Eyɔɔ 4

Yeso gà mane aye Samariya deʼ

1Enjitsɔ Yeso nɛɛ kpe bɔ Farisii a shi zɔ kpe bɔ bɛɛrɛ abwa akɛkɛ a sa shùru à zeʼe abwaʼ ndze, mbè sa ndɛʼ ndim ebe angɔ fɔɔ Eyɔɔ. 2Bɛʼngɛ Yeso mɔmbwo à de ke ndɛʼ ndim ebe gho deʼ bo, a na bɔ bɛɛrɛ abwa ngɔ â ndɛʼ. 3Éngɛ èndzobo chɛ Yeso à zo ebwa wɛ â ma gà mbɔʼ engɔ ngɛ, engɔ nyɛn ekyɛ tsɛrɛ abɛɛ abɛ Judeya ngɔɔ achim abɛ Galilii. 4Aŋu engɔ à ma ngɔ̀ɔ ngɛ, engɔ à fɔɔ efwɔ abɛ Samariya. 5Éngɛ engɔ zeʼe efwɔ antiri abɛ deʼ efwɔ abɛ Samariya e ma zɔʼrɔ kpe Sayka ngɛ. Afwɔ zɔnɔ à ne ebara afwɔ chwâ yɛ Yakɔb à me ndɛʼ ebe ŋwɔ mɔ Yɔsɛf ngɛ. 6Ebla tɔʼndim Yakɔb à na afwɔ yɛ. Aŋu Yeso à shi bwara ene ezhin dɔɔdɔɔ yɛ engɔ à shi zhiri ngɛ, engɔ tsɔmɔ a chwâ ebara ebla tɔʼndim yɛ. Éngɛ nɔ a shi aghɛɛghɛɛ nchi. 7Éngɛ aye Samariya deʼ zeʼe é tɔʼ ndim. Yeso ga ebe engɔ kpe, “Ndɛʼ ndim deʼ ena.” 8Éngɛ nɔ bɔ bɛɛrɛ abwa ngɔ à shi ngɔɔ efwɔ abɛ é zɔn ende. 9Éngɛ aye wɛ gà ebe Yeso kpe, “Ngwo na gho Juu, mmɛ mwɔ aye Samariya, ngwo sa da biiri ndim ena ngɛ ene?” Bɔ Juu mane bɔ Samariya ke ma gli ela afwɔbi bo. 10Yeso gíì ebe engɔ kpe, “Mala ngwo a me nɛɛ etɔ̧ɔrɔ yɛ Ngwe ma ndɛ̀ʼ ngɛ gɛ̀rɛ̀ me nɛɛ M̀pè gho yɛ è ma biiri ndim engɛ̂ ngɛ, shi ngwo à ba biiri engɔ ndɛʼ ndim etyê engɛ̂.” 11Aye wɛ ga kpe, “Masa ngwo ke le ànkàm deʼ é tɔʼ ndim anyi bo, ebla tɔʼndim gɛrɛ me turu ngɔɔ efwɔ ghɛʼ. Ngwo na nu ndim etyê mɔnɔ awɛ? 12À na àtɛ sam ngbɛɛ Yakɔb à ndɛʼ ebla tɔʼndim zɔnɔ endyɛɛ. Engɔ mɔmbwo à na ŋwɔ ndim efwɔ nè bwɔ mɔ mane ela ekɛb mɔ. Ngwo na ga ngɛ kpe ngwo we fɔɔ engɔ?” 13Yeso gíì kpe “Gho ŋwàʼaŋwàʼ wɛ è ma ŋwɔ andim mɔnɔ ngɛ, fi̧ri ngɔ tsa wu fe ekyɛ tsɛrɛ, 