Lug 4

Sàtàn kwàʼrì Yeso

(Mat 4:1-11; Mag 1:12-13)

1Yeso ya bə̀ndì igyi Jodàn tì Azwighi Ŋwiye inga məd iswighi. Azwighi Ŋwiye ya niŋ aməd ghò inga ibad zɔbi. 2Debrə̀ ya kwàʼrì aməd ane ineg ìghum ikwè inga ibad zɔbi we. Njèg yaya zàŋa məd imbə̀ʼ icheg ne wì ya chughi ane ineg ìghum ikwè chəyi wì jə̀ghi.

3Debrə̀ ya ghà ibo gha, “Àghò mə yaʼ Ŋwan Ŋwiye, ghàma abə iteg gho̰ we bəŋə ane ngə̀ŋ.”

4Yeso ya ywìtì ibo gha, “Àŋwàʼrì Ŋwiye gha, ‹Chəyi wə̀d ya chùghə izɔm igun isəg aŋa məyi imbə̀ʼ ngə̀ŋ.›”

5Debrə̀ ya niŋ aməd kɔʼ ghò ikaŋ iwum ne sa ikaŋ, niŋ məyi iki nyumə̀ ni chwi iben ijìm mbe igun isəg ibo. 6Si ghà ibo gha, “Mə biri nàʼ ika ni tùmbì iben mbo̰ ijìm fɔrɔ ni gha àghò jəg ighi chɔm chɔm mbe ne yaʼi inga ijìm. Mbi ya nàʼ ighi mbo̰ ijìm inum. Mə bèrì ika ni nàʼ abə wə̀d ne mə̀ kɔŋi. 7Àghò mə gùndi aseg ghùmni amə, ighi mbo̰ ijìm biri yaʼ ìmbe.”

8Yeso ya ywìtì ibo gha, “Àŋwàʼrì Ŋwiye ghà gha,

‹Ghumni məyi Anɔŋisəg ìwe Ŋwiye

bə̀ fàʼ məyi ibo.›”

9Debrə̀ ya ywìrì niŋ aməd ghò a Jèrusalèm pè kɔʼ ghò igun idɔm mbàn Ŋwiye, ghà ibo gha, “Àghò mə yaʼ Ŋwan Ŋwiye, təm aŋa nəg aseg, 10imbə̀ʼ icheg ne Àŋwàʼrì Ŋwiye gha,

‹Wì biri ghà abə ìmbi mbè angirə̀ gha mbe kyeʼre awe.›

11Mbi biri che awe ane ìmbɔb ibo ne chəyi àghò biri kṵ ìfeg ane iteg ka.”

12Yeso ya ywìrì ywìtì gha, “A ze inga Àŋwàʼrì Ŋwiye gha, ‹Imbə̀ʼ àghò kwàʼra awe Anɔŋisəg ìwe Ŋwiye.›” 13Anyumə̀ ne Debrə̀ ya màni ni kwàʼrì Yeso, wì ya kye se ghɔ̀mɔ̀ ighəm ndəŋ.

Yeso ko àzi àfàʼì a Galìli

(Mat 4:12-17; Mag 1:14-15)

14Azwighi Ŋwiye ya nàʼ ika abə Yeso wì bə̀ndì ghò a Galìli. Bəd ya zug inug imbə̀ʼ aməd inga aba aben ze ajìm. 15Wì ya chwiti Ìngam Ŋwiye inɔb inga məchamì Ŋwiye. Bəd məjìm ya se ghùmnə aməd.

Bəd ya to̰ Yeso a Nazarèd

(Mat 13:53-58; Mag 6:1-6)

16Yeso ya ghò a Nazarèd, asiŋi ne wì ya kweghi angu. Igun aneg àzwètì mə̀Ju, wì gho inga ichamì Ŋwiye icheg ne wì yaya nḛ ghò. Wì ya pè təm titighe ni fɔŋ Ìngam Ŋwiye. 17Mbi ya nàʼ àŋwàʼrì Wə̀dkə̀n Ŋwiye Àzayà abə Yeso. Àŋwàʼrì ze ya mbi kari kari. Wì ya zàrì àŋwàʼrì ze bàd asiŋi ne mbi ŋwàʼri inga gha:

18“Azwighi Ŋwiye ze igun inum.

