Makòrzì 4

Ŋmàna mò è mòònelì

(Mat 13.1-9; Luk 8.4-8)

1Yerzù à mà wòteyà lì òkòlɛ̀ hvɛ ò tòŋgòŋgò yà yùlù ya Gàlìlì. Hwatò ema hwà mà arzàŋganɛ lì mò tòŋga hwa mà aka lì kòka, ò èŋgànɛ̀lɛ̀ à mà kpeya ndi ò wɔ̀lɔ̀ rzìi a lìya. Wɔ̀ɔ̀lɔ̀ wò mà hwɛ ndi ò tenì ya màlìhwa. Ndi èŋge ŋgìndì yà hwatò ema lìya ndi ò mòkòkò mò eŋge yùlù. 2À mà hwa òkòlɛ̀ hweyà rzayì-rzayì nà meyànà. À mà hwa kpɛ̀ɛ̀yà ŋmàna nanù ema, 3“È òkànèyà tɛ! Mòònèlì wà mbòtà mɔ̀kɔ à mà hwɛ lì mùŋgùlɛ̀ ihvɔ̀ŋgɔ̀. 4Nà òmà a mà hwɛ lì mùŋgùlɛ̀ ìhvɔ̀ŋgɔ̀ ja eni, lòŋgò ì mà unda ò njìya, hwènɔ̀nì hwe mà ji rzòmà. 5Lòŋgò la hvɔ̀ŋgɔ̀ i ma unda ò ŋmanyu yà èwòmà ya lìŋyàyi ema i rza òhvɛ mɔ̀nyɛ̀ mò kòki iŋgi hvɔ̀ŋgɔ̀ i ma hvùmùwà karzi-karzi èhwanja mɔ̀nyɛ̀ mò rzi kòkè aŋga. 6È hvònda igbe ja ŋginyà ì mà wurze ì mà rzɛlɛ èŋge mbòtà rzìi e ùhwà, rzìi e ŋwa, èhwanja meyaŋgà me rzi rzɔŋgɔ̀ ò tenì yà mɔ̀nyɛ̀. 7Lòŋgò la iŋgi hvɔ̀ŋgɔ̀ hvɛ i ma unda ndì ò tenì ya wàŋga ya hwènyɛ̀ŋgɛnyɛ̀ŋgɛ̀, rzìi hweŋge hwènyɛ̀ŋgɛnyɛ̀ŋgɛ̀ hwe òŋga, hwe lìŋgɛ̀lɛ̀ iŋgi hvɔ̀ŋgɔ̀ ema i ma kɛkɛ, rzìi e ùhwà è rzi tanɛ̀ lì ŋya. 8Lòŋgò la iŋgi hvɔ̀ŋgɔ̀ ì mà unda ndi ò mɔ̀nyɛ̀ mò gbamù. Ì wurzà jò òŋga rzìi ì ŋyà. Rzìi lòŋgò la hwèŋge hwèrzòŋgò hwe mà ŋya rzàyiyàwò jà hvɔ̀ŋgɔ̀, lòŋgò hvɛ ì ma ŋya mènìmòtòhwa me hvɔ̀ŋgɔ̀, inɛ̀yi hvɛ ì ma ŋyàa ègbe ya hvɔ̀ŋgɔ̀.” 9O lìrzukù rzìi Yerzù a òhwa nanù ema, “È mɔ̀ ema à òhvi màtò mɔ̀ à hweyè.”

Jànda ema Yerzù a mà kpɛ̀ɛya menè meyàna

(Mat 13.10-17; Luk 8.9-10)

