Eyɔɔ 5

Yeso glì gho àglaba deʼ

1Aŋu abwa zɔnɔ à shi fɔɔ ngɛ, Yeso kwaʼ ngɔɔ a Jerusalɛm ene antara bɔ Juu. 2Atim ndim deʼ à ne mwɔ ebara enduʼnkɛmɛ a Jerusalɛm, e ma zɔʼrɔ atsoʼ bɔ Hibru kpe Bɛtzata. Â ne byɛ anduʼndɔ yɛ â ma nyii ngɔɔ efwɔ atim ndim yɛ ngɛ ene etɛʼɛ tan. 3Ebaŋabɔ aŋwan à ne bwɛnɛ a chwâ eba atim ndim. Abɔ deʼ â na bàfò aghɔɔ, bàpli elo, abɔ byɛ abɛɛ akwa â me ku ngɛ mane bɔ aglaba. Angɔ à ne tsɔmɔ ma kɔ̀ʼ èndzobo chɛ ndim ma kwaʼa dzòʼ ngɛ. 4#5:4 Eŋwɛʼrɛ Ngwe sam deʼ be ŋwɛʼrɛ kpe angere Ngwe à na doʼ à ngɔɔ ndùʼ ndim myɛ, egho wɛ dye nyii efwɔ èndzobo chɛ ngɛ ekwa ngɔ bwada. 5Gho deʼ à na aŋu wɛ à shi gwɔn efwɔ enɔ̂m asamabi tɛʼ wum ǹchwɔ̀ fwɔ̧ɔ ngɛ. 6Yeso à zɔ engɔ me bwɛrɛ a chwâ aŋu, è nɛɛ kpe egho wunɔ a shi gwɔn efwɔ endzobo dɔɔdɔɔ, è ngɔɔ biiri ebe egho wunɔ kpe, “Ngwo wa ke kpe aŋwan njɛ myɛ?” 7Egho aŋwan wɛ gíì kpe, “Gho kɛ, mmɛ de ke le gho deʼ anɔ tye è beʼ angu gè efwɔ atim ndim èndzobo chɛ ndim ma dzòʼ ngɛ bo. Mmɛ na de kpe mmɛ nyii, egho tsɛrɛ ngbede angu nyíì.” 8Éngɛ Yeso gâ ebe engɔ kpe, “Tam ekere gɛ̀rɛ̀ nu ekwaʼa ngwɛ ngɔɔ.” 9Egha ŋwaʼ ekwa egho wunɔ à bwada, engɔ tam ekere nu ekwaʼa mɔ klada sa zhiri. Ebwa wunɔ à gli ma anji ku̧ru bɔ Juu. 10Éngɛ eto ebe bɔ Juu ga ebe egho wɛ Yeso à gli engɔ ngɛ kpe, “Anchwɔ̀ na anji ku̧ru bɔ Juu, etsɛrɛ ke tee kpe ngwo beʼe ekwaʼa ngwɛ ànchwɔ̀ bo.” 11Egho wɛ gii ebe angɔ kpe, “Egho wɛ à gli angu ngɛ a ga ena kpe mmɛ nu ekwaʼa ngu ngɔɔ.” 12Éngɛ angɔ biiri ebe engɔ kpe, “Egho wunɔ na awɛ, wɛ a ga engɛ̂ kpe nu ekwaʼa ngwɛ ngɔɔ?” 13Bɛʼngɛ egho wunɔ wɛ â shi gli engɔ nɔ à ke nɛɛ ka Yeso à na awɛ bo, mbɔʼnga bɔ à ne ghɛʼ aŋu, Yeso gɛrɛ shi shwɔɔrɔ gli nyɔɔ amɔ. 14Afwɔ sa ndada Yeso zɔ engɔ efwɔ ndɔngwe kɛ̀ gɛ̀rɛ̀ gà ebe engɔ kpe, “Kɔʼ anɔ, ngwo shi bwada ke wu le abwa bɔɔbɔɔ egha tsɛrɛ bo. Mala ngwo wu le ebwa bɔɔbɔɔ shi ebwa wɛ e ma ngo gli ekwa ngwɛ ngɛ wa ngo me kama fɔɔ ewunɔ.” 15Egho wɛ à nyɛn ngɔɔ achim gɛ̀rɛ̀ tòʼrò ebe eto ebe bɔ Juu byɛ kpe na Yeso à gli angbe. 16Éngɛ bɔ Juu klada sa nyii Yeso, mbɔʼnga engɔ à fwɛʼ ebwa wunɔ anji ku̧ru bɔ Juu. 17Yeso ga ebe angɔ kpe, “Àtɛ ngu na fwɛʼ akyɛ gimkpaʼ, mmɛ wara fwɛʼ mmɛ éngɛ gɛrɛ.” 18Abwa zɔnɔ â le bɔ Juu sa zɛʼɛ eghɛʼnji akɛkɛ é zhudu Yeso ke tye mbɔʼnga engɔ à tsɔŋɔ ǹji etsɛrɛ e fwɛʼ anji ku̧ru bɔ Juu bo, a gɛrɛ na mbɔʼnga engɔ à ma ga kpe Ngwe na àtɛ ngbe mɔmbwo, ene aghɛʼnji zɔnɔ ma tee kpe mbè ne koʼokoʼo ne Ngwe.

