Matiyò 17

È nyò ya ama Yerzù è mà ayeŋgòwɛ̀

(Mak 9.2-13; Luk 9.28-36)

1O mburzà yà mèènyà mòtòhwa Yerzù rzìi a wòwa Pètrò, Jèmìrzì, na Jèmìrzì ŋmanyàŋgò wa enì Yòwanìrzɛ̀ rzìi a hwa timba ò hvàko ema e kàrzamì ò ekì ema hwà mà hwɛ wɔ̀ mɛnɛ. 2Aŋga rzɔ ndi Yerzù à mà atikòwɛ ò wòrzò wò awu, wòrzò wa eni wò ma hvànya ndi nàa igbèyi, lìhwatù la eni hvɛ lì ma ayèŋgòwɛ̀ mbɔmi yà ŋmàye mò rzɛŋgɛ-rzɛŋgɛ. 3Liwòkimɛnɛ Hwà-òkòwèlì hwa eni rzìi hwa ɛnɛ nà òma Mòrzè nà Èlàyijà hwà mà wurze rzìi hwa wòteyà lì òhwìrzɛ̀nɛ̀ Yerzù. 4Pètrò rzìi a òhweyà Yerzù nanù ema, “Rzàŋgò ò lɔ̀wu na òma i hwèlì anù. O lìŋgàni tɛ nà òŋga màwòndò màyàwò, lɔ̀kɔ lì hwɛ ndi è là aŋgɔ̀, Mòrzè hvɛ lɔ̀kɔ, lìnɛyi hvɛ e là ama Èlàyijà.” 5Nà òma à mà hwɛ lì òhwa, lìmbàkì ema lì ma ɛneya rzìlìhwà lì ma hwa hwànda, lìlò lì ma wurza ò lìŋgi lìmbàkì lì ma òhwa ema, “È Ŋmanà wà ami wà ndìŋgɛ ya màlìŋgò ònò, ema a nò òkirzɛ̀ mɔ̀nyɛ̀ŋgì, e mò hweyàne!” 6Nà òma Hwà-òkòwèlì hwa eni hwà mà hweye lìŋgi lìlò, hwà mà lɛmbeya mòkambiya, rzìi hwa rzuma màwɔ̀ŋgɔ̀ŋgɔ ma awu nà marzò ma awu ò rze. 7Yerzù à mà ɛndɛ ò èki ema hwà mà hwɛ rzìi a hwahwakɛ̀ màà mà eni. Rzìi à òhwa nanù ema, “È tɛ̀mɛ̀, e rza òka wɔ̀ŋgɔ̀.” 8Ndi nà òmà hwà mà karzɛ màrzò ma awu hwa rzi ɛnɛ hvɛ tɔ̀ mòtò lì aka tɛ Yerzù mɔ̀ mɛnɛ. 9Nà òmà hwa mà hwɛ lì rzìhwa ò èŋge hvàko, Yerzù rzìi a hwa kànèyà nanù ema, “È rzi kèka lì òhweyà tɔ̀ mòtò mamɛ e ɛni natɛ̀ɛ nà è hvònda ema Lohwà à ò hvùmùlɛ̀ è Ŋmanà wà è Mòtò wà Hwènàmà.” 10Hwà-òkòwèlì hwa eni rzìi hwa mò ijòwa nanù ema, “Mamɛ ndeŋgatɛ Hwà-òkòlèlì hwa mbenda hwa òhwa nanù ema, Èlàyijà ndi à lòma lì jà ndèŋgànà è Mɔ̀ ema à Ɔ̀kirzɛ̀hwɛ̀yi e?” 11Yerzù rzìi a hwa alàhwɛ̀ nanù ema, “Nà è jɔ̀kɛ̀, Èlàyijà ndì a hwɛni lì lòma lì jà, ò lì tɛ̀yirzɛ̀ hweyà hwè arzɛ gbamù. 12Ndi nà è òhweyà ema Èlàyijà à mà màà lì jà, ndi hwa rzi mò embe, hwa mà mò gbeyàna ndi nà òmà hwà mà lìŋganè. Nànù mɛnɛ hvɛ ndi è Ŋmanà wà è Mòtò wà Hwènàmà mɔ̀ hvɛ à ò tàkɛ ò màà mà awu.” 13Aŋga ndi Hwà-òkòwèlì hwa eni hwa a ayèmbɛ nanù ema a òhwa ndi lì hvòmɛ̀nɛ̀ Yòwanìrzɛ̀ è Mòlùhwìrzèlì.

Yerzù à mà wɔ̀wìrzɛ̀ e ŋmanà mberza ema èlìŋgɛ̀ ya wòhwe e ma kànèyà

(Mak 9.14-29; Luk 9.37-43a)

