Mag 11

Yeso ya nyi inga Jèrusalèm icheg ifɔn

(Mat 21:1-11; Lug 19:28-40; Jɔn 12:12-19)

1Anyumə̀ ne Yeso tì ìmbi mə̀mə̀nənùg ya se tìnde iban Jèrusalèm, mbi ya pè a Bedfèg tì Betanì ne yaʼi ibəm iwum mə̀Olìf. Anyumə̀ ne mbi ya pè angu, Yeso ya tɔm ìmbi mə̀mə̀nənùg məbe. 2Wì ya ghà inɔb gha, “Mbə̀ ghò nyi inga asiŋi ze ne yaʼi inən imbìghè. Kwàʼ anyumə̀ ne mbə̀ nyi nyi, mbə biri bàd ŋwan jàkas ne mbi tiŋi, ne chəyi wə̀d mɔ̀ʼɔ kə kweʼì kɔʼ igun. Mbə̀ za niŋ yèʼe. 3Wə̀d mɔ̀ʼɔ mə biri inən gha, ‹Aton ne mbə zà ŋwan jàkas we àkə gha?› Mbə̀ gha gha, ‹À ya Anɔŋisəg we kə̀bə̀ jàkas gho̰.› Wì biri ywiri chà wì yèʼe kwàʼ ati ati.”

4Mbi ya ghò pè bàd ŋwan jàkas ne mbi ya tiŋə imbìghè inuʼ nəb iban inɔnjì. Anyumə̀ ne mbi yaya zà, 5bəd mbe ne ya təmi iban ya biri inɔb gha, “Mbə̀ kə anìŋ ghə̀nə? Aton ne mbə zà ŋwan jàkas we àkə gha?”

6Mbi ya ghà anug ze ne Yeso ya gha inɔb abə bəd mbe. Bəd mbe ya zug ane sàŋì gha mbe ghò tì ŋwan jàkas we. 7Mbi ya ghò tì ŋwan jàkas we pè nàʼ abə Yeso. Mbi ya nàʼ ane, zì ìtɔb ndwigun igun ŋwan jàkas we. Yeso ya kɔʼ chughi igun. 8Bəd nɔʼ nɔʼ ya zèg ìtɔb ndwi igun inɔnjì. Mə̀mbin ya nyi inga nàb, kə̀b izaŋ bə̀ ghò zèg igun inɔnjì. 9Bəd mbe ne yaya ghò imbìghè abə Yeso tì bəd mbe ne yaya beni ibo anjìm yaya kyḛ gha,

“Tì ghumnə Ŋwiye!

Ŋwiye ziye àbɔrɔ̀bɔd igun wə̀d we ne yèʼe ane ikum Anɔŋisəg!

10Ŋwiye ziye àbɔrɔ̀bɔd igun anug ìfɔ̀n àze ìwa mbaʼ Dèvid ne yèʼe.

Tì ghumnə Ŋwiye we ne yaʼi ikaŋ àbɔ̀ŋɔ!”

11Yeso ya ghò nyi inga Jèrusalèm chè ghò inga mbàn Ŋwiye. Wì ya pè nèn ighi ijìm chè kad. Si ya gha, icheg ne nyùmə̀ ya fə che ako, wì ya dù ghò a Betanì tì mə̀mə̀nənùg mbe ìghum chɔ̀b ibe.

Yeso ya zɔ̀m azed fig

(Mat 21:18-19)

12À si isu abɔ̀ʼ, Yeso tì ìmbi mə̀mə̀nənùg ya nɔ̀ʼ a Betanì se ghò a Jèrusalèm. Njèg yaya zàŋa aməd. 13Wì ya təm bàd ane agha se ne ibo azed yaya ikaŋ. Wì ya gha si zì tindi ghò iban ghò nèn gha, zi wa biri bàd fitam azed mɔ̀ʼɔ ikaŋ? Anyumə̀ ne wì ya pè aton azed ze, wì ya bàd məyi ibo azed imbə̀ʼ icheg ne nyùmə̀ we kayi nyùmə̀ ne mə̀fig yaya ko. 14Ane, Yeso ya ghà abə azed fig ze gha, “Chəyi wə̀d mɔ̀ʼɔ biri nɔ̀ʼ ywiri kud fitam ane ine!” Anyumə̀ ne wì ya ghàmi ane, mə̀mə̀nənùg məd ya zug.

Yeso ya ghò nyi inga mbàn Ŋwiye

(Mat 21:12-17; Lug 19:45-48; Jɔn 2:13-22)

15Anyumə̀ ne Yeso tì ìmbi mə̀mə̀nənùg ya ghò pè a Jèrusalèm, wì ya ghò nyi inga mbàn Ŋwiye pè ko kami bəd mbe ne yaya fèndè ighi bə̀ kàmni bəd ne yaya zòndɔ ighi. Wì ya tḭ tiŋaŋi abə bəd mbe ne yaya kɔ̀pɔ məkab bə̀ tḭ itən abə bəd mbe ne yaya fèndè mə̀bupə. 16Chəyi wì ya bḛ gha wə̀d mɔ̀ʼɔ beʼe aghi iywin mɔ̀ʼɔ chè che inga ikam mbàn Ŋwiye. 17Wì ya chwìti inug inɔb gha, “À wa kə chəyi mbi ŋwàʼri gha, ‹Mbi biri se kàrì àmə nəb ane nəb ne iben ijìm mbe chàʼrà Ŋwiye inga?› Mbə fə bə̀ŋì yaʼ ane asiŋi ne məji mbe nə̀mbə̀ inga.”