14bɛʼngɛ egho wɛ è ma ŋwɔ andim myɛ mmɛ ma ndɛʼ ngɛ, fi̧ri ngɔ ke ma wu fe ekyɛ tsɛrɛ bo. Éŋwaʼaŋwâʼ andim myɛ mmɛ ma ndɛ̀ʼ ebe engɔ ngɛ, è ma ngo mwɔ ebe engɔ ne eji wɛ e ma sa ndɛʼ ndim etyê ebe engɔ gɛrɛ ndɛʼ etyê kengudu ebe engɔ ngɛ.” 15Aye wɛ ga be Yeso kpe, “Masa ndɛʼ ndim mɔmbwo e na mbɔʼtye fi̧ri ntsa ne wu fe ekyɛ tsɛrɛ bo, kà me ke wu zeʼe anɔ é tɔʼ ndim bo.” 16Yeso ga ebe engɔ kpe, “Ngɔ̀ɔ zɔʼ enɔm ngwɛ zeʼe.” 17Ayɛ wɛ gii kpe, “Mmɛ ke le anɔm bo.” Yeso ga ebe engɔ kpe, “Ngwo we koʼo aŋu ngwo ga kpe ‘Mmɛ ke le anɔm bo’ ngɛ. 18Ngwo à shi le ânɔm tan. Ka de mwɔ anɔm wɛ ngwo mwɔ nè engɔ enjitsɔ ngɛ, ke mwɔ enɔm ngwɛ mɔmbwo bo. Ebwa wɛ ngwo ga ngɛ ne éŋwaʼa.” 19Aŋu ayɛ wɛ à zo ebwa wunɔ ngɛ, è ga kpe, “Masa mmɛ shi zɔ kpe ngwo na àmɛnɛkɔn Ngwe. 20Ètɛ sam mbyɛɛ à na ghɔ Ngwe edɔm egu wunɔ, bɛʼngɛ mbɔn bɔ Juu na ga kpe afwɔ ghɔ Ngwe tye ma a Jerusalɛm.” 21Yeso gíì kpe, “Aye, ngà bɛrɛ ega ngu, endzobo ya zeʼe yɛ mbɔn ne ma ngo ghɔ àtɛ edɔm egu kà a Jerusalɛm ngɛ bo.” 22Yeso wu ga ebe engɔ kpe, “Mbɔn bɔ Samariya de ke nɛɛ egho wɛ mbɔn ma ghɔ ngɛ bo. Mbyɛɛ be nɛɛ egho wɛ mbyɛɛ ma ghɔ ngɛ, mbɔʼnga etyê Ngwe na zeʼe ebe bɔ Juu. 23Bɛʼngɛ endzobo ya zeʼe, a gɛrɛ de shi zeʼe enjitsɔ, wɛ abɔ byɛ e ma ghɔ Ngwe ene etaa éŋwaʼa ngɛ ba le bɔ sa ghɔ engɔ ene azhwɛɛrɛ mane éŋwaʼa. 24Ngwe na azhwɛɛrɛ, abɔ byɛ e ma ghɔ engɔ ngɛ e ghɔ engɔ ene azhwɛɛrɛ mane éŋwaʼa.” 25Aye wɛ gii kpe, “Mmɛ we nɛɛ kpe Ǹtɔmzhwaʼa yɛ e ma zɔʼrɔ kpe ‘Kristo’ ngɛ wa zeʼe. Èndzobo chɛ è ma ngo zeʼe ngɛ, è wa tòʼrò ǹji ene abwa gimkpaʼ endyɛɛ.” 26Éngɛ Yeso toʼro ebe engɔ apɛpɛ kpe, “Mmɛ wunɔ, mmɛ ma ga engɛ̂ nɔ, ne engɔ.”

