Jɔn 13

Yeso sò ighog abə ìmbi mə̀mə̀nənùg

1À ya yaʼ igun aneg ze ne nàʼà abə aneg ne mbe jə̀ghə Iteri Chègun. Yeso ya fə kyeri gha, nyùmə̀ fə kòʼ ibo ni sàŋì isəg gho̰, ghò yi abɔ̀ʼ ìwi Mbaʼ. Wì ya kɔ̀ŋ bəd mbe igun isəg gho̰ ne ya ìmbi məd anene ghò pè ane ìnwḭ.

2Yeso tì ìmbi mə̀mə̀nənùg yaya jə̀ghə anyumə̀ ikwìri. Ane, Debrə̀ ya fə zì ikɔndi inga fìŋ abə Judàs Ikarìyɔ̀d, ŋwan Sayimùn gha wì fḛ Yeso. 3Yeso ya kyeri gha, Mbaʼ məd fə zì inug ijìm ibo ikye abo. Wì ya bə̀ kyèri gha, Ŋwiye ya tɔm aməd igun isəg, ane, wì biri ywiri bə̀ndì ghò abɔ̀ʼ Ŋwiye ne ya Mbaʼ məd. 4Wì ya si nɔʼ sàŋì tijəg te ne wì yaya jə̀ghə, təm titighe, chì ìzi ndwigun, si niŋ tawè#13:4 Tawè: à ya towel ane ichug mə̀kara kɔd ane ìwi ìkyèri. 5Wì ya ghì ane, si niŋ mənib inga akaŋ ne mbe so nyɔd, se sò ighog ìmbi mə̀mə̀nənùg. Wì yaya sò fùghə ane tawè we ne wì ya kɔri ane ìkyèri.

6Icheg ne wì yaya sò ìmbɔb ighog ane, wì ya pè igun Sayimùn Pità, Sayimùn Pità ghà ibo gha, “Anɔŋisəg, àghò kə anìŋ jiʼè kə̀bə̀ ni sò ìmbum ighog?”

7Yeso ya ywìtì ibo gha, “Chəyi àze atog kiri zḛ imbə̀ʼ anug azo̰ ne mə ghìyə̀ amad anìŋ. Si ya gha, àze atog biri ghi zen ane amad sa.”

8Pità ya ywìtì gha, “Indèʼ, chəyi àghò biri nɔ̀ʼ sò ìmbum ighog ka.”

Yeso ya ywìtì ibo gha, “Àmə chəyi mə̀ so ìmbe ighog, kyeri gha, chəyi àghò biri ywiri yaʼ ane anug amɔʼ tì inum.”

9Sayimùn ya si ywìtì gha, “Anɔŋisəg, àmə yaʼ ane, imbə̀ʼ àghò so awe məyi ìmbum ighog. Àghò bə̀ sò ìmbum ibo fɔrɔ àmə atog!”

10Yeso ya ywìtì gha, “Chəyi wə̀d ne fə sò nyɔd ijìm ywiri beri ni sò nyɔd. Wì biri si so yaʼ ìmbi ighog imbə̀ʼ icheg ne nyɔd məd we zḛ yi. Ane, mbə̰ mbe zḛ awən. Si ya gha, kayi mbə̰ məjìm zḛ.” 11Wì ya ghàm ane imbə̀ʼ icheg ne, wì ya kyeri yi wə̀d we ne biri fḛ̀ məd. À ya aton ne wì ya gha, “Kayi mbə̰ məjìm zḛ”.

12Anyumə̀ ne wì ya mani ni sò ìmbɔb ighog, wì ya ywìrì zì ìzi ndwigun, si bə̀ndì ghò chùghi yi aseg. Wì ya si bìri inɔb gha, “Mbə kyeri aghi ne mə̀ fàʼi inən anìŋ? 13Mbə̰ mbe kàrà amə ane ‹Àchwitìnùg›, bə̀ kàrà amə ane ‹Anɔŋisəg›. Mbə̰ kòʼ awən ni kàrì amə ane imbə̀ʼ icheg ne à ya wə̀d ne mo yaʼi ìwiwən. 14Amad anìŋ ne mə yaʼ ìwən Àchwitìnùg, bə̀ yaʼ ìwən Anɔŋisəg, mbə̀ ghò bə̀ sò ighog abə ìmbən məfi icheg ne mə̀ sò ìmbən. 15Mə fə chwi ikuchèg inən gha mbə̀ bə se ghìyə̀ ane abə bəd ndəŋ. 16Mə gha tesiʼ inən gha, chəyi ŋwan àfàʼì we kweʼè chè mbaʼ àfàʼì məd. Chəyi wə̀d ne mbi tɔmi aməd we bə̀ kweʼè chè wə̀d ne tɔmi aməd. 17Amad anìŋ ne mbə̀ kyeri inug mbo̰, mbə̀ fàʼa mbiwən, Ŋwiye biri zì àbɔrɔ̀bɔd igun inən.”

18Yeso ya tòʼrì inɔb gha, “Chəyi mə̀ gha inug mbo̰ anìŋ, imbə̀ʼ awən mbə̰ məjìm. Mə kyèri bəd mbe ne mə fə chɔʼi. Si ya gha, anug ze ne yaʼi inga Àŋwàʼrì Ŋwiye biri dù ane tesiʼ. Anug ze ya gha, ‹Wə̀d we ne jə̀ghə tì inum fə bə̀ŋə̀ ane ìmə wə̀d pab.› 19Mə ya ghà inən amad anìŋ ne chəyi ze kiri du ni ghì gha anyumə̀ ne ze du, mbə biri bḛ gha mo ya wə̀d we ne mə̀ yaʼi ìwiwən. 20Mə gha tesiʼ inən gha, Wə̀d ne niŋ wə̀d ne mə cha, tengàŋ fə bə̀ niŋ amə. Ane, wə̀d we ne niŋ amə, tengàŋ fə bə̀ niŋ wə̀d we ne cha amə.”

