Hwègbèèlì 24

Pàwolò a tɛmi ò hwèkàyìrzèlì ò wòrzò wò ama Hvɛlìkrzi

1O mburzà ya menya meta Ànàniyarzì e Pìlìrzì e Kàrzàmi, à mà ɛndɛ ò Kàyìrzèrìyà na lòŋgò la hwàkànèlì hwa e mbòwa na munyanà mɔ̀kɔ wa mbenda ema hwa hwɛlɛ Tetùlùrzi. Hwà mà jà ò wòrzò wò ama e mòkànèlì Hvɛlìkrzi rzìi hwa òhwa hweyà ema hwa òhwa nanù ema Pàwolò a gbèyi. 2Aŋga ndi hwà mà hwɛlɛ Tɛ̀tùlùrzì, rzìi a wòteyà lì òhwa hweyà lì teŋgɛ̀nɛ̀ Pàwolò nanù ema, “Mòkànèlì Hvɛlìkrzi kòkò, ò wa ema òhvi èluhwe ema e kàrzàmi, irzɔ i ma luwa ɛ̀yɔ̀lɛ̀ ema e wawi ò rze ya lìkànèyà la aŋgɔ, ndèŋgànɛ̀lɛ̀ lìhwiyè la aŋgɔ̀ lì ma jò jàneyà hwèlìhvòwelì hwe ndɛnɛ ema hwe jò janelì hvɛ gbaamù ò èkòmè ya arzu. 3Irzɔ i kàrzɛ hwene hweyà ò hweki hwe arzɛ na ò ihvònda ja arzɛ. O eŋgànɛlɛ jò ò eka rzàyi-rzàyi. 4Nà rza arza lì wòwa e hvònda ya aŋgɔ̀ rzayì-rzayì ò eŋgànɛlɛ rzɔ na ò rzòrzòmelì nanù ema ò gbeyàne ŋmèma mò aŋgɔ mò gbamù ò jò ŋgbèe ŋmanà hvòka wa hvònda ò lì òkànèyà mamɛ ema jò òhwa. 5Irzɔ i luu nanù ema ònò mòtò a hwɛ̀lɛ̀hwɛ̀ɛ Pàwolò a hwèlì ndi mòtò hwa mòhvùŋgu, ndeŋgànɛlɛ mɔ̀ à tinɛlɛ mòhvùŋgu ò tenì ya wònyà Yudà hwa arzɛ ò e rze ya arzɛ. Ndèŋgànɛlɛ mɔ̀ à hwèlì ndi mòtìmbèlì mɔ̀kɔ wa ehvehva ya Nàrzàlɛ̀nì. 6A ma arza hvɛ lì keka ò lì hvàŋga èluhwe ya e Ndawò yà Lohwà rzìi i mò lɛmbɛ.#24.6 Lòŋgò la ikààtì ema i ma lòma lì tìlàhwa, i làti hvɛ ehvàrzu ema e ùkirzɛ̀ 6b-8a: Irzɔ i ma kàkɛ̀nɛ ò lì mò kàyìrzɛ lì hvòmɛ̀nɛ̀ imbenda ja arzu. 7 Ndi Lìrzìyàrzì ema a hwèlì e mòtìmbèlì wa hwààna njuma à mà jà a jò hvɔ̀tɔ̀nɔ̀ e mɔ̀ na ŋginyà. 8 Lìrzìyàrzì rzìi a àka nanù ema e wɔ̀ ema hwa mò teŋgɛ̀nɛ̀yì hwa jèe hwa mò rzɔ̀mɔ̀nè ò mba aŋgɔ. 8O wà witi ò ijò tɛ ònò mòtò hweyà ema mɔ̀ à ò òhweyà ò wà witi ò ayèmbɛ nanù ema hweyà ema jò ò òhweyà hwe hwèlì ndi e jɔ̀kɛ̀.” 9Rzìi hwanɛ̀yi hwatò hwa wònyà Yudà wɔ hvɛ hwa làtà ò mene mèrzàmbelì ò lì òhwa nanù ema hweyà hwe arzɛ ema Tɛ̀tùlùrzì a òhwi hwe hwèlì ndi e jɔ̀kɛ̀.

