wey ghə loʼ ni tsə wù kəfwaʼ tii nə kənum.” 6Tə â ka ghəə ghən dza dzə bòʼ nə̀ tə ngii ləghə ghə̂ a laa ghə, tə â sey dza bòʼ nə̀ tə â loʼ wù tsɔŋɔ. Â kwɔɔ keeli tsə wi mbəghə kə ukhəə kə, tə n tsəmə nyaʼi ney shiə tsə soʼo ukhəə tii ni zow ghəə a wi.

7Yeso n kee dza nə̀, “Zəghə na weyzən wən! Zəghə na wi, tə sey tsoʼlə tən bə dzə mə n mbvə mey tə mə khə ni tsoʼlə mə tii n tsuʼ fey ghə i tsəllənə mə tii. 8Ghaa nə̂ laʼ koʼ way ghə̂ a laa ghə n fəŋŋə kə ghaa, abə mə, n nə kee way dzə ghi ghaa nəŋə tədzəm.”

9Ambə nɔɔ kə ghə̂ a Təjuu kə zow tsu nə̀ Yeso loʼ n Betani, ghə n ndow i bə ni bə koʼ Yeso nsə ni koʼ soʼo Lazarɔs wən Yeso â zhəm dzəŋŋə bənə nə ivə. 10Sey, ghə fɔɔngili a nii ghə n kad tsu tsə̀m nə̀ ghə khə ni wey soʼo Lazarɔs tii. 11Ghə â kad tsəm ni wey soʼo Lazarɔs n təŋkey ndəmə ghə̂ a Təjuu ghə â nya zəghə maʼa dow ghə fɔɔngili a nii ghey, bəghəm fuu ndow tə Yeso bòʼ fwaʼ key Yeso â fwaʼnə n kow Lazarɔs.

Yeso nyi n Yerosalem tə̀ a loʼ kədə̀ŋ

(Mat 22.1-11; Mak 11.1-11; Luk 19.28-40)

12Tsətsə wey, nɔɔ kə aghə̂ key kə â bənə nə kəzə̂ n zow tsu nə̀ Yeso loʼ n jii tə bəghənə n Yerosalem. 13Sey, ghə n ney kɔʼ utsəghə ndow ni kpii ney wi, fuu ukali n dzə̂ tə taw tə dza nə̀, “Kali u Kəzə̀! Zə̀ kə buulə wù wey tə bəghənə n zəd i Mûkəbii. Zə̀ kə buulə də̀ŋ kə naʼ zə Izree!”

14Yeso n ney kɔʼ waa fə fənjakas, kɔʼ doʼo kɔʼ tii. Ghəə ghən n bɔɔmə bə shi kə ighələ tə̀ i tɔ̀ɔ doʼonə n màʼlə K-a-zə̀ nə̀,

15“Ka na tsəŋ dzə a ghə̂ a Zayɔn ghə,

Koʼo də̀ŋ kə ghaa kə key kə bəghənə,

Nə̀ tə n kɔʼ doʼo n tow kə waa fə fənjakas.”

16Ngəd tə wi tə n ka zowkeeli ghəə ghən n nəŋə i tii zə. Â loʼ kə nghee Yeso bə kpu tsunə, Zə̀ kə n zhəm nuu kɔʼ ndow wi idəŋ, ghə n daŋŋə taa mòʼlə bə ghəə ghən ghə â tɔ̀ɔ naŋŋə kuum wi. Ghə n moʼlə bə soʼo ghəə ghey ghə â ghəŋənə tə wi.

17Nɔɔ kə aghə̂ key kə â loʼnə ghi Yeso n nəŋə zey tə â zhəm nuu shi bənə lazarɔs n say i wi, n ndòw naʼa nduŋŋə ndow ghəə a tii ghə. 18À wən loʼ zuŋ kə ighəə key ndəmə aghə̂ â təŋŋə ndòwnə ni ndòw koʼ Yeso, n təŋkey, ghə mâ zow nə̀ tə ghəŋə ndzoʼo faalə kə ighəə kən. 19Sey, ghə̂ a tə Falasi ghə n ghɔɔmə n wû i ghə dza nə̀, “Ghəə zən n saa tsəghəshi! Koʼo na, Ghə̂ adzəm a nya təŋŋə ndòw kə n baa wi!”

