Jɔn 15

Yeso ya azed vayìn tesiʼ

1Yeso ya ghà abə ìmbi mə̀mə̀nənùg gha, “Mo ya azed vayìn ne ko, ne tì wə̀d nɔŋì fìŋ igun. Ìmə Mbaʼ ya wə̀d ne fàʼà inga mben vayìn. 2Wì ya sɔ̀pɔ̀ tìtab te ne igun inum, ne chəyi te ko titam. Àsi tìtab te ne ko titam, wì ya sèpè ni ghì gha te taŋ ko. 3Ìngam we ne mə ghàmi inən fə ghì mbə zen. 4Mbə mə̀ chè imbìghè ni yaʼ ane anug amɔʼ tì inum, mə biri bə chè imbìghè ni yaʼ ane anug amɔʼ tì nən. Chəyi fìtab azed mɔ̀ʼɔ ne tì fi ko titam ne chəyi fi yaʼ ywìrè yi ane ìtḭ vayìn. À ya icheg ne mbə̀ bə yaʼ. Chəyi wə̀d abɔ̀ʼ inən ne tì wì ghì inug mɔ̀ʼɔ ane ìwi ighəm ne chəyi məd we ywìrè ane anug amɔʼ tì inum.

5Mo ya azed vayìn. Mbə̰ ya tìtab. Mbə̰ mə̀ chùghi ane anug amɔʼ tì inum icheg ne mə bə yaʼ ane anug amɔʼ tì inən, mbə biri ya ko titam kwàʼ ti ndan ndàn. Àmə chəyi mo, chəyi aghi mɔ̀ʼɔ ne tì mbə̰ ghì. 6Wə̀d ne chəyi wì chughi ane anug amɔʼ tì inum, tengàŋ ya icheg fìtab fə ne mbi sɔbi waʼ, fi zɔm. Iku tìtab te ya mbe gwe, màʼà inga iywid, ìto̰. 7Mbə̰ mə̀ chughi ane anug amɔʼ tì inum, ìmə ìngam bə̀ yaʼ inga inən, aghi ne mbə nɔ̰ Ìmə Mbaʼ, wì biri nàʼ inən. 8Mbə mə̀ ya ko titam ndan ndàn ne chwìye gha mbə̰ ya ìmbum mə̀mə̀nənùg, ìmə Mbaʼ ya nìŋə ighumni.

9Mə kɔ̀ŋ awən kwàʼ icheg ne ìmə Mbaʼ kɔ̀ŋi amə. Mbə̀ che imbìghè ni yaʼ ane anug amɔʼ tì inum imbə̀ʼ mə bə chè imbìghè ni kɔ̀ŋ awən. 10Mbə̰ mə̀ ya zùgrə anug ne mə̀ ghà, mə biri chè imbìghè ni ya kɔ̀ŋɔ̀ awən. À ya icheg ne mo inum bə̀ chè imbìghè ni ya zùgrə ìmə Mbaʼ. Ane, məd bə̀ chè imbìghè ni ya kɔ̀ŋɔ̀ amə. 11Mə fə ghà inug mbo̰ inən, ni ghì gha mbə̀ ya gyende kwàʼ icheg ne mə bə̀ gyènde. À ya ni ghì gha mbə̀ ya taŋ gyènde. 12Ikə ne mə nàʼà inən ya gha: Mbə̀ ya kɔ̀ŋɔ̀ wə̀d imɔʼ imɔʼ kwàʼ icheg ne mə bə̀ kɔ̀ŋɔ̀ awən. 13Chəyi iku àkɔ̀ŋì mɔ̀ʼɔ ne che àze ni gha, wə̀d ku atog abə ìmbi mə̀sə̀ʼ. 14Mbə̰ mə̀ ya zùgrə anug ne mə̀ ghà, mbə̰ ya ìmbum mə̀sə̀ʼ. 15Chəyi mə̀ ywìrè kàrà awən ane bəd àfàʼì imbə̀ʼ icheg ne, chəyi bəd àfàʼì kyeri inug ìmbi ìwɔb mbaʼ àfàʼì. Mə ya se kàrà awən yaʼ ane ìmbum mə̀sə̀ʼ imbə̀ʼ icheg ne, inug mbe ne ìmə Mbaʼ gha inum, mə fə ghì mbə̰ kyeri kwàʼ ijìm. 16À ya mo chɔʼi awən, kayi mbə̰ ya chɔʼi amə. À ya mo bə tɔm awən gha mbə̀ gho ko titam ne biri yaʼ ane ighə̀m imɔʼ. Mbə̰ mə̀ fàʼ ane, nji ìmə Mbaʼ biri nàʼ ighi ijìm mbe ne mbə nɔ̰ ibo ane ìmə ikum. 17Ikə ne mə nàʼà inən ya gha: Mbə̀ ya kɔ̀ŋɔ̀ wə̀d imɔʼ imɔʼ.”

