Lug 7
7
Yeso ghù wə̀d àfàʼì abə atog wə̀d mə̀sogyì iki
(Mat 8:5-13)
1Anyumə̀ ne Yeso ya màni ni ghàm abə bəd mbe ne yaya zùghə, wì ya ghò à Kàpenàwum. 2Wə̀d mɔ̀ʼɔ ya yaʼ a Kàpenàwum ne ya atog wə̀d igun mə̀sogyì iki. Wə̀d àfàʼì məd yaya ghɔ̰̀ fə se nḛ̀ ni ku. Wə̀d kyen gho̰ ya taŋ kɔ̀ŋ wə̀d àfàʼì məd we. 3Anyumə̀ ne atog wə̀d igun mə̀sogyì iki gho̰ ya zughi inug imbə̀ʼ Yeso, wì ya tɔm itog bəd mɔ̀ʼɔ ne ya yaʼi mə̀Ju, gha mbe gho boʼ ibo abə Yeso gha wì yeʼe ghù wə̀d àfàʼì məd. 4Anyumə̀ ne itog bəd mbe ya pe, mbi ya boʼ ibo abə Yeso tì fìŋ ijìm, gha, “À ya wə̀d ne àghò kòʼi ni wètì aməd 5imbə̀ʼ icheg ne məd kɔ̀ŋ ìmba bəd. À ya məd kɔri ìwa ichamì Ŋwiye.”
6Ane, Yeso ya nɔ̀ʼ ko ghò tì inɔb. Anyumə̀ ne mbɔb ya gho se pè, atog wə̀d abə mə̀sogyì iki we ya chà mə̀sə̀ʼ məd gha mbe gho ghà abə Yeso gha, “Anɔŋisəg, imbə̀ʼ àghò nwìʼe awe ìwe nyɔd. Chəyi mə̀ koʼi ni gha àghò yeʼe inum achan. 7Chəyi mə̀ bə kòʼ ni yeʼe ine imbìghè mo mo. Àghò ghama məyi ìngam, àmə wə̀d àfàʼì biri bɔti. 8Mo inum we aton mə̀sogyì kyen. Mə bə̀ bèrì mə̀sogyì kwa kwa aton inum. Mə mə̀ ghà abə sogyì mɔ̀ʼɔ gha, ‹Ndò,› wì ya ghò. Mə mə̀ bə̀ ghà abə ìwi ndəŋ gha, ‹Yeʼe,› wì ya yèʼe. Mə mə̀ ghà abə ìmə wə̀d àfàʼì gha ‹Ghiyə anìŋ,› wì bə ghì ane.”
9Anyumə̀ ne Yeso ya zughi inug mbo̰, anug ya chè aməd. Wì ya si ghàbri ghà abə inɔ̰ bəd ne yaya yḛ̀ abɔ̀ʼ məd gha, “Mə̀ gha inən, chəyi mə̀ kə bàri wə̀d ne beri iku ibḛfiŋ gho̰, ka bèyi inga Izre.”
10Anyumə̀ ne bədtɔm mbe ya bə̀ndi ghò pè inga achan mbi ya bàd gha wə̀d àfàʼì we fə bɔti.