Bɔ bɛɛrɛ abwa Yeso wu ghɛɛbɛ zeʼe achim

27Bɔ bɛɛrɛ abwa Yeso ghɛɛbɛ zeʼe achim dù sa kɔ̂n aŋu angɔ à zɔ Yeso ma ga nè aye deʼ ngɛ. Bɛʼngɛ gho deʼ ŋwaʼ à ke biiri ebe aye wɛ kpe, “Ngwo na ke ayɛ bo.” 28Éngɛ aye wɛ gɛrɛ shi shuʼndim mɔ gɛ̀rɛ̀ nyɛn ngɔɔ efwɔ abɛ sa ga ebe bɔ kpe, 29“Mbɔn zeʼe zɔ gho deʼ wɛ è shi tòʼro abwa gimkpaʼ yɛ mmɛ à shi fwɛʼ ngɛ ena. Ka è ba we né mwɔ ma Ǹtɔmzhwaʼa ba?” 30Éngɛ bɔ gli efwɔ abɛ gɛ̀rɛ̀ nu aghɛʼ amɔ é ngo zɔ Yeso. 31À ne èndzobo chɛ bɔ bɛɛrɛ abwa ngɔ ma bii engɔ kpe, “Àtee abwa ngà nde ala deʼ.” 32Bɛʼngɛ engɔ ga ebe angɔ kpe, “Mmɛ we le ende wɛ mbɔn ne me nɛɛ bo ngɛ.” 33Éngɛ bɔ bɛɛrɛ abwa byɛ sa gà àmɔ̀ àmɔ̀ kpe, “Ka gho deʼ a ba shi nu ende deʼ zeʼe ndɛ̀ʼ ebe engɔ?” 34Yeso gíì ebe angɔ kpe, “Ende ngu ne é fwɛʼ afwɛʼ ebe engɔ wɛ à sàa angu ngɛ, gɛ̀rɛ̀ mɛ̀ɛrɛ̀ afwɛʼ ngɔ anchwɔnchwɔ. 35Mbɔn ke ma timi ega deʼ kpe ‘Ata ya fɔɔ akwɛ̀, e dza eku bo? Mmɛ ga endɔn kpe mbɔn fuʼ aghɔɔ ndzɔn gɛ̀rɛ̀ kɔʼɔ efwɔ asɔmɔ! Eku a shi fara koʼo é sa dzà. 36Ka de mwɔ enjitsɔ, abɔ byɛ e ma sɛ̀ɛrɛ̀ ega Ngwe ngɛ, Masa angɔ wa ngo nɛ̀rɛ̀ angɔ. Angɔ ne mwɔ na abɔ byɛ e ma dzà eku efwɔ esɔmɔ ngɛ nɔ, mbɔʼnga afwɛʼ yɛ angɔ ma fwɛʼ ngɛ ya gbèe bɔ sàa efwɔ etyê kengudu, mbɔʼtye egho wɛ à kɔn mane engɔ wɛ à dza ngɛ angɔ buumu sa gɛnɛ amɔ. 37Éngɛ ega wɛ kpe ‘Gho bi kɔn gho tsɛrɛ dza’ ngɛ ne éŋwaʼa. 38Mmɛ wa sàa angɔn kpe mbɔn dzà ela byɛ mbɔn ne fwɛʼ ngɛ bo. Abɔ deʼ â shi fwɛʼ afwɛʼ kamakam ngɛ, mbɔn gɛrɛ shi le ǹtsara ndzɔn ene afwɛʼ angɔ.”

Bɔ akɛkɛ abɛ Samariya le ebɛrɛ

39Bɔ Samariya akɛkɛ efwɔ abɛ yɛ â bɛrɛ ene Yeso mbɔʼ abwa yɛ aye wɛ à ma ga ngɛ. Aye wɛ à ga ebe angɔ kpe, “Engɔ à toʼro abwa gimkpaʼ yɛ mmɛ à shi fwɛʼ ngɛ ena.” 40Éngɛ èndzobo chɛ bɔ Samariya byɛ â zeʼe ebe Yeso ngɛ, angɔ bii engɔ kpe e tsɔmɔ nè mbɔɔ. Engɔ à tsɔmɔ nè angɔ enji fyee. 41Éngɛ bɔ tsɛrɛ akɛkɛ à le ebɛrɛtaa mbɔʼ abwa yɛ engɔ à ma tee ngɛ. 42Abɔ byɛ ga ebe aye wɛ kpe, “Mbyɛɛ ke wu le ebɛrɛtaa tye me ne ebwa wɛ ngwo a ga ngɛ bo, enjitsɔ mbyɛɛ shi zo abwa yɛ engɔ ma tee ngɛ mbyɛɛ mbwo, gɛ̀rɛ̀ shi nɛɛ éŋwaʼaŋwâʼ kpe egho wunɔ na m̀pwèerèse.”

