Hwègbèèlì 17

Pàwolò na Rzàyìlàrzì hwà mà ɛndɛ ò Tɛ̀rzàlònìkà

1Nà òma Pàwolò na mòndeŋge mò eni mò ma akeyà ò mambòwà mà ndɛnɛ ma Amhvipòlìrzi na Apòlonìyà rzi hwa kpèeyà ò mbòwa ya Tɛ̀rzàlònìkà. È ndawò ya màkànɛ̀ ya wònyà Yudà e ma hwɛ aŋga. 2Pàwolò à mà nyàmɛ̀lɛ̀ lì kpèeyà ò tenì ya ndawò ya màkànɛ̀ ya wònyà Yudà ò eŋgànɛ̀lɛ à mà kpèeyà aŋga. A ma lìya aŋga wiki iyàwò. O tenì ya tɔ̀ ima Wùnyà wò lì Arziyòlɛ mɔ̀ à mà òhweyà hwatò ŋmɛ̀ndì ema mò ma uwɛ̀lɛ̀lɛ̀yi ò tenì ya e kààtì ya ama Lohwɛ̀. 3A ma hwɛ lì hwa uŋmɛ̀lɛ̀ na lì hwa telɛlɛ hweyà ema à mà hwɛ lì hwa òhweyà, ndèŋgànɛ̀lɛ̀ à mà hwa uŋmɛ̀lɛ̀ nanù ema è Mɔ̀ ema à Ɔ̀kirzɛ̀hwɛ̀yi a hwɛnɛ lì luwa metàkà na lì hvùmùwà ò mburza e kpelì ya eni. Pàwolò à mà hwa òhweyà nanù ema, “Onò Yerzù ema imba na e òhweyà nanù, mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi.” 4Lòŋgò la awu la hwatò hwa Yuda hwà mà lòkɛ̀ rzìi hwa òŋgama Pàwolò na Rzàyìlàrzì. Nànù hvɛ mɛnɛ na ŋgindi ndɛnɛ ya hwatò hwa Grìki ema hwà mà lòkɛ̀ Lohwɛ̀. Nà rzayi-rzayi ja hwalana hwa èluhwe wɔ hvɛ hwà mà hweŋga Pàwolò na Rzàyilarzi. 5Ndi lòŋgò la hwatò hwa wònyà Yudà hwà mà nòneyà Pàwolò na Rzàyilarzi. O eŋgànɛ̀lɛ̀ rzɔ hwà mà ɛndɛ ò èlùwà ò lì rzaŋga hwatò ema hwà mà òhva hwɛ̀ɛ̀mɛ̀ hwe wòhwe. Hwà mà hwa lata ò lì gbeyà ŋgindi ya e kanjɛ-kanjɛ, eŋge ŋgindi rzìi e wòteyà ò lì kanja e mbòwa ya arzɛ, rzìi hwa ɛndɛ lì urzuweyà màandà mà ama Jèrzɔ̀nì ò lì arza Pàwolò na Rzàyìlàrzì, aŋga nanù hwa hwà wurzàneya e ŋgindi. 6Ndi na òma hwà mà arze Pàwolò na Rzàyilarzi rzìi hwa rzi hwa luwe, hwà mà kòòwà Jèrzɔ̀nì na hwahvɛhvɛ hwatò ema hwà mà lòkɛ̀ Yerzù rzìi hwa hwà jànà ò wòrzò wò hwàtimbelì hwa e mbòwa ndɛnɛ. Hwàŋga hwatò hwà mà hwɛ lì tɛ nanù ema, “Hwanu hwatò ema hwà mà gbèèyɛ̀ kàyɛ ò e èki ya arzɛ, hwàanù nàŋgɛ hwà mà jò jàneya irzɔ hvɛ lùwànje ò mbòwa ndɛnɛ ya arzu. 7Ndèŋgànɛlɛ Jèrzɔ̀nì mɔ̀ndi à hwa uti ò màandà mà eni. Wɔ̀ hwà mà unda e mbenda ya ama Kàyìrzà. Wɔ̀ hwa òhwa nanù ema, ò hwèlì ò hvɛhvɛ kiŋgɛ ema e hwɛ̀lɛ̀hwɛ̀ nanù ema Yerzù.” 8Nà òma wɔ̀ hwà mà kulɛ ò lì òhwa nanù, e ŋgindi ya arzɛ na hwàkànèlì hwa è mbowà ndɛnɛ hwà mà kànjeyà. 9Hwàtimbelì hwa e mbòwa ndɛnɛ hwà mà gbeyà Jèrzɔ̀nì na hwahvɛhvɛ hwàlòkèlì hwa mbòwa ndɛnɛ ema hwà mà lɛmbɛ ò lì tàŋga wòlì ndèŋgànà hwa e hwa hwɛmɛ, ndèŋgànɛ̀lɛ̀ hwà mà hwa hwɛmɛ.

