Mak 4

Nklama timi mbɔʼ àkɔn elankɔn

(Mat 9:18-26; Luk 8:40-56)

1Yeso wu klada sa tee abwa ewee angli Galilii. Enɔrɔ bɔ akɛkɛ shunu kɛɛrɛ engɔ sɔ̀, engɔ nyii efwɔ ekpe tsɔmɔ edɔ̀m angli. Ekpe mɔmbwo me tsɔmɔ edɔm angli, enɔrɔ bɔ shi tsɔmɔ ese, ewee angli. 2Yeso tee abwa akɛkɛ ebe angɔ ene nklama timi mà gà kpe, 3“Mbɔn zhuru! Afwɛʼ àsɔmɔ à ngɔɔ ekwâ é mìi esam mɔ. 4Aŋu engɔ à sa mìi esam ngɛ, edeʼ turu a njikɛ̀, ènɔ̀n zeʼe nde. 5Edeʼ turu edɔ̀m ekob wɛ chwâ à ne me ghɛʼ bo ngɛ, è bla. Â zamma bla mbɔʼnga chwâ a ne tsɛʼ eghɛʼ bo. 6Èndzobo chɛ enchwe à klada sa twɔ̀n ngɛ, afu mɔ wubu, e ku mbɔʼnga â ke le egha bo. 7Esam wɛ deʼ à turu efwɔ ekôd. Aŋu â gli ngɛ, ekôd gha engɔ, e ne kla enta bo. 8Edeʼ turu ena afwɔ chwâ ǹchwɔ̀, glì tɛb è kla enta. Edeʼ à kla enta asamabi tɛʼ wum, edeʼ èsama tɛd etsɛrɛ ekobi.” 9Yeso shi gà ebe angɔ kpe, “Egho wɛ me le ètimi ngɛ, è zhuru.”

Enji ene nklama timi

(Mat 9:18-26; Luk 8:40-56)

10Èndzobo chɛ Yeso à shi gho zhiʼ ngɛ, bɔ bɛɛrɛ abwa wum ǹchwɔ̀ fyee ngɔ mane abɔ tsɛrɛ byɛ â ma aŋu ngɛ biiri ǹji ene nklama timi mombwo. 11Yeso gíì kpe, “Â shi tòʼro ebwa nɛŋɛ wɛ e mwɔ ene ebwa m̀fɔ̀ Ngwe ngɛ endɔn, shi sa gà ebe abɔ angɔ byɛ e mwɔ ese ngɛ ene nklama timi. 12Ewunɔ ne énde mbɔʼtye ngɛ angɔ ma zɔ ne ma zhùŋù bo, gɛ̀rɛ̀ ma zo ne ma nɛ̀ɛ ǹji bo. Ne me éngɛ bo shi angɔ ba ngo kobo eleabwa àmɔ̀ e dzɛrɛ abwa bɔɔbɔɔ angɔ!”

Yeso toʼro ǹji ene nklama timi mbɔʼ àkɔn elankɔn

(Mat 13:18-23; Luk 8:11-15)

13Yeso gâ ebe angɔ kpe, “Mbɔn ke nɛɛ ǹji ene nklama timi fɔnɔ bo? Mbɔn ba da sa nɛ̀ɛ ǹji ene nklama timi deʼ ngɛ ene? 14Àkiri àsɔmɔ na kɔrɔ ega Ngwe. 15Abɔ deʼ na zo ega Ngwe wunɔ na alankɔn yɛ â turu a njikɛ̀ ngɛ nɔ. Aŋu angɔ gɛrɛ ma zo ngɛ, asatan zeʼ chì ega Ngwe wɛ e me kɔrɔ efwɔ ńtara angɔ ngɛ. 16Abɔ tsɛrɛ me mwɔ na elankɔn byɛ â kɔn edɔm ekob ngɛ nɔ. E zo ega Ngwe wɛ, e bɛrɛ ekyɛ ŋwaʼ ene gɛnɛ. 17Na aŋu angɔ ne me le egha bo ngɛ, e na tsɔmɔ tye me ene antiri endzobo. Èndzobo chɛ ǹgoʼ kà enyii zeʼ mbɔʼ ega Ngwe mɔmbwo ngɛ, angɔ zama gòdò. 18Abɔ deʼ gɛrɛ mwɔ ne elankɔn byɛ e me kɔrɔ efwɔ ekôd nɔ. 19E zo ega Ngwe, abwa efwɔ ese, àfɔ̀n efwɔ ese mane edoʼ ene ela akɛkɛ edɔm ese zeʼ koro angɔ, e sa me kla enta tsɛ̀ʼ. 20Abɔ tsɛrɛ mwɔ ne elankɔn byɛ e me kɔrɔ ene chwâ ǹchwɔ̀ nɔ. E zo, e bɛrɛ è kla enta, adeʼ enta asamabi tɛʼ wum, adeʼ enta èsama tɛd, adeʼ enta ekobi.”