Ekama ŋwɔ ne zeʼe ebe Ngwe

19Éngɛ Yeso ga ebe angɔ kpe, “Mmɛ ga éŋwaʼa endɔn kpe ŋwɔ ke ma fwɛʼ ebwa deʼ egha mɔ bo, engɔ na fwɛʼ me ebwa wɛ engɔ ma zɔ àtɛ mɔ ma fwɛʼ ngɛ, mbɔʼnga ebwa wɛ àtɛ ma fwɛʼ ngɛ ne engɔ ŋwɔ gɛrɛ ma fwɛ̀ʼ. 20Àtɛ we doʼo ŋwɔ gɛ̀rɛ̀ me tee abwa yɛ engɔ ma fwɛʼ ngɛ ebe engɔ. Engɔ wa ngo tee abwa tsɛrɛ akɛkɛ yɛ a me kama fɔɔ azɔnɔ ngɛ ebe engɔ yɛ a ma ngo le mbɔn sa kɔ̂n ngɛ. 21Aŋu àtɛ ma zhwɛɛmɛ bɔ kudu ene ewu ma ndɛʼ etyê ebe angɔ ngɛ, ene aghɛʼnji ŋwaʼ zɔnɔ ŋwɔ wa ngo ndɛʼ etyê ebe abɔ byɛ engɔ me doʼo é ndɛʼ ebe angɔ ngɛ. 22Éngɛ àtɛ ke né wu sɛʼ gho deʼ bo, bɛʼngɛ engɔ a shi ndɛʼɛ ekama gimkpaʼ ese ebe ŋwɔ mɔ. 23Àtɛ na le énde mbɔʼtye ngɛ bɔ gimkpaʼ sa ndɛ̀ʼ eghɔ ebe ŋwɔ na e ma ghɔ àtɛ mɔmbwo nɔ. Mala gho deʼ ne ghɔ ŋwɔ bo, éngɛ ga kpe engɔ ke ghɔ àtɛ wɛ me saa eŋwɔ wɛ ngɛ bo. 24Mmɛ ga éŋwaʼa endɔn kpe, egho wɛ ma zo ega ngu gɛ̀rɛ̀ bɛ̀rɛ ene engɔ wɛ à saa angu ngɛ, shi le etyê kengudu. E gɛrɛ yà ne engɔ sɛʼ, bɛʼngɛ engɔ shi kpɛn ene ewu ngɔɔ ene etyê. 25Mmɛ ga éŋwaʼa endɔn kpe endzobo ya ngo zeʼ, a de shi zeʼe yɛ bɔ kudu ma ngo zo etsoʼ ŋwɔ Ngwe, éngɛ abɔ byɛ e ma zo etsoʼ wunɔ ngɛ ba tye àkɔʼɔ. 26Aŋu etyê ma zeʼe ebe àtɛ ngɛ, engɔ a shi ndɛʼ etyê ebe ŋwɔ mɔ kpe è mwɔ efwɔ ekwa ngɔ gɛrɛ. 27Engɔ gɛrɛ shi ndɛʼ ekama ebe ŋwɔ é sɛʼ mbɔʼnga engɔ mwɔ Ŋwɔ Gho. 28Mbɔn ke sa kɔ̂n ene ebwa wunɔ bo, mbɔʼnga endzobo ya zeʼe wɛ bɔ gimkpaʼ byɛ e mwɔ efwɔ ashe àmɔ̀ ngɛ ba ngo zo etsoʼ Ŋwɔ Gho. 29Angɔ gɛrɛ ba ngo zhwɛm ene ewu. Abɔ byɛ â shi fwɛʼ abwa ǹchwɔ̀ ngɛ ba ngo zhwɛm è tye àkɔʼɔ, angɔ byɛ â ma le abwa bɔɔbɔɔ ngɛ ba ngo zhwɛm e nyɛ angɔ bɛ̀ʼrɛ̀. 30Mmɛ ke né fwɛʼ ebwa deʼ ene ekama ndza bo. Mmɛ na sɛ̀ʼɛ tyetye aŋu mmɛ zo ebe àtɛ ngu ngɛ. Etsɛrɛ esɛʼ ndza gɛrɛ mwɔ nkirinkin mbɔʼnga mmɛ ke ma ke é bwaara me etaa mfu bo, mmɛ na sɛ̀ʼɛ aŋu àtɛ à sàa ngu kpe mmɛ sɛʼ ngɛ.”