Pàwolò na imbunda ja eni hwa lu mòtàkà ò Bèrìyà

10Nà òma wùnyà wò ma kɔ, hwàlòkèlì hwa ama Yerzù hwà mà òma Pàwolò na Rzàyìlàrzì ò lì ɛndɛ ò mbòwa ndɛnɛ ya Bèrìyà. Nà òma wɔ hwà mà uke aŋga, rzìi hwa ɛndɛ lì kpèeyà ò tenì ya e ndawò ya màkànɛ ya wònyà Yudà. 11Hwàtò hwa wònyà Yudà ema hwà mà hwɛ ò mbòwa ndɛnɛ ya Bèrìyà hwà mà hwɛnɛ nyɔ̀ŋgi ya lì òkànèyà eyà ya Lohwà lì aka hwatò hwa e mbòwa ndɛnɛ ya Tɛ̀rzàlònìkà. Wùnyà tɛ wɔ̀ hwà mà hwɛ lì làŋga e kààtì ya ama Lohwà ò lì rzɔ̀ŋgìtɛ̀nɛ̀ na lì ɛnɛ ŋga hweyà ema Pàwolò na Rzàyilarzi hwà mà hwɛ lì òhwa hwe ma hwɛ ndi e jɔ̀kɛ̀. 12O eŋgànɛ̀lɛ̀ rzɔ, rzayi-rzayi ja hwatò hwà mà lòkɛ̀. Ndeŋgana rzayi-rzayi ja hwalana hwa wònya Grìki ema hwà mà karzɛhwɛ na èluhwe, na rzayi-rzayi ja wunyanà hwa wònya Grìki wɔ hvɛ hwà mà lòkɛ̀. 13Ndi na òma hwatò hwa wònyà Yudà hwa e mbòwa ndɛnɛ ya Tɛ̀rzàlònìkà hwà mà hweye nanù ema Pàwolò a hwèlì a òhwa hvɛ eyà ya Lohwà ò mbòwa ndɛnɛ ya Bèrìyà, wɔ̀ hwà mà ɛndɛ aŋga, rzìi hwa wòteyà lì tinɛlɛ e ŋgindi ò lì jana lùwànje. 14O lìwòkimɛnɛ hwaŋga hwàlòkèlì hwà mà òma Pàwolò ò rzàawà ya ŋmànja, ndi Rzàyilarzi na Tìmòtì hwà mà lìiya ò Bèrìyà. 15Hwàtò ema hwà mà ɛndɛ ò lì lìyɛlɛ Pàwolò, hwà mà mò lìyɛlɛ natɛ̀ɛ na ò mbòwa ndɛnɛ ya Atɛ̀nrzì rzìi hwa timbana lì kòkòwɛ̀lɛ̀ ò ma Rzàyilarzi na Tìmòtì ò lì mò ùŋmànɛ̀lɛ̀ ò Atɛ̀nrzì e rzì hwɛ lì hvaŋga hvònda.