Yeso zwemni ŋwan abə iku-àyi mɔ̀ʼɔ
11Chəyi agha ya sa, Yeso ya nɔ̀ʼ ghò a asiŋi mɔ̀ʼɔ ne mbe kàrà ane Nayìn. Mə̀mə̀nənùg məd fɔrɔ inɔ̰ bəd ne ya faŋi ya ghò abɔ̀ʼ məd. 12Kwàʼ icheg ne wì yaya se nyḭ̀yḛ ichug ikam inga aben ze, wì ya bɔ̀mbì tì inɔ̰ bəd ne ya bèʼi awu wə̀d ghi dù. Awu wə̀d ze ya yaʼ ŋwan mbaŋà abə iku-àyi mɔ̀ʼɔ ne ya yaʼi məyi məd imɔʼ abə ngɔb məd. Inɔ̰ bəd inga aben ze yaya yḛ̀ abɔ̀ʼ awu wə̀d ze tì ngɔb məd. 13Anyumə̀ ne Anɔŋisəg ya bàri àyi we, wì ya bèrì àsɔ̀mnəfiŋ igun məd. Wì ya ghà ibo gha, “Imbə̀ʼ àghò dèghe awe.” 14Anyumə̀ ne wì ya ghàmi ane, wì ghàbri ghò bètì tìkub. Bəd ne ya bèʼi tìkub awu wə̀d ze ya təm nyeʼ. Yeso ghà abə awu wə̀d ze gha, “Ajɔŋ! Nɔ̀ʼɔ!” 15Awu wə̀d ze ya nɔ̀ʼ chùghi ko gu ghàm. Yeso ya si ghà abə ngɔb məd gha, “Niŋ ìwe ŋwan.”
16Anug ya chè bəd məjìm mbe ne ya yaʼi angu, mbi bɔ se ghùmnə Ŋwiye gha, “Wə̀dkə̀n Ŋwiye dù abɔ̀ʼ ina. Ŋwiye fə yeʼe ni wètì ìmbi bəd.”
17Bəd ya ghò nè chètè ikən gho̰ imbə̀ʼ Yeso inga Jùdeyà ijìm fɔrɔ inga iben mbe ne yaʼi iban iban.
Jɔn we ne nàʼà mənib tɔm ìmbi mə̀mə̀nənùg abə Yeso
(Mat 11:2-19)
18Mə̀mə̀nənùg ìmbi Jɔn we ne yaya nàʼà mənib ya mə̀tì inug mbo̰ ijìm ne Yeso we fàʼà ibo. 19Wì ya kàrì ìmbi mə̀mə̀nənùg məbe tɔm awɔb abə Anɔŋisəg Yeso, gha mbe ghò bìri ibo gha, “Àghò kə wə̀d we ne te ghɔ̀mɔ̀ gha məd we yèʼe, kə̀ te ghɔmɔ wə̀d ndəŋ?”
20Anyumə̀ ne bəd mbe ya pe abɔ̀ʼ Yeso, mbi ya ghà ibo gha, “Jɔn ne nàʼà mənib tɔm awa gha tè yeʼe bìri ine gha, ‹Àghò kə wə̀d we ne te ghɔ̀mɔ̀ gha məd we yèʼe, kə̀ tè ghɔmɔ wə̀d ndəŋ?›”
21Kwàʼ anyumə̀ we, Yeso ya ghù bəd ndan ndàn ne ghɔ̰̀ tiku ighɔn nɔʼ nɔʼ bə̀ chì izwighi tibɔ̀ŋ inga bəd mbe ne izwighi tibɔ̀ŋ ya yaʼi inga inɔb. Wì ya bə̀ fìʼì aghə abə məfəg. 22Yeso ya ywìtì inɔb gha, “Mbə̀ gho ghà inug mbe ne mbə̀ bari fɔrɔ inug mbe ne mbə̀ zughi abə Jɔn. Məfəg mbe se bàrà isiŋi. Bəd ne ighog sweʼe mbe se yḛ̀ icheg chɔm. Bəd mbe ne ghɔ̰̀ àwàrikə̀m mbe se zḛ. Bəd ne koro mbe se zùghə inug. Bəd ne ku mbe bə̀ zwème ane iwu. Bəd mbe chètì ikən chɔm abə bəd ne chəyi àzɔb. 23Ane, Ŋwiye zì àbɔrɔ̀bɔd igun wə̀d ne chəyi we jə̀mə̀ amə.”