Yeso gli Ŋwɔ Gho kɛ deʼ

43Aŋu enji fyee byɛ à fɔɔ ngɛ, Yeso nyɛrɛ ngɔɔ abɛ Galilii. 44Yeso mɔmbwo à shi dye ga kpe, “Bɔ ke ma ndɛ̀ʼ eghɔ ebe àmɛnɛkɔn Ngwe efwɔ abɛ be mɔ bo.” 45Èndzobo chɛ engɔ à nyii efwɔ abɛ Galilii ngɛ, bɔ Galilii â nu engɔ anchwɔnchwɔ mbɔʼnga angɔ à shi zɔ abwa gimkpaʼ yɛ engɔ à fwɛʼ a Jerusalɛm endzobo antara fɔɔ ekere ngɛ, enga angɔ à na aŋu. 46Ekyɛ tsɛrɛ Yeso wu ngɔɔ efwɔ antiri abɛ Kanan yɛ à mwɔ efwɔ abɛɛ abɛ Galilii aŋu engɔ à shi le ndim firi mɔm ngɛ. Gho kɛ̀ deʼ efwɔ ǹtɔʼ m̀fɔ̀ à na aŋu wɛ ŋwɔ ngɔ à ma gwɔn abɛ Kapɛnaum ngɛ. 47Èndzobo chɛ egho wunɔ à zo kpe Yeso a shi abɛɛ abɛ Judeya zeʼe abɛɛ abɛ Galilii ngɛ, engɔ ngɔɔ ebe Yeso gɛ̀rɛ̀ bii engɔ kpe è zeʼe è ngɔɔ gli ŋwɔ ngbe abɛ Kapɛnaum wɛ aŋwan me fuumu engɔ è sa ke é kuku ngɛ. 48Éngɛ Yeso ga ebe engɔ kpe, “Mbɔn ne zɔ anɛ̂ abwa mane abwa zodo zodo bo mbɔn ba ka bɛ̀rɛ.” 49Egho kɛ̀ wɛ efwɔ ǹtɔʼ ngɛ ga kpe, “Masa, ngà zeʼe ntsɔ ngɔɔ dye ŋwɔ ngu sa ku.” 50Yeso gíì ebe engɔ kpe, “Ngɔɔ, ŋwɔ ngwɛ wa ngo bwada.” Egho wɛ à bɛrɛ ega Yeso gɛ̀rɛ̀ nyɛn. 51Aŋu engɔ à sa ngɔɔ ngɛ, è sɔ anji nè gho afwɛʼ mɔ, egho afwɛʼ wɛ ga ebe engɔ kpe, “Ŋwɔ ngwɛ shi bwada.” 52Èndzobo chɛ engɔ à biiri endzobo yɛ ekwa eŋwɔ wɛ à klada sa bwada ngɛ, e ga ebe engɔ kpe, “Efɔɔ wɛ à tsɛddɛ ekwa ngɔ ene enyɔ̀m ŋwaʼ êwɛ̀.” 53Éngɛ àtɛ wɛ zhuŋu kpe ne endzobo ŋwaʼ yɛ Yeso à ga énde kpe, “Ŋwɔ ngwɛ wa bwada” ngɛ. Éngɛ egho wunɔ mane ekla mɔ gimkpaʼ bɛrɛ ene Yeso. 54Azɔnɔ na anɛ̂ ebwa nuru fyee yɛ Yeso à le aŋu engɔ à nyɛn abɛɛ abɛ Judeya zeʼe abɛɛ abɛ Galilii ngɛ.

Currently Selected:

Eyɔɔ 4: nbt

Highlight

Copy