Jɔn 17

Yeso chàʼra Ŋwiye

1Anyumə̀ ne Yeso ya màni ni ghà inug mbo̰, wì ya nɔ̀rì atog ikaŋ chàʼra Ŋwiye gha:

“Ìmə Mbaʼ, nyùmə̀ fə kòʼ, ghumni ìwe Ŋwan imbə̀ʼ ìwe Ŋwan bə si ghùmni awe. 2Àghò fə nàʼ ika ibo igun bəd məjìm ni ghì gha wì nàʼ ìtḛ̀ ighə̀m imɔʼ abə bəd məjìm mbe ne àghò nàʼi ibo. 3Ane, ni jəg ìtḛ̀ ighə̀m imɔʼ ya ni kyeri awe, bə̀ kyèri gha à ya məyi àghò imɔʼ yaʼi Ŋwiye tesiʼ. Ni jəg ìtḛ̀ ighə̀m imɔʼ ya ni bə kyeri Yeso Kristo we ne àghò cha igun isəg. 4Mə fə ghì bəd ghumni awe igun isəg anjìm icheg ne mə mani àfàʼì ze ne àghò ya nàʼi inum gha mə faʼa. 5Ìmə Mbaʼ, ghìyə mə beri ighumni we ne tì ya fɔrɔ bèrì bɔŋ àghò ya se tànga isəg.”

Yeso chàʼra Ŋwiye abə ìmbi mə̀mə̀nənùg

6Yeso ya bə̀ chè imbìghè ni ghà abə Ŋwiye gha, “Bəd mbe ne àghò ya chi inga isəg nàʼ inum, mə fə ghì mbi kyeri awe. À ya ìmbe bəd ne àghò ya nàʼi awɔb inum. Mbɔb fə bə̀ zùgri ìwe ìngam. 7Mbɔb fə kyeri amad anìŋ gha, ighi ijìm ne mə beri, à ya àghò nàʼi inum. 8Mbɔb fə bḛ ìngam we ne àghò ya nàʼi inum gha mə gha inɔb. Mbɔb fə bə̀ bḛ gha, à ya àghò cha amə. 9Mə ya dèghè inug mbo̰ ine anìŋ, imbə̀ʼ bəd mbe ne àghò nàʼi inum ne yaʼi ìmbe bəd. Kayi imbə̀ʼ bəd məjìm igun isəg. 10Bəd məjìm mbe ne yaʼi ìmbe ya bə̀ ìmbum. Bəd məjìm mbe ne bə yaʼ ìmbum ya bə̀ ìmbe. Bəd ya ghùmnə amə imbə̀ʼ awɔb. 11Chəyi mə̀ biri ywiri chughi igun isəg tì inɔb. Mə ya anìŋ se yèʼe amə abɔ̀ʼ ine. Ane, mbɔb biri kiri yaʼ igun isəg. Ìmə Mbaʼ zḛ zḛ, àghò kyeʼre awɔb ane ika we ne yaʼi ane ìwe ikum, ne ya ikum we ne àghò ya nàʼi inum. Ghìyə ane imbə̀ʼ mbi yaʼi ane anug amɔʼ icheg ne mo tì ine bə yaʼ ane anug amɔʼ. 12Anyumə̀ ne mə̀ ya yaʼi tì inɔb, mə yaya kyèʼrè awɔb bə̀ kə̀ndə awɔb ane ika we ne yaʼi ane ikum, ikum we ne àghò nàʼi inum. Chəyi wə̀d mɔ̀ʼɔ imɔʼ abɔ̀ʼ inɔb ne nimi. À ya məyi wə̀d we ne ze ya fə chwi gha wì biri nim, ni ghì ghà anug ne yaʼi inga Àŋwàʼrì Ŋwiye ze duwə ane tesiʼ.”