Ghə̂ ghən ghə way ghə̂ a Təjuu a kəŋə Yeso

20Ghə̂ ghən ghə way ghə̂ a Təjuu ghə n bə soʼo ni bə ngɔɔmə Kəzə̀ n Zə̂ kə taa zaʼa kə n Yerosalem 21Ghə n bə koʼ bə Filip wən tə â nuu bənə n Bedsayda n mboʼo Galili, dza tə̀ wi nə̀, “Mûkəbii, ghey ləghə ni kò Yeso.”

22Filip ndòw dza ndòw tə̀ Andria, ghə n dzəŋi ndòw dza ndòw tə̀ Yeso. 23Yeso n beeli ndòw nə̀, “Nəŋə zə n bə tə̀ waa wù sɔŋtsuʼ ni keeli kɔʼlə n nii mə. 24N dza bə isəŋə tə ghaa nə̀, abə sə̂ i səb i ka nyi tsu nə təzub, i kpu tsu, zə doʼlə kə sə̂ i səb. Abə i kee kpu tsunə, zə i fòw kɔʼ, i nyim kɔʼ, i bɔŋ bə ndəmə sə̂ asəb. 25Wù wey tə ləghənə muu i wi zə, tə i guŋŋənu muu i wi zə, wù wey tə fədlə baanə muu i wi zə fa n mbi, i fəd keeli muu zə itsali. 26Wù wey tə ləghənə ni doʼo wù kəfwaʼ wuŋ, khə ni dzûmə mə, nə luʼu key n loʼnə tii, wù kəfwaʼ wuŋ i loʼ sòʼo fu. Abə wù fwaʼanə tə̀ mə, Bày wuŋ n ngɔɔmə wù tii.”

Yeso dza zey və i wi

27Yeso n ndow n sə kə ni dza nə̀, “Fə̀ŋ nya ngii bàŋa mə. N kəm loʼ ni dza nə̀ ngee? N sə loʼ ni dza nə̀, ‘Bày, bəghəshi mə n nəŋə zən ə?’ Ngaŋ! N way ni dza sey, n təŋkey, a wey loʼ zuŋ key mə â bənə fa n mbi, nə̀ n bə fəghə n nəŋə i zən. 28Bày, dìi daʼa key zəd zə i khənə tə̀ ghə̂ a fuu nkɔʼlə tə wɔ.”

Dzə̀ i loʼ zə n daŋŋə shi tsu bə idəŋ, dza nə̀, “Mə n dìi daʼa kuŋ kə, mə i nam dìi kpiʼinu.”

29Nɔɔ kə aghə̂ key kə â teynə fu n zow dzə̀ ə tii, dza nə̀ a kəmə ighow, a loʼ ghə n dza, “Tsəndəghə ə Kəzə̀ n ghɔɔmə tə wi.” 30Yeso n beeli ndow ghə nə̀, “Dzə̀ zən ka shi tsu bə dzə bòʼ mə, i shi tsu bə bòʼ ghaa. 31Nəŋə zə n kpii tə̀ Zə̀ kə ni saʼ ghə̂ a mbi. À loʼ nya ghə i dzum maʼa shiənə Satan, tə loʼnə də̀ŋ kə mbi kə. 32Abə ghə̂ ghə i ney nuu kɔʼnə mə fa aghəd, kɔʼlə naŋa kɔʼ mə n zat kə fəkaʼ, mə i zuŋŋə bə aghə̂ adzəm n tənə mə.” 33Tə â dza sey ni dii ndzoʼo jìi zey tə i kpuunə tii. 34Nɔɔ kə aghə̂ key n beeli ndow wi nə̀, “Laŋ kə ghey kə dza nə̀, Klisto nə kpu koʼ way tə̀ mbi nə bə may. A kee loʼ kee wə sə dzanə tə̀ ghey nə̀ ghə khə ni kɔʼlə kɔʼ dzə Waa wù sɔŋtsuʼ n zat kə fəkaʼ ə? Waa wù sɔŋtsuʼ wən wə baa dzanə fa, loʼ u ghaa wə ə?” 35Yeso n dza ndow tə ghə nə̀, “Daa kə i nam doʼlə kəŋŋə ndownu ghi ghaa n tɔŋɔ fə inəŋə. Bwey na nya ghaa khənə daa kə, nə̀ a way sey ləm kə i bwu kwɔɔlə ghaa. Wù wey tə bwey nə kələm khə way luʼu key tə ndownə tii. 36Nya wən ghaa nam khənə daa kə, bəghəm fu na tə wi, sey nə̀ ghaa loʼ ni doʼo bə waa a kədaa.”