Pàwolò a òhwirzɛnɛyi hwatò hwa Atɛ̀nrzì

16Nà òma Pàwolò à mà hwɛ lì ambɛlɛlɛ Rzàyilarzi na Tìmòtì ò mbòwa ndɛnɛ ya Atɛ̀nrzì, à mà tàkìrzɛ̀hwɛ ò ŋmèma rzayi-rzayi na òma mɔ̀ à mà ɛnɛ na òma eŋge mbòwa e ma ònde nà mà hvɛhvɛ mòhwa ema hwà mà hwɛ lì kànɛlɛlɛ. 17O eŋgànɛ̀lɛ̀ rzɔ à mà ɛndɛ ò tenì ya e ndawò ya màkànɛ ya wònyà Yudà rzìi a akòhwana hwatò hwa wònyà Yudà, na e wɔ ema hwa rza enje wònyà Yudà ema hwà mà hwɛ lì kànɛ Lohwɛ̀ mendeŋga. A ma hwɛ hvɛ ò lì ɛndɛ ò ewòka ya màlòkò wùnyà tɛ ò lì kòòwàna hwatò ema hwà mà hwɛ lì jà aŋga mendeŋga. 18Hwàtò ema hwà mà hwɛ ò ehvehva ema e ma hwɛ̀lɛ̀hwɛ̀ Èpìkòlìyànì na Rzìtɔ̀yìkì, wɔ hvɛ hwà mà wòteyà ò lì taa e hvenda na mɔ̀. Lòŋgò la awu hwà mà ijòwa nanù ema, “Mamɛ hvɛ ene ema tɔ̀ ònò hvɛ ema a rza òkòwɛ a arza ò lì òhwa e?” Hwahvɛhvɛ hwatò hwà mà òhwa nanù ema, “È gbèyi ndi nàa ò a ɛnɛ ema mɔ̀ à òhwa ndi ò lì hvòmɛ̀nɛ̀ mahvɛhvɛ mòhwà ma hwàyɛ̀nì.” Wɔ̀ hwà mà òhwa ndi nanù èhwanja Pàwolò à mà hwɛ lì òhwa lì hvòmɛ̀nɛ̀ ŋmɛ̀ndì mò gbamù mò ama Yerzù na hwèhvùmùwèlì. 19O eŋgànɛ̀lɛ̀ wɔ̀ hwà mà wòwa Pàwolò rzi hwa mò ɛ̀ndɛ̀nɛ̀ ò wòrzò wò hwèlìyelì hwe mbòwa ema hwe hwɛ̀lɛ̀hwɛ̀ Àrèyòpàgùrzì, ema hwà mà òhwe nanù ema, “I tanɛyi lì hwiya mamɛ hwene hwèyòkòlèlì hwe hvènya ema ò òkòlɛ hwe hwèlì e? 20O hwèlì hweyà hwe hvènya ema ò òkòlɛ ema hwe jò kaŋga ò màtò irzɔ ja arza lì hwe rzɔ̀ŋgìtɛ̀nɛ̀ kɔ̀yi-kɔ̀yi.” 21Èhwanja i wònja ja arzɛ ja e mbòwa ndɛnɛ ya Atɛ̀nrzì na hwàyɛ̀nì hwa hwatò ema hwà mà lìya aŋga, hwà mà lìŋgàna ò lì akɛlɛ e hvònda ya awu ya arzɛ ò lì òhwa na ò lì òkànèyà màlùtèyà ma hvènya.

22Pàwolò rzi a tɛ̀mɛ̀ ò wòrzò wò wòŋgò wòlìya wò mbòwa wò Àrèyòpàgùrzì rzìi a òhwa nanù ema, “Hwàtò hwa e mbòwa ndɛnɛ ya Atɛ̀nrzì! Imba na ɛni nanù ema e kànɛ Lohwɛ̀ rzayi-rzayi. 23Nà òhwa ndi nanù ehwànja ò hweyàkèlì hwe ami ò tenì ya e mbòwa ndɛnɛ ya anyu, na ɛnɛ meyòka me anyu ema e kànɛlɛlɛ mòohwà. Nà mà ɛnɛ èki yɔ̀kɔ ema e tilì nanù ema, ‘Èki ya ama Lohwɛ̀ ema lì rza hwiyahwɛ.’ Lìŋgi lohwà ema inyɔ e kànɛlɛlɛ, tɔ̀ nɛ inyɔ e rza lì hwiyɛ, lɔ ndi imba na e òhweyà naŋgɛ. 24Lohwɛ̀, ema à mà weka e rze na hwèèmà hwe arzɛ ema hwe hwèlì ò tenì, mɔndi à hwèlì e Rzàŋgò ya lòohwà na e rze. Ndeŋgànɛ̀lɛ̀, mɔ̀ à rza lìya ò tenì ya ndawò ja hwèrzùmbu ema jò òŋgahwi na màà mà hwatò hwa hwènàmà. 25Ndeŋgànɛ̀lɛ̀ mɔ̀ à rza arzɛ nanù ema na òma i mò gbèeyà i mò ŋgbe tɔ yòma. Ndi mɔ̀ ŋmìti ndi à ŋgba tɔ̀ ima mòtò lòŋgɛ na muulu na tɔ̀ ima nyayi eyà ema ja arza. 26Mɔ̀ à mà lòma lì weka mòtò mɔ̀kɔ rzìi matumbà mà arzɛ ma e rze ya mɔ̀nyɛ̀ ma wurzeya òŋgò mòtò mɔ̀kɔ. Ndeŋgànɛlɛ mɔ̀ à mà hwa gbeyà ò lì lìya ò tenì ya e rze ya mɔ̀nyɛ̀ ya arzɛ. Ndeŋgana mɔ̀ à e hwa weka, à mà màa lì rzekeya e hvònda na hweki ema wɔ hwa ò lìya. 27Lohwɛ̀ à mà gbeyà ndi nanù, aŋga nanù hwatò hwa ò mò arza, nanù ema wɔ̀ hwa ò tanɛyi lì arza e njiya ya lì uka ò mbèeni na lì mò luwa. Tɔ̀ nɛ mɔ̀ à rza rzɔlɛnɛ na tɔ̀ mɔ̀kɔ wa arzu. 28Nà òma mòtò mɔ̀kɔ mɔ̀ à mà lòme lì òhwa nanù ema,

