Kəfwaʼ 6

Ghə say ghə̂ a gaamə ghə asəghəmbəghə

1Nghee tə taŋ ə dzûmə tə Klisto tə nyîmmə kɔʼɔ ndownə tə tsuʼu n tsəghənə, ghə̂ a Təjuu ghən ghə a ghɔɔmənə ghɔɔmə i Grik zə, ghə n tam ndow Juu tən tə â ghɔɔmənə ghɔɔmə i Hibru zə dza nə̀ ghə badla ukpey abə ghə dzawnə fəzəə wey ghey a kpusə a khə ni ney. 2Sey, ngəd tə Yeso tən ighəm n ghii tə təbəghə n tɔŋɔ naŋa bə dzûmə tə Klisto tədzəm dza nə̀, “I ka kpii dzə tə saa ni buu naŋa tsu ni dii ghɔɔmə i Kəzə̀ zə, saa təŋə doʼo ndow n ghəə ghə ufəzəə. 3Waazə ghə, say kɔʼ n na ghə̂ ghə asəghəmbəghə n fəŋŋə kə ghaa, ghə̂ ghən ghaa khənə nə̀ Zay kə Zow kə loʼ n kow ghə, ghə u khə soʼonə tɔb wə, ghaa fuu ndow fwaʼ kən tə ghə nə ghə i fwaʼa. 4Abə ghey, gheykee doʼo tən tsu kə ni fwaʼa fwaʼ kə gɔŋŋə kə nsə ni dii ghɔɔmə i Kəzə̀ zə.”

5Ghə̂ adzəm n ngii ləghə saalə kən ngəd tə Yeso tə fuu bənə. Sey, ghə n sày kɔʼ Sitifən, tə a ngii khə bəghəm i fə̀ŋ zə, Zay kə Zow kə n loʼ soʼo n kow wi. Ghə sày kɔʼ soʼo, Filip, Prokorus, Nikanɔ, Timɔn, Paminas, nsə Nikɔlɔs tə â nuu bənə n Antyɔk tə â bəghəm tsəghə dzənə tə ghəə a Kəzə̀ a ghə̂ Təjuu ghə. 6Ghə n ney teyyə naŋa shi bə ghə̂ ghən asəghəmbəghə n sə kə ngəd tə Yeso tey, ghə n gɔŋŋə tə ghə, gaʼ ndow awɔɔ n tow u ghə.

7Sey, ghɔɔmə i Kəzə̀ zə n ndow n sə̂ kə ni zaamə, taŋ ə dzûmə tə Klisto tə n nyîmmə kɔʼɔ ndow n Yerosalem, ndəmə ghə fɔɔngili a Təjuu ghə bəghəm soʼo tə Yeso.

Ghə kwu Sətifən

8Sətifən â loʼ wù nə Zə̀ kə n fuu wi n ndzuŋ nsə daʼa kə naʼ idzəm. Tə n ghəŋŋə ndəmə ghəə a faalə ghə nsə ghəə a zum ghə idzuu ghə n fəŋŋə kə aghə̂. 9Ghə̂ a Təjuu ghən ghə a nuu bə n naʼ i Sirin, Alekzandra nsə n mboʼo tə Silishya nsə Eshya, ghə â loʼnə n zəghə wən ghə tɔŋŋə nə̀ a loʼ, “Ghə̂ a ngəŋ”, n kaʼ ni baŋŋə təfəghəm ghi Sitifən. 10Ghə n dəm kii ni ghɔɔmə baalə ghi wi bòʼ tɔb wey Zay kə Zow kə â fuunə tə wi.

11Sey, ghə n tsiilə zuulə naŋa kɔʼ ghə̂ a loʼ ghə nə̀ ghə i bad tsu aghəə nə̀, “Ghey â zow tə tsayyənə laŋ u Mushi wə, tsayyə soʼo Kəzə̀.” 12Ghə̂ ghən n sɔʼlə kɔʼ bə aghə̂, sɔʼlə kɔʼ soʼo ngəd tə inaʼ nsə ghə̂ a dii a kəlaŋ ghə. Ghə n daŋŋə bə kwu kɔʼ Sətifən, ney ndow wi n ndaw tsə. 13Ghə n ney bə ghə̂ a loʼ ghə nə̀ ghə bə zɔʼ dza tsu nə̀, “Wù wən ka kam buu doʼo koʼ tsə nə̀ tə khəə way ghəə a bəbə ghə bòʼ ndaw Kəzə̀ ə saa i nii zən i zownə nsə laŋ u Mushi wə. 14Ghey â zow wi tə dzanə nə̀ Yeso wù Nazared wən i saʼa maʼanu Ndaw Kəzə̀ ə saa zən, tə kwey kɔʼ soʼo ghəə ghə inaʼ ghən Mushi a fuu naŋanə tə̀ saa.” 15Ghə̂ ghey adzəm ghə a doʼnə n ndaw tsə, ghə n tɔʼ laalə ndow Sətifən, koʼ ndow tûm u sə u wi, wə n nyiələ tə̀ aloʼ tûm usə u tsəndəghə Kəzə̀.

Currently Selected:

Kəfwaʼ 6: WEH

Highlight

Copy