13Wì ya ywìrì gha, “Amad anìŋ, mə̀ ya anìŋ se yèʼe amə abɔ̀ʼ ine. Ane, mə̀ ya ghà inug mbo̰ ne mə̀ kiri yaʼi inga isəg, ni ghì gha mbɔb ya taŋ gyènde icheg inum. 14Mə fə ghàm ìwe ìngam inɔb. Bəd inga isəg ya se bà̰ awɔb imbə̀ʼ icheg ne mbɔb kayi bəd inga isəg gho̰, bə̀ icheg ne, mo inum kayi bə wə̀d inga isəg gho̰. 15Chəyi mə̀ ghà gha, àghò chiye awɔb inga isəg gho̰. Mə ya ghà yaʼ gha, àghò chə̀ʼə awɔb abə Wə̀d Tibɔ̀ŋ. 16Mbɔb kayi bəd igun isəg gho̰ bə̀ icheg ne chəyi mo inum bə yaʼ wə̀d igun isəg. 17Àghò ghìyə mbɔb zen anjìm tesiʼ. Ìwe ìngam ya ghìyə̀ bəd kyere tesiʼ. 18Mə fə chà awɔb inga isəg icheg ne àghò ya bə chà amə inga isəg. 19Mə ya zì àmə atog ane àze àfàʼì ni ghì gha mbɔb inɔb bə taŋ zì àzɔb tì atog ane àze àfàʼì.”

Yeso chàʼra Ŋwiye abə bəd məjìm ne bḛ aməd

20Wì ya chè imbìghè ni gha, “Mə ya dèghè inug mbo̰ ine anìŋ, kayi məyi imbə̀ʼ ìmbum mə̀mə̀nənùg mbo̰, à ya fɔrɔ imbə̀ʼ bəd mbe ne biri bḛ ikən gho̰ ne mbɔb mbe chètè. 21Mə ya dèghè gha mbɔb məjìm yaʼ ane anug amɔʼ, kwàʼ icheg ne àghò ìmə Mbaʼ, àghò yaʼi inga inum, mo inum bə̀ yaʼ inga ine. Mbɔb inɔb bə̀ yaʼ inga ina imbə̀ʼ bəd igun isəg bḛ gha, à ya àghò cha amə. 22Ighumni we ne àghò ya ghi mə bèrì, mə bə̀ ghì mbɔb bèrì ìwiwən ni ghì ghà mbɔb yaʼi ane anug amɔʼ icheg ne mo tì ine bə yaʼ ane anug amɔʼ. 23Mə yaʼ ane anug amɔʼ tì inɔb kwàʼ icheg ne àghò yaʼi ane anug amɔʼ tì inum. Àghò ghiyə gha mbɔb yaʼ ane anug imɔʼ ane inug ijìm, imbə̀ʼ isəg kyeri gha, à ya àghò cha amə, bə̀ kyèri gha àghò kɔ̀ŋ awɔb kwàʼ icheg ne àghò bə kɔ̀ŋ amə.

24Ìmə Mbaʼ, mə kə̀b gha bəd mbe ne àghò ya nàʼi inum, mbe yaʼ tì inum inga asiŋi ne mə̀ yaʼi angu. Ane, mbi biri bàd ìmə ighumni, ne ya ighumni we ne àghò ya kɔ̀ŋi amə, nàʼ inum, bɔŋ se tànga isəg.

25Ìmə Mbaʼ ne təmi kòʼ, ka chəyi bəd igun isəg kyeri awe, mo kyèri awe. Ane, mbɔb kyèri gha, à ya àghò cha amə. 26Mə fə ghì mbi kyeri awe. Mə biri chè imbìghè ni ghì gha mbe taŋ kyèri awe. Ane, àghò biri kɔ̀ŋ awɔb kwàʼ icheg ne àghò bə kɔ̀ŋ amə, mə bə̀ yaʼ ane anug amɔʼ tì inɔb.”

Currently Selected:

Jɔn 17: MBTP

Highlight

Copy