Yòwanìrzɛ̀ 12

Yerzù à ɔ̀kirzɛ̀hwɛ̀yi ò Bɛ̀tanì

(Mat 26.6-13; Mak 14.3-9)

1Hweyu hwàmbi ndèŋgàna è Ndèma yà lì Akà Ɔ̀nɛ̀yi e uka, Yerzù à mà ɛ̀ndɛ ò Bɛ̀tanì, èki ema Làrzàrɔ̀rzì à mà lìya, e mòtò ema à mà hvùmùlɛ̀ ò kpelì. 2Hwà mà mò wòŋgìrzɛ̀nɛ̀ jùùmɛ̀ ja lì làa, ema iyɛ Mata à mà òŋgòwànè lì hwa hvùrzùhweyà. Làrzàrɔ̀rzì mɔ̀hvɛ à mà hwɛ mɔ̀kɔ wà awu ema à mà hwɛ èki ya hwèlèelì na Yerzù. 3Rzìi Màlìyɛ̀ à wòwa ilùka rzùrzu jà lìyɔ̀kì là hvɛ̀ɛ̀hvɛ̀ lì andahwɛnɛyi nà wòlì ema wò kòki. Liŋgi lìyɔ̀kì lì mà gbeyàhwɛlɛ ndi nà nàdì.#12.3 Nàdì: Nàdì à hwèlì ndi mbònji ema è òhvi èrzunju yà hvɛ̀ɛ̀hvɛ̀ ema hwa mà hwɛ lì gbeyàna màwɔ̀kì mà è èrzunju yà hvɛ̀ɛ̀hvɛ̀. À mà lì nyàlɛ̀ là arzɛ ò matàŋga mà ama Yerzù, rzìi à tìtòwa mataŋgà mà ama Yerzù nà lìhvumbu là eni là mòhvò. Èŋge èrzunju yà hvɛ̀ɛ̀hvɛ̀ è mà nyàlà ò è ndawò yà arzɛ. 4Jùdàrzì Ìrzìkalìyɔ̀tɛ̀ mòòkòwèlì mɔ̀kɔ wà ama Yerzù ema mɔ̀ndi à mà hwɛnɛ lì mò àhwirzɛ̀ rzìi à òhwa nanù ema, 5“Mamɛ ndèŋgàtɛ̀ hwa rzìi àhwirzɛ̀ lìni lìyɔ̀kì, rzìi hwa wòwa iŋgi kahvà lì ɛndɛ lì ŋgbà mèlìrza mè hwatò e? Ò mà lìni lìyɔ̀ki lì wurzi wòlì wò lì taŋgeya mòtò mɔ̀kɔ ò ŋma mɔ̀kɔ.” 6À rzìi òhwe ndi ene eyà èhwanja à mà lutaneya mèlìrza me hwatò gbamù, ndi èhwanja à mà hwɛ ndi ŋmìhwɛ̀. Mɔ̀ ndi à mà òhva lìyamba la wòlì, à mà hwɛ lì a òŋgòwanɛ mɔ̀ ŋmìti na wòŋgò wòlì. 7Ndi Yerzù à mà òhwa nanù ema, “Ò mò hwɛ̀mɛ̀ hviyàyii! À ute lìyɔ̀kì ema lì lìyelì, aŋga nanù lì ò gbeyànɛ̀hwɛ̀ ò wùnyà ema nà ò imàyɛ̀lɛ̀hwɛ̀. 8Mèlìrza mè hwatò hwa hwèlì nà inyɔ hvònda tɛ, ndi imba nà rza hwɛ nà inyɔ hvònda tɛ.”

Hwà mà kimeya Làrzàlìyɔ̀tɛ̀

9Ŋgindi ndɛnɛ ya wònyà Yudà e ma hwèya nanù ema Yerzù a hwèlì ò e mbòwà ya Bɛ̀tanì. O èŋgànɛ̀lɛ̀ hwà mà ɛ̀ndɛ aŋga. Rzekɛ hvɛ tɛ ema Yerzù a hwèlì aŋga ndi ò lì ɛnɛ Làrzàrɔ̀rzì ema Yerzù à mà timbirzɛ ò lòŋgɛ. 10O èŋgànɛ̀lɛ̀ Ipìlìrzì ndɛnɛ i ma weka ŋmanò ò lì òŋwa hvɛ Làrzàrɔ̀rzì. 11Èhwanja hwatò rzayi-rzayi hwa wònyà Yudà hwà mà hwɛ lì hwa kumbɛ imburza ò lì lòkɛ̀ Yerzù wɔ̀ hwà mà lòkɛ̀ Yerzù lì hvòmɛ̀nɛ̀ mamɛ ema e ma gbèyɛ̀nɛ Làrzàrɔ̀rzì.

