Matyo 28

Aŋu Yeso à zhwɛm ene ewu ngɛ

1Aŋu anji ku̧ru à fɔɔ ngɛ, ese sa kèʼ enchwenchwe anji mbèmbè efwɔ ǹkyɛ̀, Meri Magdalɛn mane Meri wè ngɔɔ é kede atoshe. 2E sa klikɔ̀ʼ, chwâ binni ene ekama, angere Masakɛ kla nyɛ̀rɛ̀ zeʼe ezob bwɛn tini etye yɛ atoshe ngɛ shi, gɛ̀rɛ̀ tsɔmɔ edɔm. 3Efàarà ngɔ ma nɛŋɛrɛ na m̀bò ghɔbɔ nɔ, ǹdiri ngɔ ma bla mpɛɛ. 4Èklɔ̀ à bere bàkɔ̀ʼ eshe, akwa angɔ sa biri ene aghɛʼ yɛ angɔ à shi na bɔ kudu nɔ. 5Angere wɛ gâ ebe aye byɛ kpe, “Mbɔn ka bum, mmɛ we nɛɛ kpe mbɔn na kɔʼrɔ Yeso wɛ â me kɔmmɔ ngɛ. 6Engɔ ne tsɛʼ anɔ bo, engɔ à shi zhwɛm ene ewu aŋu engɔ à ga endɔn ngɛ. Mbɔn zeʼ zɔ afwɔ yɛ â me bwɛɛrɛ engɔ ngɛ. 7Éngɛ mbɔn zamma ngɔ̀ɔ sɛ̀ɛrɛ̀ ebe bɔ bɛɛrɛ abwa ngɔ kpe ‘Engɔ a shi zhwɛm ene ewu, engɔ wa ngɔ̀ɔ embè ndzɔn a Galilii, mbɔn ba ngo zɔ engɔ aŋu.’ Mbɔn zhuŋu ebwa wɛ mmɛ shi ga endɔn ngɛ.” 8Éngɛ angɔ zamma nyɛn atoshe ma bumu bɛʼngɛ egɛnɛ me shwe efwɔ akwa angɔ, e dɔrɔ ngɔ̀ɔ tòʼrò ebe bɔ bɛɛrɛ abwa ngɔ. 9Sa klikɔ̀ʼ Yeso kla angɔ gɛ̀rɛ̀ ga ebe angɔ kpe, “Mmɛ gamma endɔn.” Angɔ à ngɔ̀ɔ kla engɔ klini elo ngɔ, è ghɔ engɔ. 10Éngɛ Yeso gâ ebe angɔ kpe, “Mbɔn ka bum mbɔn ngɔɔ ga ebe bwɔngwaanɔm mbu kpe angɔ ngɔɔ a Galilii, angɔ ba ngo zɔ angu aŋu.”

Bàkɔ̀ʼ akwâ ga ebwa à gli ngɛ

11Aŋu aye byɛ à ma ngɔ̀ɔ é sɛ̀ɛrɛ̀ aŋu Yeso à shi zhwɛm ene ewu ebe bɔ bɛɛrɛ abwa ngɔ ngɛ, abɔ ebiri byɛ adeʼ à ma kɔʼ atoshe ngɛ ghɛ̀ɛbɛ ngɔɔ efwɔ antiri abɛ gɛ̀rɛ̀ dù sɛ̀ɛrɛ̀ abwa gimkpaʼ yɛ a gli ngɛ ebe m̀fɔ̀rɔ̀ zhiri. 12M̀fɔ̀rɔ̀ zhiri sɔŋɔ mane eto, ndèerè abwa àmɔ̀, gɛ̀rɛ̀ ndɛʼ ekɛb akɛkɛ ebe abɔ ebiri byɛ 13è gà ebe angɔ kpe, “Mbɔn ga kpe aŋu mbɔn à me bwɛnɛ ǹklì ngɛ, bɔ bɛɛrɛ abwa ngɔ à zeʼ ji akudugho ngɔ. 14Éngɛ mala Paylet zo ebwa wunɔ, shi mbyɛɛ ba ngo le engɔ bɛrɛ kpe mbɔn ke nɛɛ ebwa deʼ aŋu engɔ me zhwɛm ene ewu ngɛ bo, éngɛ tsɛʼ ala deʼ à ma ngo le mbɔn sa bumu bo.” 15Éngɛ abɔ ebiri byɛ nu ekɛb wɛ gɛ̀rɛ̀ fwɛʼ aŋu â shi mɛnɛ ebe angɔ ngɛ. Ne éngɛ bɔ Juu ma sɛ̀ɛrɛ̀ bwɛn ànchwɔ̀ kpe bɔ bɛɛrɛ abwa Yeso à ji akudugho ngɔ.

Yeso bum efàarà bɔ bɛɛrɛ abwa mɔ

16Bɔ bɛɛrɛ abwa wum ǹchwɔ̀ ŋwaʼ à ngɔ̀ɔ edɔm egu deʼ a Galilii afwɔ yɛ Yeso à shi ga ebe angɔ kpe e ngɔɔ ngɛ. 17Aŋu angɔ à zɔ engɔ ngɛ, angɔ ghɔ engɔ, bɛʼngɛ abɔ deʼ à ma di kpe ke me engɔ bo. 18Yeso wu tini ngɔ̀ɔ ebara, gà ebe angɔ kpe, “Ngwe shi ndɛʼ ekama gimkpaʼ ezob mane a chwâ ena. 19Éngɛ mbɔn ngɔɔ efwɔ ebɛ gimkpaʼ, akwâ gimkpaʼ, è lè bɔ gimkpaʼ shi ma bɔ bɛɛrɛ abwa mbu, mbɔn ndɛʼ ndim ebe angɔ ene ekumu àtɛ mane ŋwɔ mane azhwɛɛrɛ pɛ. 20Mbɔn gɛrɛ tee angɔ é zo abwa gimkpaʼ yɛ mmɛ a shi ga endɔn é fwɛʼ ngɛ, mmɛ wa ngo mwɔ̀ nè mbɔn akyɛ gimkpaʼ ngɔ̀ɔ bwɛ̀n ene endzobo ngùdu ese.”

Currently Selected:

Matyo 28: nbt

Highlight

Copy