Anɔŋisəg fə zɔʼ amə gha mə gha ikən chɔm abə bəd ne chəyi àzɔb,

bə̀ chà amə ni ghò chètì abə bəd ne yaʼi inga ndəŋ gha Ŋwiye biri chì awɔb a ndəŋ sàŋì,

fɔrɔ ni gha məfeg bàd isiŋi,

fɔrɔ ni gha bəd mbe ne mə̀mbin mbe nyə̀mə̀ awɔb mbe pum,

19bə̀ ghà abə bəd gha nyùmə̀ kòʼ

ne Anɔŋisəg biri chwi àzi àsɔ̀mnəfiŋ abə bəd.”

20Anyumə̀ ne wì ya màni ni fɔŋ asiŋi àŋwàʼrì ze, wì ya ywìrì kad nàʼ abə wə̀d àfàʼì inga ichamì Ŋwiye, si ghò chùghə yi aseg. Wə̀d ijìm ne ya yaʼi inga ichamì we yaya se nḛ̀ məd nḛ. 21Wì ya ko se ghà inɔb gha, “Ìngam Ŋwiye gho̰ fə dù ane tesiʼ tèchɔ̀ŋ, mbə̰ zug.”

22Anug ya chè wə̀d ijìm ne ya zughi ìngam àbɔrɔ̀bɔd ne Yeso yaya ghàmà. Mbi yaya se ghàmà inug chɔm imbə̀ʼ aməd bə̀ se bìre gha, “Àkə kayi ŋwan Jòseb gho̰?” 23Wì ya ghà inɔb gha, “Mə kyèri gha mbə biri màʼ ìngam gho̰ inum gha, ‹Dɔgtà, ghù ìwe nyɔd. Àghò faʼa iyeti inug aŋa ine inga aben icheg mbe ne tì zughi gha àghò fàʼ a Kàpenàwum.›” 24Yeso ya ywìrì ghà inɔb gha, “Mə gha tesiʼ inən gha, chəyi bəd mbe bḛ wə̀dkə̀n Ŋwiye inga aben məd. 25Mə ghà kwàʼ tesiʼ inən gha, məku àyi ya nɔʼ inga Izre inga nyùmə̀ we abə Èlayijà ne Ŋwiye ya wùbi ikaŋ àbɔ̀ŋɔ. Chəyi mbə̀ŋ ya no ane tituʼ titad tì aba. Ane, njèg ya nyi inga aben bəd Izre ajìm. 26Ane, Ŋwiye ya cha Èlayijà məyi abə àyi imɔʼ ne ya yaʼi iku-àyi inga Zarafàd inga aba aben ze a Sidòn. 27Bəd àwàrikə̀m ya nɔ̀ʼ inga aben mə̀Izre inga nyùmə̀ we abə Èlisà wə̀dkə̀n Ŋwiye. Chəyi Ŋwiye ya ghu ìwi mɔ̀ʼɔ. Wì ya cha Èlisà məyi abə Namàn, wə̀d inga aben məSiriyà.” 28Anyumə̀ ne bəd məjìm ne ya yaʼi inga ichamì Ŋwiye we ya zughi inug mbo̰, agaŋ ya sweg inɔb inga fìŋ. 29Mbɔb ya gàd nɔ̀ʼ aseg kàmni aməd inga ichamì Ŋwiye fɔrɔ inga aben, niŋ aməd ghò atog kəŋ, ane ndò aben, kə̀b ni tḭ aməd gha wè fen. 30Məd ya nyeʼè chè yi inɔb inga ìsàn bə̀ ghò yi.

