Matiyò 19

Yerzù a òkòlɛ lì hvòmɛ̀nɛ̀ lì òŋwa la lìhwa

(Mak 10.1-12)

1Nà òma Yerzù à mà kulɛ̀ lì òhwa hwenè hweyà à mà anjiya ò erzòòkà yà Galìlì rzìi à ɛ̀ndɛ ò erzòòkà yà Jùdeyà rzìi à aka ò mòrzò mò Jɔdànì. 2Ŋgindi ndɛnɛ yà hwatò ema mò nɔ̀ŋgɔ rzìi à kùwa lì wɔ̀wìrzɛ̀ hwaŋga hwa arzɛ ema hwa mà ɔ̀kirzɛ̀ aŋga. 3Lòŋgò là Ihvalìrzàyì hwa mò jèeyà ò lì mò rzɔ njɔ̀mì, rzìi hwa mò ijòwa nanù ema, “È mbenda è ŋgbelì wònja nanù ema mòtò à òŋwe lìhwa è rzi hwɛ njɔ̀mì e?” 4Yerzù rzìi à hwa timbirzɛlɛlɛ nanù ema, “È rzìi laŋgì ò è kààtì yà Lohwà nanù ema natɛ̀ɛ nà ò hwèwòtèlì Lohwɛ̀ à mà hwa wèka wɔ̀ munyanà nà mòlanà e? 5Lohwɛ̀ rzìi a òhwa nanù ema, ‘Ene ŋgàna ɔ̀ndeŋgàtɛ̀ ŋmanà wa munyanà a hwɛ̀mɛ̀ rzàŋgɛ na nyàŋgɛ rzìi a uŋma jòjìyɛ̀ wa eni rzìi hwahwàkɛ hwa alàtànɛ̀ ò lì hwɛ mòtò mɔ̀kɔ.’ 6Hwa mà jà rzɔ ndi mòtò mɔ̀kɔ hwa rza enje hvɛ hwahwàkɛ ò èŋgànɛ̀lɛ̀ rzɔ mamɛ ema Lohwɛ̀ a làti mòtò wà hwènàmà a rzi keka lì e wùùlɛ̀.” 7Ihvalìrzàyì hwa mà mò ijòwa nanù ema, “È hwèlì tɛ nanù, mamɛ ndeŋgàtɛ̀ Mòrzè à mà ŋgba hwatò e wònja nanù ema, mòtò a hwɛnì lì ŋgba jòjìyɛ̀ wa eni è kààtì ò lì uŋmɛ̀lɛ̀ nanù ema, hwà mà òŋwa lìhwa rzìi à mò hvayà à mà à ɛ̀ndɛ ònɛyi e?” 8Yerzù rzìi à hwa timbirzɛlɛlɛ nanù ema, “Mòrzè à mà e ŋgba wònja ema e òŋwe mààhwà ma anyu èhwanja mèèmà me anyu me eti. Ndi e rzi hwɛ nanù natɛ̀ɛ na ò hwewòtelì hwe ene rze. 9Nà e òhweyà na e jɔ̀kɛ̀ nanù ema tɔ̀ ima mòjòmɛ̀ ema mò hvayi e jòjìyɛ̀ ya eni e rzi hwɛ ema ò nyòla ya mòrzònje mò lìhwa eŋge tumba mòtò e hwàyi tɛ òhvɛhvɛ mòlanà nanù òma a undi e mbenda ya mòrzònje mò lìhwa.” 10Hwà-òkòwèlì hwa eni rzìi hwa mò òhweyà nanù ema, “È hwèlì tɛ ema nanù ndi hwètɛ̀yìrzèlì hwe mòjòmɛ̀ na e jòjìyɛ̀ ya eni hwe hwèlì nanù òma ò hwèlì gbamù ema mòtò a rzìi hwaa rzɔ.” 11Yerzù rzìi a timbirzɛlɛlɛ ama, “Rzeketɛ tɔ̀ ima mòtò ndì a emeyà hwene hwèyòkòlelì, lì aka tɛ hwaŋga hwatò mɛnɛ ema Lohwɛ̀ à mà ŋgbe. 12È hwɛni lì hwiya nanù ema, màandà mà kòki ɔ̀ndeŋgàtɛ̀ lòŋgò la hwatò hwa rza hwaa hwalana. Èhwanja nanù ndi lòŋgò la awu hwà mà ŋyahwɛnɛ, hwanɛ̀yi hvɛ hwatò ndi hwà mà hwa gbeyà ò lì hwɛ nanù, lòŋgò hvɛ hwa agbèelɛ ndi nanù aŋga nanù hwa gbèeyà èwòlò ya lìkànèyà là ama Lohwɛ̀. Inyɛ̀ e mɔ̀ ema a tanɛ ò lì emeyà hwene hwèyòkòlèlì inyɛ a hwe emeyà.”

Yerzù à nàmìrzɛ̀yì hwàna hwàrzàlì

(Mak 10.13-16; Luk 18.15-17)

13Lòŋgò la hwatò hwà mà jàneyà Yerzù hwàànà hwarzàlì ò lì arza nanù ema Yerzù a hwa hwàkɛ màa a hwa kanɛ̀lɛ̀lɛ̀. Ndì hwà-òkòwèlì hwa eni hwà mà lòmeya e wɔ̀ ema hwà mà hwa jànà. 14Yerzù rzìi a hwa òhweyà ama, “È hwɛmɛ hwàànà hwarzàlì hwa jèe na imba e rzi keka lì hwa iŋga èhwanja ini nyayi ja hwatò ndi i hwɛnì lìkànèyà là ŋmanyu.” 15Nà òma à mà kulɛ lì hwa hwàkɛ màa rzìi a anjiya aŋga a ɛ̀ndɛ e ya eni.

