Eleabwa 3

Petoro glî abuʼru gho

1À shi anji deʼ, Petoro mane Eyɔɔ ma ngɔɔ é tsàʼrà Ngwe efwɔ ndɔngwe kɛ̀. Endzobo à ne enyɔ̀m tɛd nchi. 2Enduʼnkɛmɛ wɛ a ma nyii à ngɔ̀ɔ efwɔ ndɔngwe kɛ̀ ngɛ â na zɔʼrɔ kpe enduʼnkɛmɛ wɛ à me nara nara ngɛ. Gho deʼ à ne tsɔmɔ enduʼnkɛmɛ aŋu wɛ à me buʼru nyɛ̀rɛ̀ zèʼe èndzobo chɛ â be engɔ ngɛ. Â na beʼ engɔ ngɔ̀ɔ shi enduʼnkɛmɛ enji gimkpaʼ è ma bii ekɛb ebe abɔ byɛ â ma ngɔ̀ɔ efwɔ ndɔngwe kɛ̀ ngɛ. 3Èndzobo chɛ engɔ à zɔ Petoro mane Eyɔɔ e ma nyii à ngɔɔ efwɔ ndɔngwe kɛ̀ ngɛ, engɔ bii ebe angɔ kpe e ndɛʼ ekɛb deʼ énde. 4Bɛʼngɛ angɔ nɔm aghɔɔ àmɔ̀ ene engɔ, Petoro gâ ebe engɔ kpe, “Kede angbɛɛ!” 5Éngɛ egho wɛ kede angɔ ma zhùŋù kpe e ba ngo ndɛʼ ala nkpède deʼ énde. 6Éngɛ Petoro gâ ebe engɔ kpe, “Mmɛ ke le aklibi àfɔ̀n deʼ bo, bɛʼngɛ mmɛ wa ndɛ̀ʼ ala yɛ mmɛ me le ngɛ engɛ̂. Ene ekumu Yeso Kristo gho Nazarɛd, mmɛ gâ engɛ̂ kpe tam ekere zhiri.” 7Éngɛ Petoro kpede klini abwo egho wɛ ene abwo nde mɔ, taama engɔ ekere. Elo mane enkɔnɔ elo ngɔ kwaʼ kam ekyɛ ŋwaʼ. 8Egho wɛ furu chimmi ekere tam ene elo mɔ, gɛ̀rɛ̀ klada sa zhinni. Éngɛ engɔ kiri angɔ ngɔ̀ɔ efwɔ ndɔngwe kɛ̀ ma furu à chimmi gɛ̀rɛ̀ ma zodo Ngwe. 9Abɔ byɛ â mwɔ aŋu ngɛ zɔ engɔ ma zhiri ma zodo Ngwe. 10Èndzobo chɛ angɔ à nɛɛ kpe ne egho wɛ à ma tsɔmɔ ma bii ekɛb enduʼnkɛmɛ ndɔngwe kɛ̀ ngɛ, angɔ kɔ̂n ene ebwa wɛ angɔ à zɔ ngɛ.