Yerzù a kpèelì nàa Kìŋgɛ ò Jèrurzalɛ̀mù

(Mat 21.1-11; Mak 11.1-11; Luk 19.28-40)

12O ɛnɛyi eyu, e ŋgìndì ndɛnɛ ema e ma ja ò Ndema ya lì Akà Ɔnɛyi e ma hwèya nanù ema Yerzù a hwèlì a ja ò mbòwà ya Jèrurzalɛ̀mù. 13Rzìi hwa kɛ̀ inyàŋgò, hwa ɛ̀ndɛ lì mò ùŋmànɛ̀lɛ̀ ò njiya. Hwa mà hwɛ lì tɛ̀ɛ nanù ema, “Hòrzanà! Mònàmɛ̀ nà è mɔ̀ ema à jelì ò lìnà là ama è Rzàŋgò. Mònàmɛ̀ nà è Kìŋgɛ yà hwatò hwa Irzàyɛ̀lì!”

14Yerzù à mà ɛnɛ ŋgumà jàkarzì rzìi à jì lìya. Ène eyà è mà gbèyɛ̀nɛ̀ nà òma è tìlahwì ò è Kààtì yà ama Lohwà nanù ema,

15“Hwatò hwa Rzàyɔ̀nì è rza òka wɔ̀ŋgɔ̀,

è ɔ̀ŋgɔ tɛ è Kìŋgɛ yà anyu nà òma è jà,

à lìyàyi ò ŋgumà jàkarzì.”

16Nà òma hwene hweyà hwe mà gbèyɛ̀nɛ̀, hwà-òkòwèlì hwa eni hwa rzi hwe rzɔ̀ŋgìtɛ̀nɛ̀. Ndi nà òma Yerzù à mà hvùmùwè nà èluhwe yà ama Lohwà, rzìi hwa ɔ̀ŋgɛ̀lɛ̀ nanù ema hweyà ema hwe mà gbèyɛ̀nɛ̀ lì hvòmɛ̀nɛ̀ Yerzù, hwe mà lòma lì tìlahwa.

17È ŋgindi ema è mà hwɛ nà Yerzù è hvònda ema à mà hwɛlɛ Làrzàrɔ̀rzì ò rzɔ̀ŋgɔ̀ rzìi à mò timbirzɛ ò lòŋgɛ, wɔ̀ hwa mà hwɛ lì nyàlirzɛ̀ meŋge meyàŋgò. 18Lìtìŋga lìŋgi ndèŋgàtɛ̀ è ŋgìndì è mà ɛndɛ lì ùŋmanɛlɛ Yerzù èhwanja hwa mà hwèya nanù ema à gbèye manù mànyakà mà hweyà. 19Ihvàlìrzàyì rzìi i àwòhwànɛ̀lɛ̀ mɔ̀kɔ nà ɔ̀nɛyi nanù ema, “È ɔ̀ŋgɔ tɔ̀ nàŋgɛ nanù ì rza tànɛyi lì gbeyà tɔ̀ eyà. È rze ya arzɛ e hwèlì e mò òŋgama.”

Hwatò hwa Grìki hwa arza Yerzù

20Lòŋgò la hwatò hwa Grìki hwà mà hwɛ na hwanɛ̀yi hwatò ema hwà mà ɛ̀ndɛ ò Jèrurzalɛ̀mù lì kanɛ̀ ò e hvònda ya è Ndèma yà lì Aka Ɔ̀nɛyi. 21Hwà mà ɛ̀ndɛ òma Hvìlìpì. Hvìlìpì à mà uwɛ̀lɛ̀lɛ̀yi ò e mbòwà ya Bɛ̀trzàyìdà e hwèlì ò erzòòkà ya Gàlìlì. Rzìi hwa mò òhweyà nanù ema, “Ìi rzàŋgò kòkò, i arza lì ɛnɛ Yerzù.” 22Hvìlìpì à mà ɛ̀ndɛ lì òhweyà Àndèlè. Rzìi wɔ̀ hwahwàkɛ hwa ɛ̀ndɛ lì òhweyà Yerzù. 23Yerzù rzìi a hwa alàhwɛ̀ nanù ema, “È hvònda e ma uka ema èluhwe ya ama è Ŋmanà wà è Mòtò wà Hwènàmà e hwɛni lì ɛnɛhwɛ. 24Nà e òhweyà e jɔ̀kɛ̀ nanù ema, hvɔ̀ŋgɔ̀ ya mbarzi e lìiya ndi èŋge hvɔ̀ŋgɔ̀ ya ahvɔ̀kɛ mɛnɛ natɛ̀ɛ e ònahwa ò mɔ̀nyɛ̀ rzìi e ŋwa. È ŋwelì tɛ èŋge hvònda ndi e ŋya i hvɔ̀ŋgɔ̀ ja mbarzi jɔ̀ɔjɔ̀ɔ. 25Hwàŋga hwatò ema hwa lìŋgàni lòŋgɛ là awu wɔ̀ hwa lì wɔ̀lɛ̀nɛ̀. È wɔ̀ ema hwa kɔ̀wu lòŋgɛ là awu anù rze hwa lì uta ò lòŋgɛ là gbìndèyà. 26Tɔ̀ ima mòtò ema à nò gbèeyà à àŋgàmɛ̀nɛ̀yi lì hwɛ è mògbèèlì wà ami. Tɔ̀ ima èki ema nà hwèlì è mògbèèlì wa ami mɔ̀ hvɛ à àŋgàmɛ̀nɛ̀yi lì hwɛ aŋga. Tɔ̀ ima mɔ̀ ema à nò gbèèlì, Tatɛ̀ wa ami à mò ŋgbà èluhwe.