Hwèkàyìrzèlèlì hwe ama Pàwolò ò wòrzò wò ama e mòkànèlì Hvɛlìkrzi

10Aŋga ndi e mòkànèlì Hvɛlìkrzi a à ŋgba Pàwolò ehvòlò ya lì òhwa eyà, Pàwolò rzìi a wòteyà lì òhwa nanù ema, “Imba na hwi nanù ema ò wa ò ma kàyìrzɛ meyaŋgò rzàyi-rzàyi ò tenì ya rzàyi-rzàyi ja meya ema me ma aka ò tenì ya ene èkòmè. Ndèŋgànɛlɛ na òka mɔ̀nyɛ̀ŋgì ò lì kaya ŋmàŋgò mò ami ò wòrzò wò aŋgɔ̀. 11O arzirzɛ tɛ, ò wà witi ò ɛnɛ nanù ema, ò luwa nanù ema ò rza akayi lìyòmɛ la menya na mehwàkɛ ema nà mà agbe ò Jèrurzalɛ̀mù ò lì ŋgbà Lohwɛ̀ èluhwe. 12Tɔ̀ wùnyà tɔ̀ wɔ̀kɔ hwatò hwa wònyà Yudà hwà rzi nò ùŋmanɛlɛ na tɔ̀wɔ na tɔ̀ mòtò tɔ̀ mɔ̀kɔ ò tenì ya e ndawò yà Lohwà. Ndeŋgànɛlɛ wɔ̀ hwa rzi nò ùŋmànɛ̀lɛ̀ ema na hwèlì lì keka ò lì tinɛlɛ hwatò ò lì gbeyà mòhvùŋgu ò tenì ya e ndawò ya màkanɛ̀ ya wònyà Yudà, tɔ̀ ò tenì ya e mbòwa ndɛnɛ. 13Hwa rza tànɛyi hvɛ tɔ̀ lì ò uŋmɛ̀lɛ̀ lìtiŋga lɔ̀kɔ ò hwenè hweyà hwe arzɛ ema hwa òhwa lì nò teŋgɛ̀nɛ̀. 14Ò jɔ̀kɛ̀ imba na imelì ò wòrzò wò aŋgɔ̀ nanù ema na gbèeyà Lòohwà ema imbamba ja arzu i ma gbèeyà nàa òma imba na òŋgama e Njiya ya jɔ̀kɛ̀. Nà lòkɛ̀ hweyà hwe arzɛ ema hwe tɛmi ehve-ehve lì hvòmɛ̀nɛ̀ e mbenda ya ama Mòrzè na mamɛ ema hwà-òhwèlì hwa hwèlìŋgɛ̀ hwà mà tìle. 15Nà òhvi lìhvìtà na Lohwɛ̀ nyayi hvɔ̀kɔ hvɛ mɛnɛ na òma hwanù hwatò wɔhvɛ hwa òhvi. Nà àhvìtɛ̀ nanù ema hwatò hwa arzɛ hwa ò hvùmùwà ò kpelì, e wɔ̀ ema hwa tɛmi ehve-ehve na e hwaa wòhwe. 16O èŋgànɛ̀lɛ̀ na keka ihvònda ja arzɛ nanù ema ŋmèma mò ami mò rzaŋge ò wòrzò wò ama Lohwɛ̀ na ò wòrzò wò ama e mòtò wa hwènàmà. 17O mburzà rzàyi-rzàyi ja meya ema imba na rza ɛndɛ ò Jèrurzalɛ̀mù nà mà ɛndɛ aŋga. Nà ma ɛndɛneya hwatò wa ami ŋmanà wòlì na ò lì ŋgbàà Lohwɛ̀ màhwèyà. 18Nà òma nà mà hwɛ lì òŋgama hwene hweyà ò mburza, ɔndi hwanu hwatò hwà mà nò ùŋmànɛ̀lɛ̀ ò Ndawò yà Lohwà, tɛ òma imba na kulɛ lì arzàŋgìrzɛ̀ la ami. O rzi hwɛ tɔ̀ ŋgìndì aŋga ndèŋgànɛlɛ ò rzìi hwɛ hvɛ tɔ̀ luwànjɛ. 19Ndi ò ma hwɛ lòŋgò la hwatò hwa wònyà Yudà aŋga ema hwà mà uwɛ̀lɛ̀lɛ̀yi ò erzòòkà ya Èrzìyà. Hwàŋga hwatò hvɛ hwa àŋgàmɛ̀nɛ̀yàyì lì hwɛ anu ò wòrzò wò aŋgɔ̀ e ma hwɛ tɛ ema wɔ hwa òhvi eyà lì nò teŋgɛ̀nɛ̀. 20Tɔ̀ hwanù hwatò ema hwa nò jàni anù, inyɛ wɔ̀ hwiti hwa òhwe eyà ya wòhwe ema nà mà gbeye e hvònda ema hwà mà nò kàyìrzɛ ò wòrzò wò wòlìya wò e mbòwa wò hwatò hwa wònyà Yudà. 21Lì akà tɛ ene eyà ya awɔ̀kɛ mɛnɛ ema nà mà gbeye. Nà ma kàrzɛ lìlò la ami nanù ema, ‘Inyɔ e nò kàyìrzɛ ndi ànu yàwònò èhwanja na lòkɛ̀yi nanù ema hwatò ema hwa ŋwelì hwa ò hvùmùwà hvɛ ò lòŋgɛ.’”

