Eleabwa 4

Petoro mane Eyɔɔ efàarà bɔ m̀pàrà

1Èndzobo chɛ Petoro mane Eyɔɔ à ma bli à ga ngɛ, ètɛ zhiri, ato ebe bàkɔ̀ʼ akwâ a ndɔngwe mane bɔ Sadusii gɛrɛ bwɛn. 2Angɔ à bɔɔ etaa ghɛʼ mbɔʼnga bèmpwɔnɔntɔm â na sɛ̀ɛrɛ̀ ebe bɔ kpe Yeso a shi zhwɛm ene ewu, wɛ e me tee kpe bɔ kudu yà wu zhwɛm shi ma bɔ kɔʼɔ ngɛ. 3Éngɛ eto bere angɔ gè a ndɔdzɔm bwɛn anji ese à keʼe mbɔʼnga endzobo à shi fɔɔ. 4Bɛʼngɛ bɔ akɛkɛ byɛ â zo ekɔn wunɔ ngɛ le ebɛrɛ. Nuru bɔ à ghɛʼ sa ngo bwɛrɛ na bɔ ètɔɔshin tan nɔ. 5Ese nɔ keʼ nɔ, eto ebe bɔ Juu, bɔ tɛbɛ mane bàtee atsɛrɛ sɔŋɔ a Jerusalɛm. 6Angɔ à ngɔɔ kla angwa zhiri wɛ ekumu ngɔ à mwɔ Anas ngɛ, Kayfas, Eyɔɔ, Alɛkzanda mane abɔ tsɛrɛ byɛ â mwɔ bɔ ekla angwa zhiri ngɛ. 7Angɔ ga ebe bèmpwɔnɔntɔm bɔnɔ e tamma efàarà angɔ gɛ̀rɛ̀ biiri ebe angɔ kpe, “Mbɔn na da fwɛʼ abwa zɔnɔ ngɛ ene? Awɛ me ndɛʼ ekama endɔn é sa le engɛ̂? Mbɔn na fwɛʼ ene ekumu wɛ?” 8Petoro wɛ azhwɛɛrɛ pɛ à me shwe ekwa ngɔ ngɛ gii ebe angɔ kpe, “Eto mane bɔ tɛbɛ, 9mala mbɔn sa biiri endyɛɛ mbɔʼ ebwa ǹchwɔ̀ wɛ â fwɛʼ ekwa egho wunɔ wɛ elo ngɔ à me buʼru mane aŋu â gli engɔ ngɛ, 10mbɔn mane bɔ gimkpaʼ efwɔ abɛ Israel nɛɛ kpe egho wunɔ me tama efàarà ndzɔn shi nara nɔ, â gli engɔ me ene ekumu Yeso Kristo gho Nazarɛd wɛ mbɔn à kɔmmɔ ene azɔd baʼra, Ngwe zhwɛɛmɛ engɔ ene ewu ngɛ. 11Yeso ne engɔ wɛ aŋwɛʼrɛ Ngwe â ga mbɔʼ engɔ kpe ‘Etye yɛ àbyɛndɔ à ma bɛ̀ʼrɛ̀ ngɛ, ne engɔ a ma ngo mwɔ etye ndɔʼndɔ yɛ e ma ngo klini ndɔ ngɛ.’ ” 12Ntsɔ na le etyê nyɛ̀rɛ̀ zèʼe achim engɔ. Tsɛ̀ʼ gho tsɛrɛ efwɔ ese abwaʼ bɔ e me né pwèerè bɔ bo. À tye mwɔ ene ekumu ngɔ wɛ Ngwe à shi ndɛʼ ngɛ. 13Bɔ efwɔ ndɔ m̀pàrà â kɔ̂n é zɔ kpe Petoro mane Eyɔɔ angɔ a ke le ebum deʼ bo. Angɔ à gɛrɛ nɛɛ kpe â nana bɔ ne me nɛɛ aŋwɛʼrɛ bo. Ne èndzobo chɛ â shi nɛɛ kpe angɔ na bɔ â ma zhiri nè Yeso. 14À ne tsɛʼ ebwa deʼ tsɛrɛ wɛ angɔ à me né e wu gà ngɛ bo mbɔʼnga angɔ à zɔ egho wɛ â gli engɔ ngɛ e me tama nè Petoro mane Eyɔɔ. 15Éngɛ angɔ gâ ebe Petoro angɔ kpe e glini efwɔ ndɔ m̀pàrà mbɔʼtye e nɛɛ ebwa é le. Angɔ klada sa ga àmɔ̀ àmɔ̀, sa biiri kpe 16“Ntsɔ ba ngo le ene nè anɔm bɔnɔ ngà?” Bɔ gimkpaʼ a Jerusalɛm be nɛɛ kpe na angɔ a me fwɛʼ abwa zodo zodo zɔnɔ. Ntsɔ gɛrɛ ke me né tɔrɔ bo. 17Bɛʼngɛ é le kpe ebwa wunɔ ke wu ngɔɔ embè bo, ntsɔ gbeʼre eto angɔ kpe e ke wu zɔʼrɔ ekumu Yeso ebe gho deʼ bo. 18Éngɛ angɔ wu zɔʼ Petoro mane Eyɔɔ achim gà ebe angɔ kpe ka mwɔ ebwa yɛ, angɔ ke wu tee kà gà mbɔʼ ekumu Yeso ebe gho deʼ bo. 19Petoro mane Eyɔɔ gíì ebe angɔ kpe, “Mbɔn mɔmbwo sɛʼ kpe ewe a me koʼro efàarà Ngwe, é zo angɔn kà é zo Ngwe? 20Enga mbyɛɛ mɔmbwo ke né tɔrɔ é ga mbɔʼ abwa yɛ mbyɛɛ mbwo shi zo gɛ̀rɛ̀ zɔ ngɛ bo.” 21Ndɔ m̀pàrà fɔɔ embè ma gbeʼre eto angɔ akɛkɛ gɛ̀rɛ̀ shi pwèere angɔ sàa. Angɔ à na bumu é ndɛʼ enyii ebe angɔ mbɔʼnga bɔ â na zodo Ngwe ene ebwa wɛ â gli ngɛ. 22Egho wɛ â le anɛ̂ ebwa zɔnɔ ekwa ngɔ ngɛ à shi bwɛn enɔ̂m èsama fyee.