Bəd inga isəg ya pàbà mə̀mə̀nənùg Yeso

18Yeso ya ywìrì gha, “Bəd inga isəg mə̀ pàb awən, mbə̰ wèndi gha, mbi ya fə bì pàb amə. 19Àkə ni gha mbə yaʼi abɔ̀ʼ bəd inga isəg, nji mbi ya kɔ̀ŋɔ̀ awən icheg ìmbɔb bəd. Tesiʼ ya gha, chəyi mbə̰ yaʼi abɔ̀ʼ bəd inga isəg. Mə fə chɔʼ awən chì inga isəg. À ya aton ne, bəd inga isəg mbe pàbà awən. 20Mbə̀ wendi ìngam we ne mə̀ ya ghàmi inən gha, ‹Chəyi wə̀d àfàʼì mɔ̀ʼɔ ne che mbaʼ àfàʼì məd.› Icheg ne bəd mɔ̀ʼɔ inga isəg yaya chɔ̀ʼɔ ìmbum ibɔʼì ighog, à ya ane ne, mbi biri bə chɔʼ ìmbən tì ibɔʼì ighog. Icheg ne mbi mɔ̀ʼɔ tì bəd yaya zùgrə ìmə ìngam, à ya ane ne, mbi mɔ̀ʼɔ tì bəd biri bə zugri ìwən ìngam. 21Mbi biri ghì inug mbo̰ inən anìŋ, məyi imbə̀ʼ amə. Aton ya gha, chəyi mbi kyeri Wə̀d we ne cha amə. 22Àkə ni gha, chəyi mə̀ ya yèʼe ghàm inɔb, nji chəyi mbi biri nyimi awɔb imbə̀ʼ ìmbɔb inug tibɔ̀ŋ. Icheg ne mə fə yèʼe ghàm inɔb, chəyi mbi biri ywiri bèrì aton mɔ̀ʼɔ ni nàʼ imbə̀ʼ ìmbɔb inug tibɔ̀ŋ. 23Wə̀d we ne pàbà amə, we bə̀ pàbà ìmə Mbaʼ. 24Icheg ne mə ghi inug ne chəyi wə̀d mɔ̀ʼɔ kə kweʼì ghì inɔb, mbi biri nyimi awɔb ane ìmbɔb inug tibɔ̀ŋ. À ya ane imbə̀ʼ icheg ne, mbɔb bàd iyeti inug mbe bə̀ kiri pab amə, bə̀ pàb ìmə Mbaʼ. 25Àzo̰ ya yaʼ anìŋ, ni ghì gha, anug ze ne mə̀nɔ̀ʼɔ̀ gha, ze duwə ane tesiʼ gha: ‹Mbi ya pàbà amə, witì zə̰ aton.›”

26Wì ya chè imbìghè ni gha, “Àwètìbə̀d biri yeʼe . Mə biri ghì ìmə Mbaʼ chà aməd inən. Məd ya Azwighi ne nɔ̀ʼɔ̀ abə ìmə Mbaʼ. Wì ya gha tesiʼ. Anyumə̀ ne wì yèʼe, wì biri tòʼrì inug imbə̀ʼ amə abə bəd. 27Mbə̰ inən biri bə̀ tòʼrì inug imbə̀ʼ amə abə bəd imbə̀ʼ icheg ne, mbə̰ ya yaʼ abɔ̀ʼ inum, nɔ̀ʼ ane nyumə̀ ne, mə̀ ya ko àmə àfàʼì.”

Currently Selected:

Jɔn 15: MBTP

Highlight

Copy