Anâm yɛ e me chɛ gè enji ekuʼ ngɛ

(Luk 8:16-18)

21Yeso gâ ebe angɔ kpe, “Ngwo na de chɛ anâm, ngwo ge enji ngwɔ̀m kà enji etan? Ngwo ke ma tɛʼ edɔm echud tɛʼ anâm bo? 22Ebwa deʼ wɛ e me nɛŋɛ ngɛ wa ngo glì apɛpɛ, ala deʼ yɛ a gɛrɛ me nɛŋɛ ngɛ, e ba ngo nu é zeʼ apɛpɛ: 23Mala gho deʼ me le ètimi engɔ zhuru.” 24Yeso fɔɔ embè gà kpe, “Mbɔn nu azɔm anchwɔnchwɔ ene abwa yɛ mbɔn ma zo ngɛ mbɔʼnga nuru ala yɛ ngwo ma ndɛ̀ʼ ngɛ gɛrɛ na angɔ ngwo ma nu, ba de fɔɔ. 25Egho wɛ me le ngɛ e ba ngo zhiiri, engɔ wɛ ne me le bo ngɛ, ka de ma âfwɔ ngɔ wɛ è me le ngɛ e ba ngo fèe ebe engɔ.”

Nklama timi mbɔʼ alankɔn yɛ a ma tɛ̀bɛ ngɛ

26Yeso gɛrɛ wu gà kpe, “Ebwa m̀fɔ̀ Ngwe ne mwɔ na gho ma mìi alankɔn a chwâ nɔ. 27Ǹklì mane nchi, ke engɔ ma bwɛrɛ kà e mwɔ ekere, alankɔn yɛ na glì tɛb engɔ ne me nɛɛ bo. 28Na chwâ ma le egha mɔ, elankɔn ma tɛbɛ. E na klàda ene afu ngɔ̀ɔ ene sɔʼrɔ. Sɔʼrɔ tɛb fìrì enta. 29Aŋu enta ma fàn ngɛ, ekyɛ ŋwaʼ è ndèerè amɔ nu ebye é sa dzà, mbɔʼnga ela a shi fara.”

Nklama timi mbɔʼ sam digidigi

(Mat 13:31-32, 34; Luk 13:18-19)

30Engɔ wu gà kpe, “Ntsɔ ba ngo ga kpe ebwa m̀fɔ̀ Ngwe ne mwɔ na yɛ? Kà ntsɔ ba shi ngo nu nklama timi fe é moŋoro anyi? 31E ne mwɔ na sam digidigi yɛ è me kpɛɛ ghɛʼ ngɛ, yɛ e ma kɔrɔ a chwâ nɔ. 32Èndzobo chɛ ngwo kɔrɔ ngɛ, è tɛb gɛ̀rɛ̀ klɔ̀ na azɔd kɛkɛ efwɔ ǹtsà nɔ, ènɔ̀n ezob ma fùnnù à bànna ene atɔ ngɔ, mà byɛ ndɔrɔ mà nàmà enchwe.” 33Ene m̀pèrè nklamara timi tsɔnɔ Yeso à sɛɛrɛ aga kɛkɛ é moŋoro ene ega Ngwe ene aghɛʼ yɛ angɔ à ma ngo nɛ̀ɛ ngɛ. 34Engɔ à ke ga ebwa deʼ eba angɔ ne mwɔ ene nklama timi bo, bɛʼngɛ engɔ à na tòʼrò ǹjiri ene abwa gimkpaʼ ebe bɔ bɛɛrɛ abwa mɔ èndzobo chɛ à shi gho zhiʼ nè angɔ ngɛ.

Yeso bwaara efùu kamakam

(Mat 8:23-27; Luk 8:22-25)

35Etiʼdi anji ŋwaʼ yɛ, engɔ gâ ebe bɔ bɛɛrɛ abwa mɔ kpe, “Ntsɔ kpɛn ngɔ̀ɔ anjid zè.” 36Angɔ nu engɔ efwɔ ekpe kpɛ̀n waʼ enɔrɔ bɔ achim. Akpe tsɛrɛ à gɛrɛ ne mwɔ aŋu. 37Efùu kamakam zèʼ wɛ afwɔ mpiʼ nɔ shi â ŋwɛɛrɛ ekpe. 38Yeso ma bwɛrɛ amɔ achim ekpe me tɛʼɛ ato mɔ ene ǹkɔ̀. Bɔ bɛɛrɛ abwa ngɔ zɛɛmɛ engɔ gà kpe, “Ngwo ne ke kpe ntsɔ kudu?” 39Engɔ tam ekere gà ebe efùu kpe, “Bwad!” Éngɛ, efùu ba tuuu, bwad, akwa ju mɔɔɔ. 40Engɔ biiri ebe bɔ bɛɛrɛ abwa mɔ kpe, “Mbɔn na bumu ayɛ? À yɛ me le mbɔn ne me le ebɛrɛtaa bo?” 41Èklɔ̀ bere angɔ, angɔ sa biiri àmɔ̀ àmɔ̀ kpe, “Ewùnɔ na awɛ? Na M̀pè gho we wunɔ wɛ efùu mane awawa ma zo engɔ?”

Currently Selected:

Mak 4: nbt

Highlight

Copy