Ambə Yeso ghɔɔmə may tsu ghəə ghən, tə n zəghə tsu ghə, ndow nyì doʼo ndow nə̀ kə ghə nə koʼonə wi.

Ghə̂ a Təjuu a nam tuu kə ni bəghəm tə̀ Yeso

37Nghee tə Yeso â tsəm dii kə ndəmə ghəə a faalə ghə n sə kə ghə̂ a Təjuu, ghə n nam tuu ni bəghəm fuu tə̀ wi. 38Zə â loʼ sey ni luulə ghɔɔmə i Kəzə̀ zey wù tûm Kəzə̀ Ayzaya â tɔ̀ɔ naŋa nə̀,

“Mûkəbii, a loʼ wù ghaa wə tə â bəghəm naŋanə ghɔɔmə i ghey zə ə?

Â loʼ n wɔ wù ghaa wə Zə̀ kə â diinə daʼa kə wi kə n wɔ wi ə?”

39À wey loʼ ghə i tii zə ghə â way ni bəghəm fuu ghɔɔmə i tii zə kùm nə̀ wù tûm Kəzə̀ Ayzaya mâ dza naŋa soʼo nə̀,

40“Zə̀ kə n fəb naŋa sə̂ a ghə ghə̀,

Tawwə naŋa fə̀ŋ tə ghə

Nə kə ghə nə koʼo luʼu tə,

Kə ghə nə zowkeeli soʼonə ghə i loʼ zə,

Sey nə̀ kə ghə nə kweyyə nuu dzəŋŋə bənə n ghəə a ghə a bəbə ghə, ghə bə n səə mə,

Tə n baŋŋə ghə.”

41Ayzaya â dza sey kùm nə̀ tə mâ koʼ zey ghaʼ i Yeso zə, tə n dza naŋa bə aghəə bòʼ wi.

42Nghee ghə̂ a Təjuu ghə â tuu kənə ni bəghəm fuu tə̀ Yeso, ndəmə ngəd tə ghə tə loʼ tə n nam bəghəm fu ndow tə̀ wi, ghə n kee tsəŋə ghaʼa ni dii shi ndow iwû nə̀ kə̂ ghə̂ a tə Falasi a nə dzum shiənə ghə n ndaw kədzəŋi ə ghə̂ a Təjuu. 43Ghə â tsəŋə bòʼ nə̀ ghə â ləghə ni keeli kɔʼlə mey ghə̂ a mbi ghə â fuunə, tsəghəshi kɔʼlə mey Zə̀ kə fuunə.

Zə̀ kə i saʼa ghə̂ ghey ghə ka bəghəm ghɔɔmə i Yeso

44Yeso n dza shi kɔʼ n dzə̀ i taw zə nə̀, “Wù wey tə bəghəm fu tə mə, tə ka kad bəghəm dzə tə̀ mə, tə bəghəm fuu soʼo tə̀ wù wey tə tûmnə mə. 45Wù wey tə koʼnə mə, tə n sey koʼ soʼo wù wey tə tûmnə mə. 46N bə fa n mbi tə̀ a loʼ kədaa, sey nə̀, wù wey tə bəghəm fuu dzə tə̀ mə, tə ka doʼo tən dzə nə kələm. 47Wù wey tə zow ghɔɔmə zuŋ zə, tuu ni ney naŋa, N way ni saʼ wi, n təŋkey, N ka bə dzə fa n mbi ni bə saʼ aghə̂, mə â bə ni bə bəghəshi ghə̂ a mbi. 48Wù loʼnu tə i saʼanə ghə̂ ghey ghə tuu maʼanə mə, tuu soʼo ni ney naŋa ghɔɔmə zuŋ, n təŋkey, a i loʼ ghɔɔmə zən i shi bənə n dzuu zuŋ, zə i saʼanə ghə n tsuʼ fey mbi i maynə tii. 49N ka ghəə ghən ghɔɔmə shi bə dzə n daʼa kuŋ, a loʼ Bày wuŋ wən tə tûm shi bənə mə, tə fuunə mə n laŋ kə n ghəə zey n khənə ni dza nsə jìi zey n khənə ni ghɔɔmə tii. 50N khənu nə̀ laŋ kə wi kə ghəŋŋə aghə̂ nə̀ ghə i khə muu zə itsali zə. Ghəə ghey n ghɔɔmənə, N bɔɔmə ghɔɔmə kə nghee tə Bày â dza bənə tə̀ mə.”

Currently Selected:

Jɔn 12: WEH

Highlight

Copy