Mak 2

Yeso glì gho àglaba

(Mat 9:1-8; Luk 5:17-26)

1Yeso ghɛɛbɛ zeʼe a Kapɛnaum, tsɔmɔ efwɔ enji deʼ, abɔ byɛ zo kpe engɔ shi wu zeʼe abɛ. 2Bɔ bâ akwâ aŋu ene aghɛʼnji yɛ à me tsɛʼ ka ampiʼ afwɔ deʼ nɔ bo, ka de ma aghɔɔnduʼ, Yeso ma sɛ̀ɛrɛ̀ ega Ngwe ebe angɔ. 3Ânɔm deʼ kwɛ̀ me beʼe gho àglaba edɔm ekwaʼa ngɔ̀ɔ ebe Yeso. 4À ne tsɛʼ aghɛʼ ebe angɔ é ngɔ̀ɔ efàarà Yeso bo mbɔʼ ebaŋabɔ. Angɔ kwaʼ ngɔɔ edɔ̀m ndɔ, toʼ afwɔ ekere èzhɛ̀ ndɔ aŋu Yeso à mwɔ ngɛ, shi chwee ekwaʼa wɛ nè gho àglaba wɛ edɔ̀m, sàa a chwâ efàarà Yeso. 5Aŋu Yeso à zɔ ebɛrɛtaa angɔ ngɛ, è ga ebe gho àglaba wɛ kpe, “Ŋwɔ ngu, e shi dzɛrɛ abwa bɔɔbɔɔ njɛ.” 6Bàtee atsɛrɛ deʼ byɛ â me tsɔmɔ aŋu ngɛ sa zhùŋù efwɔ ńtara àmɔ̀ kpe, 7“Egho wunɔ na ga énde kpe ayɛ? Engɔ na ndwàʼ Ngwe! À tye Ngwe zhiʼ me né dzɛ̀d abwa bɔɔbɔɔ.” 8Etaa Yeso tee ebwa wɛ angɔ à ma zhùŋù àmɔ̀ àmɔ̀ ngɛ ekyɛ ŋwaʼ, è shi ga ebe angɔ kpe, “Mbɔn na zhùŋù m̀pèrè abwa yɛngɛ kpe ayɛ? 9Ewe a me zamma, é gà ebe gho àglaba wunɔ kpe ‘E dzɛd abwa bɔɔbɔɔ njɛ’ kà é gà kpe, ‘Tam ekere, nu ekwaʼa ngwɛ zhiri?’ 10Mmɛ wa ngo tee anɛ̂ endɔn kpe Ŋwɔ Gho we le ekama a chwâ é dzɛ̀d abwa bɔɔbɔɔ.” Éngɛ è ga ebe gho àglaba wɛ kpe, 11“Mmɛ ga engɛ̂, tam ekere nu ekwaʼa ngwɛ klo ngɔ̀ɔ abɛ!” 12Aŋu angɔ bɔ gimkpaʼ à ma kede ngɛ, egho wɛ tam ekere nu ekwaʼa mɔ klo ngɔ̀ɔ abɛ mɔ. Angɔ bɔ gimkpaʼ à kɔn gɛ̀rɛ̀ sa ghɔ Ngwe à ga kpe, “Mbyɛɛ de ke shi zɔ M̀pè ebwa zɔnɔ afwɔ deʼ bo!”

Yeso zɔʼ Lɛvi

(Mat 9:9-13; Luk 5:27-32)

13Yeso wu ngɔɔ achim eba angli Galilii. Ebaŋabɔ zeʼe ebe engɔ, è klada sa tee angɔ. 14Aŋu engɔ à ma zhìrì à ngɔ̀ɔ ngɛ, è zɔ Lɛvi, ŋwɔanɔm Alfiyɔs è me tsɔmɔ afwɔ afwɛʼ mɔ. Engɔ à na àshuru aŋwɛ. Yeso ga ebe engɔ kpe, “Kiri angu” Lɛvi tam ekere gɛ̀rɛ̀ kìrì engɔ. 15Afwɔ sa ndada Yeso sa nde efwɔ ndɔ Lɛvi, bàshuru aŋwɛ mane bɔ abwa bɔɔbɔɔ akɛkɛ byɛ â me kiri engɔ ngɛ me tsɔmɔ nè Yeso mane bɔ bɛɛrɛ abwa ngɔ. 16Èndzobo chɛ bàtee atsɛrɛ deʼ byɛ â ma bɔ Farisii â zɔ aŋu Yeso à ma nde nè bɔ abwa bɔɔbɔɔ mane bàshuru aŋwɛ ngɛ, angɔ shi biiri ebe bɔ bɛɛrɛ abwa ngɔ kpe, “Engɔ na nde nè bàshuru aŋwɛ mane bɔ abwa bɔɔbɔɔ kpe ayɛ?” 17Yeso zo aŋu angɔ à ma ga ngɛ, gìi kpe, “Abɔ byɛ e me tsɔmɔ ekama ngɛ ke ma ke ǹgàkyè bo, tye ma angɔ byɛ e ma gwɔ̀rɔ̀ ngɛ. Mmɛ ke me zeʼe é zɔ̀ʼ abɔ byɛ eleabwa angɔ me koʼro efàarà Ngwe ngɛ bo, mmɛ ne zeʼe é zɛʼ ma bɔ abwa bɔɔbɔɔ.”