24Anyumə̀ ne bəd ne Jɔn ya tɔmi ya fə bə̀ndì ghò awɔb, Yeso ya ko ni ghà inug imbə̀ʼ Jɔn abə inɔ̰ bəd we. Wì ya biri inɔb gha, “Aghi ne mbə̀ ya gho inga tibad zɔbi ni nèn àkə aghə? Àkə abo agyen ne ifə ya tìnde? 25Àmə kayi ane, mbə̀ ya si ghò ni nèn aghə? Wə̀d ne zì ndwi njəngi njəngi? Indèʼ, Bəd ne zìyè ndwi njəngi njəngi bə̀ bèrì ighi àka inun ya chùghə inga ìtɔʼ. 26Aghi ze ne mbə̀ ya jiʼì ghò ni nèn àkə aghə? Àkə wə̀dkə̀n Ŋwiye? E! Mbə̀ ya bàd wə̀d ne che wə̀dkə̀n Ŋwiye. 27Jɔn ya wə̀d we ne mbi ya ŋwàʼri imbə̀ʼ aməd gha,
‹Mə biri cha ìmə wə̀dkə̀n ine imbìghè.
Wì biri tangi ìwe inɔnjì.›
28Mə ghà inən gha, Jɔn we ne yaya nàʼà mənib bèrì ati chè bəd mbe ne mbi gwi igun isəg aŋa məjìm. Si ya gha, wə̀d we ne kə chè bəd məjìm inga anug ìfɔ̀n Ŋwiye, tengàŋ bèrì ati chè Jɔn.”
29Wə̀d ijìm fɔrɔ bədtag ne ya zughi inug mbo̰ ya bḛ gha Ŋwiye we ghìyə̀ inug ne koʼi. Mbɔb məjìm ya bḛ imbə̀ʼ icheg ne mbɔb ya fə niŋ mənib abə Jɔn. 30Si ya gha, mə̀Farìsi fɔrɔ mə̀chwitì mə̀nɔ̀ʼɔ̀ ya ton inug mbe ne Ŋwiye chùʼri nɔ̀ŋì inɔb. Aton ya gha mbɔb ya to̰ awɔb ni niŋ mənib abə Jɔn.
31Yeso ya chè imbìghè ni gha, “Iwaŋ bəd gho̰ kə anìŋ iye? Mbi kə anìŋ, mə mə̀grì ane aghə?” 32Mbi ya icheg bɔn ne chughi a sàmi iywin se kàrà mə̀mbin gha,
“Tè kə fə abin inam inən, chəyi mbə̀ nɔʼi bin. Tè bə̀ zə̀ʼ ikyeg iwu inən, chəyi mbə̀ deghi. 33Jɔn we ne nàʼà mənib ya yeʼe, chəyi wì yaya jə̀ghə ngə̀ŋ, kə̀ no mənoʼ. Mbə̀ gha azwighi tibɔ̀ŋ ze inga məd. 34Ŋwan Wə̀d bə̀ yèʼe. Wì ya jə̀ghə bə̀ no. Mbə̀ gha, ‹Mbə̀ nḛ! À ya wə̀d àfaŋi ìfə. À ya atəd mənoʼ. Məd ya ìsə̀ʼ abə bədtag fɔrɔ bəd inug tibɔ̀ŋ.› 35Si ya gha, à ya bəd mbe ne bḛ inug mbe ne Ŋwiye we ghìyə̀ ne chwìye gha iwe Ŋwiye kòʼ.”