Entsɛ Yeso

31Mala mmɛ bɛrɛ antsɛ mbɔʼ mmɛ mɔmbwo, éngɛ ga kpe ebwa wɛ mmɛ ma ga ngɛ na andɔɔ, ke me éŋwaʼa bo. 32Egho tsɛrɛ wa aŋu wɛ è ma bɛ̀rɛ antsɛ mbɔʼ mmɛ ngɛ. Bɛʼngɛ ebwa wɛ engɔ ma ga mbɔʼ mmɛ ngɛ ne éŋwaʼa. 33Mbɔn à saa bɔ ebe Eyɔɔ, engɔ gɛrɛ bɛ̀rɛ antsɛ éŋwaʼa. 34Mmɛ ke ma ga kpe gho deʼ bɛrɛ antsɛ ebe bɔ mbɔʼ mmɛ bo, mmɛ na ga kpe mbɔn bɛrɛ shi e gɛrɛ pwèerè angɔn chi. 35Eyɔɔ à ne mwɔ na anâm nɔ ma pɛ abwaʼ ndzɔn, mbɔn ma doʼo é kìrì engɔ, mbɔʼnga engɔ à na pɛ na anâm nɔ. 36Éngɛ mmɛ we le gho deʼ wɛ e ma bɛ̀rɛ antsɛ mbɔʼ mmɛ wɛ è me fɔɔ Eyɔɔ ngɛ. Efwɛʼ bɔnɔ mmɛ ma fwɛʼ nɔ be bɛrɛ antsɛ mbɔʼ mmɛ. Ne efwɛʼ byɛ àtɛ ngu à ndɛʼ ena kpe mmɛ sa fwɛʼ ngɛ. E gɛrɛ ba tee apɛpɛ kpe na àtɛ ngu a me tɔmɔ angu. 37Ka de mwɔ àtɛ wɛ à sàa angu ngɛ, we ga mbɔʼ mmɛ. Mbɔn de ke shi zo etsoʼ ngɔ bo, mbɔn yà ne engɔ zɔ. 38Mbɔn ke ma ge ega ngɔ efwɔ ńtara ntsɔn bo, mbɔʼnga mbɔn ke bɛrɛ ene engɔ wɛ engɔ à saa ngɛ bo. 39Mbɔn na bɛ̀ɛrɛ abwa efwɔ aŋwɛʼrɛ ega Ngwe anchwɔnchwɔ mbɔʼnga mbɔn ma zhuŋu kpe na anyi mbɔn ma nyii efwɔ etyê kengudu Ngwe. Èga ŋwaʼ wunɔ gɛrɛ bɛ̀rɛ antsɛ mbɔʼ mmɛ. 40Mbɔn à da ke doʼo é zeʼe ena é le etyê bo. 41Mmɛ ke doʼo kpe bɔ sa ndɛ̀ʼ eghɔ ena bo. 42Bɛʼngɛ ngɛ mmɛ we nɛɛ angɔn, mmɛ we nɛɛ kpe mbɔn ke le edoʼ Ngwe efwɔ ńtara ntsɔn bo. 43Mmɛ ne zeʼe ene ekumu àtɛ ngu, mbɔn gɛrɛ ke bɛrɛ angu bo, bɛʼngɛ mala gho tsɛrɛ deʼ zeʼe ene ekumu mɔ mbɔn ba ngo bɛrɛ engɔ. 44Mala mbɔn ghɔ angɔn mbɔrɔmbɔn, mbɔn ma gɛnɛ angɔn, bɛʼngɛ mbɔn ne ma le abwa yɛ Ngwe ma gɛnɛ amɔ nè mbɔn bo ngɛ, mbɔn da sa bɛ̀rɛ angu ngɛ ene? 45Mbɔn ke bɛrɛ ene mmɛ bo, mmɛ ke ma ngo ge ebwa enji ndzɔn efàarà àtɛ ngu bo. Na Mose wɛ mbɔn me shi ezhuŋu kɔʼɔ ndzɔn ene engɔ ngɛ ma ngo ge ebwa enji ndzɔn. 46Mala mbɔn me bɛrɛ ene Mose, shi mbɔn gɛrɛ ba ngo bɛrɛ ene mmɛ mbɔʼnga engɔ à ŋwɛʼrɛ mbɔʼ mmɛ. 47Bɛʼngɛ aŋu mbɔn ne bɛrɛ abwa yɛ Mose à ŋwɛʼrɛ ngɛ bo nɔ, mbɔn ba ngo bɛrɛ abwa yɛ mmɛ ma ga ngɛ ene?

Currently Selected:

Eyɔɔ 5: nbt

Highlight

Copy