22È mòkànèlì Hvɛlìkrzi a hwèlì ndi mòtò ema mɔ̀ à mà màà lì rzɔ̀ŋgìtɛ̀nɛ̀ e Njiya ya jɔ̀kɛ̀. A ma aŋga mòŋgò ŋmàŋgò lì hvɛhvɛ lòni, rzìi a hwa òhweyà nanù ema, “Nà akɛlɛ ndi ene mbàkò e hvònda ema Lìrzìyàrzì ema a hwèlì e mòkànèlì hwa hwàànà njuma a ò jɛ̀ɛ̀.” 23Mɔ̀ à mà òhweyà òŋgò ŋmànelì wa njuma mòndɛnɛ ema à mà hwɛ lì ɔŋgeya Pàwolò ema a hwɛ ndi ò lì mò ɔŋgeya nanù mɛnɛ. Ndi inyɛ a ŋgbe Pàwolò ŋmanà ehvòlò, ndeŋgànɛlɛ a hwɛmɛ imbùnda ja ama Pàwolò i mò ŋgbe lìwòŋgò ema a arza.

Pàwolò a tɛmi ò wòrzò wò ama Hvɛlìkrzi na Drùrzìlà

24O mburzà ŋgùrzu ja mèenyà Hvɛlìkrzi e mòkànèlì e ma jà na e jòjìyɛ̀ wa eni Drùrzìlà. Drùrzìlà à mà hwɛ ndi mòlanà wa wònyà Yudà. Hvɛlìkrzi à mà yòhwɛ Pàwolò nanù ema a jèe, e hvònda ema à mà jèe, hwà mà hwɛ lì mò òkànèyà na òma a òhwa lì hvòmɛ̀nɛ̀ lì lòkɛ̀ ò ma Yerzù Krirztò. 25Ndi na òma Pàwolò à mà hwɛ lì òhwa lì hvòmɛ̀nɛ̀ lì tɛ̀mɛ̀ la ehve-ehve ò wòrzò wò ama Lohwɛ̀, lì alɛ̀mbɛ, na Wùùnyà wò hwèkàyìrzèlì ema wò hwɛnì lì jà. Hvɛlìkrzi à mà òka wɔ̀ŋgɔ̀. Hvɛlìkrzi rzìi a òhwa nanù ema, “Inyɛ̀ i hwɛmɛ ene mbɔrzi nanù. O tanɛyi ò ɛndɛ. Nà lu tɛ ehvòlò na ò hwɛlɛ hvɛ.” 26O èŋge hvònda mɛnɛ mɔ̀ à mà ika màhvita nanù ema Pàwolò a ò mò ŋgbà hwemita, ò lìni lìtiŋga à mà hwɛ lì mò yòhwɛ hvònda na hvònda tɛ ema a jèe, rzìi à mò òhwìrzɛ̀nɛ̀. 27O mburzà meya me hwàkɛ, Pòkìyùrzì Hvɛ̀rzìtùrzì mɔ̀ ndi à mà wòwa e mbòkò ya lìkànèyà la ama e mòkànèlì Hvɛlìkrzi. Hvɛlìkrzi à mà kìnyɛ̀lɛ̀ Pàwolò ò hwèwòwà ehwànja à mà arza lìinà la gbamù ò wòrzò wò hwatò hwa wònyà Yudà.

Currently Selected:

Hwègbèèlì 24: bri

Highlight

Copy