Matiyò 24

Hwewòtelì hwe Mètàkà

(Mak 13.1-2; Luk 21.5-6)

1O mburza nanù Yerzù à mà ànjiya ò Ndawò ya Lohwà. Nà òma à mà hwɛ lì ɛ̀ndɛ, rzìi hwà-òkòwèlì hwà eni rzìi hwa mò uŋmanɛlɛ, hwa mò òhweyà ò lì ɔ̀ŋgɔ hwèyòŋgèlì hwe e ndawò ya Lohwà. 2Yerzù rzìi a hwa ijòwa nanù ema, “È ɛnɛ̀ hwenè hwèèmà hwe àrzɛ e? Nà e òhweyà na e jɔ̀kɛ̀ ema, tɔ̀ lìŋyàyi tɔ̀ lɔ̀kɔ lì rza o lìiya ò ŋmanyu yà lìnɛyi, marzɛ-marzɛ ma kùwà lì rzùuhwa ò rze.”

3Nà òma Yerzù à mà lìya ò mòòlì mò Njàhwɛ̀, hwà-òkòwèlì hwa eni hwa mò ùŋmànɛ̀lɛ̀ ò èki ema wɔ̀ na wɔ̀ ndi hwà mà hwɛ aŋga. Rzii hwa mò ijòwa nanù ema, “O jò òhweyà e hvònda ema hwene hweyà hwe arzɛ hwe ò gbèyɛ̀nɛ, ima hvònda enè eyà e ò gbèyɛ̀nɛ e. Ndèŋgànà mamɛ e ò hwɛ̀ èmɛ̀nɛ̀nì ò lì uŋmɛ̀lɛ̀ hwejèelì hwe aŋgɔ̀ na lìrzukù la ene rze e?” 4Yerzù rzìi a hwà alàhwɛ̀ nanù ema, “È aŋgòwa mòtò a rzì e lukɛlɛ. 5Rzayì-rzayì ja hwatò hwa ò ja ema hwa ò òhwɛ nanù ema wɔ̀ ndi hwa hwèlì e mò ema a Ɔ̀kirzɛ̀hwɛ̀yi. Ndèŋgànà hwa ò lùkɛlɛ rzayi-rzayi ja hwatò. 6È ò hwèya injùmà nà mɛɛ̀ndi me njùma ndi tɔ mɔ̀kɔ hwa anyu a rzi keka lì tumeya. Hwenè hweyà hwe hwɛni lì gbèyɛnɛ ndi rzeketɛ hweyɔ ndi hwe uŋmɛ̀lɛ̀ nanù ema lìrzukù lì ma jà. 7Èkòmè yɔ̀kɔ e ò anana ehvɛhvɛ èkòmè, màkànèyà hvɛ mà ò ateŋgɛ̀nɛ̀. O ò hwɛ njawu na mònyìŋgìrzɛ̀nɛ̀ ò hwèki hwe arzɛ. 8Hwenè hwe àrzɛ ndi hwe ò hwɛ nàa hwe wòtelì hwe mòrziyò mò lìyalì. 9O eŋge hvònda, e ò ŋgbàŋgɛ̀hwɛ̀ na lì ŋgbahwa ò màà ma hwatò ema hwa e kɔ̀kìrzɛ̀ rzii hwa e òŋwa. O nyòla lìinà la amì e ò kɔ̀ɔ̀wɔ̀ nà hwèkòmè hwe arzɛ.

10“Hwatò rzayì-rzayì hwa rza ò lòkɛ̀ hvɛ, hwa ò ŋgbà mɔ̀kɔ na ɔ̀nɛ̀yi ò màà mà hwaŋga ema hwa hwà kɔwu. Hwa ò a kɔ̀ɔnɛ mɔ̀kɔ na ɔ̀nɛ̀yi. 11Rzayì-rzayì ja hwà-òhwèlì hwa hwèlìŋgɛ̀ hwa mòlàŋgà hwa ò wurza na lì lukɛlɛ rzayì-rzayì ja hwatò ò lì hwa nɔ̀ŋgɔ̀. 12Meema me wòhwe me ò nyàla, ò eŋgànɛ̀lɛ̀ e ndìŋgɛ ya rzayì-rzayì ja hwatò e ò rzima. 13Ndi hwatò ema hwa ò nò kakana mèèmà natɛ̀ɛ nà ò lìrzukù hwa ò rzùŋgàhwà.” 14Mònò ŋmɛ̀ndì mò gbamù lì hvòmɛ̀nɛ̀ lìkànèyà la ama Lohwà mò òhwahwa ò marzuku ma e rze ya arzɛ nàa mbòŋgi ò hwèkòmè, ndèŋgàna lìrzukù lì e ja.