18Itog bəd mbàn Ŋwiye tì mə̀chwitì mə̀nɔ̀ʼɔ̀ ya zug anug ne wì ya gha. Ane, mbi yaya se kə̀bə̀ inɔnjì ne zweti aməd. Si ya gha, mbi yaya bɔ aməd imbə̀ʼ icheg ne inɔ̰ bəd we ijìm yaya yeti inug mbe ne wì yaya chwìte.

19À yaya si ikwikwiri, Yeso tì ìmbi mə̀mə̀nənùg ya dù a Jèrusalèm ghò awɔb.

Anug ni nani ane azed fig ze

(Mat 21:20-22)

20À yaya isusu we ne beni abɔ̀ʼ, anyumə̀ ne Yeso tì ìmbi mə̀mə̀nənùg yaya chè, mbɔb ya bàd azed fig ze. Ze ya fə ku ghò pè ane ighaŋ. 21Pità ya bàd ane, kɔ̀ndi anug ze ne Yeso ya gha, si ghà abə Yeso gha, “Masà, nḛ! Azed fig ze ne àghò kə̀ zɔ̀mi, ze fə ku!”

22Yeso ya ywìtì inɔb gha, “Mbə̀ nɔŋi ìwən ibḛfiŋ igun Ŋwiye. 23Mə gha tesiʼ inən gha, wə̀d we tì wì ghà abə iwum gho̰ gha, ‹Chɔʼɔ, ghò fen inga igyi tìbà›. Wì biri bə chɔʼɔ kwàʼ icheg ne wì ghàmi. Anug ne angu ya gha imbə̀ʼ tengàŋ jə̀mə̀ yi inga ìzi fìŋ. Wì bḛ inga fìŋ gha anug ze ne zìye gha biri dù kwàʼ icheg. 24Ane, mə ghà inən gha, inug ijìm mbe ne mbə̰ mbe chàʼrà Ŋwiye nɔ̰ ibo, mbə̀ bḛ inga fìŋ gha mbə fə bèrì. Mbə̰ mə̀ bḛ ane, ighi mbe biri yaʼ ìmbən. 25Anyumə̀ ne mbə̀ təmi ni chàʼra Ŋwiye, mbə̀ waʼ inug mbe ne ìmbən məfi fɔrɔ ìtən njàbi gughi inən, ni gha ìwən Mbaʼ we ne yaʼi ikaŋ àbɔ̀ŋɔ bə waʼ ìmbən tì inug tibɔ̀ŋ.” 26[Mbə̰ mə̀ to̰ awən ni waʼ inug tibɔ̀ŋ bəd ndəŋ, nji chəyi ìwən Mbaʼ we ne yaʼi ikaŋ àbɔ̀ŋɔ biri bə waʼ ìmbən tì inug tibɔ̀ŋ.]

Ibiri imbə̀ʼ wə̀d we nḛ nàʼà ika abə Yeso

(Mat 21:23-27; Lug 20:1-8)

27Yeso tì ìmbi mə̀mə̀nənùg ya ywìrì bə̀ndì ghò a Jèrusalèm. Anyumə̀ ne wì yaya yḛ̀ inga mbàn Ŋwiye, itog bəd mbàn Ŋwiye tì mə̀chwitì mə̀nɔ̀ʼɔ̀ fɔrɔ bəd kyen mbe inga aben ya ghò kɔ̀ti aməd. 28Mbi ya pè biri ibo gha, “Àghò kə̀ nìŋi ika we ne àghò ya ghìyə̀ inug mbo̰ ayeg? Àkə we nàʼà ika gho̰ ine?”

29Yeso ya ghà inɔb gha, “Mə biri bə biri anug mɔ̀ʼɔ inən. Mbə̰ mə̀ ywìtì inum, mə biri bə si mə̀tì asiŋi ne ìmə ika ni ghì inug mbo̰ nɔʼ angu. 30Àkə Ŋwiye ya nàʼi ika abə Jɔn gha wì nàʼ mənib kə̀ àkə bəd? Mbə̀ ywiti inum.”

31Mbɔb ya ko tàŋ mbɔb mbɔb gha, “Tì mə gha, ‹À ya Ŋwiye›, wì biri biri ina gha, ‹Aton ne chəyi mbə̀ ya si bḛ aməd kə gha?› 32Tì mə bə̀ gha, ‹À ya bəd…›” (Mbɔb yaya bɔ bəd mbe imbə̀ʼ icheg ne bəd məjìm yaya bḛ gha Jɔn ya kwàʼ wə̀dkə̀n Ŋwiye tesiʼ.) 33Ane mbi ya ywìtì abə Yeso gha, “Chəyi tì kyeri.”

Yeso ya bə̀ ghà inɔb gha, “Chəyi mə̀ biri bə gha wə̀d ne nàʼi ika inum ni ghì inug mbo̰.”

Currently Selected:

Mag 11: MBTP

Highlight

Copy