Yeso ghà icheg ne mbi biri fèn aməd

(Mat 26:20-25; Mag 14:17-21; Lug 22:21-23)

21Yeso ya ghà inug mbo̰ ane, fìŋ məd nɔ̀ʼ ko se nàʼà ngəʼ ibo. Wì ya si ghà asaŋ asaŋ gha, “Mə gha kwàʼ tesiʼ inən, wə̀d mɔ̀ʼɔ abɔ̀ʼ inən biri fèn amə.”

22Mə̀mə̀nənùg məd ya ghabri nen ìwɔb nyɔd se bìre inga fìŋ gha, “Kə̀ wə̀d ne Yeso ya ghàmà anìŋ imbə̀ʼ aməd àkə we?” 23Àmə̀nənùg Yeso mɔ̀ʼɔ ne ya we ne wì kɔ̀ŋi ya yaʼ iban məd ichughi. 24Sayimùn Pità ya mə̀ʼrì abə àmə̀nənùg we gha, “Àghò biri abə Yeso gha, àkə we ne wì ya ghàmà imbə̀ʼ aməd.”

25Àmə̀nənùg we ya tindi ghò iban Yeso, bìri ibo gha, “Anɔŋisəg, àkə we ne àghò we ghà?” 26Yeso ya ywìtì gha, “À ya wə̀d we ne mə̀ biri chùb ngə̀ŋ inga ìmḛ nàʼ ibo” Wì ya gha ane, bəʼ ngə̀ŋ nyɔ̀ʼ inga ìmḛ, nàʼ abə Judàs Ikarìyɔ̀d, ŋwan Sayimùn. 27Kwàʼ icheg ne Judàs ya niŋi ngə̀ŋ ze, Sàtàn ya nyi bə̀ŋì fìŋ məd. Yeso ya si ghà ibo gha, “Zàmba ghì anug ze ne àghò we kə̀bə̀ ni ghì.” 28Chəyi wə̀d mɔ̀ʼɔ abɔ̀ʼ bəd mbe ne yaya jə̀ghə, ya kyeri aton ne Yeso ya ghàmi ibo ane. 29Mbi mɔ̀ʼɔ yaya kɔ̀ndɔ gha, icheg ne Judàs yaya nyìme àbàn ikab, ighəm mɔ̀ʼɔ, Yeso ya ghà ibo gha wì gho zon ighi ne mbi biri jəg iteri kə̀ ghà gha wì gho nàʼ ikab mɔ̀ʼɔ abə bəd ne chəyi àzɔb. 30Kwàʼ anyumə̀ ne Judàs ya fə niŋi ngə̀ŋ ze, wì ya dù ghò isəg. Isiŋi ya fə fin yi.

Yeso nàʼ ikə feg abə ìmbi mə̀mə̀nənùg

31Anyumə̀ ne Judàs ya fə gho, Yeso ya gha, “Nyùmə̀ fə kòʼ ne mbi biri ghumni Ŋwan Wə̀d bə̀ ghùmnə Ŋwiye anjìm məd. 32Mbi mə̀ fə ghumni Ŋwiye anjìm məd, ane ya gha, Ŋwiye biri bə ghumni aməd anjìm inug mbe ne we ghìyə̀. Wì biri ghì ane, məyi kwàʼ amad anìŋ.”

33Ìmbum bɔn, chəyi mə̀ biri chughi tì inən agha sà. Mbə̰ biri kə̀b amə, si ya gha, anug ne mə̀ ya gha abə mə̀Ju, mə̀ ya anìŋ bə̀ ghà inən. Anug ze ya gha, “Chəyi tì mbə̰ yeʼe ane asiŋi ne mə ghò angu.”

34Mə ya anìŋ nàʼà ikə feg inən gha, “Mbə̀ kɔŋɔ wə̀d imɔʼ imɔʼ. Icheg ne mə̀ kɔ̀ŋ awən, mbə̀ bə̀ kɔ̀ŋ mə̀mbin. 35Mbə̀ mə̀ ya kɔ̀ŋɔ̀ mə̀mbin, wə̀d ijìm biri kyeri gha, mbə̰ ya ìmbum mə̀mə̀nənùg.”

Yeso gha Pità biri ton aməd

(Mat 26:31-35; Mag 14:27-31; Lug 22:31-34)

36Sayimùn ne ya Pità ya biri ibo gha, “Anɔŋisəg, àghò kə ghò aya?” Yeso ya ywìtì gha, “Asiŋi ne mə ghò angu, chəyi tì àghò yeʼe angu. Si ya gha, àghò biri ghi si yèʼe.”

37Pità ya biri gha, “Anɔŋisəg, aton ne chəyi tì mə yeʼe abɔ̀ʼ ine amad anìŋ àkə gha? Mə fə chuʼri ìmə nyɔd ni ku imbə̀ʼ awe.” 38Yeso ya ywìtì gha, “Kwàʼ tesiʼ tesiʼ gha, àghò biri ku imbə̀ʼ amə? Mə gha tesiʼ ine, bɔŋ inɔm ngub se tɔ̀ŋɔ àghò biri fə to̰ awe awum, aghəm atad.”

Currently Selected:

Jɔn 13: MBTP

Highlight

Copy