Ìfàʼì 3

Pità tì Jɔn ghù wə̀d mɔ̀ʼɔ ne buʼrə

1Aneg mɔ̀ʼɔ ane mə̀nyùmə̀ mətad tisi, ne ya nyumə̀ ne mbe chàʼrà Ŋwiye, Pità tì Jɔn yaya ghò inga mbàn Ŋwiye. 2Bəd mɔ̀ʼɔ yaya bèʼè wə̀d mɔ̀ʼɔ ne buʼrə ghò nɔ̀ŋɔ̀ inuʼ ikam mbàn Ŋwiye. Wə̀d we ya buʼrə nɔ̀ʼ kwàʼ ane nyumə̀ ne mbi ya gwi aməd. Inuʼ ikam gho̰ ya mbi yaya kàrà ane Inuʼ ikam Ngwèn. Mbi yaya bèʼè məd ineg ijìm yèʼe nɔ̀ŋɔ̀ angu ane, wì se nɔ̰ ikab abə bəd ne chè nyḭ̀yḛ inga mbàn Ŋwiye. 3Anyumə̀ ne abuʼrə wə̀d ze ya bàra Pità tì Jɔn ne mbe chè ni nyi inga mbàn Ŋwiye, wì ya ko se nɔ̰ ikab inɔb. 4Pità tì Jɔn ya nèn wə̀d we kwàʼ igun ife. Pità ya si ghà ibo gha, “Nḛ!” 5Abuʼrə wə̀d ze ya bə̀ nèn awɔb kwàʼ igun ìfe kɔ̀ndi àzi gha mbi biri nàʼ aghi mɔ̀ʼɔ ibo.

6Pità ya si ghà ibo gha, “Chəyi mə̀ beri ikab ni nàʼ ine. Aghi ne mə̀ beri, mə biri nàʼ ine. Mə ghà ine ane ikum Yeso Kristo we a Nazarèd, nɔ̀ʼɔ, yèn!” 7Pità ya ghà ane si nyìmi aba abo jəghi məd, nɔ̀ aməd titighe. Kwàʼ ati, ighog məd sèmbè, tìfaŋ aghog məd bə̀ kà. 8Wì ya gàd təm titighe, ko se yḛ̀ nè nə̀kə ghùmnə Ŋwiye. Wì ya beni abɔ̀ʼ inɔb ghò nyi inga mbàn Ŋwiye. 9Bəd məjìm mbe ne ya yaʼi angu ya si bàd icheg ne wə̀d we yaya se yḛ̀ kwàʼ ane ìmbi ighog nè ghùmnə Ŋwiye. 10Mbi ya nèn aməd bə̀ kyèri gha à ya kwàʼ wə̀d we ne yaya chùghə Inuʼ Ikam Ngwèn nɔ̰ ighi. Mbi ya bàd aməd ne we se yḛ̀ ane, anug chè awɔb.