‘Nà òma i hwèlì mɔ̀kɔ na mɔ̀, i hwèlì lòŋgɛ,

ndèŋgànɛ̀lɛ̀ i hwèlì mamɛ ema i hwèlì.’

È gbeye hvɛ ndi nàa hwakpɛɛ hwa meyàna hwa òhwa nanù ema,

‘Irzɔhvɛ i hwèlì ndi hwàanà hwa eni.’

29Kanatɛ irzɔ i hwèlì ndi hwàanà hwa ama Lohwɛ̀, irzɔ i rza àŋgàmɛ̀nɛyi ò lì lùtèyà nanù ema Lohwɛ̀ a rza enje ndi nàa yòma ema e wèkahwì ndi na gòòlù, rzìlìhwà, tɔ̀ lìŋyàyi ema lì wòndɛhwɛyi na lìhweyà la e mòtò wa hwènàmà. 30È hvònda ema hwatò hwa rzi hwiyɛ Lohwɛ̀, Lohwɛ̀ a rzi wòwe wòhwe wò awu nàa eyà. Ndi ò naŋgɛ mɔ̀ à òhweyà tɔ̀ ima mòtò ò hweki hwe arzɛ ò lì rzɔnjɛ̀lɛ̀ wòhwe. 31Èhwanja mɔ̀ à mà rzekeya wùnyà nanù ema mɔ̀ à ò kàyìrzɛ̀ e rze ya arzɛ na hwèkàyìrzèlèlì hwe ehve-ehve. A ma hvɔ̀rzɔ̀ e mòtò ema a kàyìrzɛ mòŋgò ŋmàŋgò. Ndeŋgànɛ̀lɛ̀ mɔ̀ à mà uŋmɛ̀lɛ̀ hwatò hwa arzɛ nanù ema òŋgò mòtò a lòŋgamɛnɛyi na òma à mà mò hvùmùlɛ̀ ò kpelì.”

32È hvònda ema wɔ hwà mà hweye na òma Pàwolò a òhwa lì hvòmɛ̀nɛ̀ hwehvùmuwelì ò kpelì. Lòŋgò la awu hwà mà mò kikòwa ndi hwahvɛhvɛ hwà mà òhwa nanù ema, “Ja arza nanù ema ò jò òhweyà lì hvòmɛ̀nɛ̀ mònò ŋmɛ̀ndì hvɛ.” 33O eŋgànɛ̀lɛ̀ Pàwolò à mà anjiya ò ìtììtènì ja awu. 34Lòŋgò la hwatò hwà mà wòteyà lì òŋgama Pàwolò rzi hwa lòkɛ̀ Yerzù. O ìtììtènì ja hwaŋga hwatò ò ma hwɛ mɔ̀kɔ ema à mà hwɛ̀lɛ̀hwɛ̀ Dìyònìrzìyùrzì. A ma hwɛ mùnyanà wa wòlìya wò Àrèyòpàgùrzì. O ma hwɛ òhvɛhvɛ mòlanà aŋga ema à mà hwɛ̀lɛ̀hwɛ̀ Dàmàrìrzì, na hwahvɛhvɛ hwatò.

Currently Selected:

Hwègbèèlì 17: bri

Highlight

Copy