Èwàŋgì ya mòtò na lìkànèyà là ŋmanyu yà lohwà

(Mak 10.17-31; Luk 18.18-30)

16Mòtò mɔ̀kɔ à mà jèeyà Yerzù rzi à mò ijòwa nanù ema, “Ìi Mòòkòlèlì, i ma lìtumba la eyà ya gbamù ema na hwɛni lì gbeyà ò lì lùwa lòŋgɛ la gbìndèyà e?” 17Yerzù rzìi a mò alàhwɛ̀ nanù ema, “Mamɛ ònò ijòwàna lì hvòmɛ̀nɛ̀ hweyà hwe lɔ̀wu e? O hwèlì ndi mòtò mɔ̀kɔ mɛnɛ ema a hwèlì e mòtò wa gbamù. O arza tɛ lòŋgɛ la gbìndèyà, ika imbenda.” 18Oŋgò mòtò rzìi a mò ijòwa nanù ema, “Ima mbenda e?” Yerzù rzìi a mò timbirzɛlɛ nanù ema, “O rzi òŋwa mòtò, ò rzi gbeyà mòrzònje mò lìhwa, ò rzi ihwa, ò rzi tɛ̀mɛ̀ mbòŋgi ya mòlàŋgà, 19luwɛ rzɔ̀ŋgɛ na nyɔ̀ŋgɛ rzìi ò lìŋgàne hvɛ ŋmànyàŋgò wa aŋgɔ̀ na òma wa àlìŋgànɛ ò wà witi.” 20Eŋge erzɔ̀mbɛ̀ ya mòtò rzìi e a alàhwɛ̀ nanù ema, “Nà ma ika ini mbenda ja arzɛ. Mamɛ hvɛ na hwɛni lì gbeyà e?” 21Yerzù rzìi a mò alàhwɛ̀ hvɛ nanù ema, “O arza tɛ lì hwɛ ema ò rza òhvɛ njɔ̀mì, ɛ̀ndɛ ò àhwirzɛ̀ lìrzàŋgò la aŋgɔ̀ la arzɛ ò ŋgbe mèlìrza me hwatò wòŋgò wòlì. O gbe tɛ nanù, ò luwa mònàmɛ̀ ò ŋmanyu yà lohwà. Eŋge hvònda ndi ò nò nɔ̀ŋgɔ.” 22Nà òma eŋge erzɔmbɛ ya èwàŋgì e ma hweye nanù, rzìi a ɛ̀ndɛ na ŋmèma mò rzɔ̀luu èhwanja à mà hwɛ ndi èwàŋgì ndɛnɛ.

23Yerzù rzìi a òhweyà Hwà-òkòwèlì wa eni nanù ema, “Nà e òhweyà ndi e jɔ̀kɛ̀ ema e ambani èhwàŋgì ya mòtò ò lì kpèeyà ò lìkànèyà la ŋmanyu yà lohwà. 24Nà e òhweyà hvɛ ema, e rza ambani èembè nàa e Kamɛlì ò lì akeyà ò lìhvɔ̀ndi la ndɔ̀ndɔ̀kì, ndi e ambani èwàŋgì ya mòtò ò lì kpèeyà ò lìkànèyà là ama Lohwɛ̀.” 25Nà òma Hwà-òkòwèlì hwa eni hwà mà hweye nanù hwà mà tàmà rzayì-rzayì rzìi hwa mò ijòwa ema, “Njɛnɛ rzɔ a tànɛyi lì rzùŋgahwà e?” 26Yerzù rzìi a hwa ɔ̀ŋgɔ kòò, rzìi a hwa alàhwɛ̀ nanù ema, “Ene eyà ya ambani mòtò wa hwènàmà ndi e hwèlì tɛ na Lohwɛ̀, hwe arzɛ hwe gbèyɛ̀nɛ.” 27Pètrò rzìi a ijòwa Yerzù nanù ema, “Ɔ̀ŋgɔ tɛ, irzɔ i hwɛmi hwe arzɛ ò lì ò nɔ̀ŋgɔ! Mamɛ rzɔ e ò hwɛ mɔrzɛŋgi mò arzu e?” 28Yerzù rzìi a tìmba hvɛ lì hwa òhweyà nanù ema, “Nà e òhweyà ndi e jɔ̀kɛ̀ e hvònda ema è Ŋmanà wà è Mòtò wà Hwènàmà a ò lìya ò mbòkò ya lìkànèyà la eni la èluhwe, ò e rze ema e ò jɛ̀ɛ̀ inyɔ lìyòme la hwatò na hwahwakɛ ema e nò nɔŋgi e ò lìya ò mbòkò ja lìkànèyà ò lì kàyìrzɛ̀ lìyòmɛ̀ la matumba na mahwakɛ ma Irzàyɛ̀lì. 29Tɔ̀ ima mòtò hvɛ ema à mà hwɛmɛ mandawò me enì, wònyànyàŋgò tɔ̀ indòmɛ ja eni, e rzaŋgò tɔ̀ e nyàŋgò, hwàànà na erzaŋgò ya eni ya arzɛ ò nyòla ami a hwe lùwa egbe ya ŋgelì, a lùwa hvɛ lòŋgɛ la gbìndèyà. 30Ndi rzayì-rzayì naŋgɛ ema hwa hwèlì ò wòrzò wɔ̀ ndi hwa ò lìiya ò mburza, rzayi-rzayi hvɛ ema hwa lìyelì ò mburza wɔ̀ ndi hwa ò hwɛ ò wòrzò.”

Currently Selected:

Matiyò 19: bri

Highlight

Copy