Yeso ghò inga achan Sayimùn
36Farìsi mɔ̀ʼɔ ya kàʼa Yeso gha wè yeʼe jəg ini inga nəb. Yeso ya ghò pè chùghi aseg ni jəg. 37Àyi mɔ̀ʼɔ inga aben ze ne yaya ghìyə̀ inug tibɔ̀ŋ ya zug gha Yeso we inga nəb abə Farìsi we, jə̀ghə. Wì ya ghò angu tì məwud àka inun inga chəŋ àlàbastà. 38Wì ya pè təm anjìm abə Yeso gùndi ibo iban aghog se dèghè. Məsi mbe ne yaya dùwə̀ ibo inga aghə ya sò ighog abə Yeso, wì se fùghə ane ìti nyɔ̀ŋì atog. Wì ya gundi nyɔŋ ighog ìmbi Yeso, bə̀ tù məwud àka inun mbe igun ighog ìmbi Yeso. 39Anyumə̀ ne Farìsi we ne ya kàʼi Yeso ya bàri àfàʼì ne àyi we fàʼi, wì ya ghàm ibo inga fìŋ gha, “Wə̀d gho̰ kə kwàʼ wə̀dkə̀n Ŋwiye nji wè kyèri iku wə̀d ne àyi gho̰ ne bètè aməd yaʼi ìwiwən. Nji wè kyèri gha à ya kwàʼ àyi inug tibɔ̀ŋ.”
40Yeso ya ywìtì ibo gha, “Sayimùn, mə bèrì anug mɔ̀ʼɔ ne mə̀tì ine.”
Sayimùn ya ywìtì gha, “E! Masà, mo gho̰, mə̀tə.”
41Yeso ya chè imbìghè ghà ibo gha, “Bəd məbe ya nyimi njo abə wə̀d mɔ̀ʼɔ ne chɔ̀ʼrɔ məkab abə bəd. Wə̀d ifibì ya nyimi chuʼ iki, ìywin nyimi chuʼ ìghum. 42Chəyi wə̀d mɔ̀ʼɔ abɔ̀ʼ bəd mbe məbe ya beri ikab ni tu njo ze. Ane, wə̀d we ya ghà inɔb gha, ‹Mə sàŋì njo te angu.› Ane, abɔ̀ʼ bəd mbo̰ məbe, wə̀d ne biri taŋ kɔ̀ŋ wə̀d we ne chɔ̀ʼrɔ məkab àkə we?” 43Sayimùn ya ywìtì gha, “Mə kɔ̀ndi gha, à ya wə̀d ne njo məd ya taŋ nɔ̀ʼ.”
Yeso ya ywìtì ibo gha, “Àghò gha tesiʼ.” 44Ane, Yeso ya si ghàbri ghà abə Sayimùn gha, “Àghò bàd àyi gho̰? Mə kə nyi ine inga nəb chəyi àghò nàʼi mənib gha mə so ighog. Àsi àyi gho̰, wè sò ìmbum ighog ane ìmbi məsi bə̀ fug ane ìti nyɔ̀ŋì atog. 45Nɔ̀ʼ abu ne mə nyi ine inga nəb, chəyi àghò nyɔ̀ŋì ìmə ndə̀ʼ, à ya àyi gho̰ ne chəyi wì bɔ̀ri ni gundi aseg nyɔŋi ìmbum ighog. 46Chəyi àghò zɔ̀ʼi məwud inum igun atog. À ya àyi gho̰ zɔʼi ìmbum ighog ane məwud àka inun. 47Ane, àghò kyeri gha àkɔ̀ŋì azo̰ ne məd chwi anìŋ fə ghì gha mə̀ waʼ inug tibɔ̀ŋ məd ijìm. Wə̀d ne mbi waʼi inug tibɔ̀ŋ məd məyi iki piʼì, ya bə̀ chwìye àkɔ̀ŋì məyi iki piʼì.”
48Yeso ya si ghà abə àyi we gha, “Mə waʼ ìmbe inug tibɔ̀ŋ ijìm.”
49Mbin tì bəd ne ya yaʼi inga nəb angu ya ko se bìre mbɔb mbɔb gha, “Wə̀d gho̰ kə we ne wàʼa inug tibɔ̀ŋ bəd?”
50Yeso ya chè imbìghè ghà abə àyi we gha, “Ìwe ibḛfiŋ fə pumni awe. Si ghò ane àbɔrɔ̀bɔd.”
Currently Selected:
Lug 7: MBTP
Highlight
Share
Copy
Want to have your highlights saved across all your devices? Sign up or sign in
© 2019 CABTAL