10È hvònda ema Yerzù a mà hwɛ mɔ̀ ŋmìti, lìyòmɛ̀ la eni la Hwà-òkòwèlì nà hwahwàkɛ, nà hwatò ema hwà mà hwɛ aŋga, hwa mà mò ijòwa nanù ema a hwa telɛlɛ mèŋge meyàna. 11À mà hwa òhweyà nanù ema, “Lohwɛ̀ à è ŋgbèlì è wònjà ò lì hwiyà è wùndɛ̀ yà Lìkànèyà la ama Lohwɛ̀. Ndi ò hwanɛ̀yi hwatò Lohwɛ̀ à hwa gbèyi ò lì hwiyà hwenè hweyà ò meyànà mɛ̀nɛ̀. 12À mà gbeyà ndi nanù ema,

tɔ̀ hwa ɛnɛ̀ hwa rzà èmbàneyà,

tɔ̀ hwa hweyà hwa rzà rzɔ̀ŋgìtɛ̀nɛ̀, èhwanja

hwa rzɔ̀ŋgìtɛ̀nɛ̀yi tɛ hwa tìmba ò mà Lohwɛ̀ òma à mà hwa làkìrzɛ̀.”

Yerzù à mà hwa tèlɛlɛ jànda jà ŋmàna mò è mùŋgùlèlì wà mbòtà

(Mat 13.18-23; Luk 8.11-15)

13Yerzù rzìi à hwa ijòwa nanù ema, “È rza rzɔ̀ŋgìtɛ̀nɛ̀ mònò ŋmàna e? È rza rzɔ̀ŋgìtɛ̀nɛ̀ tɛ mònò ŋmàna, nɛ è tànɛyi ò lì rzɔ̀ŋgìtɛ̀nɛ̀ mènɛ̀yi meyànà e? 14È mùŋgùlèlì wà mbòtà mɔ̀ ndi à mùŋgùlɛ̀ɛ è mbɔrzi yà ama Lohwɛ̀. 15Lòŋgò là hwatò hwa gbèyi ndi nàa ì hvɔ̀ŋgɔ̀ ema ì mà unda ò njìya. Hwa hweyi tɛ Èya yà Lohwà lìwòkìmɛnɛ Mòkarzɛ̀ à jà à è ulɛ̀ ò mèèmà mè awu. 16Hwanɛ̀yi hvɛ nàa ìhvɔ̀ŋgɔ̀ ema jò undi ò èki yà hwèkɔ̀kɔ̀ hwe maŋyayi, è mà hwa hwèyì tɛ Eyà yà Lohwà lìwòkìmɛ̀nɛ̀ hwa è imànɛ̀lɛ̀ nà mɔ̀nyɛ̀ŋgì. 17Ndi eŋge Èya yà Lohwà è rza ònahwa ò mèèmà mè awu, ndi hwa è lòkɛ̀ ndi ò ŋmanà hvòkà wà hvònda mɛnɛ. Ò èŋgànɛ̀lɛ̀ rzɔ ìndùtù tɔ̀ mètàkà me jelì tɛ, hwa akòohwɛ̀ ò mburzà ò lìwòkìmɛ̀nɛ̀. 18Hwanɛ̀yi hwatò hvɛ hwa hwèlì ndi nàa ìhvɔ̀ŋgɔ̀ ema jò undà ò tenì ya hwènyɛ̀ŋgɛnyɛ̀ŋgɛ̀, hwa hwèlì ndi hwatò ema hwa hweyi Eyà ya Lohwà, 19ndi hweyà hwe rze na è nyìrzɛ̀ ya lì hwɛnɛ̀ hwèèmà, nà è nyìrzɛ̀ ya lì arza hvɛ hwehvɛhvɛ hweyà, hwe hwa lìŋgɛ̀lɛ̀ mèèmà me awu nyàyi ema hwa rza tanɛ lì ŋya hwèhvùma. 20Hwanɛ̀yi hwatò hvɛ hwa hwèlì ndì nàa ìhvɔ̀ŋgɔ̀ ema ì undi ò mɔ̀nyɛ̀ mò gbamù, ema hwa hwèya eyà ya Lohwà, hwa imànɛ̀lɛ̀ nà è jɔ̀kɛ̀, rzìi e ŋya erzoŋgò ema e jàna rzayiyàwò ja hvɔ̀ŋgɔ̀, tɔ̀ mènì-mòtòhwa me hvɔ̀ŋgɔ̀, lòŋgò hvɛ ègbe ya hvɔ̀ŋgɔ̀.”