Yerzù à òhwi lì hvòmɛ̀nɛ̀ è kpelì yà eni

27“Nàŋgɛ nanù nà tàkirzɛ̀hwɛ̀yi ò mèèmà mò ami. Ò èŋgànɛ̀lɛ̀ mamɛ nà hwɛnì lì òhwa e? Nà òhwe ndi nanù ema, ‘Tatà ò rzìi emeyà nanù ema mònò mòtàkà ema mò òŋgòlɛyi mò nò ùŋmànɛ̀lɛ̀.’ Jàyɛ̀! Nà rza òhwa nanù, èhwanja ene hvònda yà mòtàkà è ɔ̀ndi nà jɛ̀lɛ̀lɛ̀yi. 28Ìi Tatà, uŋmɛ̀lɛ̀ èluhwe ò lìnà là aŋgɔ̀!” Rzìi lìlò lì òhwa ò ŋmanyu yà lohwà nanù ema, “Nà ŋgbelì lìinà là ami èluhwe, ò èŋgànɛ̀lɛ̀ nà lì ŋgbà hvɛ èluhwe.” 29È ŋgìndì ema è mà tɛ̀mɛ̀ aŋga è mà hwèya lìŋgi lìlò. Lòŋgò là hwatò hwa mà òhwa ndi nanù ema, è ŋgalà à lohwà ndi è kandèlì nanù. Hwanɛ̀yi hwa mà òhwa hwà ama, aŋgèlì yà ama Lohwɛ̀ ndi è mò òhwàni. 30Yerzù rzìi à hwa òhweyà nanù ema, “Rzekɛtɛ ò nyòla yà ami ɔ̀ndeŋgàtɛ̀ lìni lìlò lì òhwi, ndi ò nyòla yà anyu. 31O nàŋgɛ nanù e hvònda ene ema Lohwɛ̀ a kàyìrzɛ ene rze. Nàŋgɛ nanù e mòkànèlì wà ene rze a hweni lì kàyìrzɛ̀hwɛ. 32Nà mà kàrzɛhwɛ tɛ ò ene rze, na rzìima hwatò hwa arzɛ ò nyò ya ami.” 33(Yerzù à mà òhwa ndì nanù ò lì uŋmɛ̀lɛ̀ e nyayi ya kpelì ema mɔ̀ à mà hwɛnɛ lì ŋwa). 34È ŋgìndì rzìi e mò alàhwɛ̀ nanù ema, “È mbenda ya arzu e jò òhwèlì nanù ema, ‘È Mɔ̀ ema a Ɔ̀kirzɛ̀hwɛ̀yi à hwɛ natɛ̀ɛ nà ò mòlìkɛ̀.’ Nɛ rzɔ ò wa ò tànɛyi lì òhwa nanù ema, ‘È Ŋmanà wa e Mòtò wa Hwènàmà a àŋgàmɛ̀nɛ̀ lì karzɛhwɛ ò ŋmanyu e?’ Njɛnɛ rzɔ a hwèlì ònò ‘Ŋmanà wà è Mòtò wà Hwènàmà e?’” 35Yerzù rzìi à alàhwɛ̀ nanù ema, “Ŋmaye mò hwɛ na inyɔ ò ŋmana hvòka wa hvònda. È ɛ̀ndɛ ò wòrzò nàŋgɛ ema e òhvi mònò ŋmàye, aŋga jììtìtì i rza e lìŋgɛ̀lɛ̀. È mɔ̀ ema ayɛ̀ndɛya ò jìtìtì a rza hwi èki a ɛ̀ndɛ. 36È lòkɛ̀ ŋmàye, nàŋgɛ ema mò hwèlì na inyɔ, aŋga nanù e hwɛ ndi hwàanà hwa ŋmàye.”