Hwèya hwe wòhwe ema hwe ò gbèyɛ̀nɛ

(Mak 13.14-23; Luk 21.20-24)

15“O èŋgànɛ̀lɛ̀ rzɔ inyɔ è ò ɛnɛ ò èki ya wòtani yòma ya ŋgandi ema e ma jànɛ ìrzɔnì ò wòrzò wò ama Lohwɛ̀, ema e ma gbèyɛ̀nɛ ò e ndawò yà Lohwà na òma e Mòòhwèlì wà èlìŋgɛ̀ Dànìyɛ̀lì à mà òhwe ama e ò gbèyɛ̀nɛ.” (Inyò ema e hwèlì e laŋga hwene hweyà, e hwe rzɔ̀ŋgìtɛ̀nɛ̀ kɔ̀yi-kɔ̀yi). 16“O eŋge hvònda, hwaŋga rzɔ ema hwa hwèlì ò Jùdeyà hwa ò hwàŋga ò lì utàmà ò hvàko. 17Hwàŋga hvɛ ema hwa hwèlì ò ŋmanyu ja màkaàndò hwa rzi keka lì rzihwa ò lì arza lì wòwa tɔ̀ mamɛ ò tenì ya ndawò. 18Hwàŋga hvɛ ema hwa hwèlì ò hwe wàŋga hwa rzì tìmba lì wòwà mawɔtì ma awu. 19È ò hwɛ wòhwe ò meŋge mèenyà nà hwalanà ema hwa lìti memi ma awu na e wɔ̀ ema hwa nyɔŋgirzɛ hwàna! 20È kànɛ Lohwà nanù ema lìŋgi lìrzakò la lìŋgi lìhwaŋgi lì rza ò hwɛ ndi ò e hvònda ya ehvùhva tɔ̀ ò wùnyà wò lì Arzìyòlɛ̀! 21O eŋge hvònda rzɔ, o ò hwɛ mòhvùŋgu mò ndɛnɛ ema mò rzi gbèyɛ̀nɛ lì wòteya ewèkelì ya ene rze na tɛ na wònò wùnyà. Ndèŋgànà lìŋgi lìtumba la eyà lì rza ò gbèyɛ̀nɛ hvɛ. 22Ndi Lohwɛ̀ à mà màa lì utulɛ merzɔ̀ŋgi me meŋge mèenyà me mòhvùŋgu. A rzi gbèèye tɛ nanù, ò ma tɔ̀ mòtò a rza ò kàrzòwà. Ndi Lohwɛ̀ a ò utulɛ meŋge menya ò nyòla hwatò hwa eni ema mò a hvɔ̀rzì. 23O eŋge hvònda tɔ̀ ima mòtò à è òhwèlì tɛ nanù ema, ‘Ɔ̀ŋgɔ tɛ è Mɔ̀ ema à Ɔ̀kirzɛ̀hwɛ̀yi ònò’ tɔ̀ ‘Mɔ̀ ɔ̀nɛyi!’ È rzi mò lòkɛ̀. 24Èhwanja rzayi-rzayi ja hwatò hwa ò wurza lì kɔ̀ hweyà a lì òhwa ema wɔ̀ ndi hwa hwèlì hwaŋga ema hwa ɔ̀kirzɛ̀hwɛyi. Nà hwà-òhwèlì hwa hwèlìŋgɛ̀ hwa mòlaŋgà hwa ò wurza, hwa ò gbeyà hweyà hwe ndɛnɛ hwe mànyakà nà lì uŋmɛ̀lɛ̀ hwèembànèlì hwe ndɛnɛ hwe mànyakà. Hwa ò gbeyà ndi nanù ò lì lùkɛlɛ hwatò ema Lohwɛ̀ a hvɔ̀rzì, wɔ hwa lu tɛ njiya ya lì hwa lukɛlɛ. 25È òkànèyà, nà mà e òhweyà ene eyà ndèŋgànà e ò gbèyɛ̀nɛ. 26Tɔ̀ e hwèlì tɛ ema hwatò hwa e òhwèlì tɛ nanù ema, ‘È ɔŋgɔ̀ tɛ̀ mɔ̀ à hwèlì ɔ̀nɛyi mòrzanjɛ̀,’ e rzi ɛndɛ aŋga. Tɔ̀ hwa e òhwèlì tɛ nanù ema ‘È ɔŋgɔ̀ tɛ, mɔ̀ ònò anu ìlùkù,’ e rzi lòkɛ̀. 27Ndi nà òmà lòòhwà lì ŋmɛtɛ ŋmɛti-ŋmɛti lɛlu na mbɛŋgɛ, nanù ndi e ò hwɛ̀ɛ e hvònda ya hwèjèelì hwe ama è Ŋmanà wà è Mòtò wà Hwènàmà. 28Èhwanja èki ema ŋmìimbà mò hwèlì aŋga hvɛ ndi jɔŋgɔ ja mbeyà ja arzàŋgànɛ̀yi.”