Ètùlù à rza utahwa

(Luk 8.16-18)

21Yerzù rzìi a ijòwa èŋge ŋgìndì nanù ema, “Mòtò à kpeyàneyà tɛ ètùlù ema à mà hvààlɛ̀ ò tenì yà ndawò à e ika ndi ò rze ya èwòkì ŋga à e ika ò rze ya lìnɔ̀ŋgɔ̀ e? Rzèkɛ ò ŋmanyu yà e mbòkò ema hwa tɛ̀yìrzɛ etùlù ndi à e ika e? 22O rzà ènje tɔ̀ eyà ema e utahwi ema e rzà ò wurza ò mòteŋyi. O rzà ènje hvɛ tɔ̀ eyà ema e utami ema e rzà ò hwiyɛ̀nɛ̀. 23Tɔ̀ ima mòtò ema à òhvi matò, a hweye.”

24Yerzù rzìi a ɛ̀ndɛ hvɛ ò wòrzò lì òhwa nanù ema, “È lùtèyà kɔ̀yi-kɔ̀yi mamɛ ema e hweyà! Limɛnì ema e gbeyàna nà hwanɛ̀yi hwatò, lìŋgi lìmɛnì mɛnɛ ndi Lohwɛ̀ mɔ̀ hvɛ à ò gbeyà nà ò lì è mɛneya. Li aka tɔ̀ mamɛ ema e gbeyànì ò lì mɛneya hwanɛ̀yi hwatò. 25È mɔ̀ ema a òhvi lì rzɔ̀ŋgìtɛ̀nɛ̀ ò e wùndɛ̀ ya Lìkànèyà là ama Lohwɛ̀, Lohwɛ̀ à mò ŋgbà lì rzɔ̀ŋgìtɛ̀nɛ̀ lì kòki. Ndi è mɔ̀ ema a rza òhvɛ, Lohwɛ̀ à mò wòwànà tɔ̀ è teŋyi ema a òhvì.”

Ŋmàna mò hvɔ̀ŋgɔ̀ e òŋga

26Yerzù rzìi a òhwa hvɛ nanù ema, “Lìkànèyà là ama Lohwɛ̀ lì hwèlì ndi nàa mòtò ema a ɛndi lì mùŋgùlɛ̀ ì hvɔ̀ŋgɔ̀ ò waŋga. 27À tìmba ò ndawò ya eni, a naŋga wuu, a tɛ̀mɛ̀ ŋmerze a gbeyà èwòlò ya eni. O èŋge hvònda, ì hvɔ̀ŋgɔ̀ ì hvùmùwà, ì òŋgà, ema a rza hwiyɛ nɛ e gbèyɛ̀nɛ̀yi. 28Mɔnyɛ ndi mò gbeyà ì mbòtà jo òŋga rzi ì ŋya hvɛ hwehvùma. Liirzɔ̀ ndi lì lòma lì wurzà, rzìi ò mburzà hvònda hwèyalì hwe ɔhvɛ hwe wurza, rzìi ò lìrzukù hwèrzòŋgò. 29Ndi hwèrzòŋgò hwe ma òŋwa tɛ, lìwòkimɛnɛ, è mòtò a wòwa è hvàwò à ɛndɛ ò rzàa èhwanja e mbòtà è mà òŋwa.”

Ŋmàna mò e ŋmanà hvɔ̀ŋgɔ̀ wa gbèe

(Mat 13.31-32,34; Luk 13.18-19)