Wònyà Yudà hwa rzi timbi lì lòkɛ̀ Yerzù

O mburza hwèyòhwèlì hwe ama Yerzù, rzìi a anjiya aŋga, a ɛndɛ lì utàmà èki ema hwa rzìi tànɛyi lì mò ɛnɛ. 37Tɔ̀ nɛ Yerzù à mà gbeye manù mànyakà ma arzɛ ò marzò ma awu, eŋge ŋgindi e rzi mò lòkɛ̀. 38Ène eyà è mà gbèyɛ̀nɛ ndi ò lì òndìrzɛ̀ hwèyòhwèlì hwe ama è mòòhwèlì wà èlìŋgɛ̀ Àyìrzayà ema hwe òhwa nanù ema,

“Rzàŋgò njɛnɛ à lòkɛ̀yi ŋmɛ̀ndì ema irzɔ i mà òhwe e?

Njɛnɛ à mà ɛnɛ è ŋginyà yà aŋgɔ rzìi à è embàneyà e?”

39Ò èŋgànɛ̀lɛ̀ hwa rzi tànɛyi lì lòkɛ̀. Àyìrzayà à mò òhwa ò èhvɛhvɛ èki nanù ema,

40“Lohwɛ̀ à mà tìmbìrzɛ̀ mììrzɔ̀ mà awu ndima, rzìi à hwa ŋgbà hvɛ mèèmà ema me eti,

aŋga nanù hwa rza ɛnɛ,

ndèŋgàna hwa rza rzɔ̀ŋgìtɛ̀nɛ̀.

Aŋga nanù hwa gbe tɛ nanù hwa nò tìmbeyà òma nà mà hwa wɔ̀wìrzɛ̀.”

41Àyìrzayà à mà òhwa ndi nanù èhwanja à mà ɛnɛ èluhwe ndɛnɛ yà ama Yerzù ɔ̀ndeŋgàtɛ̀ à mà òhwa lì mò hvòmɛ̀nɛ̀. 42Tɔ̀ nɛ hwatò rzayì-rzayì nà tɔ̀ lòŋgò là hwàmbakì hwa hwatò hwa mà lòkɛ̀ Yerzù. Ndi nà òma hwa mà òke Ihvàlìrzàyì wɔ̀ŋgɔ̀ hwa rzi à uŋmɛ̀lɛ̀ wɔ̀ hwiti, ehwànja hwa mà òka wɔ̀ŋgɔ̀ ema hwa ò hvàyàhwa ò tenì yà è ndawò yà màkanɛ̀. 43Hwa mà hwɛ lì gbeyà nanù èhwanja hwa mà lìŋgàna jeka jà hwatò lì aka è lɔ̀ là ama Lohwà.

È mbɔrzi yà ama Yerzù ndi è kàyìrzɛ hwatò

44Yerzù à mà òhwa ò lìlò lì kàrzami nanù ema, “Tɔ̀ ima mɔ̀ ema à nò lòkɛ̀yì, à rza nò lòkɛ̀yì ndi imba mɛnɛ, ndi à lòkɛ̀yì hvɛ nà e mɔ̀ ema a nò òmi. 45Tɔ̀ ima mɔ̀ ema a nò ɛni, a ɛni hvɛ e mɔ̀ ema a nò òmi. 46Nà jelì ndi ò rze nàa ŋmàye, aŋga nanù tɔ̀ ima mɔ̀ ema a nò lòkɛ̀yì imba a rzi lììya ò jìtìtì. 47Tɔ̀ ima mòtò a hweyi tɛ ŋmɛ̀ndì mò ami, rzìi a rzi mò ika, imba na rza mò kaya èhwanja na rza jelì ndi ò lì kàyìrzɛ̀ e rze ndi na jelì ndi ò lì e rzùŋga hwatò hwa ene rze. 48È mòtò ema a nò rzɔ̀rzi rzìi a rzi imanɛlɛ hvɛ ŋmɛ̀ndì mò ami, mɔ̀ à òhvi e mɔ̀ ema a mò kàyìrzɛ̀. È mbɔrzi ema na òhwi yɔ ndi e mò kàyìrzɛ̀ ò wùnyà wò hwèkàyìrzèlèlì. 49È ò hwɛ ndi nanù èhwanja na rza òhwa ndi hwene hweyà hwe arzɛ na lìkànèyà la ami. Ndi e Tatɛ̀ ema a nò òmi à mà nò rzèkeya mamɛ ema na hwɛni lì òhwa. 50Nà hwi nanù ema tɔ̀ ima lìtumba la eyà ema a nò òhwèlì ema na òhwe lì jànà lòŋgɛ la gbìndèyà. Mamɛ ema na òhwa nanù, e hwèlì ndi mamɛ Tatɛ̀ a nò òhwèlì à mà na òhwe.”

Currently Selected:

Yòwanìrzɛ̀ 12: bri

Highlight

Copy