Atsaʼra Ngwe bɔ byɛ e me le ebɛrɛtaa ngɛ

23Aŋu â pweere Petoro mane Eyɔɔ sàa ngɛ, angɔ ghɛɛbɛ ngɔ̀ɔ efwɔ ǹtìmi àmɔ̀, gɛ̀rɛ̀ toʼro abwa yɛ m̀fɔ̀rɔ̀ zhiri mane bɔ kɛ efwɔ abɛ â ga ngɛ. 24Èndzobo chɛ abɔ byɛ â me le ebɛrɛtaa â zo ngɛ, angɔ bɔ gimkpaʼ buumu tsàʼrà Ngwe kpe, “Àtɛ ngbɛɛ Masakɛ wɛ à ndeere ezob mane chwâ, ebɔrɔndim mane ela gimkpaʼ byɛ e mwɔ efwɔ aŋu ngɛ! 25Enyɛrɛ zeʼe achim azhwɛɛrɛ pɛ, ngwo gà ebe àtɛ sam ngbɛɛ Devid wɛ à me mwɔ gho afwɛʼ ngwɛ èndzobo chɛ engɔ à ga kpe

‘Ebɛbɔ na bɔɔ etaa ghɛʼ ene abwa bli kpe ayɛ?

Bɔ na nde akɔɔ bli ato bɔ ene yɛ?

26M̀fɔ̀rɔ̀ efwɔ ese â ndeere akwa amɔ,

eto gɛrɛ sɔ̀ŋɔ̀ afwɔ ŋwaʼ ma gà

mbɔʼ Masakɛ mane Ǹtɔmzhwaʼa mɔ.’

27Éŋwaʼaŋwâʼ, Hɛrɔd mane Pontiyos Paylet â sɔŋɔ efwɔ abɛ Jerusalɛm nè ebɛbɔ mane bɔ Israel ma nde akɔɔ mbɔʼ Yeso gho afwɛʼ ngwɛ wɛ è me pɛ gɛ̀rɛ̀ mwɔ Ǹtɔmzhwaʼa ngɛ. 28Angɔ à sɔŋɔ ene eshi njɛ aŋu ngwo à shi shi kpe e gli ngɛ. 29Éngɛ, enjitsɔ Masakɛ kede aŋu angɔ ma wu̧ru angbɛɛ ngɛ, gɛrɛ le kpe mbyɛɛ bɔ afwɛʼ mbyɛ sa sɛ̀ɛrɛ̀ ekɔn ngwɛ ne ma bumu bo. 30Tee ekama njɛ é glì bɔ. Gɛrɛ le kpe abwa zodo zodo mane enɛ̂ abwa gli nyɛ̀rɛ̀ zèʼe ene ekumu gho afwɛʼ pɛ ngwɛ Yeso.” 31Èndzobo chɛ angɔ à mɛɛrɛ tsàʼrà Ngwe ngɛ, akwâ binni ene afwɔ yɛ angɔ à me sɔŋɔ ma tsàʼrà Ngwe ngɛ, azhwɛɛrɛ pɛ shwe akwa angɔ, angɔ gɛrɛ klada sa sɛ̀ɛrɛ̀ ega Ngwe ne ma wa bumu bo.

Bɔ byɛ â me le ebɛrɛtaa ngɛ gɛbbɛ eku àmɔ̀

32Abɔ byɛ â me le ebɛrɛtaa ngɛ â ne le ezhuŋu mane etaa ŋwaʼ. À ne tsɛʼ gho deʼ à ma zɔʼrɔ ala mɔ kpe na àndze bo. Angɔ à na gɛ̀bɛ ela gimkpaʼ byɛ â me le ngɛ àmɔ̀ àmɔ̀. 33Bèmpwɔnɔntɔm â bɛrɛ antsɛ ene ekama kpe Masakɛ Yeso à zhwɛm ene ewu, éngɛ Ngwe tee enarataa mɔ ghɛʼ ebe angɔ bɔ gimkpaʼ. 34À ne tsɛʼ gho deʼ abwaʼ angɔ à ma ke ala deʼ tsɛʼ bo. Abɔ byɛ â me le asɔmɔ kà ndɔrɔ ngɛ â fɛ̀nnɛ bwɛ akɛb yɛ zeʼe. 35Angɔ à dù ndɛ̀ʼ ebe bèmpwɔnɔntɔm. Éngɛ angɔ gɛbbɛ akɛb yɛ ndɛ̀ʼ ebe gho ŋwàʼaŋwàʼ aŋu engɔ à ma ke ngɛ. 36Ne éngɛ â mwɔ nè Yɔsɛf gho ekla Lɛvi wɛ â be engɔ a Sayprɔs wɛ bèmpwɔnɔntɔm â ma zɔʼrɔ kpe Banabas ngɛ. Enji ene ekumu Banabas me ga kpe egho wɛ ma twàʼrà ebwa ngɛ. 37Engɔ à gɛrɛ fɛ̀n esɔmɔ mɔ nu ekɛb wɛ zeʼe ndɛ̀ʼ ebe bèmpwɔnɔntɔm.

Currently Selected:

Eleabwa 4: nbt

Highlight

Copy