30Yerzù rzìi a òhwa hvɛ nanù ema, “Mamɛ ì tanɛ lì òhwa nanù ema Lìkànèyà la ama Lohwɛ̀ lì ayèkɛnɛ̀ e? Tɔ̀ ima ŋmàna ì tanɛ lì gbeyàna ò lì òhwa nɛ Lìkànèyà là ama Lohwɛ̀ lì hwèlì e? 31Lì gbèyi ndi nàa ìhvɔ̀ŋgɔ̀ ja wòŋgò gbèe ema mòtò a wò, rzi a hvàhva ò mòònda. Ini hvɔ̀ŋgɔ̀ ì tu rzayì-rzayì. O ji mɛ̀nɛ̀nì tɛ nà ihvɛ-hvɛ hvɔ̀ŋgɔ̀ ja ene rze. 32Jò òŋga tɛ, jò òŋga lì aka hwèwùlè hwe arzɛ rzìi jo òhvi hwèkɔ̀kɔ̀ ema hwènɔ̀nì hwe òŋga mùùmbù ma awu.” 33Mònò ŋmàna nà mehvɛhvɛ meyàna me ɔ̀ndi Yerzù a mà gbeyàne ò lì hwa òkòlɛ̀ Èya ya Lohwà. A ma hwɛ lì hwa òhweyà nyayi ema hwa mà tanɛ lì rzɔ̀ŋgìtɛ̀nɛ̀. 34A rzi hwa òhweyà tɔ̀ Èya e rzìi hwɛ lì hwa kpɛ̀ɛyà ŋmàna. Ndi tɔ̀ ima hvònda ema a mà hwɛ mɔ̀ ŋmìti nà Hwà-òkòwèlì hwa eni mɛnɛ à mà hwa òhweyà jànda ja mene meyàna.

Yerzù à mà lɔ̀kɔ hwemunɛ̀

(Mat 8.23-27; Luk 8.22-25)

35O wòŋgò wùnyà na òma e ŋgòmbe ya lohwà e ma ùke, Yerzù à mà òhweyà Hwà-òkòwèlì hwa eni nanù ema, “Inyɛ̀, je ɛ̀ndɛ o enɛyi èhvarzù ya Yulu.” 36Hwà-òkòwèlì hwa eni rzìi hwa hwɛ̀mɛ̀ e ŋgìndì rzi hwa kpèeyà ò wɔ̀lɔ̀ ema Yerzù à mà hwɛ, rzìi hwa mò ɛ̀ndɛ̀nɛ̀. O mà hwɛ mahvɛhvɛ mɔ̀lɔ̀ aŋga. 37Mbɛ̀hvɛ̀nì ndɛnɛ è mà wòteya lì nèŋgìrzɛ̀ wòŋgò wɔ̀lɔ̀ rzi hwèmùnɛ̀ hwe wòteyà lì kpèeyà ò tenì yà wɔ̀lɔ̀, natɛ wò mà arza lì inda. 38Yerzù à mà hwɛ ò tenì yà wɔ̀lɔ̀ ò mburzà. À mà naŋga rzìi a ika mòòhvò mò eni ò mòmbòŋga. Hwa mà mò imòlɛ rzi hwa mò òhweyà nanù ema, “Ìi Mòòkòlèlì ò rza jò àŋgòhweyà na òma ì hwèlì ndi ò kpelì e?” 39Yerzù rzìi a tɛ̀mɛ̀ ò ŋmanyu a lòmeyà e mbɛ̀hvɛ̀nì nanù ema e yɔ̀yeyà, rzìi a òhweyà hwèmùnɛ̀ ema hwe lɔ̀kɔ̀meyà, è mbɛ̀hvɛ̀nì e yɔ̀yeyà rzìi èki ya arzɛ hvɛ e hwɛ ŋmɛ̀ɛ. 40A ijòwa Hwà-òkòwèlì hwe eni nanù ema, “Mamɛ ndèŋgàtɛ̀ è òka wɔ̀ŋgɔ̀ e? O èŋgànɛ̀lɛ̀ natɛ̀ɛ na nàŋgɛ e rza òhvi tɔ̀ lìlòkɛ̀ e?” 41Hwa mà jeja nà wɔ̀ŋgɔ̀ wòndɛnɛ rzìi hwa ìjòwànɛ̀ mɔ̀kɔ nà ɔ̀nɛyi nanù ema, “Njɛnɛ hvɛ ònò e? Èma è mbɛ̀hvɛ̀nì nà hwèmùnɛ̀ hwe mò hweyànà e?”

Currently Selected:

Makòrzì 4: bri

Highlight

Copy