Pità ghàm anug imbə̀ʼ Yeso abə bəd inga ikam mbàn Ŋwiye

11Wə̀d we ne Pità ya ghu aməd yaya se nànga nangi ane Pità tì Jɔn. Bəd ya bàd aməd anug ya chè awɔb. Ane, inɔ̰ bəd we ya nòrò ghò fète iban inɔb asiŋi ze ne mbe kàrà ane məkə̀tə̀ Solomùn. 12Anyumə̀ ne Pità ya bàri inɔ̰ bəd we, wì ya ghà inɔb gha, “Məmbon, mbə̰ mə̀Izre, anug azo̰ kə chè awən iye? Mbə kə se nḛ̀ awa nḛ icheg ni gha à ya ane ìwa ika kə̀ anjìm ìmba inug chɔm ne tì ghi wə̀d gho̰ nɔ̀ʼ se yḛ̀? 13Wə̀d ne ghi wə̀d gho̰ nɔ̀ʼ se yḛ̀ ya Ŋwiye we ne Abràham tì Jàkɔb tì Azìg fɔrɔ ìmba mə̀mbaʼ aneg yaya ghùmnə. À ya məd nàʼi ighumni abə wə̀d àfàʼì məd Yeso Kristo. Mbə̰ ya ton awən məd kwàʼ imbìghè abə Payilèd. Mbə̰ ya kə̀b àzən gha mbe zweti aməd ne Payilèd ya kə̀bi ni sàŋì aməd. 14Mbə̰ ya ton awən wə̀d ne təmi kòʼ bə̀ təm zen, ghà àzən gha mbe saŋa yaʼ wə̀d ne ya zweti wə̀d. 15Mbə̰ ya zweti wə̀d ne nàʼà ìtḛ̀. Si ya gha, Ŋwiye ya zwemni aməd ane iwu. Mba mbo̰ ya bàd anug ne ya che. 16À ya ika we ne yaʼi inga ikum Yeso tì ibḛfiŋ ne tì beri igun ikum we ghù wə̀d gho̰ ne mbə̀ taŋ kyèri, icheg ne mbə̰ mbe bàrà anìŋ.

17Ane, ìmbum məfi fɔrɔ ìtum njàbi, mə kyèri gha, anug ze ne mbə̰ tì ìmbən itog bəd ya ghi igun Yeso ya mbə̀ ya ghi kwàʼ abəŋ. 18Aŋa ya anug ze ne Ŋwiyekɔʼ ya ghum chè anjìm bədkə̀n məd məjìm ghà. Wì ya gha, ‹Wə̀d we ne Ŋwiye zɔ̀ʼi biri ghum zə̰ ngəʼ.› 19Ane, mbə̀ bəŋə ìtən fìŋ, waʼ inug tibɔ̀ŋ, ghò abɔ̀ʼ Ŋwiye, ni ghì gha wì waʼ ìmbən inug tibɔ̀ŋ. 20Mbə̰ mə̀ ghì ane, Anɔŋisəg biri ghì ìtən fìŋ zùtì. Wì biri chà wə̀d we ne məd zɔʼi ne ya Yeso, inən. 21Məd biri kiri chughi yi ikaŋ àbɔ̀ŋɔ ghò pè ane nyumə̀ we ne Ŋwiyekɔʼ biri tangi ìmbi inug ijìm icheg ne wì ya ghum chè anjìm bədkə̀n ìzḛzḛ məd kàʼ. 22À ya kwàʼ icheg ne Muse ya gha: ‹Anɔŋisəg, ìwən Ŋwiye biri ghum chɔʼ wə̀dkə̀n mɔ̀ʼɔ inga ìwən inɔ̰ ne yaʼi icheg inum, chà inən. Mbə̰ mənyìʼ zùgri inug ijìm mbe ne məd biri ghà inən gha mbə̀ faʼa. 23Wə̀d ne to̰ yi ni zugri aməd, Ŋwiye biri chì tengàŋ inga ìmbi bəd, nìmni.›

24Wì biri ghì ane imbə̀ʼ icheg ne, bədkə̀n Ŋwiye məjìm ni ko ane Samùwè ya fə ghum ghà inug mbo̰ ne dùwə̀ amad anìŋ inga nyùmə̀ isəg gho̰. 25Inug ijìm mbe ne Ŋwiye ya ghum kàʼ anjìm bədkə̀n məd ya inən. Mbə̰ bə̀ bèrì ati inga ikan we ne məd ya wàri tì ìmbən mə̀mbaʼ aneg icheg ne wì ya gha abə Abràham gha: ‹Mə biri zì àbɔrɔ̀bɔd igun wə̀d ijìm igun isəg anjìm àze aghaŋ inəbi.› 26Ŋwiye ya chɔʼ ìwi wə̀d àfàʼì bì chà aməd inən gha wì ziye àbɔrɔ̀bɔd igun inən icheg ne we ghìyə̀ mbə̰ bə̀ŋə̀ ìtən fìŋ chìyè ane inug tibɔ̀ŋ.”

Currently Selected:

Ìfàʼì 3: MBTP

Highlight

Copy