Petoro sɛɛrɛ ega Ngwe efwɔ ndɔngwe kɛ̀

11Aŋu egho wɛ à kɔrɔ amɔ achim Petoro mane Eyɔɔ ngɔ̀ɔ eba atim ndim yɛ â ma zɔʼrɔ kpe atim ndim Saramu ngɛ, abɔ byɛ â kɔ̂n gɛ̀rɛ̀ dɔrɔ ngɔ̀ɔ kla angɔ. 12Èndzobo chɛ Petoro à zɔ angɔ ngɛ, è ga ebe angɔ kpe, “Bwɔngwa mbu, bɔ Israel, ayɛ me le mbɔn ma di angɔn ene ebwa wunɔ? Mbɔn gɛrɛ na kede angbɛɛ ene yɛ? Mbɔn ne zhùŋù kpe mbyɛɛ ne le egho wunɔ zhiri nɔ ene ekama njɛɛ kà enga mbyɛɛ me pɛ? 13Ngwe Abraham, Ayzik mane Yakɔb, Ngwe yɛ mwɔ Ngwe ètɛ sam bɔ ngɛ, a shi ndɛʼɛ enɛŋɛrɛkɛ mɔ ebe gho afwɛʼ mɔ Yeso. Bɛʼngɛ mbɔn nu engɔ ndɛ̀ʼ ebe eto efwɔ abɛ gɛ̀rɛ̀ bɛ̀ʼrɛ̀ engɔ efàarà Paylet, ka de mwɔ aŋu Paylet à me doʼo mɔ é pwèerè engɔ ngɛ. 14Engɔ à ne pɛ gɛ̀rɛ̀ ma le abwa yɛ à me koʼro efàarà Ngwe ngɛ, bɛʼngɛ mbɔn bɛʼrɛ engɔ gɛ̀rɛ̀ gà ebe Paylet kpe zhudu engɔ é pwèerè ma àzhudu abɔ. 15Mbɔn à zhudu egho wɛ à ma ndɛʼ etyê ngɛ. Bɛʼngɛ Ngwe zhwɛɛmɛ engɔ ene ewu, éngɛ ntsɔ gɛrɛ mwɔ entsɛ ene ebwa wunɔ. 16À ne ebɛrɛtaa ene ekumu Yeso wunɔ wɛ â ndɛʼ ekama ebe abuʼru gho zɔnɔ. Ne ebɛrɛtaa ngɔ ene ekumu Yeso wɛ à le engɔ bwada aŋu mbɔn ma zɔ nɔ.” 17Bwɔngwa mbu, bɔ Israel, enjitsɔ mmɛ we nɛɛ kpe ebwa wɛ mbɔn mane eto mbɔn à fwɛʼ ebe Yeso ngɛ à ne achim atii. 18Ngwe à shi ga endzobo achim nyɛ̀rɛ̀ zèʼe achim bàmɛnɛkɔn mɔ kpe, Ǹtɔmzhwaʼa ndze wa ngo zɔ enyii. Engɔ le e gli éŋwaʼa ene aghɛʼ zɔnɔ. 19Mbɔn kobo eleabwa ndzɔn, ghɛɛbɛ ngɔɔ achim ebe Ngwe mbɔʼtye engɔ dzɛ̀d abwa bɔɔbɔɔ ndzɔn. Mala mbɔn le énde, 20shi endzobo deʼ yà zeʼe yɛ Ngwe ma ngo jùuru ńtara ntsɔn ngɛ. Engɔ wa ngo sàa Ǹtɔmzhwaʼa wɛ ma Yeso Kristo wɛ engɔ à shi chi shi endɔn ngɛ. 21Engɔ wa ngo tsɔmɔ ezob bwɛn èndzobo chɛ e ma le ela gimkpaʼ shi me ela fe, aŋu Ngwe à shi ga bli egha tsɛrɛ, nyɛ̀rɛ̀ zèʼe achim bàmɛnɛkɔn pɛ mɔ ngɛ. 22Mose à ga kpe, “Masakɛ Ngwe ndzɔn yà sàa àmɛnɛkɔn deʼ endɔn nkirinkin aŋu engɔ à saa angu nɔ, engɔ wa ngo mwɔ egho bi abwaʼ ndzɔn. Mbɔn ba zo abwa gimkpaʼ yɛ engɔ ma sa ga kpe mbɔn fwɛʼɛ ngɛ. 23Egho ne ma zhuru ebe àmɛnɛkɔn wɛ bo ngɛ, e ba ngo chi engɔ abwaʼ bɔ Ngwe gɛ̀rɛ̀ tsɔŋɔ engɔ.” 24Bàmɛnɛkɔn Ngwe gimkpaʼ, ka de mwɔ aŋu â me ghɛʼ ngɛ, e klada ene Samwɛl mane angɔ byɛ â zeʼe achim engɔ ngɛ, â shi dye gà mbɔʼ abwa zɔnɔ yɛ a ma gli efwɔ enji bɔnɔ ngɛ. 25Abwa yɛ Ngwe à tɔ̧ɔrɔ nyɛ̀rɛ̀ zèʼe achim bàmɛnɛkɔn ene egha ndzɔn mbɔn gɛrɛ mwɔ abwaʼ etsɛrɛ yɛ Ngwe à shi le nè ètɛ sam mbɔn ngɛ, aŋu engɔ à ga ebe Abraham kpe, “Enyɛrɛ zeʼe achim bwɔ ekla mbyɛ, mmɛ wa ndɛ̀ʼ m̀bɔ̀nɔ ebe bɔ gimkpaʼ efwɔ ese. 26Èndzobo chɛ Ngwe à zhwɛɛmɛ gho afwɛʼ mɔ ngɛ à dye sàa engɔ endɔn kpe engɔ ndɛʼ m̀bɔ̀nɔ endɔn é le kpe bɔ gimkpaʼ kɔmɔ akuchim amɔ ene eleabwa ǹchù.”

Currently Selected:

Eleabwa 3: nbt

Highlight

Copy