Yeso chì azwighi tibɔ̀ŋ inga mbaŋà mɔ̀ʼɔ

(Mag 1:21-28)

31Yeso ya swiʼi ghò a Kàpenàwum ne yaʼi inga aba aben Galìli. Wì ya pè chwiti inug inɔb igun aneg àzwètì mə̀Ju. 32Anug ya chè bəd məjìm ne ya zughi inug mbe ne wì yaya ghàmà imbə̀ʼ icheg ne ìngam məd ya bèrì ika.

33Mbaŋà mɔ̀ʼɔ ne azwighi tibɔ̀ŋ ya yaʼi inga məd ya yaʼ inga ichamì Ŋwiye we. Wì ya kyen ane gì ka ka gha, 34“Eyì! Yeso a Nazarèd; Aghi ne àghò bèrì ni ghì tì ina àkə aghə? Mə kyèri wə̀d ne àghò yaʼi ìwiwən. Imbə̀ʼ àghò yèʼe anìŋ ni nimni awa? Àghò ya Wə̀dtɔm Ŋwiye ne zḛ.”

35Yeso ya kyen azwighi tibɔ̀ŋ ze gha, “Chim tizi! Che dù inga məd!” Azwighi tibɔ̀ŋ ze ya ŋam wə̀d we tum aseg, si dù yi inga məd witì zì anə igun məd.

36Anug ya chè wə̀d ijìm inga ichamì Ŋwiye we. Mbɔb mbe ne ya yaʼi angu ya kwì ìsaʼ, se ghàmà mbɔb mbɔb gha, “Àkə iku ìngam weg gho̰ ne beri ika anìŋ? Wì ya ghàmà izwighi tibɔ̀ŋ ne yaʼi inga bəd chè dùwə̀.” 37Mbi yaya se yḛ̀ nè mə̀tə̀ inug mbo̰ imbə̀ʼ Yeso inga iben ijìm mbe ne ya yaʼi iban iban.

Yeso ghù bəd ndan ndàn

(Mat 8:14-17; Mag 1:29-34)

38Yeso ya dù inga ichamì Ŋwiye we, ghò inga nəb Sayimùn, àmə̀nənùg Yeso. Tichaʼ nyɔd ka ka ya yaʼ igun inyɔ ìwi Sayimùn. Mbi ya boʼ ibo abə Yeso gha wì wete aməd. 39Yeso ya ghò təm iban məd, kyen tìchaʼ nyɔd ze. Àyi we bɔ̀ti kwàʼ ati, nɔ̀ʼ kə̀b ighijəg nàʼ inɔb.

40Ane achwi ya fḛ, mbi ya niŋ bəd məjìm ne ya beri ighɔn aku aku, ghò abə Yeso. Wì nɔ̀ŋì ibo igun inɔb ghù awɔb. 41Izwighi tibɔ̀ŋ ya dù inga bəd nɔʼ nɔʼ se kyen gha, “Àghò ya Ŋwan Ŋwiye!” Wì ya kyen awɔb. Chəyi wì ya nàʼ apan inɔb ni ghàm imbə̀ʼ icheg ne mbɔb ya kyeri gha məd ya Wə̀d we ne Ŋwiye zɔ̀ʼi.

Yeso ghàm Ìngam Ŋwiye inga məchamì Ŋwiye

(Mag 1:21-28)

42Anyumə̀ ne ituʼ ya se chə̀ghə, Yeso ya nɔ̀ʼ ghò a asiŋi ne chəyi wə̀d angu. Bəd yaya kə̀bə̀ aməd. Anyumə̀ ne mbi ya bàri aməd, mbi ya ghò kɔ̀ti aməd. Chəyi mbi ya ywìrì kə̀b ni sàŋì aməd gha wì gho. 43Məd ya ghà inɔb gha, “Mə mənyìʼ ghàm ikən chɔm imbə̀ʼ anug ìfɔ̀n Ŋwiye abə iben ndəŋ imbə̀ʼ icheg ne, aŋa ya àfàʼì ne mə yeʼe igun.”

44Ane, wì yaya yḛ̀ nè ghàmà Ìngam Ŋwiye inga məchamì Ŋwiye mbe a Jùdeyà.

Currently Selected:

Lug 4: MBTP

Highlight

Copy