Hwejeèlì hwe è Ŋmanà wà è Mòtò wà Hwènàmà

(Mak 13.24-27; Luk 21.25-28)

29“Hweŋge hwèyu hwe mawɔ̀ŋgɔ̀ hwe aka tɛ, i gbèyi jò ò ayèŋgòwɛ̀ jìtìtì, ŋmɛ̀ɛlì hvɛ mò rza ò uŋmɛ̀lɛ ŋmàye mò eni, i rzòmbe ja arzɛ jò ò unda lì anjiya ò ŋmanyu yà lohwà ndèŋgànà i ŋginyà ja arzɛ ja ŋmanyu jò ò kùwa lì nyiŋga. 30O eŋge hvònda e ò ɛnɛ èmɛ̀nɛ̀nì ya è Ŋmanà wà è Mòtò wà Hwènàmà e uwɛ̀lɛ̀lɛ̀yi ò lìwòhwɛ̀ la ŋmanyu, rzìi matumbà mà arzɛ ma hwatò ma e rze ya arzɛ ma ò wòteyà lì ahvahvɛ. Hwatò hwa ò ɛnɛ è Ŋmanà wà è Mòtò wà Hwènàmà na òma a jà ò lìmbàkì la e ŋmanyu yà lohwà na ŋginyà na èluhwe ndɛnɛ. 31Lìyɔ̀mi lì ndɛnɛ lì ò tòŋga, ndèŋgànà mɔ̀ à ò òma i aŋgèlì ja eni ò marzuku ma aniyɛ ma ene rze ò lì rzàŋga hwatò hwa eni ema Lohwɛ̀ à mà hvɔ̀rzɛ̀ lì wòteyà njuka hvɔ̀kɔ na enɛyi ja ene rze ya arzɛ.”

Hwèyòkòlelì lì hvòmɛ̀nɛ̀ gbee wò hwɛ̀lɛ̀hwɛ̀ Hvigi

(Mak 13.28-31; Luk 21.29-33)

32È wòwe èmɛ̀nɛ̀nì nà gbee wò hwehvùma ema wò hwɛ̀lɛ̀hwɛ̀ hvigi. È ɛni tɛ hwɛ̀kɔ̀kɔ̀ hwe eni hwe mà wòteyà tɛ lì kɛkɛ hweyàlì hwe hvènya, e hwiya nanù ema ehvuhva è ma kòmbɛ̀nɛ̀. 33Ŋgana hvɔ̀kɔ hvɛ mɛnɛ, è ɛni tɛ hwenè hweyà hwe arzɛ ndi hwe gbèyɛ̀nɛ, e hwiyè ema è Ŋmanà wà è Mòtò wà Hwènàmà à mà kòmbɛ̀nɛ̀ ò hwèjèelì hwe eni ndèŋgànɛ̀lɛ̀ à mà kòmbɛ̀nɛ̀. 34Nà e òhweyà è jɔ̀kɛ̀ ema, ène nyɔ̀ŋgɔ̀nì e rza ò ŋwa natɛ̀ɛ hwenè hweyà hwe arzɛ hwe ò gbèyɛnɛ. 35È ŋmanyu nà è rze hwe ò kùwa lì aka ndi hweyòhwèlì hwe ami hwe ò hwɛ ò i hvònda ja arzɛ.

Tɔ̀ mòtò a rza hwi wùùnya ema è Ŋmanà wà è Mòtò wà Hwènàmà à ò jɛ̀ɛ̀

(Mak 13.32-37; Luk 17.26-30,34-36)