Ebiiri mbɔʼ é tsɔmɔ ene chwɔ atsaʼra Ngwe

(Mat 9:14-17; Luk 5:33-39)

18À ne endzobo deʼ, bɔ bɛɛrɛ abwa Eyɔɔ mane bɔ Farisii ma tsɔmɔ ene chwɔ atsaʼra Ngwe. Bɔ deʼ biiri ebe Yeso kpe, “Ayɛ me le bɔ bɛɛrɛ abwa Eyɔɔ mane bɔ Farisii ma tsɔmɔ ene chwɔ atsaʼra Ngwe, àmbyɛ ne ma tsɔmɔ bo?” 19Yeso gíì kpe, “Àgɔn anɔmaye deʼ ba tsɔmɔ ene nchwɔrɔ efwɔ ndɔ antara nu-aye wɛ engɔ mwɔ abwaʼ angɔ ngɛ? Angɔ ba sa tsɔmɔ ene chwɔ atsaʼra Ngwe èndzobo chɛ engɔ shi tsɛʼ abwaʼ angɔ bo ngɛ. 20Bɛʼngɛ, anji ya zeʼe yɛ e ma ngo chi anɔmaye wunɔ abwaʼ angɔ ngɛ, angɔ gɛrɛ shi sa tsɔmɔ ene chwɔ atsaʼra Ngwe. 21Mala gho deʼ nu aparandi fe ndèe ǹdi sam anyi, shi aparandi fe yɛ ya de pan, ǹdi yɛ wu mɛ̀ɛ pan ghɛʼ. 22Nkirinkin mala gho deʼ me né nu mɔm jù ge efwɔ agla sam, shi agla yɛ ya ngo pɔ̀m mɔm gɛrɛ tù. E ke ma le éngɛ bo, e na gè mɔm jù efwɔ agla fe.”

Ebwa mbɔʼ anji ku̧ru bɔ Juu

(Mat 12:1-8; Luk 6:1-5)

23À na anji ku̧ru bɔ Juu deʼ, Yeso ma fɔɔ efwɔ esɔmɔ ǹku mane bɔ bɛɛrɛ abwa mɔ. Aŋu â ma zhiri à ngɔɔ ngɛ, bɔ bɛɛrɛ abwa ngɔ sa zhiri à buʼu ǹkùru. 24Bɔ Farisii biiri ebe engɔ kpe, “Kede, ayɛ me le angɔ ma fwɛʼ abwa yɛ etsɛrɛ me ga kpe e ke fwɛʼ anji ku̧ru bɔ Juu ngɛ bo?” 25Yeso gíì kpe, “Mbɔn ke shi zɔʼrɔ ebwa wɛ M̀fɔ̀ Devid mane azhɛmbyɛ mɔ â le èndzobo chɛ â ma gwɔ̀rɔ̀ nchwɔrɔ ma zɛʼ ala deʼ é nde ngɛ bo? 26Èndzobo chɛ Abyata à ma Angwa zhiri ngɛ, M̀fɔ̀ Devid à nyii efwɔ ndɔngwe è nde ǹgoŋ yɛ â me tɔ̧ɔrɔ Ngwe anyi ngɛ. À ne koʼro nde ǹgoŋ yɛ me ètɛ zhiri aŋu etsɛrɛ Mose à ma tee ngɛ. Bɛʼngɛ Devid à nde gɛ̀rɛ̀ ndɛ̀ʼ edeʼ ebe bɔ mɔ.” 27Éngɛ Yeso ga ebe angɔ kpe, “Ngwe à dye ndèerè gho, ke sa ndɛ̀ʼ anji kuru. Engɔ à ke dye ndɛ̀ʼ anji ku̧ru dye shi sa ndèerè gho bo. 28Enyɛrɛ éngɛ, Ŋwɔ Gho na Masakɛ ka de mwɔ ena anji ku̧ru bɔ Juu.”

Currently Selected:

Mak 2: nbt

Highlight

Copy