14Nà òma Yerzù na Hwà-òkòwèlì hwa eni hwà mà timbè ò lì ùŋmànɛ̀lɛ̀ e ŋgìndì ya hwatò, mòtò mɔ̀kɔ à mà jèeyà Yerzù rzìi a mò rzùmeya màwɔ̀ŋgɔ̀ŋgɔ̀ ò wòrzò wa eni a mò òhweyà ama, 15“Ìi Rzàŋgò òkeya e ŋmanà wà ami wà mùnyanà ììlì! À hvòkòwa, à tàka rzayì-rzayì, à yɔ̀ki hvɛ lì kpa ò tenì yà mùnya nà malìhwa. 16Nà mà mò jàneyà Hwà-òkòwèlì hwa aŋgɔ̀ ndi hwa rzìi tanɛ lì mò wɔ̀wìrzɛ̀.” 17Yerzù rzìi a alàhwɛ̀ nanù ema, “Bɔ̀ɔ! Inyɔ ene nyɔ̀ŋgɔ̀nì yà wòhwe ema è rza hwɛ̀nɛ̀ lìlòkɛ̀, nà hwɛ nà inyɔ natɛ̀ɛ nà rzìtii e? Nà è ajùlɛ̀nɛ̀ hvɛ natɛ̀ɛ nà ima hvònda e? È nò jàneyà òŋgò ŋmanà ònò.” 18Yerzù rzìi a kànèyà eŋge èlìŋgɛ̀ ya wòhwe rzìi e wurza òŋgò ŋmanà wa munyanà, lìwòkimɛnɛ a wɔ̀wɔ̀. 19O mburza hvònda Hwà-òkòwèlì hwa ama Yerzù hwà mà mò jèeyà rzìi hwa mò ijòwa ò wùndɛ̀ nanù ema, “Mamɛ ndeŋgatɛ irzɔ i rza tàneyà lì hvayà ene èlìŋgɛ̀ ya wòhwe e?” 20Yerzù rzìi a hwa alàhwɛ̀ nanù ema, “Inyɔ e rzi tànɛyi lì hvaya eŋge èlìŋgɛ̀ èhwanja lìlòkɛ̀ la anyu lì rza òlò. È hwɛni tɛ lìlòkɛ ema lì òlò ndi nàa ŋmanà hvɔ̀ŋgɔ̀ wa wòrzaŋgò, e tànɛyi e kànèyà mònò mòoli nanù ema, ‘Anjiya anu, ò ɛ̀ndɛ ɔnɛyi!’ Ndèŋgànà mò ɛndɛ. È tànɛyi lì gbeyà tɔ̀ mamɛ.” 21O rza enje tɔ̀ eyà ema e tànɛyi lì hvaya ini nyayi ja hwèlìŋgɛ lì aka tɛ màkanɛ̀ na mòkìyà njàwò. #17.21 Lòŋgò la ikààtì ja wòrzò i rza òhvi ene ehvarzù.

Yerzù à mà timba lì òhwa hvɛ lì hvòmɛ̀nɛ̀ e kpelì ya eni

(Mak 9.30-32; Luk 9.43b-45)

22Nà òma Yerzù nà Hwà-òkòwèlì hwa mà arzàŋganɛ ò erzòòkà yà Galìlì, Yerzù rzìi a hwa òhweyà nanù ema, “È Ŋmanà wà è Mòtò wà Hwènàmà à ò ŋgbààhwà ò màà mà hwatò, 23hwa mò òŋwa ndi ò mèenyà me ùkirzɛ̀ meyawò a ò hvùmùlɛ̀hwɛ na Lohwɛ̀.” Ndi Hwà-òkòwèlì hwa eni hwà mà hweye ene eyà, hwà mà lɛmbeya ndùtù rzayì-rzayì.

Yerzù à rzàawi è njàŋge yà è Ndawò yà Lohwà

24Ndi na òma Yerzù na Hwà-òkòwèlì hwa eni hwà mà ùke ò e mbòwa ya Kàpɛ̀nàwɔ̀mì, hwàrzàŋgèlì hwa è njàŋge yà è Ndawò yà Lohwà hwà mà jèeyà Pètrò rzi hwa mò ijòwa nanù ema, “È Mòòkòlèlì wà anyu mɔ̀ à rzàawà è njàŋge ò Ndawò yà Lohwà e?” 25Pètrò rzìi a hwa alàhwɛ̀ nanù ema, “Ɛ̀ɛ, à è taŋga.” Nà òma Pètrò ama kpeya ò ndawò, Yerzù rzìi a lòma lì mò òhweyà nanù ema, “Ìi Rzìmɔ̀nì mamɛ ò wa ò ɔ̀ŋgɛ̀lɛ̀ e? Njɛnɛ a rzàawà e njàŋge ya wònja na e yà lìkànèyà ò ma ikiŋgɛ ja ene rze e? I wònja ja èkòmè ŋga hwàyɛ̀ni e?” 26Rzìi à mò alàhwɛ̀ nanù ema, “Hwàyɛ̀nì.” Yerzù rzìi a mò alàhwɛ̀ nanù ema, “Eŋge ŋgàna e hwèlì ndi nanù ema i wònja i rza hwɛnì lì rzàawa.” 27Ndi ò lì arza nanù ema i rza hwa tàtìrzɛ̀, ɛ̀ndɛ ò yulu ò aŋgbe lìyɔ̀hwi la aŋgɔ̀. È nyàmà ya wòrzò ema o ò lɛ̀mbɛ, ò e lìhvòhwè e wàna ò ùŋmanɛlɛ kahvà ema i lòŋgamɛnɛ ò lì jò rzaweya e njàŋge ya arzu ya e ndawò yà Lohwà. O ji wòwe ò ɛndɛ ò jò rzaweya e njàŋge ya arzu ya e Ndawò ya Lohwà.

Currently Selected:

Matiyò 17: bri

Highlight

Copy