36“Tɔ̀ mòtò tɔ̀ mɔ̀kɔ a rza hwi wòŋgò wùnyà tɔ̀ e hvònda ema hwene hweyà hwe gbèyɛ̀nɛ. Tɔ̀ i aŋgèlì ema i hwèlì ò ŋmanyu ya Lohwà tɔ̀ e Ŋmanà hwa rza hwi. Tatɛ̀ mɔ̀ ŋmìti ndi à hwi e hvònda ema hwene hweyà hwe ò gbèyɛ̀nɛ. 37Nà òmà e mà hwɛ ò e hvònda yà ama Nòwà nanù hvɛ mɛnɛ ndi e ò hwɛ nà hwejèelì hwe è Ŋmanà wà è Mòtò wà Hwènàmà. 38Ehwanja ò eŋge hvònda, ndèŋgànà malìhwà mà mbuwà ma e ònda e rze, hwatò hwà mà hwɛ lì laa na lì nyɔ, wùnyànà na hwalanà hwà mà hwɛ lì ahwàanɛ̀, natɛ̀ɛ na wòŋgò wùnyà ema Nòwà ama kpèeyà ò wòŋgò wɔ̀lɔ̀ wò ndɛ̀nɛ. 39Ndi tɔ̀ nanù, wɔ̀ hwa rzi ayèmbɛ mamɛ ema e ma hwɛ lì gbèyɛ̀nɛ natɛ̀ɛ malìhwà mà mbuwà ma ɛkɛ̀meyà ma hwa indirzɛ. Nànù mɛnɛ hvɛ ndi e hwɛni lì hwɛ̀ ò e hvònda ema è Ŋmanà wà è Mòtò wà Hwènàmà a ò jɛ̀ɛ̀. 40O eŋge hvònda hwatò hwahwàkɛ hwa ò hwɛ lì gbeyà èwòlò ò hvaya, Lohwɛ̀ a wòwa mɔ̀kɔ, ɔ̀nɛyi a lìiya aŋga. 41Hwalanà hwahwàkɛ hwa ò hwɛ ò èki ema hwa kɔ̀kɔ̀ɔ̀ mòlelì, Lohwɛ̀ a wòwa mɔ̀kɔ, ɔ̀nɛyi a lìiya aŋga. 42O èŋgànɛ̀lɛ rzɔ inyɔ hvɛ e hwɛnì lì wòwa hvònda, èhwanja è rza hwi wùùnya ema Rzàŋgò ya anyu à ò jɛ̀ɛ̀ hvɛ. 43È òkànèyà tɛ è mòhwɛnèlì wa ndawò à mà hwiya tɛ e hvònda ema è ŋmìhwɛ̀ a ò jɛ̀ɛ̀ wùuwù, òma a lìya ɛ̀hvɛ̀nyɛ̀ ò lì ɔŋgeya e ndawò ya eni ndèŋgànɛ̀lɛ̀ a rzi imanɛlɛ ema e ŋmìhwɛ̀ a gbe e ndawò ya eni. 44O èŋgànɛ̀lɛ̀ rzɔ, inyɔ hvɛ e hwɛnì lì wòŋgirzɛnɛ i hvònda ja arzɛ èhwanja è Ŋmanà wà è Mòtò wà Hwènàmà à jà ò è hvònda ema e rza hwìyahwɛ̀.

È mògbèèlì wà gbamù nà è wà wòhwe

(Luk 12.41-48)

45“Njɛnɛ rzɔ a hwèlì e mògbèèlì hwa lìhwiyè na e jɔ̀kɛ̀ e? Mɔ̀ ndi rzàŋgɛ wa eni wa èwòlò a ŋgba e wònja ò lì kànèyà hwanɛ̀yi hwàgbèèlì ò lì hwa ŋgba mòlelì mò awu ò e hvònda ema e hvòmɛ̀nɛ̀. 46Mònàmɛ̀ mò hwèlì na òŋgò mògbèèlì ema rzaŋgò wa eni wa èwòlò a timbi tɛ rzìi a mò ùŋmanɛlɛ a gbeyà mamɛ ema à mà mò òhweyà nanù ema a gbèèye. 47Nà e òhweyà ndi e jɔ̀kɛ̀, a mò ika ò lì kànèyà erzaŋgò ya eni ya arzɛ. 48Ndi òŋgò mògbèèlì a hwèlì tɛ wa wòhwe, rzìi a òhwanɛ̀lɛ ò ŋmèma mò eni nanù ema, ‘Rzàŋgò wa ami wa èwòlò a ò indeya ndèŋgànà a e timba.’ 49Rzìi à wòteya lì anana hwanɛ̀ hwàgbèèlì na lì laana na lì nyɔ̀ɔnɔ hwatò hwa mbòma. 50È rzaŋgò wa èwòlò wa ama òŋgò mògbèèlì a ò jà ò wùnyà tɔ̀ e hvònda ema mɔ̀ à rza mò àhvìtɛ̀. 51È rzaŋgò wa eni wa èwòlò e mò kɔ̀kìrzɛ̀ hwekɔkirzelì hwe ŋginyà. A mò kɔ̀kìrzɛ̀ na òma mɔ̀ a kɔ̀kìrzɛ̀ hwatò hwa mèhvìlì ò èki ema a ò eeya na lì kɔ̀kɔ mehvehve.”

Currently Selected:

Matiyò 24: bri

Highlight

Copy